Arquivo de noticias do CCG

As cancións de poetas mindonienses como Álvaro Cunqueiro, Aquilino Iglesias Alvariño ou Manuel Leiras Pulpeiro protagonizan a quinta edición de “No bico un cantar”, un concerto de carácter didáctico e cultural que xunta música, poesía e mocidade. A cita contará coa presenza de Rosario Álvarez, vicepresidenta do Consello da Cultura Galega, Anxo Lorenzo, secretario xeral de Cultura, e Elena Candia, alcaldesa de Mondoñedo. A cita xuntará na praza da Catedral, ás 17:30 horas, un gran coro de cincocentos nenos e nenas chegados dos conservatorios profesionais e das escolas de música de toda Galicia, dirixidos por Maximino Zumalave. Nel estrearase a versión musical dos poemas “Neniae” e “¡Non o sei!” a cargo do compositor compostelán Nico Casal.

Un novo encontro monográfico sobre patrimonio cultural coordinado por Carlos Nárdiz abordará o estado e a necesaria protección das vías romanas en Galicia. Organizado pola Sección de Patrimonio e Bens Culturais do Consello da Cultura Galega, o encontro terá lugar mañá, martes 23 de maio a partir das 16:15 horas baixo o título “O estado actual das vías romanas en Galicia e a necesidade dunha maior protección” e contará coa presenza dos expertos Carlos Nárdiz, Fermín Pérez Losada, César Parcero Oubiña, Santiago Ferrer e Manuel Chaín

Ramón Villares, presidente do Consello da Cultura Galega, recibiu hoxe a visita institucional do brasileiro Paulo Speller, Secretario xeral da Organización de Estados Iberoamericanos para la Educación, la Ciencia y la Cultura (OEI). No encontro abordaron as relacións culturais en materia exterior e a colaboración do Consello da Cultura Galega coa OIE na posible organización de actividades conxuntas.

As institucións da memoria (bibliotecas, arquivos e museos) deben “adaptarse aos retos e aproveitar as oportunidades” que ofrece o paradigma dixital no que conviven, especialmente a “colaboración aberta” cos cidadáns, que pode contribuir a mellorar a relación entre institucións e cidadanía. Así o aseguran os coordinadores no documento de conclusións do encontro “O patrimonio común? Colaboración aberta e institucións da memoria” , que hoxe rematou no Consello da Cultura Galega.

O Consello da Cultura Galega organiza, a través da Sección de Patrimonio e Bens Culturais, as xornadas “O patrimonio compartido? Colaboración aberta e institucións da memoria”, que se celebrarán o mércores 10 e o xoves 11 de maio no Consello da Cultura Galega en Santiago de Compostela. As xornadas inauguráronse hoxe mércores 10 de maio ás 10 horas, por Rosario Álvarez, vicepresidenta do Consello da Cultura Galega.

O Consello da Cultura Galega presentou a edición conmemorativa do Día das Letras Galegas 2017 da obra teatral infantil As laranxas máis laranxas de todas as laranxas, escrita por Carlos Casares. Villares, que estivo acompañado de Christian Casares, fillo do autor, e de Montse Pena, autora do estudo introdutorio. Villares tamén presentou outras accións conmemorativas do autor, coma o Concerto das Letras que se celebrará en Ourense (16 de maio) e Compostela (18 de maio).

O duodécimo encontro monográfico sobre patrimonio cultural que vén organizando a Sección de Patrimonio e Bens Culturais do Consello da Cultura Galega analizará este xoves “O Castelo da Rocha Forte: entre o presente e o futuro dun xacemento arqueolóxico”. Na xornada participarán arqueólogos, veciños da Asociación Cultural Rocha Forte e representantes municipais para coñecer o labor da asociación, analizar os resultados das últimas intervencións e debater sobre a súa xestión patrimonial.

A Sección de Música e Artes Escénicas do Consello da Cultura Galega organiza a xornada “A encrucillada na danza na actualidade” que terá lugar mañá, mércores 26 de abril. O encontro consistirá nun seminario pola mañá de Antonio Najarro, director do Ballet Nacional de España e nunha mesa redonda pola tarde coa presenza de Mercedes Suárez, Cosme Marina e María José Alemany, que analizarán a danza dende o punto de vista artístico, académico e da xestión. Con esta xornada o Consello da Cultura Galega súmase aos actos de conmemoración do Día Mundial da Danza que se celebra o próximo sábado.

O Consello da Cultura Galega, a Fundación Carlos Casares e o Concello de Ourense presentaron na mañá do venres o tradicional Concerto das Letras Galegas, unha cita anual que pretende dotar de música as celebracións do 17 de maio. O estreito vínculo do autor homenaxeado este ano, Carlos Casares, coa cidade auriense determinou a escolla do lugar de celebración dun evento que dende hai sete anos, percorre a xeografía galega para dar protagonismo á literatura e á música galega. A cita será no Auditorio de Ourense o vindeiro día 16 de maio ás 20:30 horas.

O Protocolo para a garantía dos Dereitos Lingüísticos. Exemplo de empoderamento da sociedade civil é o título da conferencia coa que Paul Bilbao, secretario xeral de Kontseilua, abriu os XIX Encontros para a Normalización Lingüística, organizados anualmente polo Consello da Cultura Galega. O experto vasco relatou o traballo realizado durante ano e medio por un cento de entidades de toda Europa para elaborar un protocolo con 185 medidas que se deben adoptar para garantir os dereitos lingüísticos recollidos na Declaración de Barcelona de 1996. Este documento, asinado en Donostia en decembro de 2016, subliñou, evidencia o empoderamento da sociedade civil que o fixo posible.

