Arquivo de noticias do CCG

O Consello da Cultura Galega (CCG) acolle estes días As XVI Jornades d’Intercanvi Cultural, organizadas organizadas pola Societat Verdaguer, a Societat Catalana de Llengua i Literatura e a Càtedra Verdaguer d’Estudis Literaris da Universitat de Vic – Universitat Central de Catalunya. Conferencias, mesas de debate, encontros arredor da tradución literaria galego-catalá e catalán-galego xunto con visitas a espazos emblemáticos da cultura galega enmarcan un programa de catro días que conta coa colaboración de diferentes entidades galegas.

O Consello da Cultura Galega (CCG) acolleu esta mañá a presentación das XVIII Xornadas do Peregrino “Abrindo Camiño”, que poñen o foco na figura de Andrea López Chao (Mondoñedo, 1874 - A Habana, 1954), destacada mestra do galeguismo na emigración. Rosario Álvarez, presidenta do CCG, subliñou que “Andrea foi muller, docente, emigrante, militou no asociacionismo, feminista... constantes que nos convocan constantemente”. Pola súa parte, Isabel Martínez, subdirectora xeral de Relacións coas Comunidades Galegas da Xunta, puxo o énfase en que foi “un referente e unha pioneira no compromiso social coas mulleres”. Tamén interviñeron Alberto García, concelleiro de Cultura de Mondoñedo, e Luís Fernández Ansedes, membro da asociación Abrindo Camiño, quen destacaron a importancia das actividades que se desenvolverán o vindeiro día 15 en Mondoñedo. Ademais da presentación do documental sobre a súa figura, da man dos seus directores Violeta Ramos e Daniel Vázquez, estivo presente a bisneta da homenaxeada, Patricia Ares.

“Foi un home dotado dun excepcional talento empresarial e comercial que puxo ao servizo da prosperidade de Galicia” asegura o historiador Xosé Luís Pastoriza sobre Fidel Isla Couto (Cambados, 1902-Vigo, 1989). O empresario incorpórase hoxe ao Álbum de Galicia, colección dixital de biografías do Consello da Cultura Galega (CCG).

“Xustiza social e cultura de paz” é o título da nova entrega de Proxector, iniciativa de divulgación en lingua galega promovida polo Centro de Documentación Sociolingüística de Galicia (CDSG) do Consello da Cultura Galega (CCG) co apoio da Universidade de Santiago de Compostela (USC). Nesta ocasión, selecciona unha ducia de vídeos para conmemorar o Día Internacional da Paz, que a Asemblea Xeral das Nacións Unidas (ONU) celebra cada 21 de setembro.

Os veciños e as veciñas de Veigas de Camba abandonaron en 1974 a aldea que, pouco despois, quedou asolagada baixo as augas do encoro das Portas. A memoria daquel acontecemento regresou na tarde deste domingo 7 de setembro á casa da Viúva na Gudiña da man dos antigos veciños e veciñas así como de diferentes especialistas. Foi no marco da xornada “A memoria asolagada: Veigas de Camba e a Lama no encoro das Portas” que organizou a sección de Patrimonio e Bens Culturais do Consello da Cultura Galega (CCG) baixo a coordinación de Nieves Amado. Rosario Álvarez, presidenta do CCG; Néstor Ogando, alcalde da Gudiña e Teresa Nieto, coordinadora da sección de Patrimonio e Bens Culturais inauguraron a xornada que foi gravada e subirase ao web do CCG.

A sección de Patrimonio e Bens Culturais do Consello da Cultura Galega (CCG) organiza este domingo 7 de setembro na Casa da viúva na Gudiña a xornada “A memoria asolagada: Veigas de Camba e a Lama no encoro das Portas”. A cita, coordinada por Nieves Amado, pretende reflexionar sobre o territorio, a memoria e o patrimonio no val do río Camba, un lugar hoxe asolagado polas augas do encoro das Portas. A citá reunirá a investigadoras, veciñanza e representantes institucionais para reflexionar arredor das características técnicas da construción do encoro, dos elementos do patrimonio cultural que quedaron asolagados e dos procesos xudiciais que mantiveron as veciñas e veciños das vilas asolagadas coa empresa construtora e, sobre todo, para rescatar a súa memoria. A sesión non se emite en directo pero será gravada.

