Arquivo de noticias do CCG

O Álbum de Galicia, colección de biografías do Consello da Cultura Galega (CCG), incorpora hoxe a entrada de Ángel Brage Villar (Santiago de Compostela, 1903 – 1983). Foi director de orquestra teatral, profesor de piano e director da Escola Municipal de Música de Santiago. Loitou porque se recoñecera a música como disciplina universitaria e mantivo activa a Escola durante a Guerra Civil e Posguerra. David Ferreiro Carballo asina a entrada que está dispoñible para consultar no web do CCG.

No serán deste martes finaba en Santiago de Compostela o pianista, empresario e político Ramón Castromil. O Consello da Cultura Galega expresa o seu fondo pesar de quen foi membro do seu Plenario entre 1993 e o 2006 e vicepresidente entre 1998 e 2006.

“Antonio Fraguas e a memoria musical de Cotobade” é o libro-CD que mañá xoves (19:00 horas) se presenta no Consello da Cultura Galega. A secretaria da institución, Dolores Vilavedra, participa neste acto que pretende dar a coñece o traballo realizado por Xavier Groba e editado pola Central Folque no que se recolle a primeira achega á música de transmisión oral do concello de Cotobade. Tamén estarán presentes Ramón Castromil e Ramon Pinheiro Almuinha.

O Consello da Cultura Galega lamenta a morte de Manuel Fraga Iribarne, ex Presidente da Xunta de Galicia. De acordo coa Lei do Consello da Cultura Galega, Manuel Fraga foi tamén Presidente de Honra desta institución durante todos os anos que exerceu o seu cargo como xefe do Executivo galego, entre 1990 e 2005. O actual Presidente do CCG, Ramón Villares, valorou positivamente a relación de Fraga coa institución e salientou o seu apoio manifestado ao participar de forma regular nas súas sesións plenarias e nalgunhas das súas actividades. Considerou tamén decisiva a intervención de Manuel Fraga, canda o Presidente do CCG Xosé Filgueira Valverde, para que o Consello se instalase na sede actual, no Pazo de Raxoi en Santiago de Compostela, en 1994, xa que ata ese momento non tivera unha sede fixa.



XX Aniversario do Consello da Cultura Galega. Franciso Díaz-Fierros, José María García Leira, Manuel Fraga, Alfonso Zulueta, Ramón Castromil e Henrique Monteagudo. Foto: CCG

O Teatro Jofre de Ferrol acolle hoxe ás 20´30 horas a estrea absoluta do “Concerto para trompa e orquestra” (1948), de José Arriola (1895-1954), interpretado pola Real Filharmonía de Galicia baixo a dirección de Maximino Zumalave e con David Fernández Alonso como solista á trompa.

A Comisión Executiva do Consello da Cultura Galega (CCG) celebrará este martes, día 12, en Vigo a súa reunión ordinaria semanal. Será ás 17´00 horas no Pazo de San Roque. Á sesión de traballo, presidida polo presidente do CCG, Alfonso Zulueta de Haz, acudirán os vicepresidentes: Ramón Castromil, Francisco Díaz Fierros e Xosé López, o secretario, Henrique Monteagudo, e o xerente, Antonio Montero.

O Consello da Cultura Galega (CCG) acolleu este venres a presentación do CD "Crónicas porteñas" do gaiteiro Manuel Dopazo, considerado o máis grande gaiteiro da emigración. A obra está editada pola discográfica "Ouvirmos" e conta co patrocinio do Arquivo Sonoro de Galicia do CCG.

O Consello da Cultura Galega (CCG) acollerá este venres, 3 de xuño, ás 12´30 horas, a presentación do CD "Crónicas porteñas", que reúne unha parte do legado musical de Manuel Dopazo (1882-1952), considerado por moitos como o máis grande gaiteiro da emigración.

O Consello da Cultura Galega acolle desde mañá a cuarta edición do Encontro O Son da Memoria, organizado polo Arquivo Sonoro de Galicia. Estudosos, músicos e xente vinculada á produción artística e cultural analizarán nesta cita as músicas emigradas, a produción musical dos galegos fóra do país. As xornadas tamén inclúen unha homenaxe ao gran compositor galego Andrés Gaos.

