Arquivo de noticias do CCG

A Sección de Ciencia, Tecnoloxía, Natureza e Sociedade do Consello da Cultura Galega (CCG), co apoio da Real Academia Galega de Ciencias (RAGC) e a Universidade de Santiago de Compostela (USC) organizan este mércores na Igrexa da USC a xornada “José Rodríguez, o inicio da liña do tempo en Galicia”. Nela abordará o contexto histórico, científico e político deste persoeiro, nomeado Científico Galego do Ano pola Real Academia Galega de Ciencias (RAGC) e pioneiro da ciencia en Galicia. No evento intervirán, entre outras persoas, Francisco Díaz-Fierros Viqueira, catedrático emérito da USC e Elena Vázquez Cendón, membro do Pleno do CCG e coordinadora da Sección. Despois haberá unha visita guiada á exposición sobre o matemático dentro do mesmo espazo.

O Consello da Cultura Galega (CCG) e a Real Academia Galega de Ciencias (RAGC) acaban de sacar do prelo José Rodríguez González (1770-1824). Un matemático sublime, persoeiro nomeado Científico Galego do Ano en 2024. O volume foi presentado esta mañá na Aula Magna da Facultade de Matemáticas da Universidade de Santiago de Compostela pola presidenta do CCG, Rosario Álvarez; o reitor da USC, Antonio López; o conselleiro de Educación, Ciencia, Universidades e Formación Profesional, Román Rodríguez; o alcalde de Lalín, Xosé Crespo; a decana da Facultade de Matemáticas, Elena Vázquez Cendón; o editor, Juan José Nieto Roig; e varios dos autores da publicación. Xa está dispoñible para descarga no web do CCG.

O Consello da Cultura Galega (CCG) acolleu na mañá deste venres, 7 de xullo, o acto institucional co que celebrou o 40º aniversario da súa creación. “Renovamos o compromiso do CCG coa defensa e promoción dos valores culturais do pobo galego, dos seus dereitos á cultura, do seu dereito e obriga de arrequentar e transmitir a herdanza cultural”, expresou a presidenta, Rosario Álvarez, nun discurso en que fixo partícipes a todos os presentes. “Velaí un camiño que, por forza, temos que percorrer xuntos”, afirmou nun acto que tamén contou coa presenza de Alfonso Rueda, presidente da Xunta de Galicia e presidente de honra da institución. Rueda puxo en valor o traballo desenvolvido polo CCG durante todos estes anos e comprometeu "o apoio do Executivo autonómico a seguir impulsando a creación e o talento galegos". Pola súa parte, o presidente do Parlamento de Galicia, Miguel Ángel Santalices, apuntou que o CCG é unha “institución indispensable para o presente e para o futuro de Galicia”. Autoridades e representantes da cultura galega e da sociedade civil ateigaron a sede da institución nesta celebración.

Corría o ano 1972 cando un grupo de mozos e mozas participan no Festival das San Lucas de Mondoñedo cunha canción titulada “Fuxan os ventos”. Con ela gañaron o certame e foi tamén o nome dunha das iniciativas musicais galegas máis emblemáticas do país. A súa historia completa recóllese no libro “Fuxan os ventos. 50 anos de historia. 1972-2022” que acaban de editar o Consello da Cultura Galega (CCG) e Fuxan os Ventos. A presidenta do CCG, Rosario Álvarez; a vicepresidenta da Deputación de Lugo e concelleira de Cultura do Concello de Lugo, Maite Ferreiro; a integrante de Fuxan os ventos, Carmen Vázquez; a cantante, Uxía Senlle; e a comisaria da mostra da que parte a publicación, Sabela Fraga participaron esta mañá no Vello Cárcere de Lugo na presentación deste libro que constitúe un fito máis na formación que vén de cumprir 50 anos de vida.

A secretaria do Consello da Cultura Galega (CCG), Dolores Vilavedra, participou na presentación da programación do Día das Letras Galegas. O CCG analizará os exilios tomando como base a da figura de Florencio Delgado Gurriarán, homenaxeado nesta ocasión do Día das Letras Galegas. “Os exilios provocados polas guerras seguen a ser unha realidade que non mudou” puntualizou Vilavedra ao tempo que explicou que este estudo permitirá coñecer “un exilio que non é moi visible por non ser un destino moi numeroso, como é o exilio mexicano, pero que á luz das súas achegas foi moi rico intelectualmente”. Un espazo web, a reedición facsimilar Cancioneiro da loita galega con estudo crítico de Xesús Alonso Montero e notas de Ricardo Gurriarán, así como o tradicional Concerto das Letras Galegas a cargo do grupo Zoar centran a programación do CCG que se estenderá máis alá do 17 de maio.

O 26 de setembro é o Día Europeo das Linguas. Unha efeméride instaurada polo Consello de Europa para recoñecer a diversidade lingüística como unha ferramenta clave para lograr unha maior comprensión intercultural e un elemento clave no rico herdo cultural do noso continente. O Consello da Cultura Galega (CCG) súmase á celebración en colaboración con outras entidades. A presidenta da institución, Rosario Álvarez, asiste este venres en Nápoles (Italia) aos actos convocados polo Instituto Cervantes. Ademais, o domingo, que coincide co propio día da celebración, participará no acto institucional que terá lugar en Santiago.

