Arquivo de noticias do CCG

Como naceu o reino suevo? Por que din que arde o mar? Como era o universo imaxinario dos cadros de Urbano Lugrís? Que animais habitaron a Cova Eirós? Esta son algunhas das cuestións que se abordan en Ágora, nome co que o Consello da Cultura Galega presenta en formato podcast as conferencias pronunciada por diferentes personalidades na institución. William Shea, Michel Maffesoli, Xosé M. Núñez Seixas, Darío Villanueva, Isabel Burdiel, Justo Beramendi, Jorge Mira, Henar Gallego, Ramón Villares, entre outros especialistas se poden atopar neste proxecto que tamén inclúe as ficcións La lindona de Galicia e A Camisa.

Compañías afeccionadas, festivais ou xornadas de teatro... entre as décadas dos setenta e oitenta xurdiron diferentes iniciativas ao redor das artes escénicas que acabaron cristalizando no nacemento do teatro galego profesional. Para preservar a memoria dese período, o Consello da Cultura Galega (CCG) elaborou a serie documental Memoria do teatro galego na Transición. O proxecto complétase agora con dous novos episodios que se presentan este luns (16:30 horas) no marco dunha xornada encamiñada a reflexionar sobre este período crucial na historia cultural de Galicia e para afondar no proceso de recuperación e preservación da memoria escénica galega. Rosario Álvarez, presidenta do CCG, acompañada por Cristina Domínguez Dapena, coordinadora da Sección de Artes Escénicas, Musicais e Audiovisuais do CCG, e Inma António, presidenta da Academia Galega de Teatro, inauguran esta cita presencial que se pode seguir en directo polo sitio web e as redes da institución.

Foi ao final do franquismo cando xurdiron ao longo de toda Galicia diferentes iniciativas ao redor das artes escénicas. Desde compañías afeccionadas, festivais ou xornadas de teatro, aquel fervedoiro acabou cristalizando no nacemento do teatro galego profesional. Para preservar a memoria dese período, o Consello da Cultura Galega presentou hoxe os primeiros dous episodios da serie "Memoria do teatro galego na Transición", xa accesibles no web oficial do CCG.

O Consello da Cultura Galega (CCG) acode á 16ª edición da Culturgal, que se desenvolve ata o domingo 3 de decembro no Pazo da Cultura de Pontevedra, con dúas actividades para presentar os traballos audiovisuais producidos pola institución nos últimos meses ao redor de diferentes disciplinas artísticas contemporáneas. A presidenta, Rosario Álvarez, e mais os responsables da Sección de Artes Escénicas, Musicais e Audiovisuais, do Arquivo Sonoro de Galicia e da Comisión Técnica de Relacións Institucionais e Acción Exterior, Cristina Domínguez, Alejo Amoedo e Xavier Queipo, respectivamente, acompañados de diferentes profesionais que participan nestes proxectos, asistirán ás dúas presentacións, que terán lugar mañá domingo (12:00 e 17:00 horas).

Este venres, na Mostra Internacional de Teatro de Ribadavia (MIT), presentarase un avance do vindeiro proxecto audiovisual da institución, promovido desde a Sección de Música, Artes Escénicas e Audiovisuais do Consello da Cultura Galega (CCG). Chámase “Memoria do teatro galego da transición” e consiste nunha serie audiovisual arredor da recuperación da actividade teatral en Galicia nos anos setenta e oitenta do século XX. Estarán presentes a presidenta do CCG, Rosario Álvarez; o alcalde de Ribadavia, César Álvarez; a presidenta da Academia Galega de Teatro, Imma António Souto; a coordinadora da Sección de Música e responsable do proxecto, Cristina Domínguez; o director da MIT, Roberto Pascual, e Tito Asorey, director das dúas primeiras pezas audiovisuais do proxecto. Un día despois, o sábado 22, no marco deste proxecto, terá lugar un debate sobre a importancia da MIT no sistema teatral galego.