O gasto en cultura dos concellos galegos non depende do seu tamaño nin da súa densidade de poboación, senón das prioridades que cada entidade lle concede a este ámbito. Así se desprende do estudo O gasto en cultura na Administración local en Galicia, elaborado polo Observatorio do Consello da Cultura Galega (OCG), servizo do Consello da Cultura Galega (CCG), coa colaboración metodolóxica e técnica do Instituto de Estudos e Desenvolvemento de Galicia (IDEGA) da Universidade de Santiago de Compostela. O informe constata que concellos de tamaño desigual poden ter o mesmo gasto por habitante en cultura. Este estudo, que analiza por primeira vez o gasto executado polas entidades municipais, foi presentado esta mañá pola presidenta do CCG, Rosario Álvarez, quen destacou a necesidade de “poñer números ao esforzo que fan os concellos en cultura”. Canda ela, o responsable do OCG, Håkan Casares, subliñou a importancia de contar cunha “imaxe precisa do gasto real en cultura que fai a administración local”. Pola súa parte, Melchor Fernández Fernández e Pedro Rey Araujo, integrantes do IDEGA, salientaron que o informe contribúe á necesaria reflexión sobre a relación que debe existir entre a actividade cultural e a fixación de poboación nos territorios despoboados.

O Consello da Cultura Galega (CCG) vén de incorporar ao seu Álbum de Galicia -colección biobibliográfica que visibiliza personalidades senlleiras da historia e cultura galegas- unha nova entrada dedicada ao empresario galeguista Ramiro Isla Couto (A Estrada-1896, Vigo, 1987). A biografía, elaborada polo historiador Xosé Luís Pastoriza, rescata unha vida marcada polo compromiso político, a emigración e o exilio, e a quen o intelectual galeguista Ramón Piñeiro definiu como “peleriño do galeguismo polo mundo galego”.

Tal día como hoxe, pero de 1950, arrincaba en Montevideo a primeira emisión do programa de radio Sempre en Galicia. Setenta e cinco anos despois daquel fito, o director Xan Leira presentou no Consello da Cultura Galega (CCG) o documental Sempre en Galicia, voz e pensamento galeguista na emigración que recupera a historia deste programa de radio que continúa en emisión. A presidenta do CCG, Rosario Álvarez; o secretario xeral da Lingua, Valentín García; máis catro dos participantes no filme: Mónica Rebolo, Manuel Suárez, Carlos Sixirei e Yolanda Díaz Gallego xunto co autor presentaron este proxecto que se estreará no vindeiro mes de outono tanto en Galicia como en Uruguay.

O Álbum de Galicia, colección de biografías do Consello da Cultura Galega (CCG), incorpora hoxe a entrada de Faustino Rey Romero (Rianxo, 1921 – Bos Aires, 1971) e Baldomero Isorna Casal (Catoira, 1916 – Madrid, 1986). Foron dous poetas e activistas culturais que fundaron o Ateneo do Ullán e a Romaría Viquinga de Catoira, ademais de publicar poesía, artigos de prensa e participar na vida intelecutal e cultural do país, Xosé Ramón Fandiño é o autor da entrada que está dispoñible para consulta no web do CCG.

O ambiente galeguista da emigración en Bos Aires no século XX poderá ser hoxe máis coñecido. O Consello da Cultura Galega rematou o proceso de dixitalización e publicación da emblemática publicación Opinión Gallega, o órgano oficial do Centro Ourensán e o Centro Pontevedrés de Bos Aires. Con 120 números novos que comprenden entre decembro de 1945 e novembro de 1953, os lectores poderán seguir sinaturas tan destacadas como Castelao, Plácido R. Castro, Antón Alonso Ríos, Aquilino Iglesia Albariño, Ramón Otero Pedrayo ou Xosé Neira Vilas, entre moitos outros. seu Repertorio da prensa da emigración galega

O Álbum de Galicia, colección de biografías do Consello da Cultura Galega (CCG), incorpora hoxe a entrada de Roberto Vidal Bolaño (Santiago de Compostela 1950-2002). Foi dramaturgo, director de escena e actor de teatro e televisión. Participou na creación do Centro Dramático Galego e axudou a dinamizar o movemento teatral independente. Xosé Manuel Fernández Castro asina a entrada que está dispoñible para consulta no web do CCG.

