Arquivo de noticias do CCG

A presentación do informe A SITUACIÓN SOCIOCULTURAL DOS CONCELLOS GALEGOS DE MENOS DE 50.000 HABITANTES. II MAPA CULTURAL DE GALICIA, publicado polo Consello da Cultura Galega (CCG), serviu para chamar a atención sobre a necesidade de adecuar mellor recursos e obxectivos en tempos de crise. Tamén para insistir no feito de que as políticas culturais non deben ser vistas como gasto senón como investimento. Nesa liña coincidiron o Presidente do CCG, Ramón Villares, o director do informe, Xesús A.. Lage Picos, e o Presidente da Federación Galega de Municipios e Provincias (FEGAMP), Carlos Fernández. O informe constata o feito de que nos inicios do 2009 “a cultura amósase amplamente arraigada na xeografía galega como un servizo máis do Estado do Benestar” e daquela o grao de institucionalización das políticas culturais ten acadado o seu cénit.

"O lector habitual de prensa reclama unha maior presenza do galego nos xornais". Esta é unha das principais conclusión do avance de datos do estudo "A lingua galega nos medios de comunicación", presentado esta mañá no Consello da Cultura Galega (CCG). A investigación, levada a cabo pola Sección de Lingua do CCG, parte dunha enquisa realizada a 1.200 persoas sobre o consumo de medios en Galicia e sobre as opinións e percepción que teñen sobre a presenza do galego nos diferentes soportes.

Os IV Encontros Cultura e Concellos, que organiza o Consello da Cultura Galega (CCG), comezaron esta mañá destacando a necesidade de que os concellos aproveiten as novas tecnoloxías da información e a comunicación para reactivar a cultura. Estas xornadas reúnen hoxe e mañá a expertos e representantes de máis de corenta concellos galegos para afondar na relación entre novas tecnoloxías e cultura.

Os "IV Encontros Cultura e Concellos" reunirán o vindeiro venres e sábado, días 18 e 19 de xuño, a preto dun centenar de axentes culturais de concellos e de expertos en diferentes ámbitos para afondar na relación entre a cultura e as novas tecnoloxías. O coordinador do encontro e director do Observatorio da Cultura Galega, Xan Bouzada, salientou a importancia destas xornadas debido "ao papel das novas tecnoloxías como ferramentas para conseguir a participación e o desenvolvemento cultural nos concellos".

O Consello da Cultura Galega (CCG) presentará mañá mércores, día 16, ás 12´30 horas, os IV Encontros "Cultura e Concellos" que, nesta edición analizarán a relación entre Cultura e Novas Tecnoloxías.

O segundo volume do Informe de Política Lingüística e Normalización en Galicia (IPLN), elaborado pola Sección de Lingua do Consello da Cultura Galega, reclama "obxectivos normalizadores máis ambiciosos" por parte da Administración e presenta propostas de mellora para avanzar cualitativamente partindo do feito de que "hoxe a lingua galega está presente en tódolos centros de ensino".

O Consello da Cultura Galega acollerá mañá, a partir das 12 h, a presentación do primeiro volume de "O proceso de normalización do idioma galego: 1980-2000", unha obra impulsada pola Sección de Lingua do CCG. Este acto, que contará coa presencia dos coordinadores do volume, Henrique Monteagudo e Xan Bouzada e o presidente do CCG, Alfonso Zulueta, supón facer público o primeiro froito dun traballo que ocupou á Sección de Lingua durante catro anos (1998-2002), tempo no que se elaborou un completo informe que se compón en total de catro volumes, o primeiro dos cales é o que se presenta mañá.

O Consello da Cultura Galega acollerá mañá, a partir das 12 h, a presentación do primeiro volume de "O proceso de normalización do idioma galego: 1980-2000", unha obra impulsada pola Sección de Lingua do CCG. Este acto, que contará coa presencia dos coordinadores do volume, Henrique Monteagudo e Xan Bouzada, supón facer público o primeiro froito dun traballo que ocupou á Sección de Lingua durante catro anos (1998-2002), tempo no que se elaborou un completo informe que se compón en total de catro volumes, o primeiro dos cales é o que se presenta mañá.

O número 217, correspondente a xuño de 2002, da revista literaria Quimera, acolle o monográfico CARLOS CASARES: MEMORIA Y HOMENAJE. Ó longo de 36 páxinas esta revista editada en Barcelona recolle os artigos de doces escritores, especialistas e estudiosos, que percorren as diferentes significacións (literaria, cultural e de editor) dunha figura senlleira da literatura e da cultura galega.

As distintas relacións que se poden establecer entre a acción cultural e a participación centran este ano a nova edición dos Encontros Cultura e Concellos que, por terceiro ano, organiza o Consello da Cultura Galega en colaboración coa Federación Galega de Municipios e Provincias (FEGAMP).

No marco do Ano Europeo das Linguas, Andorra acolleu o 2º Congreso Europeo sobre Planificación Lingüística, unhas xornadas que se viñeron desenvolvendo durante os días 14, 15 e ata a xornada do 16, xornada que se pechou coa participación dos coordinadores do Informe de Política Lingüística e Normalización (IPLN) en Galicia, Henrique Monteagudo e Xan Bouzada, e da coordinadora do Arquivo de Planificación e Normalización Lingüística, Susana Mayo, entre outros asistentes.

Os V Encontros para a Normalización Lingüística inauguráronse hoxe co relatorio de Henrique Monteagudo, co-director, con Xan Bouzada, do Informe de Política Lingüística e Normalización. Este proxecto, que comezou a finais de 1998 subvencionado pola Comisión Europea, é un estudio analítico da situación da lingua no ámbito da política, a administracións públicas e o ensino. Ademais, tamén se analiza o campo da planificación e difusión da lingua e oa área empresarial e comercial.