O Consello da Cultura Galega e o concello do Barco de Valdeorras rematan hoxe a difusión do proxecto A camisa, a adaptación sonora do texto dramático escrito por Lauro Olmo (O Barco de Valdeorras, 1922-Madrid, 1994) que retrata o drama da emigración e do exilio. A ficción en formato podcast foi feita por A quinta do Cuadrante, con dirección de Tito Asorey, a partir da tradución que Ramón de Valenzuela fixo do texto orixinal. Este proxecto serviu para conmemorar o centenario do nacemento de Lauro Olmo e o sesenta aniversario da estrea da peza.

A desesperanza acentúase no cuarto episodio de A camisa. O matrimonio formado por Xan e Lola pasa polo seu momento máis difícil, xa que o ansiado traballo non acaba de chegar e a emigración semella xa a única saída, decisión na que non concordan. Xa está dispoñible o penúltimo episodio da adaptación sonora da peza homónima escrita por Lauro Olmo (O Barco de Valdeorras, 1922-Madrid, 1994). A ficción en formato podcast foi feita por A quinta do Cuadrante, con dirección de Tito Asorey, e parte da tradución que Ramón de Valenzuela fixo do texto orixinal. O Consello da Cultura Galega (CCG) e o concello do Barco de Valdeorras foron os encargados deste proxecto que conmemora o centenario do nacemento de Lauro Olmo e o sesenta aniversario da estrea da peza.

A decisión de Lola de marchar traballar a Alemaña ante a negativa do seu home a facelo centra o terceiro dos episodios de A Camisa, adaptación sonora da premiada peza dramática escrita por Lauro Olmo (O Barco de Valdeorras, 1922-Madrid, 1994). A ficción en formato podcast foi feita por A quinta do Cuadrante, con dirección de Tito Asorey, e parte da tradución que Ramón de Valenzuela fixo do texto orixinal. O Consello da Cultura Galega (CCG) e o concello do Barco de Valdeorras foron os encargados deste proxecto que conmemora o centenario do nacemento de Lauro Olmo e o sesenta aniversario da estrea da peza.

O segundo episodio de A camisa aborda a emigración forzosa ao estranxeiro dun dos amigos de Xan, o protagonista, que insiste na súa idea de ficar e continuar á busca de traballo. Continúa a narración da premiada peza dramática escrita por Lauro Olmo (O Barco de Valdeorras, 1922-Madrid, 1994) que retrata o dama da emigración. A adaptación sonora en formato podcast feita por A quinta do Cuadrante, dirixida por Tito Asorey, parte da tradución que Ramón de Valenzuela fixo do texto orixinal. O Consello da Cultura Galega (CCG) e o concello do Barco de Valdeorras foron os encargados deste proxecto que conmemora o centenario do nacemento de Lauro Olmo e o sesenta aniversario da estrea da peza.

A camisa é unha peza dramática escrita por Lauro Olmo (O Barco de Valdeorras, 1922-Madrid, 1994) que retrata o dama da emigración na pel dunha familia que se traslada a Madrid coa esperanza dun mundo mellor. O barquense retratouna nunha premiada e representada obra que outro escritor, o silledense Ramón de Valenzuela, puxo en galego. A partir desa tradución, o Consello da Cultura Galega (CCG) e o concello do Barco de Valdeorras déronlle unha nova vida ao texto, cunha adaptación sonora dividida en cinco episodios que se distribúe en formato podcast. Tito Asorey foi o encargado de dirixir a ficción sonora na que participan Melania Cruz, Josito Porto e o propio Asorey, entre outros. O proxecto, que conmemora o centenario do nacemento de Olmo e o sesenta aniversario da estrea da peza, foi presentado esta mañá no concello ourensán pola presidenta do CCG, Rosario Álvarez; o alcalde, Alfredo García; a concelleira de Cultura e Educación, Margarida Pizcueta, e mais unha das actrices da ficción sonora, Melania Cruz. O primeiro dos episodios xa está dispoñible no especial homónimo no web do Consello da Cultura Galega.