A música galega na emigración será o tema de debate e análise do IV Encontro O Son da Memoria, organizado polo Arquivo Sonoro de Galicia (Consello da Cultura Galega). O encontro celebrarase este xoves e venres, días 17 e 18 de febreiro, e contará coa participación de destacados expertos, músicos e de xente vinculada á produción musical e cultural, como Deborah Pacini, Andrés Gaos e o antropólogo arxentino Norberto Pablo Cirio.

O Consello da Cultura Galega (CCG) presentará este martes, día 15 de febreiro, o IV Encontro "O son da memoria", dedicado á música galega na emigración.

O Pleno do Consello da Cultura Galega (CCG) reunido hoxe en sesión ordinaria, a primeira do novo ano, elixiu por unanimidade ao xornalista e profesor Xosé López García como novo vicepresidente da institución.

O Pleno do Consello da Cultura Galega (CCG) reunirase en sesión ordinaria, a primeira do novo ano, o vindeiro venres, día 14 de xaneiro, ás 17´00 horas. Nesta reunión procederase á elección dun novo vicepresidente entre os membros do Pleno. O novo cargo ampliará os integrantes da Comisión Executiva, que conta actualmente cun presidente, Alfonso Zulueta de Haz; dous vicepresidentes, Ramón Castromil Ventureira e Francisco Díaz-Fierros Viqueira, e un secretario, Henrique Monteagudo Romero.

A Sección de Cultura Galega no Exterior do Consello da Cultura Galega (CCG) inaugura esta tarde, ás 20:00 horas, a exposición "Galicia, o sorriso de Daniel" na Universitat de Barcelona, dentro do circuíto de actividades do Fórum Universal das Culturas de Barcelona.

A Comisión Executiva do Consello da Cultura Galega (CCG) desprazarase mañá martes, día 20, a Ferrol para celebrar nesa cidade a súa reunión ordinaria semanal e estabelecer contactos co alcalde, Juan Juncal, e coa Corporación Municipal. Ás 11´00 horas está previsto o acto de recepción oficial no Concello, no que intervirán o alcalde da cidade e o presidente do CCG, Alfonso Zulueta de Haz.

O luns, día 2 de febreiro, ás 13´30 horas, celebrarase no salón de actos do Consello da Cultura Galega unha rolda de prensa para presentar o "V FESTIVAL ALTERNATIVO DE TEATRO MÚSICA E DANZA DE COMPOSTELA".

O empresario compostelán Ramón Castromil Ventureira, vicepresidente do Consello da Cultura Galega (CCG) e un dos artífices da recuperación do Casino de Santiago, recibiu onte o Premio Especial "Manuel Beiras" pola súa traxectoria de apoio decidido á promoción e á normalización do idioma galego, nomeadamente a través das campañas realizadas á fronte da empresa "Castromil", de transporte de viaxeiros.

O Consello da Cultura Galega (CCG) conmemorou este martes os seus primeiros vinte anos cun acto institucional presidido polo Presidente da Xunta, Manuel Fraga, e ó que asistiu o titular do Parlamento, José María García Leira, xunto con autoridades e representacións da vida cultural, política, relixiosa, económica e universitaria de Galicia. No acto fixeron uso da palabra o Presidente do CCG, Alfonso Zulueta de Haz, e o titular da Xunta, Manuel Fraga, Presidente de Honra da institución cultural. Ademais procedeuse á presentación da edición facsímile do "Códice de Toledo" das CANTIGAS DE SANTA MARIA, do Rei Alfonso X "O Sabio", e inaugurouse unha exposición bibliográfica cos fondos do Consello. O cantautor Amancio Prada ofreceu un recital cunha escolma de Cantigas dos trobadores galaico-portugueses e de Alvaro Cunqueiro. Unhas cento cincuenta persoas estiveron presentes nestes actos conmemorativos. Previamente celebraron sesións ordinarias a Comisión Executiva e o Plenario do CCG. O Códice de Toledo foi presentado polo profesor Henrique Monteagudo, secretario do CCG. Ramón Castromil, vicepresidente da institución, presentou ó catautor Amancio Prada.

O Arquivo Sonoro de Galicia, do Consello da Cultura Galega (CCG), celebra este venres, día 21, o III Encontro O Son da Memoria baixo o título "De quen é a palabra. Arquivos sonoros e propiedade intelectual". A xornada abordará a polémica en torno á xestión dos dereitos de autor e a propiedade intelectual ante as posibilides de difusión que ofrecen as novas tecnoloxías.