Arquivo de noticias do CCG

O Consello da Cultura Galega e a Real Filharmonía de Galicia presentaron esta mañá o disco: José Arriola. Orchestral Music, con obras inéditas do compositor galego. É o resultado dun proxecto de colaboración entre o Consorcio de Santiago e o CCG que arrincou en 2010 coa edición das obras completas e gravación no Auditorio de Galicia dun dobre CD, que sae agora á luz da man do selo discográfico Brilliant Classics. No acto de presentación estiveron a presidenta do Consello da Cultura Galega, Rosario Álvarez; a xerente do Consorcio de Santiago, Belén Hernández; e o director asociado da orquestra, o mestre compostelán Maximino Zumalave.

O Consello da Cultura Galega (CCG) acolle este xoves 22 de novembro a presentación do libro Los soldados del Tercio Norte y las tres Españas en la guerra de Cuba, da autoría de Ana Isabel Bello Platas. No acto intervirán Dolores Vilavedra Fernández, secretaria da institución; Juan Ruesta Botella, coronel do Terzo do Norte; Pilar Cagiao Vila, profesora da Universidade de Santiago de Compostela, e a autora do libro, Ana Isabel Bello Platas.

Esta venres, 16 de novembro, é o Día do Patrimonio. Unha iniciativa que o Consello da Cultura Galega (CCG) conmemora xunto con outros centros da memoria do noso país. A colaboración entre todos eles concrétase nun espazo web que concentra a información sobre os diferentes tipos de actividades que cada institución programou para festexar este día. Visitas guiadas, xornadas de portas abertas, pezas do ano, exposicións, difusión de documentos dixitalizados... son algunhas das propostas que se poden realizar e que forman parte desta páxina web.

“Nós nomeámonos, dende oxe e para sempre, nazonalistas galegos”, así se autodefiniron un grupo de asistentes á I Asemblea Nacionalista de Lugo, que tivo lugar en Vilalba o 17 de novembro de 1918. Nesa xuntanza aprobouse o Manifesto ao Pobo Galego, que deu paso ao nacionalismo galego e foi o un dos fitos das Irmandades da Fala. O Consello da Cultura Galega (CCG) volve a esta localidade lucense cen anos despois para conmemorar aquela xuntanza e analizar o que supuxo da man de diferentes especialistas. A cita comeza mañá cunha proxección audiovisual e remata o sábado cunha ofrenda floral perante o monólito conmemorativo daquela asemblea.

O Consello da Cultura Galega abre hoxe o prazo de inscrición para as visitas á súa exposición “Alba de Gloria. Unha experiencia”, comentadas polo seu comisario, Manuel Gago. A mostra, que recrea o último gran discurso de Castelao, contará con tres percorridos que terán lugar o 23 de novembro, o 13 de decembro e o 17 de xaneiro. Estas visitas forman parte do programa de difusión desta mostra que se complementa con visitas para escolares. A exposición está aberta en San Domingos de Bonaval ata o 3 de febreiro.

“Houbo unanimidade en recoñecer que a análise económica do capital feita por Karl Marx segue plensamente vixente case dous séculos despois” asegurou Jorge Álvarez Yagüez, coordinador xunto con Ramón Máiz das xornadas “Karl Marx, 1818/2018” que conmemoraban o bicentenario do nacemento dun pensador de grande relevancia histórica. A cita abordou tamén outros aspectos como a cuestión ecolóxica e a tecnolóxica.

Cúmprense douscentos anos do nacemento dun pensador de influencia histórica: Karl Marx. Unha efeméride que a Sección de Pensamento e Sociedade do Consello da Cultura Galega (CCG) aproveita para fixar os ollos no seu legado e reivindicar a súa vixencia. Juan Carlos Monedero, Francisco Sampedro, Clara Rama e Ramón Máiz son algúns dos relatores dunhas xornadas que arrincan mañá na sede da institución. A presidenta do Consello da Cultura Galega, Rosario Álvarez, será a encargada de inaugurar esta cita xunto cos dous coordinadores, Ramón Máiz e Jorge Álvarez Yágüez. A cita pódese seguir en directo desde o sitio web corporativo e a nosa canle de Youtube.

“As fronteiras producen fronteiras” afirmou Felipe Criado na súa conferencia no marco do congreso internacional “Patrimonio e fronteira” que se desenvolveu ata hoxe en Compostela. A cita puxo enriba da mesa a necesidade dunha maior cooperación entre os Estados e a necesidade de implicar a comunidade local na xestión patrimonial. “Existen evidencias que o modelo actual vai mudar e a actitude que teñamos hoxe vai marcar o futuro” dixo Criado ao tempo que outros profesionais insistían en buscar motivacións máis alá do turístico e do económico. A cita foi organizada polo Consello da Cultura Galega (CCG) coa colaboración da Comunidade dos Países de Língua Portuguesa (CPLP) e a Universidade do Minho.

