Arquivo de noticias do CCG

Os expertos da xornada A responsabilidade social corporativa en galego coincidiron en sinalar a creación dun relato propio, único e veraz e o establecemento dun diálogo cos usuarios como algunhas claves para unha boa RSC. O compromiso coa comunidade en que a empresa desenvolve a súa actividade ecónomica e a repercusión dos seus beneficios nesa sociedade son cruciais e, nese sentido, a lingua e a cultura galega deben ocupar un lugar prioritario nas empresas galegas.

En 1995 un estudo revelaba que os directivos das empresas non eran reacios e a empregar o galego nos seus produtos comerciais nin na comunicación corporativa. 17 anos despois, unha xornada pon sobre a mesa a publicidade en galego para coñecer a situación actual desta realidade. Publicistas, empresarios e expertos no ámbito da comunicación publicitaria participarán no seminario A publicidade en galego, que terá lugar mañá, xoves 23 de outubro na sede da institución.

As debilidades da publicidade no noso idioma son algúns dos temas que centran a xornada A Publicidade en Galego, unha cita que terá lugar no Consello da Cultura Galega o vindeiro día 23 de outubro. Publicistas, empresarios e expertos no ámbito da comunicación publicitaria participarán neste seminario, que ofrecerá un marco histórico actual desde todos os ámbitos implicados na materia. Está aberto o prazo de inscrición (100 prazas, de balde), que se pode facer a través da web.

O presidente do Consello da Cultura Galega foi o encargado de facer a presentación da nova publicación do Arquivo Sonoro de Galicia, Poetas e narradores nas súas voces, un libro que recolle textos de 31 autores galegos contemporáneos e que está complementado cun doble CD, onde se atopan as voces destes literatos, "unha obra que é o primeiro volume dunha serie que se quere proseguir, recollendo as voces de poetas e dramaturgos galegos de hoxe", segundo asegurou Carlos Casares no acto que tivo lugar esta mañá no Salón de Actos do Consello da Cultura Galega.

Con motivo da presentación oficial do libro Poetas e Narradores nas súas voces, o Consello da Cultura Galega organiza un acto que terá lugar mañá, venres 8 de xuño, ás 12,00h. no Salón de Actos do Consello da Cultura Galega. O acto contará coa participación de oito dos escritores que participaron nesta publicación do Arquivo Sonoro de Galicia, que serán presentados polo presidente do Consello da Cultura Galega, Carlos Casares. Do mesmo xeito, o acto aproveitarase para facer público o nomeamento do novo responsable do Arquivo Sonoro de Galicia, Paulino Novo Folgueira.

As editoriais en linguas minorizadas deben formular estratexias rápidas para poder contrarrestar os efectos dun mercado globalizado. Así o sinalaron os editores reunidos nas xornadas de Galeusca 2001 de Editores, no Consello da Cultura Galega. As xornadas de traballo reunen a representantes e directivos de editoriais en lingua galega, catalana e basca e rematarán mañá venres e están organizadas este ano pola Asociación Galega de Editores en colaboración con diversas institucións autonómicas.

Os editores en linguas minorizadas reclaman unha maior defensa das identidades e linguas propias no proceso actual da globalización cultural. Así o manifestaron os editores reunidos nas xornadas de traballo Galeusca 2001 de Editores, reunidos no Consello da Cultura Galega.