Arquivo de noticias do CCG

Son máis de 6.500 cartas escritas por diferentes interlocutores e dirixidos a Ramón Otero Pedrayo (Ourense, 1888-1976). Documentos imprescindibles para entender a traxectoria persoal e intelectual do escritor de Trasalba que repousaban na Fundación Penzol en Vigo. A presidenta do Consello da Cultura Galega, Rosario Álvarez, e o presidente da Fundación Penzol, Manuel Puga, veñen de asinar un protocolo de colaboración para a dixitalización e difusión pública dese material.

Non é posible comprender Galicia e a súa cultura sen a xeración Nós e o rico legado que deixou. Para conmemorar o centenario do nacemento da revista “Nós” en Ourense en 1920, o Consello da Cultura Galega recolle neste especial contidos producidos pola institución que dan conta da vida, obra e impacto dun grupo de intelectuais que entenderon Galicia como un proxecto integral. Son materiais biográficos, documentais e de reflexión ao redor da revista “Nós” e da xeración que a ideou. O especial contén unha pequena xoia, chámase “Os quixotes da Terra van de camiño” e ofrece sete viaxes por Galicia a partir dos roteiros que Ramón Otero Pedrayo deseñou para o seu amigo Silvio Santiago na segunda metade dos anos 60. Ademais dos manuscritos orixinais debuxados por Otero Pedrayo, pódese seguir cada un deses trazados a través dunha viaxe multimedia xeolocalizada e enriquecida con materiais contemporáneos.

“Pra ledicia de todos e pra enseño de moitos, sai oxe Nós”. Así comezaba unha das iniciativas máis frutíferas da cultura galega: a revista “Nós”. Un proxecto editorial que botaron a andar Vicente Risco, Castelao, Ramón Cabanillas e Antón Losada Diéguez hai cen anos. Nacía así unha cabeceira que dignificou o idioma, que buscaba unha estética xenuinamente galega e nos puxo en pé de igualdade coa cultura europea do momento. Co gallo do centenario desta publicación, o Consello da Cultura Galega presenta a biografía das persoas vencelladas a esta histórica cabeceira. Comezamos con Ánxel Casal, Xavier Prado “Lameiro”, Ricardo Carballo Calero, Arturo Noguerol e o director de “Nós”, Vicente Risco.

O 7 de xaneiro de 1950 morría en Bos Aires, Alfonso R. Castelao. Unha efeméride que o Consello da Cultura Galega (CCG) conmemora cunha visita institucional á exposición “Alba de Gloria. Unha experiencia” que recrea o último gran discurso que pronunciou Castelao. Alí, ademais de poñer un ramo perante a tumba do intelectual rianxeiro, a presidenta do CCG, Rosario Álvarez, informou que ante a demanda da cidadanía a exposición amplía o seu prazo de apertura ata o 3 de marzo. Ademais, anunciou que se está a traballar nas itinerancias desta mostra que comezarán no segundo trimestre do ano.

O Consello da Cultura Galega presentou hoxe a edición cuarta e definitiva do libro O PÓRTICO POÉTICO DOS “SEIS POEMAS GALEGOS” DE FEDERICO GARCÍA LORCA, un completo estudo crítico publicado pola institución e realizado polo profesor Luís Pérez Rodríguez.
A edición, de catrocentas páxinas, inclúe dous CD´s cunha conferencia de Eduardo Blanco Amor pronunciada sobre o tema en Bos Aires en 1959 e un recital musical celebrado en 1996 no Consello da Cultura Galega coa música do compositor e pianista Isidro B. Maiztegui e a actuación da soprano Marta de Castro. No acto interviron Ramón Villares, presidente do CCG, o autor Luís Pérez Rodríguez e a escritora e poeta María do Cebreiro.