O Consello da Cultura Galega (CCG) é, desde o ano 2016, observador consultivo da Comunidade dos Países de Língua Portuguesa (CPLP). No marco desta relación, o CCG organiza ata mañá o congreso “Patrimonio e fronteira”, que se desenvolve en Compostela. Ademais, promove unha serie de visitas que está a facer estes días a directora xeral da CPLP, Georgina Benrós de Mello.

Escoitar e ver o último discurso de Castelao da súa man, cun formato innovador e vangardista. Así é “Alba de Gloria. Unha experiencia”, a mostra que inaugurou este serán en San Domingos de Bonaval a presidenta do Consello da Cultura Galega (CCG), Rosario Álvarez, canda o presidente de honra da institución e presidente da Xunta de Galicia, Alberto Núñez Feijóo, e mais unha nutrida representación de autoridades e personalidades. “Esta non é unha exposición máis, como tampouco é un discurso máis”, explicou a presidenta do CCG ao tempo que reivindicou a “necesidade dun Panteón de Galicia que reúna as grandes figuras da nosa cultura”. Manuel Gago, o comisario da exposición, incidiu na rolda de prensa anterior á inauguración que a mostra pretende “trasladar a emoción da colectividade que asistiu a aquel discurso no ano 1948 e que está presente en todas as crónicas daquel acto”. A exposición estará aberta ata o 3 de febreiro de 2019.

Presas, encoros e ríos ocupan unha parte importante do noso territorio. Ao seu carón emerxeu un vizoso patrimonio que forma parte do noso imaxinario cotián non sempre ben recoñecido. Sobre eses muíños, lavadoiros, batáns e demais exemplos deste tipo de bens afonda a xornada “A posta en valor do patrimonio cultural dos ríos”, que terá lugar mañá e pasado no Consello da Cultura Galega (CCG). A cita será inaugurada pola presidenta da institución, Rosario Álvarez, a directora de Augas de Galicia, Teresa Gutiérrez, e o presidente da Confederación Hidrográfica Miño-Sil, José Antonio Quiroga. A xornada pódese seguir en directo desde o web do CCG.

“Alba de Gloria” foi un discurso representativo para a cultura galega por numerosos motivos. Primeiro porque recrea unha singular “santa compaña”, unha grande procesión das figuras determinantes na creación da identidade de Galicia. Segundo, porque é o mellor e máximo expoñente da retórica en lingua galega. Pero tamén porque é o último gran discurso que pronunciou Castelao en vida. Cando se cumpren os setenta anos da súa alocución, o Consello da Cultura Galega recupera a súa significación na exposición “Alba de Gloria”, e faino dun xeito inédito. A través de sistemas de realidade virtual e recreacións sonoras e visuais, os visitantes poderán vivir unha experiencia e mergullarse na historia de Galicia da man do propio Castelao. A mostra, con comisariado de Manuel Gago, inaugurarase o vindeiro mércores 7 de novembro en San Domingos de Bonaval (Santiago de Compostela).

A presidenta do Consello da Cultura Galega (CCG), Rosario Álvarez, compareceu este serán na Comisión 3ª, Economía, Facenda e Orzamentos, do Parlamento de Galicia, no marco das sesións informativas en relación co Proxecto de lei de orzamentos. Alí deu conta do orzamento da institución que preside, que se incrementou nun 5,1% para 2019. En total, contará con 2 679 233 euros, cos que se manterán as liñas de traballo habitual e se buscará unha maior renovación nos formatos e unha maior transversalidade para chegar a novos públicos. No vindeiro ano o CCG traballará, ademais de seguir con actividades xa consolidadas, en recuperar a figura de Antón Fraguas, na creación do Álbum de Galicia e tamén en preparar as homenaxes á xeración Nós ou á figura de Concepción Arenal. Ademais, Rosario Álvarez tamén falou da renovación dunha institución que, alén do cambio de presidencia, actualizou en case un 30% os membros da súa composición (plenario, comisión executiva, arquivos, comisións e seccións).

