Arquivo de noticias do CCG

O pianista e doutor Alejo Amoedo, membro do Plenario do Consello da Cultura Galega (CCG), vogal da Comisión Executiva da institución e director do Arquivo Sonoro de Galicia (ASG), acaba de ser nomeado académico de número da Sección de Música da Real Academia Galega de Belas Artes. Foi proposto polos académicos numerarios Juan Durán Alonso, Felipe-Senén López Gómez, José Ramón Soraluce Blond, Xurxo Lobato e Xosé Manuel Casabella López. A súa elección produciuse na sesión desenvolvida o día 28 de outubro de 2023 na Sala do Padroado do Centro Galego de Arte Contemporánea (CGAC) de Santiago.

Paco Pestana atopou na escultura e na poesía as súas canles fundamentais de expresión. Creador multidisciplinar, a súa obra e traxectoria consolidárono como unha figura referencial para entender o desenvolvemento da escultura en Galicia nas últimas décadas do século XX. Cando se fan dous anos da súa morte, a Sección de Creación e Artes Visuais Contemporáneas do Consello da Cultura Galega (CCG) dedícalle mañá, 23 de outubro (16:00 horas), unha nova xornada do ciclo Revisando a nosa arte. A sesión, coordinada por Rosario Sarmiento e Lucila Yáñez, desenvolverase de xeito presencial no Vello Cárcere de Lugo. A cita non se poderá seguir en directo, pero será gravada e subida posteriormente á hemeroteca do CCG.

A historia de Teima durou apenas un ano, o que vai de novembro de 1976 a agosto de 1977, pero marcou un fito na historia das publicacións galegas. Foi a primeira revista xornalística que se editou integramente en galego e en Galicia. Nela colaboraron e traballaron Víctor Fernández Freixanes, Manuel Rivas, Xavier Navaza, Pepe Carreiro, Xaquín Marín, Xurxo Lobato e moitos outros nomes hoxe destacados da cultura e da comunicación do país. O Consello da Cultura Galega (CCG) pon na rede o seu arquivo completo neste 3 de maio, Día da Liberdade de Prensa.

O 10 de marzo de 1972, a policía franquista segaba en Ferrol a vida de dous traballadores do estaleiro Bazán, Amador Rey e Daniel Niebla, no decurso dunha manifestación sindical, na que houbo ademais varias ducias de feridos. A protesa saldouse cun cento de detidos, 54 multados e numerosos despedimentos. Aqueles feitos conmemóranse cada 10 de marzo no Día da Clase Obreira Galega. Cincuenta anos despois, o Consello da Cultura Galega analiza o contexto histórico e o que supuxo a nivel cultural cunha xornada titulada “Ferrol, 10 de marzo de 1972: medio século despois”. A sesión é presencial pero pode seguirse a través das redes da institución.

O humano e o artístico mesturáronse esta tarde no Consello da Cultura Galega (CCG) para recuperar a figura dun dos creadores máis destacados da arte abstracta da segunda metade do século XX: Leopoldo Nóvoa. O galerista, Adolfo Sobrino, e o arquitecto, Celestino García Braña, mantiveron unha conversa na que destacaron, entre outras cousas, o papel fundamental que desempeñou na súa traxectoria a casa da Armenteira. A secretaria da institución, Dolores Vilavedra, fixo fincapé na necesidade de “evocar a memoria desta figura dentro das artes plásticas” e anunciou a continuidade desta xornada nunha mesa redonda que o CCG celebrará o vindeiro 18 de marzo no Museo de Pontevedra sobre a faceta artística de Leopoldo Nóvoa.

Espazo, materia e luz son tres elementos centrais da obra de Leopoldo Nóvoa (Salcedo, Pontevedra, 1919-París, 2012), unha figura que centra mañá unha nova edición do ciclo do Consello da Cultura Galega (CCG) “En modo conversa”. A cita é unha proposta da Sección de Creación e Artes Visuais Contemporáneas que pretende afondar nun dos grandes referentes da arte abstracta da segunda metade do século XX, cando se acaban de cumprir cen anos do seu nacemento. A xornada poderá seguirse en directo a través do web da institución.

