Arquivo de noticias do CCG

O Consello da Cultura Galega organiza a participación de Xavier Queipo na Feira de Göteburgo, o que permitirá que a literatura galega estea presente na feira do libro máis importante dos países escandinavos. A feira, que ten lugar entre os días 22 e 26 de setembro no Centro de Congresos e Exhibicións de Suecia, converteuse nos últimos anos no gran festival literario europeo, o segundo en importancia logo de Fráncfort e no que participan escritoras e escritores de todo o mundo. Xavier Queipo intervirá o sábado 24 ás 17.00 horas no stand da EUNIC (European Union National Institutes for Culture) cun diálogo coa escritora estonia Maarja Kangroo.

Este domingo 18 de setembro clausurouse a exposición “Galicia 100. Obxectos para contar unha cultura”, no local de Afundación en Santiago de Compostela. As seguintes etapas desta mostra serán A Coruña e Vigo. En A Coruña inaugurarase o día 4 de outubro. En Santiago, pasaron pola mostra preto de 6000 persoas.

O panorama musical galego mudou pouco nos últimos tempos e sitúase nun contexto de descenso de concertos e asistentes. En 2014, realizáronse 1136 concertos de música clásica (36 menos que en 2013) aos que asistiron 236 087 espectadores. No caso da música popular en vivo, rexistrouse unha baixada no número de concertos, que pasan de 4606 a 3938, un descenso dun 7,2 % de espectadores, que se sitúa nos 941 000. O aspecto positivo está na recadación xa que tanto na música clásica como na popular melloraron as cifras. Na música clásica a recadación sitúase nos 763 565 euros, un 11,8 % máis que en 2013. No caso da música popular en directo, recadáronse 5 778 000 euros, 287 000 euros máis que en 2013. Son cifras do estudo “A música clásica en Galicia (2016)”, o último Documento de Traballo do Observatorio da Cultura Galega (OCG-DT), que fai unha desagregación do sector por xéneros musicais.

O presidente do Consello da Cultura Galega (CCG), Ramón Villares, presenta mañá en Ponta Delgada (Illa de São Miguel, Azores) a publicación Emigración e exilio nos Estados Unidos de América: experiencias de Galicia e Azores. A actividade, organizada coa Fundação Luso-Americana para o Desenvolvimento (FLAD), enmárcase dentro dos actos conmemorativos do corenta aniversario da autonomía da asemblea lexislativa das illas dos Azores. No acto tamén estarán presentes dous coordinadores da publicación, Alberto Pena e Mário Mesquita, así como Michael Baum, administrador da FLAD.

O Consello da Cultura Galega (CCG) realizou no serán do pasado xoves 14 de xullo unha sesión plenaria ordinaria na que aprobou os nomeamentos e renovacións dos coordinadores e coordinadoras das súas seccións, comisións e arquivos.

O presidente do Consello da Cultura Galega, Ramón Villares, o alcalde de Ribadeo, Fernando Suárez, e o investigador Pablo Rodríguez presentan mañá venres en Ribadeo (20:30 horas) o libro Eliseo Pulpeiro. As letras galegas entre dúas ribeiras (Ribadeo e o Río da Prata). A obra revisa a figura de quen foi fundador de Céltiga, unha cabeceira crucial no proceso de afirmación e desenvolvemento do galeguismo entre as comunidades galegas de América. Non é a única actividade da institución nesta localidade lucense, xa que pola mañá (12:30 horas) inaugura Galicia Imaxinada, a exposición que visualiza de xeito gráfico a influencia da emigración na creación dos símbolos de Galicia.

A Sección de Creación de Artes Visuais Contemporáneas do Consello da Cultura Galega realiza mañá unha xornada en que pretende reflexionar sobre as relacións entre a arte e a educación. Na liña de traballo habitual, de poñer a arte en diálogo con outras estruturas ou disciplinas, busca agora afondar nas estratexias e nos modos nos que a arte está presente na sociedade e na educación. A sesión complétase cunha intervención que recolle un mapa conceptual e gráfico sobre estas materias a partir da colaboración das e dos participantes.

Son varios os casos de obras en cidades galegas que foron ou paralizadas ou modificadas polo achado dun xacemento arqueolóxico. A factoría de salga atopada na obra da rúa Marqués de Valladares en Vigo ou o templo romano ao lado do Círculo das Artes de Lugo son só algúns exemplos. Estes dous casos analizaranse no marco da sétima xornada dos “Encontros monográficos co Patrimonio Cultural”, que se desenvolve mañá á tarde no Consello da Cultura Galega (CCG). A cita poderase seguir en directo a través do web da institución.

