Arquivo de noticias do CCG

A celebración do Día das Letras Galegas arrincou coa décimo cuarta edición do Concerto das Letras Galegas, proposta musical e sonora do Consello da Cultura Galega (CCG) que este ano contou co apoio do Concello da Coruña. Un concerto que conciliou a faceta musical e literaria de Luísa Villalta e no que se estreou a ópera de cámara Concerto para un home só a partir da obra teatral homónima da homenaxeada e composta por Federico Mosquera. A presidenta do CCG, Rosario Álvarez; o presidente da Real Academia Galega, Víctor Freixanes; o secretario xeral da Lingua, Valentín García; a familia Villalta Gómez e unha ampla representación da sociedade e da cultura galegas encheron o Teatro Colón. O concerto poderá verse este venres na segunda canle da TVG (23:13 horas), no marco da programación especial para o Día das Letras.

Literatura e música son dúas facetas vencelladas á escritora e violinista Luísa Villalta (A Coruña, 1957-2004), homenaxeada este ano no Día das Letras Galegas. As dúas conflúen no programa da décimo cuarta edición do Concerto das Letras Galegas, iniciativa organizada polo Consello da Cultura Galega (CCG) que este ano conta co apoio do Concello da Coruña. O Teatro Colón acolle mañá (xoves 16, 20:30 horas) esta cita, que corre a cargo do Grupo Instrumental Siglo XX, dirixido por Florian Vlashi. No programa, alén dos compositores preferidos da homenaxeada, estrearase a peza Concerto para un home só, baseada na obra homónima de Luísa Villalta, que o CCG lle encargou a Federico Mosquera (A Coruña, 1986) para a ocasión. O concerto, de entrada libre ata completar a capacidade, tamén se poderá seguir en directo no web do CCG e nas plataformas da CRTVG.

Luísa Villalta: entender para vivir é a obra coa que o Consello da Cultura Galega (CCG) contribúe á celebración da figura homenaxeada nesta edición do Día das Letras Galegas. A presidenta do CCG, Rosario Álvarez, presentou esta publicación, que “naceu como un espazo para o diálogo entre a obra de Luísa e un monllo selecto de persoas que, sendo referentes no sistema cultural galego, mantiveron en vida vínculos coa autora e a súa obra”. Pola súa parte, Dolores Vilavedra, coordinadora do volume, destacou que son unha colección de textos que “amosan ben a natureza intrinsecamente dinámica e expansiva dun corpus precursor e versátil como poucos na nosa historia”. A publicación foi presentada nun acto ao que asistiu a familia de Luísa Villalta, representada na mesa pola súa irmá Susana, quen agradeceu a homenaxe, e Margarita Ledo, secretaria da Real Academia Galega (RAG), quen destacou que “este volume coincide coa achega diversa e comprometida da autora”. A obra xa está dispoñible para descarga no web do CCG.

Luísa Villalta (A Coruña, 1957-2004) foi, ademais dunha grande escritora, unha recoñecida violinista. Por iso, no programa desta edición do Concerto das Letras Galegas teñen unha presenza moi destacada os violíns e os compositores favoritos da homenaxeada este 17 de maio. A presidenta do Consello da Cultura Galega (CCG), Rosario Álvarez; o concelleiro de Fomento e Promoción da Cidade, Gonzalo Castro Pardo; a irmá de Luísa, Susana Villalta, e o director do Grupo Instrumental Siglo XX, Florian Vlashi, presentaron esta mañá o programa da décimo cuarta edición que busca, en palabras da presidenta, “unir literatura e música, dous fíos que están na propia biografía e actividade cultural de Luísa”. O concerto celebrarase na Coruña, cidade natal da homenaxeada (Teatro Colón, 20:30 horas), o 16 de maio, véspera do Día das Letras Galegas. A entrada é libre ata completar a capacidade.

Foi unha pioneira, unha muller destacada no ámbito musical. No seu dilatado currículo destaca o feito de ser a primeira muller en presidir unha Real Academia, entre moitos outros méritos. Chámase Mercedes Goicoa e a súa figura, e o que representa para a música e tamén para as mulleres, é obxecto dunha xornada que terá lugar mañá no Consello da Cultura Galega (CCG). A cita pode seguirse en directo desde o web da institución e nela participan figuras como Laura Quintillán, Mónica de Nut, Uxía Senlle, Maximino Zumalave ou Lucía Martínez. A presidenta da institución, Rosario Álvarez, será a encargada de inaugurar esta cita coordinada por María Xosé Porteiro e Alba María Rodríguez.

As actividades que o Consello da Cultura Galega (CCG) ten programadas para as vindeiras semanas están encamiñadas a analizar o patrimonio desde diferentes puntos de vista, ademais de volver poñer os ollos nun tema de actualidade como é a violencia de xénero. Ferrol acollerá un encontro para analizar a situación urbanística e patrimonial do seu casco urbano coa revisión do barrio da Madalena e do Ferrol vello (31 de outubro). Séguelle no tempo unha xornada para tratar o patriarcado na xustiza, que terá lugar o día 5 de novembro. Ademais, nesa mesma semana organizamos dous encontros relacionados co patrimonio: un para debullar as relacións fronteirizas con Portugal e outro para coñecer a situación actual do patrimonio dos ríos. Todas elas teñen aberto o prazo de inscrición, que se pode formalizar a través do sitio web da institución.

O Teatro Jofre de Ferrol acolle hoxe ás 20´30 horas a estrea absoluta do “Concerto para trompa e orquestra” (1948), de José Arriola (1895-1954), interpretado pola Real Filharmonía de Galicia baixo a dirección de Maximino Zumalave e con David Fernández Alonso como solista á trompa.