Arquivo de noticias do CCG

Os “Encontros para a Normalización” chegan á súa maioría de idade sendo un espazo de debate e reflexións sobre a lingua. Nesta XVIII edición, que comeza mañá xoves, volven poñer o foco nos máis novos cun programa encamiñado a coñecer as motivacións da mocidade galega a falar nun ou outro idioma, a debater sobre cal é a potencialidade das redes dixitais e cal o papel da escola. A cita está organizada polo Centro de Documentación Sociolingüística de Galicia (CDSG) do Consello da Cultura Galega (CCG), e poderase seguir en directo a través do web. Valentín García, secretario xeral de Política Lingüística, e Rosario Álvarez, vicepresidenta do CCG, serán os encargados da inauguración dun encontro que se desenvolverá na sede da institución ata o venres.

“Outros verbos, novas lecturas: Valle-Inclán traducido”(1930-1936) é o título da exposición que pretende dar conta da dimensión internacional deste escritor a través das traducións das súas obras a outras linguas. A versión en portugués desta mostra inaugurouse na tarde deste martes no Museo Nogueira da Silva en Braga. Alí estivo presente o presidente do Consello da Cultura Galega, Ramón Villares, e a comisaria, Rosario Mascato, nun acto que contou coa actuación musical do grupo Zoar.

O Consello da Cultura Galega (CCG) celebrou no serán do xoves 7 de abril unha sesión plenaria na que aprobou cambios na súa composición. Nesta ocasión procedeuse a nomear os membros por designación das institucións que conforman o CCG e que se produce por cumprimento da Lei de creación da institución e do seu regulamento, cada dous anos. Ademais, tamén se aprobaron as próximas actividades, así como os informes das seccións e comisións que deron conta do seu funcionamento.

O Consello da Cultura Galega celebra no serán deste xoves 7 de abril unha sesión plenaria. Na orde do día figura a toma de posesión de novos membros, en cumprimento da Lei de creación da institución, que renovan por metades cada dous anos e que nesta ocasión afecta a quenda de institucións. Ademais, tamén se aprobará o plan de actividades para o segundo semestre, así como os informes das seccións e comisións que dan conta do seu funcionamento.

O Museo das Peregrinacións acaba de ampliar a súa sede e crear unha sala de exposición permanente na praza das Praterías. O proceso técnico deste cambio protagoniza a cuarta das xornadas dos “Encontros monográficos co Patrimonio Cultural” que terá lugar mañá á tarde no Consello da Cultura Galega (CCG). A xornada ten o seu aforo completo pero pode seguirse en directo a través do web da institución.

As cancións dos xograres e trobadores medievais protagonizan a cuarta edición de “No bico un cantar”, un programa que ten un carácter didáctico e cultural e xunta música, poesía e mocidade. O concerto foi presentado esta mañá na biblioteca do Consello da Cultura Galega (CCG) polo seu presidente, Ramón Villares, quen destacou o seu papel de difusión cultural ao lembrar que “o que se aprende cantando, non se esquece máis". Canda el estaban Román Rodríguez, conselleiro de Cultura, Educación e Ordenación Universitaria; Anxo Lorenzo, secretario xeral de Cultura; Héitor Mera, concelleiro de Cultura de Cangas; Rosario Álvarez, vicepresidenta do CCG, e Maximino Zumalave, director artístico do concerto. A cita xuntará en Cangas, o vindeiro 3 de xuño, un gran coro de nenos e nenas chegados dos conservatorios de música profesional de Galicia para cantar a lírica medieval. A cita suporá a estrea da versión musicada do poema “Pois nosas madres van a San Simón” de Pero Viviaez a cargo do compositor Rogelio Groba.

Hai moitas maneiras de achegar o teatro aos máis novos nun ámbito escolar. Hai quen usa o teatro para instruír nos contidos das materias de clase, e quen o emprega como un divertimento. Todas as opcións, así como as súas vantaxes, quedaron de manifestou na xornada “Teatro amador na infancia e na mocidade”. A cita que se desenvolveu ao longo da xornada de hoxe no Consello da Cultura Galega incidiu na relación entre a educación e a cultura pero, sobre todo, puxo de manifesto o papel central das artes escénicas na formación e a necesidade de que exista unha maior integración destas no currículo educativo.