A praza da Catedral de Mondoñedo será o escenario da quinta edición de “No bico un cantar”, unha iniciativa que ten un marcado carácter didáctico e cultural organizada polo Consello da Cultura Galega e a Consellería de Cultura, Educación e Ordenación Universitaria da Xunta de Galicia. O concerto foi presentado hoxe na Casa do Concello mindoniense polo presidente do Consello da Cultura Galega Ramón Villares; Anxo Lorenzo, secretario xeral de Cultura da Consellería de Cultura, Educación e Ordenación Universitaria; Maximino Zumalave, director artístico do concerto e Elena Candia, alcaldesa anfitrioa. A cita xuntará en Mondoñedo o vindeiro 2 de xuño ás 17:30 horas un gran coro de medio milleiro de nenas e nenos chegados dos conservatorios profesionais de música de Galicia para cantar a Álvaro Cunqueiro, A. Noriega Varela, Manuel Leiras Pulpeiro, Aquilino Iglesia Alvariño e Xosé Díaz Jácome.

O Protocolo para a garantía dos Dereitos Lingüísticos. Exemplo de empoderamento da sociedade civil é o título da conferencia coa que Paul Bilbao, secretario xeral de Kontseilua, abrirá mañá, a partir das 16:00 horas, os XIX Encontros para a Normalización Lingüística, organizados anualmente polo Consello da Cultura Galega. Durante dous días, expertos de ámbitos tan diversos como o ensino, a sanidade, a creación ou a administración reflexionarán sobre a situación dos dereitos lingüísticos nos seus campos de traballo. Nos Encontros poderase visitar Artesa 2017, unha mostra de iniciativas normalizadoras.

A vía máis eficaz para incrementar o uso da lingua galega entre a mocidade galega é a creación dun espazo de “solidariedade co galego”, movidos pola "afectividade e a emotividade”, por riba das vías máis institucionais coma o ensino e os medios de comunicación. Así o pon de manifesto o informe “Prácticas e actitudes lingüísticas da mocidade en Galicia”, elaborado polo CCG e aprobado polo Plenario do Consello da Cultura Galega o 6 de abril de 2017.

O fuso horario e a pertinencia ou non do seu cambio é o obxectivo da publicación electrónica “É o noso fuso horario un problema?”, presentada hoxe por Francisco Díaz-Fierros Viqueira, coordinador da Sección de Ciencia, Natureza e Sociedade, e o coordinador da publicación, o catedrático de Electromagnetismo da USC Jorge Mira.

As cancións dos poetas mindonienses protagonizan a quinta edición de “No bico un cantar”, un programa que ten un marcado carácter didáctico e cultural e xunta música, poesía e mocidade. O concerto foi presentado este luns 13 de marzo no Consello da Cultura Galega polo seu presidente, Ramón Villares, Román Rodríguez, conselleiro de Cultura, Educación e Ordenación Universitaria, Elena Candia, alcaldesa de Mondoñedo e Maximino Zumalave, director artístico do concerto.

Mañá, xoves 9 de marzo, terá lugar ás 17:00 horas no Consello da Cultura Galega a conferencia Intersectional meanings of culture a cargo de Nira Yuval-Davis, directora do Research Centre on Migration, Refugees and Belonging (CMRB) na University of East London. Trátase da sexta sesión do ciclo Europa Fortaleza, coordinado por Ramón Máiz, centrado nos retos dos fluxos migratorios, e na resposta institucional e política da Unión Europea.

Ramón Villares, presidente do Consello da Cultura Galega, foi investido doutor honoris causa pola Universidade de Rennes 2, na Bretaña Francesa, esta mañá do martes 7 de marzo. Durante o acto solemne, Villares pronunciou a conferencia "A Bretaña na cultura galega: similaridades e conexións", que foi respondida pola profesora Christine Rivalan Guégo, profesora de lingua e literatura española contemporáneas.

A colección dixitalizada de publicacións periódicas feministas A Saia, xestionada pola Comisión de Igualdade do Consello da Cultura Galega e ADHUC Teoria, Gènere, Sexualitat da Universitat de Barcelona incorpora a publicación A muller e a loita, editada na clandestinidade en Vigo polo Movimiento Democrático de Mujeres de Vigo entre 1971 e 1976.

Rosario Álvarez, vicepresidenta do Consello da Cultura Galega, presentou hoxe, en compañía de Francisco Dubert, secretario do Instituto da Lingua Galega, e Xavier Varela, coeditor do volume, o libro A lingua galega no solpor medieval, que aborda os procesos de transformación da lingua galega e o seu abandono como lingua escrita formal entre os séculos XV e XVI.

O Castro de Baroña é un dos xacementos máis visitados de Galicia, no que se xuntan interesantes aspectos patrimoniais, a súa temperá posta en valor e a súa localización, o que lle confire un importante valor paisaxístico. <>. Así o considera Luis F. López González, do equipo arqueolóxico de Terra Arqueos, responsable das últimas intervencións no castro e participante no encontro que terá lugar mañá xoves no Consello da Cultura Galega.