Arquivo de noticias do CCG

O 25 de xullo de 1961 a praza da Quintana de Santiago de Compostela ateigouse de xente para asistir á primeira representación en Galicia de Os vellos non deben de namorarse a cargo do coro Cantigas e Agarimos. Foi un fito histórico e cultural do país pero tamén un dos capítulos máis destacados desta formación histórica que hoxe, 29 de xullo, cumpre cen anos. O Consello da Cultura Galega (CCG) celebra a efeméride nun especial que xunta imaxes, debuxos, recortes hemerográficos e diferentes materiais arredor daquela representación. Proceden de Son de Galicia, a mostra organizada polo CCG en 2018 que reconstrúe a historia do país a través do papel que desempeñaron os coros.

“Era unha rapaza máis ben pequena e delgada, moi churrusqueira e graciosa e moi seria e competente no seu labor” dixo Lois Tobío de Margot Sponer (Niesse, 1898 - Berlín, 1945), unha polaca que foi pioneira dos estudos lingüísticos galegos. A súa entrada, asinada por Patricia Arias, acaba de incorporarse ao Álbum de Galicia.

En novembro de 2019 o Consello da Cultura Galega (CCG) botou a andar o Foro Patrimonio e Sociedade, un ambicioso proxecto que tiña como obxectivo propor un cambio na xestión do noso inxente patrimonio. Trinta especialistas de diferentes ámbitos xuntáronse durante mais de ano e medio nun proceso único, deseñado expresamente para integrar a todas as persoas que teñen que ver co sector, desde a sociedade ata os partidos políticos. O resultado desta iniciativa se concreta nunha Guía Práctica que, ademais de recomendar a creación dun Observatorio de Patrimonio, unha comisión de Patrimonio no Parlamento e a elaboración dun Plan Autonómico Patrimonial de Galicia, traza a folla de ruta para a xestión do patrimonio galego nos vindeiros anos. A presidenta do CCG, Rosario Álvarez, e a coordinadora do Foro e mais da Sección de Patrimonio e Bens Culturais, Rebeca Blanco-Rotea, presentaron publicamente esta mañá os resultados deste proceso.

O filólogo lugués Aníbal Otero (Barcia, Ribeira de Piquín 1911-1974) é coñecido principalmente por ser un dos enquisadores do Atlas Lingüístico de la Península Ibérica, así como pola súa detención (e posterior condena) cando estaba a facer traballo de campo en Portugal no momento da rebelión militar de 1936. Ora ben, as súas contribucións van ben máis alá. Foi recolector destacado de romances, redactor de numerosas contribucións lexicográficas e etimolóxicas e tamén creador literario, se ben que boa parte dos seus escritos permanece inédita. O profesor Xosé Afonso Álvarez Pérez asina a entrada que se acaba de incorporar ao Álbum de Galicia.

Arqueixal, Gandeiria Quintián, Amarelante ou Adegas Celme son proxectos empresariais galegos que se caracterizan por un fondo compromiso polo medio, pola produción agrícola e gandeira sustentable e polo respecto á lingua e á cultura galegas. Os responsables destas iniciativas participan na xornada “Faladoiro de marcas que constrúen novas ruralidades” que a Sección de Lingua, Literatura e Comunicación do Consello da Cultura Galega (CCG) organiza mañá martes, 20 de xullo, en Castrelo de Miño. A presidenta da institución, Rosario Álvarez, inaugurará esta cita coordinada por Elisa Fernández Rei e Eva Sánchez Amboage.

A décima entrega do especial “Historias de ida e volta”, un proxecto web realizado polo Consello da Cultura Galega (CCG) en colaboración coa Secretaría Xeral da Emigración, amosa a realidade do exilio galego.

Ángel Rodulfo (1880-1956) foi un crego e músico que desenvolveu unha grande actividade tanto no ámbito compositivo, como no docente e no interpretativo. Era un bo coñecedor do xénero vocal e abordou tamén o xénero da balada baixo o subtítulo de Melodía gallega. O Consello da Cultura Galega (CCG), no marco da súa liña de traballo de recupberación do patrimonio musical galego, presenta Melodía galega unha obra editada por Javier Jurado que recolle partituras e textos de catro cancións creadas por este músico vigués que se sitúan na tradición da canción en galego.

A Misión Biolóxica de Galicia foi unha institución científica fundamental para a modernización e mellora do sector agrogandeiro galego no século XX. Esta misión contou con importantes científicos e membros do ámbito cultural e universitario como Cruz Gallástegui, ou Osorio Tafall. Hoxe ,15 de xullo, o Centro Superior de Investigacións Científicas (CISC) celebra en Salcedo (Pontevedra) o acto oficial de celebración do centenario desta entidade. Unha efeméride á que o Consello da Cultura Galega (CCG) contribúe cun especial web que xunta as biografías de destacados membros que a conformaron e que están no Álbum de Galicia. Acompáñase cun artigo contextualizador de Francisco Díaz-Fierros, catedrático emérito de Edafoloxía da USC.