Mañá desenvólvese no Consello da Cultura Galega a xornada “Teatro amador na infancia e na mocidade”, unha cita que pretende ver o papel lúdico e didáctico das artes escénicas. A cita organizada pola Sección de Música e Artes Escénicas está coordinada por Inma Lopez Silva e Euloxio Ruibal e ofrecerá experiencias teatrais que se están a desenvolver no ámbito educativo.

O Museo das Peregrinacións acaba de ampliar a súa sede e crear unha sala de exposición permanente na praza das Praterías. O proceso técnico deste cambio acapara a cuarta das xornadas dos “Encontros monográficos co Patrimonio Cultural” que organiza o Consello da Cultura Galega (CCG). A cita terá lugar o vindeiro 8 de abril e acaba de abrir a inscrición a través do web da institución.

O teatro é lecer pero tamén un espazo de aprendizaxe. Esta é a idea de fondo da xornada “Teatro amador na infancia e na mocidade” que se desenvolve o día 4 de abril no Consello da Cultura Galega. A cita pretende poñer de manifesto experiencias prácticas desa dobre faceta da realidade teatral. O encontro está organizado pola Sección de Música e Artes Escénicas e acaba de abrir o seu prazo de inscrición.

Medra considerablemente o número de visitas virtuais ás bibliotecas, concretamente a consulta aos catálogos e aos fondos dixitalizados. Así se desprende do último Documento de Traballo (DT-OCG) do Observatorio da Cultura Galega, servizo dependente do Consello da Cultura Galega. Baixo o título Estatística de bibliotecas, este estudo facilita información sobre o equipamento material e humano das bibliotecas galegas e incide na idea de que o mundo dixital abre novas perspectivas. Con todo, tamén deixa cifras negativas ao debuxar unha actividade marcada polo descenso leve de usuarios, de bibliotecas e de préstamos.

As bibliografías dos irmáns Ramón e Antón Villar Ponte son as primeiras entradas do álbum Irmandades da Fala. Unha iniciativa do Consello da Cultura Galega que pretende difundir dun xeito divulgativo as biografías e materiais de máis de dúas ducias de persoas que formaron parte do movemento. O proxecto está coordinado por Miguel Anxo Seixas Seoane, quen asina un texto que explica o contexto de nacemento das Irmandades da Fala. O Álbum faise visible ao público hoxe, 21 de marzo, ao coincidir coa data na que Ramón Villar Ponte asina o manifesto “Nuestra afirmación regional” que reivindica a problemática do idioma e a necesidade de recuperar o seu uso. O Álbum actualizarase de xeito mensual e conforma algunha das actividades que o Consello da Cultura Galega ten programado para celebrar o centenario deste fenómeno.

O Concerto das Letras Galegas naceu como unha iniciativa do Consello da Cultura Galega (CCG) para celebrar dun xeito festivo o 17 de maio. Nesta ocasión cambia de rexistro para lembrar ao homenaxeado deste 2016: Manuel María. A cita será na Coruña, onde o grupo Milladoiro poñerá a música nun concerto en que cobrará protagonismo os textos do poeta lucense. “É unha homenaxe a Manuel María, ao Día das Letras Galegas pero tamén á importancia que ten a música na cidade da Coruña” destacou Ramón Villares, presidente do Consello da Cultura Galega, esta mañá na presentación do concerto. Canda el estaban o alcalde da Coruña, Xulio Ferreiro; Maximino Zumalave, coordinador da Sección de Música e Artes Escénicas do CCG, e Moncho García, integrante da formación.

