Arquivo de noticias do CCG

No día en que Manuel María (Outeiro de Rei, 1929- A Coruña, 2004) cumpriría 94 anos, a súa biografía entra no Álbum de Galicia. É unha referencia imprescindible no panorama literario da segunda metade do século XX, pola amplitude dos seus rexistros, das súas propostas e da súa temática. A súa entrada foi elaborada por Alberte Ansede, presidente da fundación que leva o nome do intelectual.

Editor, arquiveiro e historiador, Andrés Martínez Salazar (Astorga,1846 - A Coruña, 1923) foi unha das principais figuras do rexionalismo galego, sobre todo no campo da cultura e como impulsor do rexurdimento literario do país. A súa entrada, que hoxe se inclúe no Álbum de Galicia, colección de biografías que elabora o Consello da Cultura Galega (CCG), foi elaborada por Alfonso Mato.

María del Pilar Pereira Carballo (Santiago, 1937-2020) foi unha actriz de teatro e locutora radiofónica pioneira, aínda que tamén foi autora e directora escénica e traballou como actriz de cinema e televisión. Foi “un referente e posúe unha dilatada, destacada e versátil carreira” asegura Ana Abad de Larriba, que asina a entrada que hoxe se inclúe no Álbum de Galicia, colección de biografías que elabora o Consello da Cultura Galega (CCG).

Aureliano José Pereira de la Riva (Lugo, 1855 - Madrid, España, 1906) foi unha figura relevante dentro do republicanismo galego. Unha manifestación política que en Galicia “nin foi esporádica, nin puntual, nin intermitente, nin limitada a un par de cidades” como apunta Xurxo Martínez na entrada que hoxe se inclúe no Álbum de Galicia, colección de biografías que elabora o Consello da Cultura Galega (CCG).

María Victoria de la Fuente (Vigo, 1927- Madrid, 2009) foi unha pintora de gran proxección artística no Madrid da segunda década do século XX. A súa historia entra agora no Álbum de Galicia, a colección de biografías dixitais do Consello da Cultura Galega (CCG), cunha entrada asinada por Xosé Ramón Fandiño.

No ano 1921, a Hispanic Society encomendou á fotógrafa Ruth Matilda Anderson o labor de viaxar á Península Ibérica para desenvolver un traballo de documentación baseado, nomeadamente, no fotografado do traxe tradicional e outras manifestacións da cultura material galega. Desa encomenda saíron diferentes viaxes que construír a documentación máis completa que unha persoa estranxeira erguera nunca sobre o noso país. A historia da fotógrafa americana e o seu legado entra agora no Álbum de Galicia, a colección de biografías dixitais do Consello da Cultura Galega (CCG), nunha entrada asinada por Vitor Vaqueiro.

O protagonismo que tivo no banquete de Conxo, o seu compromiso social ou a relación con Rosalía de Castro marcan a traxectoria cultural, política e vital de Aurelio Aguirre, unha figura sobranceira entre os poetas do século XIX. Mais toda a súa obra estivo escrita en castelán (só deixou un poema en galego) polo que a súa figura quedou relegada a un segundo plano. Xurxo Martínez González asina a súa entrada no Álbum de Galicia, a colección de biografías dixitais do Consello da Cultura Galega (CCG).

O Álbum de Galicia, colección dixital de biografías do Consello da Cultura Galega (CCG), incorpora esta semana a entrada de Afonso o Sabio, X de Castela e IX de Galicia-León. Henrique Monteagudo é o autor da entrada desta figura imprescindible para a cultura galega e nela descríbeo como “monarca das Letras Galegas medievais”.

No ano en que o Seminario de Estudos Galegos (SEG) conmemora o centenario da súa creación, o Álbum de Galicia do Consello da Cultura Galega (CCG) está a incorporar as entradas de diferentes membros vinculados coa institución. No día de hoxe súmanse á colección as biografías de Luciano Fariña Couto (1916-2011), Antonio Iglesias Vilarelle (1891-1971), Manuel Lago González (1865-1925) e Sebastián González García-Paz (1908-1967). Asínanas, respectivamente, Francisco Fariña, José Antonio Cantal, Xosé Ramón Fandiño e Adrián Estévez.

Ana María Múgica Martínez (Donostia, Guipúscoa, 1898 – Lugo, 1981) dedicouse profesionalmente á ensinanza, un ámbito en que destacou por converterse na primeira catedrática de Ciencias da Escuela Normal de Maestras de Lugo. “Foi unha ensinante moi activa e namorada da súa profesión”, destaca María Isabel Fernández García. Ela é a autora da entrada que se incorpora hoxe ao Álbum de Galicia, a colección dixital de biografías que mantén o Consello da Cultura Galega (CCG).

Alejandro Viana (Ponteareas, Pontevedra, 1877 – México D. F., 1952) desenvolveu a súa traxectoria como empresario e político. De ideoloxía republicana, acadou en 1936 a acta de deputado nas Cortes pola Fronte Popular, cargo en que permaneceu ata 1939, cando se exiliou a Francia. Dende alí organizou varias expedicións marítimas que permitiron o traslado duns 17 000 refuxiados republicanos a América. A súa entrada no Álbum de Galicia, a colección dixital de biografías que mantén o Consello da Cultura Galega (CCG), é autoría de Roberto Mera.

Gustavo Pernas Cora (Viveiro, Lugo, 1959 – A Coruña, 2018) destacou na súa traxectoria como actor, director de escena e dramaturgo. Foi unha das “figuras fundamentais das artes escénicas galegas e, especialmente, da dramaturxia galega contemporánea”, subliña Ana Abad de Larriva. Ela é a autora da entrada que se incorpora hoxe ao Álbum de Galicia, a colección dixital de biografías que mantén o Consello da Cultura Galega (CCG).