Arquivo de noticias do CCG

Foi un destacado filólogo e un dos máximos especialistas arredor do ilustrado Padre Sarmiento. José Luis Teófilo Pensado Tomé (Negreira, 1924- Salamanca, 2000), coñecido co hipocorístico de “Chelís”, é unha figura imprescindible dentro dos estudos lingüísticos. A súa entrada, asinada por Xosé Amancio Liñares Giraut, acaba de incorporarse ao Álbum de Galicia.

O proxecto Caligrafías musicais, iniciativa do Arquivo Sonoro de Galicia (ASG) do Consello da Cultura Galega (CCG) que recupera conferencias destacadas de prestixiosos estudosos do eido musical galego, difunde na nova entrega unha conferencia do musicólogo lucense Juan Bautista Varela de Vega (1933-2014). Nela aborda a etapa de Jesús Bal y Gay (Lugo, 1905 - Torrelaguna, Madrid, 1993) no exilio mexicano e destaca a súa conexión con figuras internacionais como Igor Stravinski ou Aaron Copland, entre outros.

O final do franquismo (1973-1977) é o título da xornada coa que o Consello da Cultura Galega (CCG) e o grupo de investigación da Universidade de Santiago (USC), HISPONA, abordan este martes (a partir das 9:30 horas) os diversos aspectos históricos e sociais que marcaron a Transición en Galicia e no conxunto do Estado. Emilio Grandío coordina esta cita na que investigadores como Manuel Ortiz Heras, Ana Cabana ou Luis Velasco achegarán múltiples perspectivas e reflexións críticas sobre este período histórico. A xornada, que se emite en directo polo web e as redes sociais da institución, pon o ramo ao convenio de colaboración entre ambas as dúas entidades

Chamábase Xosé Manuel Vázquez Martínez (Ribeira, 1947- A Coruña, 2010), pero era coñecido como Tuto Vázquez. Foi un actor pioneiro de teatro, audiovisual e dobraxe en Galicia. Participou en numerosas montaxes de compañías teatrais amadoras, profesionais e tamén do Centro Dramático Galego. Ademais, formou parte do grupo de persoas que elaboraron o proxecto fundacional da Escola Dramática Galega. A súa entrada, escrita por Ana Abad de Larriva, incorpórase hoxe ao Álbum de Galicia, colección de biografías dixitais que mantén o Consello da Cultura Galega (CCG).

A nova xornada do ciclo Revisando a nosa arte procurará fomentar a “lembranza, recoñecemento e aproximación a algunhas facetas esenciais” do pintor Tino Grandío cando se conmemoran os cen anos do seu nacemento. Miguel Fernández-Cid, Xosé Carlos López Bernárdez e Manuel Quintana Martelo participan neste encontro coordinado por Lucila Yáñez Anllo-Vergas e organizado pola Sección de Creación e Artes Visuais Contemporáneas do Consello da Cultura Galega (CCG) coa colaboración do Centro de Artesanía e Deseño (CENTRAD), a vicepresidencia de Cultura da Deputación de Lugo e o Museo Provincial de Lugo. A sesión, que se celebra na sala de exposicións Capela de Santa María (xoves, 12 de decembro, a partir das 16:30 horas), non se emite en directo pero será gravada e subirase ao sitio web da institución.

O Consello da Cultura Galega (CCG) acolleu esta mañá a presentación dunha obra que explora a figura e o legado de José María Alonso de Trelles e Jarén, "El viejo Pancho", cando se cumpre o centenario do seu pasamento. A obra El viejo Pancho Pancho, de Ribadeo a El Tala pasando por Navia, coordinada por Pablo Rodríguez "Vivín", rende homenaxe a este poeta nado en Ribadeo que foi unha destacada figura en Uruguai. Dolores Vilavedra, vicepresidenta do CCG; Daniel Vega Pérez, alcalde de Ribadeo; Lourenzo Fernández Prieto e Pilar Cagiao Vila, profesores da Universidade de Santiago de Compostela; máis o editor, Antonio Andina, destacaron na presentación a importancia de tender pontes e a relevancia da súa figura.

O proxecto Sextina, que inclúe rarezas e documentos pouco coñecidos do Centro de Documentación en Igualdade e Feminismos (CDIF), inclúe hoxe unha nova entrega. Desta volta subimos un número de As follas de Sísifo, revista literaria promovida polo Café Uff de Vigo na primeira metade da década dos oitenta.