No noso territorio aínda sobreviven algunhas pegadas do primeiro grande auxe de construción da Alta Idade Media que están invisibilizadas. Esta é a premisa do proxecto europeo Early Medieval Churches: Archaeology, History and Heritage (EMCHAHE), que dirixe o profesor José Carlos Sánchez Pardo na Universidade de Santiago de Compostela. As características desta proposta centra a terceira edición dos “Encontros monográficos co Patrimonio Cultural” que terá lugar mañá xoves no Consello da Cultura Galega (CCG). A xornada retransmitirase en directo a través do web da institución.

Tres seminarios, dúas exposicións e un proxecto web. Este ó conxunto de actividades coas que o Consello da Cultura Galega participa na programación que celebra o centenario das irmandades da Fala dado a coñecer esta mañá no Museo do Pobo Galego. Ramón Villares, presidente do CCG, detallou a as actividades da institución ao tempo que anunciou que se trata dunha conmemoración “precisa, necesaria e obrigada”. O acto estivo presidido polo Conselleiro de Cultura, Román Rodríguez, e asistiu o presidente da Real Academia Galega, Xesús Alonso Montero, o presidente do Padroado do Museo do Pobo, Xusto Beramendi, e os representantes doutras entidades.

O Consello da Cultura Galega acaba de abrir o prazo de inscrición na xornada “Cultura e comunicación na sociedade en rede”, que analiza novos modelos e novas experiencias no ámbito dixital da man de expertos como Miquel de Moragas ou Emili Prado. A cita terá lugar na sede da institución o vindeiro 26 de abril e está organizada polos profesores Xosé López, Francisco Campos e Manuel Gago. A inscrición pode facerse a través da web, é gratuíta e hai cen prazas.

“Olladas de mulleres no mundo” é o título dun ciclo de cinema co que o Consello da Cultura Galega(CCG) e o Centro Galego de Artes da Imaxe (CGAI) pretenden amosar o traballo de actrices, directoras ou produtoras de cine. Arrinca o 8 de marzo, o Día da Muller Traballadora, e permite ver a través de proxeccións e coloquios o cinema feito tanto en Galicia coma noutras partes do mundo desde unha perspectiva de xénero. As galegas Diana Toucedo e Xisela Franco xunto coa realizadora belga Chantal Akerman, recentemente falecida, conforman o programa desta edición.

Moitas das conquistas sociais que parecían irreversibles desapareceron nos últimos anos. O estado do benestar atravesa unha crise severa marcada por un individualismo posesivo e unha Europa asocial, tal e como explicará nunha conferencia o sociólogo e politólogo Luis Moreno. A cita terá lugar este xoves 3 de marzo (17:00 horas) e insírese no ciclo O(s) Sentido(s) da(s) Cultura(s), seminario do Consello da Cultura Galega coordinado polo profesor Ramón Máiz. A cita programouse inicialmente en 2015 e tivo que ser adiada por mor da cancelación do voo que impediu a Moreno ofrecer a conferencia.

Linguaxe multisensorial, renovación dos procesos editoriais e novas formas de contar a realidade amparadas nas posibilidades que ofrece a tecnoloxía son algunhas das claves de futuro para a cultura galega. Así o trasladaron expertos como Ramón Salaverría ou Mario Tascón no marco da xornada “Desafíos para a cultura galega no escenario interactivo da sociedade en rede”, que se desenvolveu ao longo do día de hoxe no Consello da Cultura galega. A proposta estivo coordinada por Xosé López, Francisco Campos e Manuel Gago.

Nos últimos tempos Galicia deu pasos para que a súa cultura e a súa identidade estean de xeito activo e visible na rede pero quedan aínda hai moitos retos por cumprir. Sobre eles reflexionará a xornada “Desafíos para a cultura galega no escenario interactivo da sociedade en rede”, que terá lugar mañá no Consello da Cultura galega. A proposta está coordinada por Xosé López, Francisco Campos e Manuel Gago, e contará coa presenza de expertos recoñecidos como Mario Tascón ou Rosa Franquet para falar de novas dinámicas que inciden nos usos e consumos de produtos culturais. A xornada ten o seu aforo completo, con todo, os relatorios pódense seguir en directo a través do web da institución.