Da eficacia de lavado das bolas ecolóxicas ata os anticelulíticos pasando por fenómenos como a seca da lagoa de Antela ou o terremoto de Lorca do ano 2011. Ao longo da xornada “As ciencias ensinan a pensar: razoamento científico e pensamento crítico” analizáronse casos e novas reais para dar conta de cómo a ciencia nos axuda a desenvolver un pensamento crítico. A cita do Consello da Cultura Galega puxo sobre a mesa prácticas científicas para construír e validar coñecementos e ter así unha opinión máis formada lonxe de subxectividades e impresións.

Como combater a publicidade enganosa ou os razoamentos baseados en ideoloxías? A resposta a esta pregunta está nunha xornada titulada “As ciencias ensinan a pensar: razoamento científico e pensamento crítico” que se desenvolve mañá mércores no Consello da Cultura Galega. Destacados especialistas tratarán de explicar como as ciencias nos axudan a desenvolvernos na nosa vida diaria ao ter en conta probas e argumentos e non opinións subxectivas. A sesión poderá seguirse en directo desde o web da institución.Como combater a publicidade enganosa ou os razoamentos baseados en ideoloxías? A resposta a esta pregunta está nunha xornada titulada “As ciencias ensinan a pensar: razoamento científico e pensamento crítico” que se desenvolve mañá mércores no Consello da Cultura Galega. Destacados especialistas tratarán de explicar como as ciencias nos axudan a desenvolvernos na nosa vida diaria ao ter en conta probas e argumentos e non opinións subxectivas. A sesión poderá seguirse en directo desde o web da institución.

O recital unirá a poesía galega e vasca nas voces de Leire Bilbao, Felipe Juariti, Miren Agur Meabe, Gonzalo Hermo, Manuel Rivas e Dores Tembrás. O escritor e membro da Sección de Lingua, Literatura e Comunicación do CCG, Anxo Angueira, fará de mantedor do acto. O recital terá lugar este xoves 16 de xuño ás 19 horas na sede da institución.

Co poema “Autobusa hartu behar dut” (“Cómpreme coller o bus”) de Leire Bilbao abriuse esta tarde no Consello da Cultura Galega (CCG) un recital poético singular. Tratouse dun diálogo entre a literatura galega e vasca nas voces de poetas recoñecidos de ambas literaturas. Miren Agur Meabe, Gonzalo Hermo, Manuel Rivas e Dores Tembrás completaron esta proposta que foi presentada polo escritor e membro da Sección de Lingua, Literatura e Comunicación do CCG, Anxo Angueira quen destacou a vizosa relación entre a lingua e a cultura vasca. Foi o vicepresidente Francisco Díaz-Fierros quen situou a cita no marco dunha liña de traballo institucional que o Consello da Cultura mantén co Instituto Ramón Llull e co Etxepare no que atende á difusión da cultura e o idioma das diferentes linguas ibéricas.

Para unha parte da poboación a arqueoloxía é esa profesión que paraliza e atrasa as obras, para outra é unha paixón e para algúns unha auténtica descoñecida. Todos os axentes implicados na actividade arqueolóxica: profesionais, investigadores, docentes ou técnicos participarán nunhas xornadas do Consello da Cultura Galega que pretenden trazar un estado da cuestión da arqueoloxía en Galicia. A cita, que se desenvolverá ata o xoves 15, conta cunha enquisa anónima e voluntaria na rede para coñecer a opinión da cidadanía sobre este sector. As xornadas poderanse seguir en directo desde o web da institución.

A cultura xerou en 2011 un total de 1103 millóns de euros, o que se traduce nun 2 % do Produto Interior Bruto (PIB) de Galicia. Este sector está conformado por 5747 empresas culturais que empregan 30 828 persoas e son maioritariamente PEME. Esta radiografía do sistema cultural e empresarial galego así como do seu impacto no conxunto da economía galega conforma o último Documento de Traballo (DT-OCG) do Observatorio da Cultura Galega, servizo dependente do Consello da Cultura Galega, e titúlase O sistema produtivo da cultura. A recuperación das exportacións e un incremento nun 84,7 % das importacións completan o balance deste sector.

