Arquivo de noticias do CCG

Fernando Daniel Cortezón (Ribadeo, 1927- Lugo, 2009), foi un prolífico escritor galego que cultivou a narrativa, o ensaio e a literatura dramática e que destacou pola súa recuperación e revisión da historia de Galicia e a identidade galega dende unha abordaxe crítica. Así o define Ana Abad de Larriva, autora da súa entrada no Álbum de Galicia, colección de biografías que mantén o Consello da Cultura Galega.

O Álbum de Galicia, colección biobibliográfica que mantén o Consello da Cultura Galega (CCG), acaba de incorporar a entrada de Jenaro de la Fuente Domínguez (Villa de Torquemada- Palencia, 1851 - Vigo, 1922). Xosé Ramón Fandiño é o autor da entrada deste arquitecto que foi unha peza fundamental na configuración da fisionomía arquitectónica do ensanche de Vigo.

Fernando Fraga Rodríguez (Santiago de Compostela, 1922 – Nigrán, 2020) consolidouse como un dos pioneiros da oceanografía en Galicia. Investigador recoñecido a nivel internacional polas súas contribucións no campo da oceanografía química, participou en varias campañas no Índico e no Antártico, así como no noroeste de África e da Península Ibérica. A súa entrada no Álbum de Galicia, a colección dixital de biografías que mantén o Consello da Cultura Galega (CCG), é da autoría de Xosé Antón Álvarez Salgado.

Antonio Naveyra (Santiago de Compostela, 1909 – A Coruña, 1976) desenvolveu unha longa traxectoria vinculada ao teatro, unha disciplina en que sobresaíu como actor, director, escritor e adaptador. Ademais, realizou un destacado labor a prol da posta en valor do folclore galego a mediados do século XX. A súa entrada incorpórase hoxe ao Álbum de Galicia, a colección dixital de biografías que mantén o Consello da Cultura Galega (CCG), cun texto asinado por Ana Abad de Larriva.

María Cardarelly (Zaragoza, 1845 – ?, ca. 1915) foi unha fotógrafa pioneira ao erixirse como a primeira muller en ter un estudio propio en Galicia. Malia que só se dedicou tres anos á práctica fotográfica e que a obra que dela se coñece non supera a media ducia de orixinais, sobresaíu por capturar coa súa cámara “unha das personaxes máis relevantes da literatura e a sociedade do noso país como Rosalía de Castro”. Así o subliña Vítor Vaqueiro, o autor da súa entrada no Álbum de Galicia, a colección dixital de biografías que mantén o Consello da Cultura Galega.

María Xosé Rouco Lamela (Vilalba, 1952 – Lugo, 2020) destacou polo seu labor pioneiro a prol da defensa dos dereitos das mulleres. Foi unha das impulsoras da Asociación Democrática da Muller Galega e a fundadora da Asociación de Mulleres Empresarias da Provincia de Lugo. Cunha traxectoria profesional vinculada á atención do negocio familiar Calzados Camba en Lugo, ocupou tamén o cargo de vogal da directiva da Cámara de Comercio da cidade. No ronsel do 72º aniversario do seu nacemento, a súa entrada incorpórase ao Álbum de Galicia, a colección dixital de biografías que mantén o Consello da Cultura Galega (CCG). Asina o texto Luz Darriba.

Blanca Jiménez Alonso (Ribadeo, 1926 – A Coruña, 2012) destacou polo seu labor a prol do patrimonio bibliográfico e documental galego, un compromiso que se traduciu na procura e achega de fondos para a biblioteca da Fundación Penzol. Posta en marcha grazas á doazón do seu marido, Fermín Penzol, traballou activamente para a institución, da que foi presidenta e presidenta de honra. Ademais, integrou o Plenario do Consello da Cultura Galega (CCG) como membro representativo da Fundación Penzol entre os anos 2002 e 2008. A súa entrada no Álbum de Galicia, a colección dixital de biografías que mantén o CCG, é da autoría de María Dolores Cabrera Iglesias e Patricia Arias Chachero.

O Consello da Cultura Galega expresou o seu pesar polo falecemento de Blanca Jiménez Alonso, viúva de Fermín Penzol, e que fora integrante do Plenario da institución entre 2001 e 2008. Era presidenta de honra da Fundación Penzol e conselleira da Editorial Galaxia.
O Consello da Cultura Galega salientou “o entusiasta labor de Blanca Jiménez Alonso no desenvolvemento do ricaz patrimonio bibliográfico Fundación Penzol, creada por iniciativa do seu marido e aberta ao servizo de Galicia en Vigo desde 1963”. Lembrou asemade a “continuada colaboración da Fundación Penzol co Consello da Cultura desde a constitución desta institución en 1983”.
O funeral celebrarase mañá sábado día 6 de outubro ás 18´15 horas no tanatorio de Boisaca en Santiago de Compostela.