Publicacións, proxeccións multimedia, concertos e un acto académico son as actividades centrais que lembrarán a figura de Xela Arias (Lugo, 1962- Vigo, 2003) ao longo de todo o ano. Así o explicaron esta mañá en Vigo Román Rodríguez, conselleiro de Cultura e Turismo; Rosario Álvarez, presidenta do Consello da Cultura Galega (CCG); Víctor Freixanes, presidente da Real Academia Galega (RAG); Xaime Arias director de proxección social da CRTVG e Darío Gil Arias, fillo da homenaxeada.

Neste 2021 xúntanse dúas celebracións importantes para Galicia e a cultura galega: a celebración dun novo Ano Santo e o 800 aniversario do nacemento de Afonso X, unha das figuras máis relevantes da cultura europea. Dúas efemérides sobre as que se asenta o último proxecto expositivo do Consello da Cultura Galega (CCG) “Afonso X e Galicia”. A mostra, que abre hoxe as súas portas na Igrexa da Universidade en Santiago, convida a coñecer a enorme influencia da figura de Afonso X cunha peregrinaxe a través de documentos, testemuños arqueolóxicos, literarios e musicais que amosan o legado afonsino en paralelo ao esplendor da cultura galega na etapa medieval. A mostra foi inaugurada pola presidenta do CCG, Rosario Álvarez; o presidente da Xunta de Galicia e presidente de honra desta institución, Alberto Núñez Feijoo; o conselleiro de Cultura e Turismo, Román Rodríguez; o presidente da Deputación de Ourense, José Manuel Baltar e o reitor da USC, Antonio López. O músico, musicólogo e medievalista Antoni Rossell é o comisario desta mostra que estará aberta ata o 24 de abril.

Nomes coma os de Ramón Otero Pedrayo, Francisco Fernández del Riego, Celso Emilio Ferreiro, Torrente Ballester, Isaac Díaz Pardo, Xosé Neira Vilas, Lino Novás ou Uxío Novoneyra figuran nos arquivos da ampla correspondencia que Camilo José Cela mantivo con intelectuais de Galicia. É parte do epistolario persoal do Premio Nobel, gardada na Fundación Camilo José Cela, que o Consello da Cultura Galega dixitalizará e difundirá en virtude dun convenio asinado hoxe en Iria Flavia.

Incrementar o orzamento público en cultura da Xunta de Galicia, coordinar e integrar máis as políticas culturais das diferentes administracións, mellorar a presenza da cultura galega no exterior e asumir os retos da dixitalización son algunhas das propostas que realiza o Consello da Cultura Galega para as futuras políticas públicas da cultura en Galicia. Así o manifestou o presidente do Consello da Cultura Galega, Ramón Villares, durante a entrega do documento Diagnose da cultura galega. Datos para unha estratexia cultural no século XXI ao conselleiro de Cultura da Xunta de Galicia, Román Rodríguez.

O presidente do Consello da Cultura Galega (CCG), Ramón Villares; o vicepresidente, Alfonso Rueda; e mais o conselleiro de Cultura, Educación e Ordenación Universitaria, Román Rodríguez, asinaron este serán un acordo de colaboración para a elaboración do informe “A muller na cultura galega: condicións sociolaborais no ámbito cultural con perspectiva de xénero”. Un documento que pretende servir para coñecer cal é a situación da muller no sector cultural e que permitirá ao goberno galego implementar as accións políticas que sexan necesarias.

O presidente do Consello da Cultura Galega (CCG), Ramón Villares, e o conselleiro de Cultura, Educación e Ordenación Universitaria, Román Rodríguez, asinaron esta mañá un acordo de colaboración para o financiamento da elaboración de materiais de diagnóstico sobre a situación da cultura galega. “É un acordo interinstitucional que nos permitirá facer unha diagnose que que o goberno elabore unha estratexia específica para a cultura galega” afirmou Ramón Villares, mentres que o conselleiro, Román Rodríguez, destacou a relevancia desta iniciativa “que se fai cunha perspectiva xeral e temporal para a cultura galega”. No acto estaba presente Anxo Lorenzo, secretario xeral de Cultura e Marcelino Fernández, xerente do CCG.

As cancións dos poetas mindonienses protagonizan a quinta edición de “No bico un cantar”, un programa que ten un marcado carácter didáctico e cultural e xunta música, poesía e mocidade. O concerto foi presentado este luns 13 de marzo no Consello da Cultura Galega polo seu presidente, Ramón Villares, Román Rodríguez, conselleiro de Cultura, Educación e Ordenación Universitaria, Elena Candia, alcaldesa de Mondoñedo e Maximino Zumalave, director artístico do concerto.

