Arquivo de noticias do CCG

Un concerto conformado por un coro de 350 nenos e nenas de toda Galicia puxo fin á terceira edición de “No bico un cantar”. Unha cita organizada polo Consello da Cultura Galega (CCG) e a Consellería de Cultura, Educación e Ordenación Universitaria que xunta poesía, música e mocidade. O poeta elixido foi Ramón Cabanillas (Cambados, 1876-1959) polo que o concerto se celebrou na súa localidade natal, nun espazo tan emblemático como son os xardíns do Pazo de Torrado. Maximino Zumalave repetiu como director deste gran coro infantil que tivo un dos seus momentos máis destacados na estrea absoluta da versión musical do poema “Fala unha laverca”, que o CCG lle encargou á compositora Margarita Soto Viso. No inicio do concerto, o vicepresidente Francisco Díaz-Fierros anunciou que a vindeira edición desta proposta estará dedicada ás cancións dos xograres e trobadores medievais e se desenvolverá na Ría de Vigo.

Igualdade, contradición, consentimento, historicidade… son algúns dos conceptos sobre os que afondará a filósofa Geneviève Fraisse nun relatorio titulado “Voir et savoir. La contradiction des égalités” e que pretende debater o concepto de igualdade. A cita terá lugar mañá, xoves 4 de xuño (17:00 horas), e insírese no ciclo O(s) Sentido(s) da(s) Cultura(s), seminario do Consello da Cultura Galega coordinado polo profesor Ramón Máiz.

O poeta Ramón Cabanillas (1987-1959) é o protagonista da terceira edición de “No bico un cantar”, un programa que une poesía, música e mocidade e organizan o Consello da Cultura Galega (CCG) e a Consellería de Cultura, Educación e Ordenación Universitaria. A praza de Fefiñáns, en Cambados, acollerá este venres un gran coro de 350 nenas e nenos chegados dos conservatorios de música profesional de Galicia cantando poemas do poeta Cabanillas baixo a dirección de Maximino Zumalave. A cita suporá a estrea da versión musicada do poema “Fala unha laverca”, que o CCG lle encargou á compositora Margarita Soto Viso.

No ano 2013 as bibliotecas galegas rexistraron cinco millóns e medio de visitantes e preto de dous millóns e medio de préstamos. Unhas cifras positivas que amosan un incremento continuado desde o ano 2009. O último Documento de Traballo do Observatorio da Cultura Galega (DT-OCG) chámase “Os arquivos e a protección do patrimonio documental” e recolle os datos das actividades de bibliotecas e de arquivos. Este documento tamén destaca que Galicia está nos postos de cabeza do número de arquivos, dos que máis da metade son de titularidade relixiosa.

Ramón Piñeiro desenvolveu un papel básico na política e na cultura galega da segunda metade do século XX. Foi o primeiro presidente do Consello da Cultura Galega, fundador da Editorial Galaxia, codirector de Grial, entre moitas outras iniciativas. Este domingo cúmprense cen anos do seu nacemento e está previsto que se celebre en Compostela un acto de homenaxe á súa figura no que o Consello da Cultura Galega participa a través do seu vicepresidente, Francisco Díaz- Fierros.

Como deseñar a programación dun teatro, que infraestruturas construír sobre un territorio ou que proxectos promover son exemplos de xestión cultural. Sobre este aspecto centrouse a segunda sesión do ciclo Desafíos do ecosistema cultural galego ante a Axenda Europa 2020 puxo sobre a mesa as necesidades e esixencias da xestión cultural. Alfons Martinell, director honorífico da Cátedra Unesco Políticas Culturais e Cooperación, enumerou algúns dos retos que ten ese traballo que, na súa opinión “ha de pensar máis no futuro e menos no pasado”. Canda el participaron João B. Serra, presidente da Fundação Cidade de Guimarães, Teresa Albuquerque, da Fundação Casa Mateus e o economista e consultor cultural Marcos Lorenzo que reforzaron a idea de que a cultura é un dereito do cidadán.