Son mulleres anónimas, que non deixaron ningunha pegada nos rexistros oficiais e que sustentaron as súas familias cos materiais que transportaban na súa cabeza. Sobre elas fala “As mulleres co mundo na cabeza”, documental dirixido por Encarna Otero elaborado co material de documentación rexistrado por unha das áreas de traballo do Centro de Documentación de Igualdade e Feminismos (CDIF) do Consello da Cultura Galega (CCG). A presidenta da institución, Rosario Álvarez, o fotoxornalista Xurxo Lobato e Encarna Otero presentan mañá este traballo na Real Academia de Belas Artes Nosa Señora do Rosario ás 20:00 horas. Ao rematar haberá unha actuación musical de Bea a de Estrella.

A Sección de Comunicación do Consello da Cultura Galega (CCG) presentou esta mañá o Informe A Comunicación en Galicia 2004, unha publicación bianual que analiza a situación dos medios en Galicia e as tendencias que se perfilan no hipersector da comunicación.

Galicia e Irlanda como países de emigración e de industrialización tardía e as súas relacións culturais centraron a segunda xornada do Congreso internacional "Galicia-Irlanda: dúas Fisterras Europeas", que se celebra desde o mércores, día 21, no Consello da Cultura Galega (CCG). Entre a análise de similitudes e diverxencias, o profesor Fernando González Laxe foi o encargado de tocar un tema no que as relacións entre Irlanda e Galicia están na actualidade enfrontadas: a pesca. Laxe reclamou a igualdade de acceso aos caladoiros e control das cotas fronte aos irlandeses e a non imposicións de restriccións, sinalando que se a Unión Europea non resposta á necesidade de acordos, haberá que apostar por acordos privados ou das institucións galegas para conseguir que a flota desenvolva a súa capacidade. "Galicia non pode estar maniatada por postulados arcaicos", sinala, dada a importancia económica e social da pesca en Galicia.

O salón de plenos da Deputación de Pontevedra acolle desde esta mañá as "Xornadas Fotodixitais" que se desenvolven hoxe, en sesións de mañá e tarde, e mañá, venres, en sesión só de tarde.O presidente do Consello da Cultura Galega, Alfonso Zulueta, e o presidente da Deputación de Pontevedra, Manuel Abeledo, foron os encargados de abrir estes encontros, organizados polo CCG en colaboración coa Deputación.

Os camiños abertos no fotoxornalismo polo emprego das tecnoloxías dixitais, cos veloces cambios que neste traballo trouxo consigo a aplicacións destas novas técnicas, e as cuestións éticas derivadas da súa aplicación, serán obxecto de análise e debate nas "Xornadas Fotodixitais" que o Consello da Cultura Galega, a través da Sección de Comunicación, organiza en Pontevedra o xoves e o venres, 27 e 28 de febreiro.

O Consello da Cultura Galega, co patrocinio da Deputación de Pontevedra, organizan os vindeiros días 27 e 28 deste mes unhas Xornadas Fotodixitais centradas en torno á introducción da tecnoloxía dixital na práctica fotográfica do xornalismo.

O Consello da Cultura Galega comeza mañá o programa de actos en homenaxe ó Padre Sarmiento, ó que este ano se lle dedica o Día das Letras Galegas. Con tal motivo, o CCG ten previsto inaugurar unha exposición sobre a vida e obra do ilustre padre benedictino baixo o título de "O Padre Sarmiento e a Galicia do seu tempo", nome baixo o que se recollen dúas exposicións que foron elaboradas en 1995 con motivo da celebración do terceiro centenario do nacemento do pai Sarmiento (Vilafranca do Bierzo, 1695).

O Consello da Cultura Galega comeza mañá o programa de actos en homenaxe ó Padre Sarmiento, ó que este ano se lle dedica o Día das Letras Galegas. Con tal motivo, o CCG ten previsto inaugurar unha exposición sobre a vida e obra do ilustre padre benedictino baixo o título de O Padre Sarmiento e a Galicia do seu tempo, nome baixo o que se recollen dúas exposicións que foron elaboradas en 1995 con motivo da celebración do terceiro centenario do nacemento do pai Sarmiento (Villafranca del Bierzo, 1695).