Arquivo de noticias do CCG

O Consello da Cultura Galega (CCG) acolleu esta mañá a presentación das XVIII Xornadas do Peregrino “Abrindo Camiño”, que poñen o foco na figura de Andrea López Chao (Mondoñedo, 1874 - A Habana, 1954), destacada mestra do galeguismo na emigración. Rosario Álvarez, presidenta do CCG, subliñou que “Andrea foi muller, docente, emigrante, militou no asociacionismo, feminista... constantes que nos convocan constantemente”. Pola súa parte, Isabel Martínez, subdirectora xeral de Relacións coas Comunidades Galegas da Xunta, puxo o énfase en que foi “un referente e unha pioneira no compromiso social coas mulleres”. Tamén interviñeron Alberto García, concelleiro de Cultura de Mondoñedo, e Luís Fernández Ansedes, membro da asociación Abrindo Camiño, quen destacaron a importancia das actividades que se desenvolverán o vindeiro día 15 en Mondoñedo. Ademais da presentación do documental sobre a súa figura, da man dos seus directores Violeta Ramos e Daniel Vázquez, estivo presente a bisneta da homenaxeada, Patricia Ares.

O Consello da Cultura Galega (CCG) pecha un ano de actividade arredor da figura de Francisco Fernández del Riego, cunha xornada no seu Lourenzá natal. Diferentes especialistas afondarán nas relacións do homenaxeado no Día das Letras Galegas desta edición coa emigración e o seu papel como colaborador nas publicacións da colectividade galega en América. A alcaldesa do concello de Lourenzá, Rocío López García, e o vicepresidente do CCG, Xosé M. Núñez Seixas, inauguran este venres, 1 de decembro (19:00 horas), a cita titulada “Fernández del Riego: de Lourenzá a América”.

A presidenta do Consello da Cultura Galega (CCG), Rosario Álvarez, recibiu esta mañá a visita dos responsables de diferentes entidades organizadoras das Xornadas do Peregrino Abrindo Camiño, coas que o CCG colabora. Esta edición, a número 16, leva por título "Camiño de Santiago e emigración" e servirá de homenaxe á mestra galega emigrada en Cuba Andrea López Chao. As xornadas terán lugar en diversos espazos de Mondoñedo e Santaballa (Vilalba) entre o 30 de xuño e o 2 de xullo.

Mestra de profesión, a actividade de Andrea López Chao (Mondoñedo, 1874 - A Habana, 1954) estivo estreitamente vinculada ao colexio do Centro Galego da Habana, no que traballou como docente e onde chegou a ser unha das súas máis distinguidas profesoras. Ademais, tivo un destacado papel no movemento societario galego e, en especial, na defensa a prol da mellora da situación das mulleres emigradas. A aparición de novos documentos, como o discurso que pronunciou no I Congreso Nacional de Mujeres, celebrado na Habana entre o 1 e 6 de abril de 1923, motivaron a revisión e actualización da súa entrada no Álbum de Galicia, a colección dixital de biografías que mantén o Consello da Cultura Galega (CCG). A entrada é autoría de Prudencio Viveiro.

O Consello da Cultura Galega (CCG) e o Instituto de Estudo das Identidades do Museo do Pobo Galego organizan mañá mércores, 4 de novembro, a primeira mesa redonda do VI Foro “A identidade galega no mundo da globalización. Sociedade, Lingua e cultura”. Esta cita, que se pode seguir en directo a través do web do CCG, está coordinada por Paulo Carlos López, que participará xunto con Ramón Villares, Antía Pérez Caramés e Olga Castro.

O catedrático de Filosofía Política Daniel Innerarity abre mañá (mércores 12 ás 18:00 horas) no Consello da Cultura Galega (CCG) o foro “A identidade galega no mundo da globalización”. Unha cita que pretende situarnos nun contexto global e recuperar un debate que iniciou a xeración Nós un século antes. A conferencia inaugural ten como título “Quen somos nós?” e afondará nas transformacións sociais e políticas actuais, na necesidade de crear un novo tipo de cidadanía e nas diferentes formas de goberno. O vicepresidente do CCG, Xosé Manoel Núñez Seixas, será o encargado de presentar esta cita, que se poderá seguir en directo desde o web da institución.

Un espazo de reflexión para situar a identidade galega nun contexto global e, ao mesmo tempo, lembrar que un século antes a xeración Nós se situou na mesma perspectiva. Con estes dous propósitos o Consello da Cultura Galega (CCG) súmase ao Museo do Pobo Galego na organización da sexta edición do foro “A identidade galega no mundo da globalización. Sociedade, lingua e cultura”. Unha iniciativa que deron a coñecer esta mañá a presidenta do CCG, Rosario Álvarez; o director xeral de Políticas Culturais, Anxo M. Lorenzo; o presidente do Padroado do Museo do Pobo Galego, Justo Beramendi; e os dous coordinadores: Dolores Vilavedra e Uxio Breogán. Rosario Álvarez destacou que “sumamos esforzos para colocar o foco nas identidades e darlles continuidade ás preocupacións xa formuladas pola xeración Nós”.