“A visión de que todo é cultura e que a cultura está en todo convértese nun conxunto ingobernable desde a teoría e no que hai que integrar numerosos factores” afirma Alfons Martinell, director honorífico da Cátedra Unesco Políticas Culturais e Cooperación e unha das voces destacadas da sesión que terá lugar o vindeiro martes 26 de maio no Consello da Cultura Galega. Insírese no ciclo Desafíos do ecosistema cultural galego ante a Axenda Europa 2020, coordinado por Xosé López, encamiñado a coñecer a relevancia e o papel que desenvolve a cultura perante a Axenda Europa 2020.

A cidade de Pontevedra volcouse para homenaxear a Xosé Filgueira Valverde na quinta edición do Concerto das Letras Galegas, iniciativa promovida polo Consello da Cultura Galega (CCG) para celebrar de xeito festivo o 17 de maio. O auditorio sede de A Fundación completou o seu aforo nunha proposta na que destacou a estrea da obra de Xavier de Paz sobre dúas cantigas de Filgueira Valverde, así como a presenza da Sociedade Coral Polifónica de Pontevedra. Entre os asistentes estaban Ramón Villares, presidente do CCG; Pilar Rojo, presidenta do Parlamento de Galicia; Anxo Lorenzo, secretario xeral de Cultura; Anxos Riveiro, concelleira de cultura de Pontevedra; Pedro Otero, director xerente de Afundación e unha nutrida representación da familia Filgueira, entre outras autoridades e personalidades do ámbito cultural e social.

No extenso e prolífico labor cultural de Filgueira Valverde, a música ten un protagonismo destacado. Foi un dos promotores da Sociedade Coral Polifónica de Pontevedra e impulsor do Festival da Canción que se desenvolveu na cidade onde foi alcalde, entre moitos outros logros. Unha traxectoria que o Consello da Cultura Galega recupera no programa do seu tradicional Concerto das Letras Galegas, que terá lugar o vindeiro sábado 16 no Auditorio Sede Afundación de Pontevedra.

Acceder ao catastro, relacionar esa busca cos mapas históricos depositados nun arquivo ou cos recursos depositados nunha biblioteca e facelo sen saír da casa. Son algunhas das utilidades que ten a dixitalización da información que repousa en arquivos, bibliotecas, museos e na propia Administración. De todo isto falouse durante dous días nas xornadas “Converxencia dixital das institucións da memoria”, que se desenvolveron ata hoxe no Consello da Cultura Galega (CCG). Os responsables dos centros presentes na cita puxeron sobre a mesa a necesidade dun plan estratéxico da información que xunte os esforzos e iniciativas que “ata o de agora se fixeron de xeito illado e descoordinado”, segundo afirmou Gabriel Quiroga, membro do comité científico.

Arquivos, bibliotecas e museos son as “institucións da memoria” dun país. As súas diferenzas estiveron sempre claras ata a chegada do contexto dixital, que fixo que se esvaecesen os límites e se abrisen novos retos para os usuarios pero tamén para os profesionais. Sobre eles falarán especialistas e responsables da súa xestión nas xornadas “Converxencia dixital das institucións da memoria”, que comeza mañá no Consello da Cultura Galega (CCG). O vicepresidente do CCG, Francisco Díaz-Fierros, e Gabriel Quiroga, membro do comité científico inaugurarán ás 10:00 horas esta cita que ten o aforo cuberto.

A conferencia prevista para esta tarde queda suspendida debido á cancelación do voo que debía traer ao relator a Santiago da Compostela. A súa participación no ciclo O(s) Sentido(s) da(s) Cultura(s) adíase a unha nova data, aínda por fixar.

Moitas das conquistas sociais que parecían irreversibles desapareceron nos últimos anos. O estado do benestar atravesa unha crise severa marcada por un individualismo posesivo e unha Europa asocial, tal e como explicará nunha conferencia o sociólogo e politólogo Luis Moreno. A cita terá lugar este mércores 29 (17:00 horas) e insírese no ciclo O(s) Sentido(s) da(s) Cultura(s), seminario do Consello da Cultura Galega coordinado polo profesor Ramón Máiz.