A filóloga Kathleen N. March clasifica as poetas de posguerra en dous grupos. Por un lado as que comezan a publicar nos anos corenta, por outro as que o fan a partir do 75. No primeiro está Xaquina Trillo (Vilagarcía, 1916-2024) poeta que hoxe se incorpora ao Álbum de Galicia, colección de biografías dixitais que mantén o Consello da Cultura Galega (CCG). Aínda que publicou o seu primeiro libro con 64 anos, ela escribiu desde que era nova e fixo gala dunha poesía sinxela e moi apegada á paisaxe mariñeira da súa cidade natal. “Pretende demostrar que a poesía é unha canle apta para deixar constancia escrita da súa ideoloxía e do seu compromiso” afirma Patricia Arias Chachero, autora da entrada biográfica.

O aumento do nivel do mar, desxeo dos glaciares, quecemento dos océanos e fenómenos meteorolóxicos extremos son algunhas das consecuencias do cambio climático. Sobre os fenómenos meteorolóxicos adversos e as consecuencias do cambio climático tratan os doce vídeos que conforman a nova entrega de Proxector, iniciativa de divulgación científica en lingua galega, promovida polo Centro de Documentación Sociolingüística de Galicia (CDSG) do Consello da Cultura Galega (CCG) co apoio da Universidade de Santiago (USC). “A adversidade nos mapas do tempo” é o título desta entrega que xa está dispoñible.

Hai un apoxeo arredor do patrimonio cultural en Galicia e no norte de Portugal no que conflúen moitos factores: as novas tecnoloxías aplicadas ao patrimonio, cambio de mentalidade social, unha maior implicación das administracións. Máis dunha ducia de experiencias de intervención patrimonial que dan conta deste cambio recóllense na exposición Olladas #EMPC. Olladas #INSITU. Rebeca Blanco-Rotea, co-comisaria xunto con Rosa Benavides; João Cabeleira, diretor-adjunto do Lab2PT Laboratório de Paisagens, Património e Território (Lab2PT) da Universidade do Miho; máis Jorge Correia, vice-diretor da Escola de Arquitetura, Arte e Desing inauguran este martes (17:00 hora local) na Escola de Arquitectura, Arte e Design da Universidade do Minho en Guimarães a primeira itinerancia desta mostra. Estará aberta ata o 10 de xaneiro.

Hospitais e albergarías. Fitos nos camiños históricos e de peregrinación é o título da xornada organizada polo Consello da Cultura Galega (CCG) e o Museo da Terra de Melide que terá lugar este luns 2 de decembro (17:00 horas). Rebeca Blanco-Rotea e Cristina Vázquez Neira coordinan esta cita centrada na historia dos hospitais e albergarías vinculados aos camiños históricos e de peregrinación en Galicia, promovidos por figuras distinguidas da curia ou da nobreza dende o medievo. A sesión, que se celebra no Centro Sociocultural Mingos de Pita de Melide, non se emite en directo, será gravada e subirase ao sitio web corporativo.

Libros de actas, estatutos e varios folletos de actividade é o material pertencente á Asociación Casa de Galicia de Bos Aires que o Arquivo da Emigración Galega do Consello da Cultura Galega (CCG) vén de subir á rede no marco do proxecto Memoria documental das sociedades da emigración galega. Uns documentos que permiten achegarse ao coñecemento desta sociedade asentada na capital arxentina que continúa a organizar actividades culturais, recreativas e de apoio á colectividade.

Canuto José Berea Rodríguez (A Coruña, 1836 - 1891) destacou pola súa transcendencia nas esferas musical, social e política galega e do noroeste peninsular no século XIX xa que, ademais, de intérprete musical e compositor, foi director, docente, axente teatral, editor, alcalde da Coruña e dono da primeira tenda de instrumentos musicais en Galicia. A súa entrada, elaborada pola musicóloga Lorena López Cobas, acaba de incorporarse ao Álbum de Galicia, colección dixital de biografías do Consello da Cultura Galega (CCG). Ademais do texto, a entrada inclúe unha escolma de material sonoro que procede do Arquivo Sonoro de Galicia (ASG)

Cando se cumpren 150 anos do nacemento do pintor Francisco Lloréns (A Coruña, 1874 -Madrid, 1948), recoñecido paisaxista e discípulo de Joaquín Sorolla, o Consello da Cultura Galega (CCG) organiza a xornada Francisco Lloréns. Paisaxe e territorio. A xornada, que se inclúe no ciclo Revisando a nosa arte, terá lugar este xoves (a partir das 16:00 horas) no Salón Azul do Edificio Liceo Arquivo do Antigo Reino de Galicia de Betanzos que tratará a vida e obra deste artista. A xornada, coordinada por Rosario Sarmiento, está organizada pola Sección de Creación e Artes Visuais Contemporáneas do CCG coa colaboración do Concello de Betanzos. Non se emite en directo, pero será gravada e subirase posteriormente ao web institucional. A entrada é libre e gratuíta.