Coa celebración do último plenario do primeiro semestre, o Consello da Cultura Galega avanzou a programación da institución para os vindeiros meses, que virá marcada por accións de conclusión de espazos de debate e reflexión ao redor da lingua, o acceso á cultura entre outras posibilidades.

O CCG exporá unha escolma do traballo fotográfico de Anna Turbau na Casa da Galería, sede da Fundación Margarita Ledo Andión, en Castro de Rei. Será a primeira mostra da súa obra que se inaugura trala morte da fotógrafa o pasado mes de marzo en Barcelona. A inauguración celebrarase o venres 18 de xullo ás 19 horas na Casa da Galería, coa presenza de Rosario Álvarez Blanco, presidenta do Consello da Cultura Galega e a comisaria da exposición e presidenta da fundación, Margarita Ledo Andión. A mostra poderase visitar ata o 25 de agosto de 2025 de venres a domingo, de 19 a 21 horas.

O Álbum de Galicia, colección de biografías do Consello da Cultura Galega (CCG), incorpora hoxe a entrada de Prudencio Piñeiro Latierro (San Sebastián, 1838 - Ferrol, 1919). Pianista e dinamizador da cultura galega, autor de pezas de zarzuela, director da orquestra de Vigo, do orfeón de Pontevedra, fundador dunha academia de música na cidade e organista da igrexa parroquial de Ferrol. Nilo García Armas é o autor da entrada que está dispoñible para consulta no web do CCG.

O Álbum de Galicia, colección de biografías do Consello da Cultura Galega (CCG), incorpora hoxe a entrada de Antonio Raimundo Ibáñez (Ferreirela de Baxo, 1749 - Ribadeo, 1809). Foi un empresario industrial e mercantil que impulsou a creación dun dos primeiros altos fornos do país, que serviu para modernizar a sociedade local da época, eminentemente labrega. Xosé Ramón Fandiño é o autor da entrada que está dispoñible para consulta no web do CCG.

Desenvolver redes de galegofalantes, incrementar a participación e intensificar os contactos entre entidades foron algunhas das propostas dos participantes na sesión ‘Sociedade, crenzas e participación comunitaria’, a última de ‘Un país coa súa lingua. Foro participativo’. A mediados de outubro farase un encontro de presentación de resultados das seis sesións no que tamén se incorporarán as cincocentas propostas dixitais remitidas pola cidadanía a través do web do CCG.

Dar a coñecer a importancia dos sistemas de rega tradicional que se empregaron para a repartición de auga e abrir un espazo para que as comunidades expoñan os problemas e dificultades que atopan para mantelos é parte do obxectivo da xornada “Comunidades e patrimonio cultural inmaterial. A rega tradicional” que se celebra esta tarde do mércores 9 de xullo no Consello da Cultura Galega. O evento será transmitido desde o web da institución.

O Consello da Cultura Galega pecha mañá, martes 8 de xullo, ‘Un país coa súa lingua. Foro participativo’. Co título ‘Sociedade, crenzas e participación comunitaria’, a mesa ten a finalidade de “obter propostas que reforcen o uso do idioma galego na sociedade civil, no asociacionismo e nos espazos comunitarios”. Representantes de redes educativas, de colaboración local ou de estudantes protagonizan os relatorios.

Os fondos do Seminario Galego de Educación para a Paz pasarán a estar depositados no Consello da Cultura Galega para a súa posta en valor e consulta pública. Así o acordaron esta mañá a presidenta do Consello da Cultura Galega, Rosario Álvarez, e Manuel Dios, presidente do Seminario Galego de Educación para a Paz (SGEP), durante a sinatura dun convenio conxunto. O Seminario Galego de Educación para a Paz estivo activo entre 1985 e 2017 e coa celebración este ano do 40 aniversario da súa fundación e o depósito dos fondos históricos pon fin ás súas actividades.