Foi o peche dos actos académicos previstos para o Día das Letras Galegas e a antesala do Ano das Irmandades da Fala. O teatro Rosalía de Castro vibrou co Concerto das Letras Galegas do Consello da Cultura Galega (CCG), no que Milladoiro fixo unha aposta moi especial e no que houbo danza e soaron os poemas de Manuel María. Era un rexistro novo para un concerto que cumpre seis edicións e que pretende celebrar dun xeito festivo o 17 de maio. Asistiron o presidente do CCG, Ramón Villares; a viúva de Manuel María, Saleta Goi; o alcalde da Coruña, Xulio Ferreiro, e outras autoridades coma o conselleiro de Cultura, Román Rodríguez, o secretario xeral de Política Lingüística, Valentín García; a conselleira de Infraestruturas e Vivenda, Ethel Vázquez, ou o presidente do Tribunal Superior de Xustiza, Miguel Ángel Cárdenas, nun teatro que tiña a cabida completa.

As cancións dos xograres e trobadores medievais protagonizan a cuarta edición de “No bico un cantar”, un programa que ten un carácter didáctico e cultural e xunta música, poesía e mocidade. O concerto foi presentado esta mañá na biblioteca do Consello da Cultura Galega (CCG) polo seu presidente, Ramón Villares, quen destacou o seu papel de difusión cultural ao lembrar que “o que se aprende cantando, non se esquece máis". Canda el estaban Román Rodríguez, conselleiro de Cultura, Educación e Ordenación Universitaria; Anxo Lorenzo, secretario xeral de Cultura; Héitor Mera, concelleiro de Cultura de Cangas; Rosario Álvarez, vicepresidenta do CCG, e Maximino Zumalave, director artístico do concerto. A cita xuntará en Cangas, o vindeiro 3 de xuño, un gran coro de nenos e nenas chegados dos conservatorios de música profesional de Galicia para cantar a lírica medieval. A cita suporá a estrea da versión musicada do poema “Pois nosas madres van a San Simón” de Pero Viviaez a cargo do compositor Rogelio Groba.

Tres seminarios, dúas exposicións e un proxecto web. Este ó conxunto de actividades coas que o Consello da Cultura Galega participa na programación que celebra o centenario das irmandades da Fala dado a coñecer esta mañá no Museo do Pobo Galego. Ramón Villares, presidente do CCG, detallou a as actividades da institución ao tempo que anunciou que se trata dunha conmemoración “precisa, necesaria e obrigada”. O acto estivo presidido polo Conselleiro de Cultura, Román Rodríguez, e asistiu o presidente da Real Academia Galega, Xesús Alonso Montero, o presidente do Padroado do Museo do Pobo, Xusto Beramendi, e os representantes doutras entidades.

O presidente do Consello da Cultura Galega, Ramón Villares, recibiu esta mañá de mans do conselleiro de Cultura, Educación e Ordenación Universitaria, Román Rodríguez, o Documento estrutural básico do Plan de dinamización da lingua galega no tecido económico 2015-2020. O Consello da Cultura Galega (CCG) e a Real Academia Galega (RAG) son as dúas primeiras entidades en recibir este documento que contén a proposta inicial de traballo. O encontro tivo lugar na Sala Eisenman da Cidade da Cultura no que tamén participaron Xesús Alonso Montero e Henrique Monteagudo, presidente e secretario da RAG, respectivamente, e Valentín García, secretario xeral de Política Lingüística.

O Consello da Cultura Galega realizou no serán deste xoves unha sesión plenaria na que aprobou a organización dunha grande homenaxe ás Irmandades da Fala con motivo do centenario da súa constitución, que terá lugar en 2016. Isto concrétase na celebración de tres seminarios e unha exposición, que supoñen unha revisión dos presupostos ideolóxicos e a contextualización deste movemento. Na sesión deuse a coñecer o redeseño da plataforma web culturagalega, que estreará dominio .gal, e a incorporación ao máximo órgano de decisión do CCG do conselleiro de Cultura, Educación e Ordenación Universitaria, Román Rodríguez, como membro nato.

O presidente do Consello da Cultura Galega (CCG), Ramón Villares, xunto cos demais membros da Comisión Executiva, recibiron esta tarde a Román Rodríguez, conselleiro de Cultura, Educación e Ordenación Universitaria. Trátase da primeira visita institucional do conselleiro desde que o pasado 10 de febreiro tomou posesión do seu cargo. Na xuntanza deron conta das actividades recentes da entidade así como da liña de traballo conxunta de cara a promoción exterior da lingua e a cultura galega.

Román Rodríguez, conselleiro de Cultura, Educación e Ordenación Universitaria realizará unha visita institucional ao Consello da Cultura Galega o vindeiro martes 3 de marzo. Trátase da primeira visita que realiza á institución desde que o pasado 10 de febreiro tomou posesión do seu cargo. O conselleiro de Cultura é membro nato do Plenario do CCG, tal e como figura na lei de creación da institución. Rodríguez será recibido polo presidente do Consello da Cultura Galega, Ramón Villares, así como polos demais membros da Comisión Executiva, composta por Francisco Díaz-Fierros, Rosario Álvarez, Xosé López e Maximino Zumalave.