Os relatorios da última xornada do congreso internacional Emilia Pardo Bazán. 100 anos despois coincidiron en destacar que o seu pensamento social e feminista a situaron como unha anticipada ao seu tempo. “As súas denuncias e demandas foron sen dúbida todo un programa intelectual” afirmou a historiadora Isabel Burdiel que destacou que Pardo Bazán “ampliou o límite do que se podía dicir hai cen anos”. A sesión que se desenvolveu este venres no Consello da Cultura Galega(CCG) puxo de relevo as contradicións entre a modernidade do seu pensamento e o seu conservadurismo político e o seu catolicismo. Con ela rematou unha semana na que unha trintena de especialistas afondaron no coñecemento dunha das grandes novelistas do século XIX europeo.

Este venres finaliza na sede do Consello da Cultura Galega (CCG) o congreso internacional Emilia Pardo Bazán. 100 anos despois que organizan conxuntamente o CCG, a Real Academia Galega (RAG) e a Universidade de Santiago (USC). A cita de clausura abordará o feminismo e a vixencia do pensamento da reputada escritora coruñesa. Isabel Burdiel, Ramón Villares, Jo Labanyi ou Pura Fernández son algunhas das personalidades que analizarán este venres unha das facetas menos estudadas da escritora coruñesa.

Na véspera do Día Mundial do Teatro, o Consello da Cultura Galega (CCG) presenta “A Lindona de Galicia”, un proxecto que explica e ficciona en cinco episodios sonoros unha obra que foi moi representada durante dous séculos. O texto é unha comedia de enredo protagonizada por unha brava muller que fala en lingua galega e que se afasta dos arquetipos da época. A adaptación en formato podcast desta peza foi dirixida por Tito Asorey, quen tamén a protagoniza xunto con Melania Cruz, Sergio Zearreta e Josito Porto. A presidenta do CCG, Rosario Álvarez; o coordinador do proxecto, Manuel Gago; e o director da adaptación, Tito Asorey, presentaron esta ficción que comeza a emitirse hoxe acompañada dunha serie de artigos contextualizadores.

A presidenta do Consello da Cultura Galega (CCG), Rosario Álvarez; o presidente da Real Academia Galega (RAG), Víctor Freixanes; a vicerreitora de cultura da Universidade de Santiago de Compostela (USC), Mar Lorenzo; xunto co secretario xeral de cultura, Anxo Lorenzo; o coordinador do congreso, Xosé Manuel González Herrán; e o director da Área de Cultura do Concello da Coruña, Rómulo Sanjurjo, presentaron esta mañá na sede da RAG o programa do “Congreso Internacional Emilia Pardo Bazán 100 anos despois”. É unha das actividades centrais preparadas para afondar na figura da escritora coruñesa no centenario no do seu pasamento, que se cumple o vindeiro 12 de maio. Ademais, a presidenta do CCG e o da RAG asinaron un convenio para a dixitalizacion e difusión en rede do epistolario da escritora coruñesa .

O Consello da Cultura Galega (CCG) pon na rede a décima edición do Concerto das Letras Galegas. A tradicional cita, que se celebra cada ano como antesala do Día das Letras Galegas, estivo este ano condicionada pola situación sanitaria. Despois de varios cambios, tivo lugar o 30 de outubro no Auditorio de Santiago, sen público e con retransmisión en directo por Internet. Nesta edición, a música correu a cargo do Taller Atlántico Contemporáneo cun programa en honor á literatura e música ferrolás, terra natal de Ricardo Carballo Calero, e supuxo a estrea absoluta da composición de Nani García sobre o poema “Danza” da figura homenaxeada nesta edición. O concerto súbese hoxe á rede, na véspera da celebración do Pleno Extraordinario que a Real Academia Galega realizará mañá en homenaxe a Ricardo Carballo Calero.

