Arquivo de noticias do CCG

O Álbum de Galicia atende esta semana a traxectoria dun dos grandes etnógrafos da cultura galega, Xaquín Lorenzo Fernández (Ourense, 1907 - Facós, Lobeira, Ourense, 1989), quen desenvolveu a súa carreira da man de Florentino López Cuevillas e Vicente Risco. Asina a súa entrada Adrián Estévez Iglesias.

Florentino López Cuevillas, Castelao, Ramón Otero Pedrayo, Jesús Bal y Gay ou Vicente Risco son algúns nomes destacados da Xeración Nós. As súas viaxes, reais e literarias, serviron para situar a cultura galega en pé de igualdade con outras culturas. Sobre esas viaxes, a súa importancia e as consecuencias que tiveron, afonda a xornada Os camiños de Nós polo mundo que o Consello da Cultura Galega e a Fundación Vicente Risco organizan en Allariz este sábado 17 de setembro. A presidenta do CCG, Rosario Álvarez, xunto coa alcaldesa, Cristina Cid Fernández e a presidenta da Fundación Vicente Risco, Celia Pereira Porto, serán as encargadas de inaugurar esta cita que será gravada e se subirá á rede con posterioridade.

Entre o 8 e o 11 de xullo do ano Xacobeo de 1926, un grupo de galeguistas fixeron unha peregrinación de Ourense a Compostela. Foron Ramón Otero Pedrayo, Florentino López Cuevillas, Lois Feixóo, Vicente Risco, Antón Sánchez e Afonso Vázquez Monxardín. Aquela viaxe foi narrada por Xavier Pardo en “A Nosa Terra” nunha serie de crónicas que se estenderían durante un ano baixo o título “No camiño de Santiago: vieiros de fe, vieiros de ideal”. Agora, o Consello da Cultura Galega (CCG) pon a disposición da cidadanía aquela viaxe e faino coa tecnoloxía de hoxe. Desde mañá retransmitirase polas redes sociais da institución a camiñata como se fose narrada polos homes da Xeración Nós en directo.

Non é posible comprender Galicia e a súa cultura sen a xeración Nós e o rico legado que deixou. Para conmemorar o centenario do nacemento da revista “Nós” en Ourense en 1920, o Consello da Cultura Galega recolle neste especial contidos producidos pola institución que dan conta da vida, obra e impacto dun grupo de intelectuais que entenderon Galicia como un proxecto integral. Son materiais biográficos, documentais e de reflexión ao redor da revista “Nós” e da xeración que a ideou. O especial contén unha pequena xoia, chámase “Os quixotes da Terra van de camiño” e ofrece sete viaxes por Galicia a partir dos roteiros que Ramón Otero Pedrayo deseñou para o seu amigo Silvio Santiago na segunda metade dos anos 60. Ademais dos manuscritos orixinais debuxados por Otero Pedrayo, pódese seguir cada un deses trazados a través dunha viaxe multimedia xeolocalizada e enriquecida con materiais contemporáneos.

No extenso e prolífico labor cultural de Filgueira Valverde, a música ten un protagonismo destacado. Foi un dos promotores da Sociedade Coral Polifónica de Pontevedra e impulsor do Festival da Canción que se desenvolveu na cidade onde foi alcalde, entre moitos outros logros. Unha traxectoria que o Consello da Cultura Galega recupera no programa do seu tradicional Concerto das Letras Galegas, que terá lugar o vindeiro sábado 16 no Auditorio Sede Afundación de Pontevedra.

“Aínda non cumprira os vinte anos cando Filgueira Valverde escribiu Os nenos, un libro de creación literaria que dá as claves do que pensaba a xeración do Seminario de Estudos Galegos”, explicou Ramón Villares, presidente do Consello da Cultura Galega (CCG), na presentación desenvolvida esta mañá. Canda el estaba Fernando Filgueira, presidente da fundación que leva o nome do polígrafo pontevedrés; Ana Isabel Vázquez, deputada provincial de Cultura; Maximino Zumalave, vocal do CCG; Carlos Valle, director do Museo de Pontevedra, e David Pintor, autor das ilustracións que acompañan a edición facsimilar deste texto, enriquecido con dous estudos críticos. A publicación insírese nas actividades previstas polo CCG para conmemorar a celebración do Día das Letras Galegas dedicado a “unha figura esencial na construción das institucións do século XX”, en palabras de Ramón Villares.

Xosé Filgueira Valverde (Pontevedra, 1906-1996) mantivo unha extensa correspondencia con Castelao, Otero Pedrayo, Vicente Risco e a maior parte da intelectualidade galega do século XX. As máis de 500 carpetas con cartas que repousan no Museo de Pontevedra son unha mostra desa fecunda relación. Todas elas, xunto con outros documentos, serán dixitalizadas polo Consello da Cultura Galega en virtude dun acordo de colaboración asinado esta mañá polo presidente desta institución, Ramón Villares, e Fernando Filgueira Iglesias, fillo e presidente da Fundación Filgueira Valverde, ante a presenza de Ana Isabel Vázquez, deputada da Área de Cultura da Deputación de Pontevedra e Carlos Valle, director do museo.

O SIMPOSIO DE ANTROPOLOXÍA "LEMBRANDO A DON XAQUÍN LORENZO" servirá para estudar as orientacións que guiaron ao creador da etnografía galega e tamén para atender as incitacións da sociedade actual desde a perspectiva e a reflexión da antropoloxía cultural. Os obxectivos resumiunos o profesor Xosé Manuel González Reboredo durante a presentación do encontro que vai celebrarse os días 25, 26 e 27 de novembro no Museo do Pobo Galego, en Santiago de Compostela.