En 2013 tiveron lugar 1172 concertos de música clásica, o que nos sitúa no sexto posto no conxunto de España. Pero se trasladamos este feito ao plano económico, temos un panorama ben diferente. A recadación en Galicia nese ano supuxo un 1,8% do conxunto total do Estado. Todo isto nun conxunto continuado de descenso que arrincou en 2007 ao coincidir coa crise. Son cifras do estudo “A música clásica e popular en Galicia”, o último documento de traballo do Observatorio da Cultura Galega (OCG-DT), que tamén analiza outros xéneros musicais.

O presidente do Consello da Cultura Galega, Ramón Villares, recibiu esta mañá de mans do conselleiro de Cultura, Educación e Ordenación Universitaria, Román Rodríguez, o Documento estrutural básico do Plan de dinamización da lingua galega no tecido económico 2015-2020. O Consello da Cultura Galega (CCG) e a Real Academia Galega (RAG) son as dúas primeiras entidades en recibir este documento que contén a proposta inicial de traballo. O encontro tivo lugar na Sala Eisenman da Cidade da Cultura no que tamén participaron Xesús Alonso Montero e Henrique Monteagudo, presidente e secretario da RAG, respectivamente, e Valentín García, secretario xeral de Política Lingüística.

Arquivos, bibliotecas e museos son as “institucións da memoria” dun país. As súas diferenzas estiveron sempre claras ata a chegada do contexto dixital, que fixo que se esvaecesen os límites e se abrisen novos retos para os usuarios pero tamén para os profesionais. Sobre eles falarán especialistas e responsables da súa xestión nas xornadas “Converxencia dixital das institucións da memoria”, que o Consello da Cultura Galega organiza os días 6 e 7 de maio. Está aberto o prazo de inscrición e hai cen prazas.

Mañá comeza na Universidade Federal da Bahia (UFBA) o I Encontro Brasileiro de Estudos Galegos (I EBEG), unha cita que ten tres obxectivos: conmemorar o aniversario do Centro de Estudos da Lingua e Cultura Galegas (CELGA), homenaxear a fundadora do Centro de Estudos Galegos na Bahia, a profesora Rosario Suárez Albán, así como intensificar o diálogo intelectual entre investigadores brasileiros e estranxeiros que se dediquen aos estudos galegos. Nesta cita, que se estende ata o mércores 15, estará presente Rosario Álvarez, vicepresidenta do Consello da Cultura Galega.

“Aínda non cumprira os vinte anos cando Filgueira Valverde escribiu Os nenos, un libro de creación literaria que dá as claves do que pensaba a xeración do Seminario de Estudos Galegos”, explicou Ramón Villares, presidente do Consello da Cultura Galega (CCG), na presentación desenvolvida esta mañá. Canda el estaba Fernando Filgueira, presidente da fundación que leva o nome do polígrafo pontevedrés; Ana Isabel Vázquez, deputada provincial de Cultura; Maximino Zumalave, vocal do CCG; Carlos Valle, director do Museo de Pontevedra, e David Pintor, autor das ilustracións que acompañan a edición facsimilar deste texto, enriquecido con dous estudos críticos. A publicación insírese nas actividades previstas polo CCG para conmemorar a celebración do Día das Letras Galegas dedicado a “unha figura esencial na construción das institucións do século XX”, en palabras de Ramón Villares.

O concepto Migración inaugura o primeiro Mateus DOC Galicia. Un encontro de reflexión e debate interdisciplinar entre doutorandos e postdocs que segue o espírito do programa Mateus DOC que se desenvolverá entre os días 18 e 20 de setembro de 20015. A cita está organizada polo Instituto Internacional Casa de Mateus e o Consello da Cultura Galega.

Mañá arrinca en Bos Aires a undécima edición do congreso anual da Asociación Internacional de Estudos Galegos (AIEG). Nesta ocasión céntrase en analizar como a globalización muda as identidades nas fronteiras, na emigración e no exilio. O Consello da Cultura Galega (CCG) contribúe coa organización de dous ciclos de diálogos: un sobre o papel de Bos Aires como capital cultural galega e outro sobre o asociacionismo étnico e a identidade.