A vila de Cangas acolleu este venres un concerto singular. 500 nenos e nenas chegados dos conservatorios de música profesional de Galicia e de tres centros de música do Morrazo xuntáronse no Adro da Igrexa de Santiago de Cangas para cantarlle ao mar de Vigo a partir de textos de Martín Códax, Afonso X ou o xograr Lourenço. Era a cuarta edición dun programa didáctico e cultural chamado “No bico un cantar” e organizado polo Consello da Cultura Galega e a Consellería de Cultura e Educación. A cita supuxo tamén a estrea da versión musicada do poema de Pero Viviaez “Pois nosas madres van a San Simón” a cargo do compositor Rogelio Groba. No acto estaban presentes Ramón Villares, presidente do Consello da Cultura Galega; Anxo Lorenzo, secretario xeral de Cultura, e Heitor Mera, concelleiro de cultura e normalización lingüística de Cangas, que anunciaron que a vindeira edición terá lugar en Mondoñedo.

As cancións dos xograres e trobadores medievais protagonizan a cuarta edición de “No bico un cantar”, un programa que ten un marcado carácter didáctico e cultural e xunta música, poesía e mocidade. A cita reunirá mañá en Cangas (Adro da igrexa de Santiago de Cangas, 17:30 horas) un gran coro formado por 500 nenos e nenas chegados dos conservatorios de música profesional de Galicia e de tres centros de música do Morrazo para cantarlle ao mar de Vigo. O concerto, organizado polo Consello da Cultura Galega e a Consellería de Cultura e Educación coa colaboración do Concello de Cangas, acollerá a estrea da versión musicada do poema de Pero Viviaez “Pois nosas madres van a San Simón” a cargo do compositor Rogelio Groba.

Son moitas as particularidades que fan de Cova Eirós unha escavación arqueolóxica singular. Dunha banda, porque é un dos xacementos paleolíticos máis notables dos que foron descubertos no noroeste ibérico. Doutra banda, porque conserva un dos mellores conxuntos de fósiles fauna do Cuaternario de toda Galicia, pero tamén porque durante a escavación se atoparon mostras arqueolóxicas da prehistoria recente e indicios de ocupacións eventuais na Idade Media e na Moderna. Todos eles se abordarán na sexta xornada dos “Encontros monográficos co Patrimonio Cultural”, que terá lugar mañá á tarde no Consello da Cultura Galega (CCG). Unha cita que se pode seguir en directo a través do web da institución.

Foi o peche dos actos académicos previstos para o Día das Letras Galegas e a antesala do Ano das Irmandades da Fala. O teatro Rosalía de Castro vibrou co Concerto das Letras Galegas do Consello da Cultura Galega (CCG), no que Milladoiro fixo unha aposta moi especial e no que houbo danza e soaron os poemas de Manuel María. Era un rexistro novo para un concerto que cumpre seis edicións e que pretende celebrar dun xeito festivo o 17 de maio. Asistiron o presidente do CCG, Ramón Villares; a viúva de Manuel María, Saleta Goi; o alcalde da Coruña, Xulio Ferreiro, e outras autoridades coma o conselleiro de Cultura, Román Rodríguez, o secretario xeral de Política Lingüística, Valentín García; a conselleira de Infraestruturas e Vivenda, Ethel Vázquez, ou o presidente do Tribunal Superior de Xustiza, Miguel Ángel Cárdenas, nun teatro que tiña a cabida completa.

O Consello da Cultura Galega (CCG) pecha os actos académicos do Día da Letras Galegas co seu tradicional concerto. Nesta ocasión, a súa proposta de conmemorar dun xeito festivo o 17 de maio cambia de rexistro para lembrar a Manuel María. O teatro Rosalía da Coruña acollerá un concerto en que o grupo Milladoiro poñerá música aos textos do poeta lucense canda outras pezas da emblemática formación, nun formato en que tamén haberá espazo para a danza. O concerto ten a cabida completa, logo de que se esgotaran as entradas que se puxeron a disposición do público.

Anxo Carracedo, Rebeca Blanco Rotea, Xulio Ríos Paredes e Carmen García Mateo son os novos membros do Plenario do Consello da Cultura Galega (CCG). Esta entidade levou a cabo no serán deste martes unha sesión plenaria ordinaria na que procedeu a nomear novos membros na quenda de personalidades, en cumprimento da Lei de creación da institución e do seu regulamento, que estipula o cambio, por metades, cada dous anos.