Como sería unha xuntanza de “zoom” entre Concepción Arenal, Rosalía de Castro e Emilia Pardo Bazán para resolver un asasinato? Isto é o que propón “As mulleres do porvir”, o texto escrito por Dorotea Bárcena en 2003 e que agora se recupera en formato audiovisual. Hoxe, 23 de novembro, o Consello da Cultura Galega (CCG) fai confluír o cabodano da morte de Dorotea Bárcena co bicentenario do nacemento de Concepción Arenal nun produto audiovisual que conecta estas dúas mulleres pioneiras. A Quinta do Cuadrante, compañía dirixida por Tito Asorey, foi a encargada de realizar unha lectura dramatizada do texto de Bárcena na que participa Susana Dans, María Vázquez, Melania Cruz e Rocío González.

A décima edición do Concerto das Letras Galegas terá lugar na rede. O concerto, que se ía celebrar en Ferrol, por ser a localidade de nacemento de Ricardo Carballo Calero, tivo que ser adaptado por mor da crise sanitaria actual. O Consello da Cultura Galega (CCG) decidiu manter esta cita e difundila na rede. Será mañá venres, día en que a figura homenaxeada neste ano cumpriría 110 anos, ás 19:30 horas e retransmitirase en directo desde o web do Consello da Cultura Galega. A proposta desta edición correrá a cargo do Taller Atlántico Contemporáneo. A presidenta da institución, Rosario Álvarez, destaca que malia o cambio “seguirá fiel á súa esencia e ofrecerá un diálogo entre a música e a literatura galega, cun claro aceno á cultura da localidade escollida para a súa celebración, aínda que non se puidese celebrar como estaba previsto”. Cada edición do concerto ofrece a estrea absoluta dunha peza e nesta ocasión Nani García ponlle música ao poema “Danza” de Carballo Calero.

O Teatro Jofre de Ferrol acolleu esta tarde un acto de homenaxe a Ricardo Carballo Calero. Unha cita organizada polo Consello da Cultura Galega (CCG) que serviu para amosar a faceta polifacética e creadora do autor homenaxeado este ano co Día das Letras Galegas. A presidenta do CCG, Rosario Álvarez destacou na súa intervención que “presentamos dúas pezas que, en dous contextos distintos, evocan a cidade de Ferrol”. No acto tivo lugar a presentación da publicación institucional “Farsa das zocas” coa que a institución recuperou esta obra teatral de Carballo Calero, acompañada dun estudo introdutorio de Carlos Biscainho. Rematou co concerto “Ferrol 1916” no que se estreou a peza que o compositor Miguel Brotóns realizou a partir dun poema homónimo de Carballo.

O Teatro Jofre de Ferrol é o escenario elexido polo Consello da Cultura Galega (CCG) para lembrar mañá a figura de Ricardo Carballo Calero, autor homenaxeado neste 2020 co Día das Letras Galegas. A cita ten un carácter dobre, xa que se presentará a publicación institucional “Farsa das zocas” coa que a institución recupera esta obra teatral de Carballo Calero, acompañada dun estudo introdutorio de Carlos Biscainho. Ademais, terá lugar o concerto “Ferrol 1916” no que se estreará a peza que o compositor Miguel Brotóns realizou a partir dun poema homónimo de Carballo.

O vindeiro mércores 14 de outubro, o Consello da Cultura Galega (CCG) celebrará no teatro Jofre de Ferrol (19:30 horas) un acto de homenaxe a Ricardo Carballo Calero. Esta proposta, adiada a outono por mor da pandemia, supón a estrea da peza “Ferrol, 1916”, unha composición que o alacantino Miguel Brotóns fixo a partir dun poema do autor ferrolán. O acto servirá tamén de presentación da publicación “Farsa das zocas” coa que a institución recupera esta obra teatral do autor homenaxeado neste ano co Día das Letras Galegas, acompañada dun estudo introdutorio de Carlos Biscainho. A presidenta da institución, Rosario Álvarez, asistirá a este acto de homenaxe que ten entrada gratuíta.