A segunda cita dos encontros IN SITU que organiza o Consello da Cultura Galega (CCG) trasládase mañá a Ferrol para poñer sobre a mesa a situación de dous barrios destacados da cidade: Ferrol Vello e o Barrio da Madalena. Este programa pretende poñer o foco na situación de cascos históricos e analízaos nunha xornada que se desenvolve na propia localidade. A cita comeza ás catro da tarde no Ateneo Ferrolán e participan arquitectos como Miguel Reimúndez González, Ignacio Mendizábal Herrero ou Alfonso Díaz Revilla. Rebeca Blanco Rotea, coordinadora da Sección de Patrimonio e Bens Culturais, e Teresa Nieto serán as encargadas de inaugurar este encontro.

San Domingos de Bonaval abrirá as súas portas o vindeiro 7 de novembro para acoller a exposición “Alba de Gloria”, que recrea e explica o coñecido discurso de Castelao. A mostra, organizada polo Consello da Cultura Galega e comisariada por Manuel Gago, pretende plasmar, dun xeito inédito en Galicia e empregando tecnoloxía innovadora, a alocución que Castelao pronunciou en 1948 en Bos Aires e que encerra en si mesmo dous grandes valores: por unha banda, ser unha peza clave para a oratoria en lingua galega e, por outra, ser tamén unha alocución fundamental na traxectoria de Castelao, na que recrea unha especie de Santa Compaña galega ao enumerar as figuras relevantes que axudaron a configurar a cultura galega.

A paixón pola música, a devoción por Arthur Rubinstein e o placer de ensinar música son algunhas das características definitorias da traxectoria de Mercedes Goicoa, a figura á que hoxe se lle dedicou a xornada que organiza anualmente a Comisión de Igualdade do Consello da Cultura Galega (CCG). A cita supuxo tamén unha homenaxe ás mulleres e á música na que profesionais e creadoras deste sector aproveitaron para expoñer a súa situación profesional. A cita foi inaugurada pola presidenta do CCG, Rosario Álvarez, quen destacou os dez anos de traballo que a institución leva traballando por visibilizar o traballo de mulleres.

Foi unha pioneira, unha muller destacada no ámbito musical. No seu dilatado currículo destaca o feito de ser a primeira muller en presidir unha Real Academia, entre moitos outros méritos. Chámase Mercedes Goicoa e a súa figura, e o que representa para a música e tamén para as mulleres, é obxecto dunha xornada que terá lugar mañá no Consello da Cultura Galega (CCG). A cita pode seguirse en directo desde o web da institución e nela participan figuras como Laura Quintillán, Mónica de Nut, Uxía Senlle, Maximino Zumalave ou Lucía Martínez. A presidenta da institución, Rosario Álvarez, será a encargada de inaugurar esta cita coordinada por María Xosé Porteiro e Alba María Rodríguez.

As actividades que o Consello da Cultura Galega (CCG) ten programadas para as vindeiras semanas están encamiñadas a analizar o patrimonio desde diferentes puntos de vista, ademais de volver poñer os ollos nun tema de actualidade como é a violencia de xénero. Ferrol acollerá un encontro para analizar a situación urbanística e patrimonial do seu casco urbano coa revisión do barrio da Madalena e do Ferrol vello (31 de outubro). Séguelle no tempo unha xornada para tratar o patriarcado na xustiza, que terá lugar o día 5 de novembro. Ademais, nesa mesma semana organizamos dous encontros relacionados co patrimonio: un para debullar as relacións fronteirizas con Portugal e outro para coñecer a situación actual do patrimonio dos ríos. Todas elas teñen aberto o prazo de inscrición, que se pode formalizar a través do sitio web da institución.

Converter a fala en texto e traducir automaticamente son dous aspectos relevantes da relación entre os idiomas e a tecnoloxía. Sobre estas materias traballa a xornada “As tecnoloxías da lingua” que organiza mañá martes o Consello da Cultura Galega. Responsables de empresas como Google, RTVE, Galma, Vicomtech e expertos universitarios falarán destas cuestións nunha xornada que se pode seguir en directo desde o web do CCG. A presidenta da institución, Rosario Álvarez; o secretario xeral de Política Lingüística, Valentín García; e a coordinadora da xornada, Carmen García Mateo, serán os encargados de abrir esta cita que pretende un enfoque eminentemente práctico.

A presidenta do Consello da Cultura Galega, Rosario Álvarez, recibiu esta mañá a visita dunha delegación de académicos colombianos nas dependencias do Consello da Cultura Galega. A comitiva visita Galicia por mor das homenaxes que se suceden no noso país ao científico de orixe galega, José de Caldas, polo 250 aniversario do seu nacemento. O concello de Caldas de Reis, xunto con outras entidades, están a organizar unha serie de actividades para lembrar á figura do "Sabio de Caldas", coñecido así en Colombia onde deu nome a unha rexión e a unha universidade.