Museos en positivo. Creando comunidade é o título da xornada coa que o Consello da Cultura Galega (CCG) e o Consello Galego de Museos reflexionan sobre o papel que os museos desenvolven co territorio e coa comunidade á que pertencen. Na xornada coñeceranse de primeira man experiencias innovadoras que se están a desenvolver na península, como o proxecto Museos Vivos que se realiza en Castela e León, a liña de acción do Institut valencià d´Art Modern (IVAM) en espazos rurais ou o caso de Gordailua, centro de Colecciones Patrimoniales de bienes muebles de Gipuzkoa. A xornada tamén servirá para ver experiencias de museos galegos que tamén exporán os problemas e retos de futuro. A presidenta do CCG, Rosario Álvarez, e Ángeles Penas Truque, membro do Consello Galego de Museos, inauguran esta xornada presencial que se pode seguir en directo desde o web e as redes sociais da institución.

A Comisión Executiva do Consello da Cultura Galega (CCG) recibiu a visita de José Ramón Gómez Besteiro, secretario xeral dos socialistas galegos, para abordar a situación actual da lingua. Á xuntanza asistiron a presidenta, Rosario Álvarez; a vicepresidenta, Dolores Vilavedra; e o secretario, Alejo Amoedo. Gómez Besteiro acudiu á sede da institución na compaña da viceportavoz do Grupo Socialista, Lara Álvarez. O encontro sitúase na rolda de contactos que a institución mantén con outros axentes e entidades de distintos ámbitos para afondar na diagnose e as acción a desenvolver.º

O Repertorio de prensa da emigración galega, proxecto do Arquivo da Emigración Galega (AEG) para a dixitalización e difusión de medios impresos promovidos pola diáspora, vén de incorporar a revista Jaque. Trátase dunha publicación editada pola "Peña de Ajedrez Alexandre Bóveda", fundada no Lar Gallego de Caracas en 1955. Esta revista, que viu a luz en xaneiro de 1960, tiña como obxectivo manter informados aos seus lectores sobre o "mundillo do xadrez” e divulgar esta práctica tanto dentro como fóra da Peña. Nesta entrega incorpóranse 19 números, do ano 1960 ao 1961. Xa se poden consultar dende o web corporativo do Consello da Cultura Galega (CCG).

O Álbum de Galicia, colección de biografías dixitais do Consello da Cultura Galega (CCG), vén de introducir unha nova entrada dedicada ao intérprete, creador cultural, director e produtor Antonio, Toñito Blanco (A Coruña, 1964 - A Coruña, 22/11/1994), “un dos artistas máis breves e influentes da Galicia dos oitenta e noventa”, segundo o describe o guionista Nico Campos, autor da entrada. Coñecido polo seu único filme La matanza caníbal de los garrulos lisérgicos, Blanco traballou tamén no eido televisivo na Televisión de Galicia (TVG) e na Televisión Española (TVE) en Galicia, cun “estilo recoñecible” ata hoxe, malia a súa prematura morte hai xa 30 anos.

“Novos relatos da violencia machista” é o título da xornada anual que o Centro de Documentación en Igualdade e Feminismos (CDIF) do Consello da Cultura Galega (CCG) organiza ao fío do 25N, Día internacional da Eliminación da Violencia contra a Muller. A cita, que terá lugar este xoves (9:45 horas) tratará a realidade da violencia de xénero no contexto global actual onde circulan “exabruptos e discursos de odio que superan abondo o linde do distópico, que disparan ás cheas unha narrativa misóxina” segundo o texto de presentación desta actividade. A presidenta do CCG, Rosario Álvarez, e a coordinadora do CDIF, Carme Adán, inauguran esta cita na que participan, entre outros, a politóloga Priscila Retamozo ou a psicóloga Martina González. O evento é presencial e poderá ser seguido en directo a través do web da institución.

O Consello da Cultura Galega (CCG), en colaboración coa Escola Superior de Arte Dramática (ESAD) de Galicia, a Escola Superior de Música e Artes do Espetáculo (ESMAE) de Porto e o Camões-Centro Cultural Português de Vigo, presenta unha nova edición de Dramaturxias Itinerantes, un ciclo que se celebra en Porto e Vigo e que busca destacar a dramaturxia contemporánea de autoría feminina en Galicia e Portugal. A sétima edición, que terá lugar este martes 29 de novembro (17:00 horas) na ESMAE de Porto e o mércores 20 na ESAD de Vigo (17:00 horas), contará coa participación das dramaturgas Luísa Pinto e Iria Pinheiro, que presentarán as súas obras Sugar Daddy e A máquina do pobo, respectivamente. Ambas representacións terán un coloquio posterior coas autoras moderado pola actriz Vanesa Sotelo.