O Diario Oficial de Galicia do 14 de xullo publicou as bases que rexen a convocatoria do Consello da Cultura Galega de dúas bolsas de estadía durante tres meses na Casa de Velázquez en Madrid. Trátase dun programa de intercambio promovido por ambas entidades coa finalidade de contribuír á proxección da cultura galega no exterior, notablemente no mundo francófono. Estas bolsas créanse en homenaxe á actriz María Casares, que foi o máximo expoñente da presenza da cultura galega en Francia. Hoxe comeza o prazo de presentación de solicitudes e estará aberto ata o 16 de agosto.

Lugares destinados á memoria, á investigación histórica pero indubidablemente cun claro retorno social e no marco dunhas políticas públicas de memoria definidas. Estas son algunhas das ideas apuntadas por diferentes especialistas e investigadores na xornada “Que facer cos lugares da memoria franquista?” que o Consello da Cultura Galega (CCG), coa colaboración do Concello de Sada e a Asociación Cultural Iráns Suárez Picallo, desenvolveu ao longo da xornada de hoxe en Sada. A cita foi coordinada por Xosé M. Núñez Seixas quen asegurou “non existen receitas únicas nin modelos ideais xa que cada sociedade, cada país, fixa o seu camiño a seguir en políticas da memoria”. Como complemento da xornada, o portal de divulgación cultural do CCG, culturagalega.gal publica a primeira reportaxe na que xeolocaliza espazos destinados á memoria das provincias de Pontevedra e A Coruña.

A Casa Cornide na Coruña, a illa de San Simón e o Pazo de Meirás son algúns dos lugares en que está presente a sombra da ditadura franquista, da súa represión e das súas vítimas. Non todos permaneceron igual, algúns foron esquecidos e outros resignificados; con todo, cómpre unha reflexión de conxunto sobre estes espazos. Isto é o que se propón na xornada “Que facer cos lugares de memoria do franquismo?” que o Consello da Cultura Galega (CCG) organiza o vindeiro xoves 15 de xullo en Sada. O vicepresidente do CCG e coordinador deste encontro, Xosé M. Núñez Seixas, e o alcalde de Sada, Benito Portela, son os encargados de inaugurar esta cita que conta coa participación de Montse Fajardo, Emilio Grandío ou Dionisio Pereira, entre outros destacados especialistas.

Berta Cáccamo (Vigo, 1963-2018) foi unha das máis relevantes figuras da pintura galega da súa xeración. Destacou pola súa personalidade, aberta e solidaria, e deixou unha fonda pegada no medio artístico. Pintora e docente soubo conectar as súas inquedanzas artísticas coas do contexto internacional. O profesor, ensaísta e comisario Carlos L. Bernárdez asina a entrada que se acaba de incorporar ao Álbum de Galicia.

“Arquitectura da auga. A situación patrimonial dos balnearios en Galicia” é o título da xornada que o Consello da Cultura Galega (CCG) organiza mañá martes en Mondariz-Balneario para analizar a problemática patrimonial e de conservación que teñen moitos dos balnearios en Galicia. A cita, coordinada por Rebeca Blanco-Rotea, pretende analizar as solucións que se veñen adoptando para a recuperación e posta en valor deste importante patrimonio e as súas posibilidades como recurso de futuro. Rosario Álvarez, presidenta do CCG; o alcalde de Mondariz-Balneario, José Antonio Lorenzo, e a coordinadora do encontro serán os encargados de inaugurar esta cita na que se exporán os casos concretos de Mondariz, Verín, Cortegada e Lugo.

O Consello da Cultura Galega (CCG) puxo a disposición pública en Internet o libro Vindicación. Vida e milagros de Pepe de Xan Baña en trinta anos de Cuba, do emigrante de Santa Comba Xosé Baña Pose. Este volume foi publicado orixinalmente en 1921 en La Habana, co obxectivo de ser repartido entre os veciños xalleiros na seguinte viaxe do escritor. O libro conta cun estudo introdutorio do profesor da Universidade de Vigo Xosé Henrique Costas González, no que se analizan as particularidades da lingua galega empregada na publicación. Está editado na colección Clásicos da Emigración do CCG e a Secretaría Xeral da Emigración da Xunta de Galicia.

Onte presentáronse as conclusións da xornada 'Mulleres rurais. Unha ollada desde Galicia e América Latina', xa cal se celebraran as conferencias o 1 de xuño. A xornada, organizada polo Centro de Documentación en Igualdade e Feminismos do Consello da Cultura Galega (CDIF) e a Valedoría do Pobo de Galicia, reuniu a destacadas expertas do país e de varios estados latinoamericanos para "intercambiar coñecementos, boas prácticas, ideas e propostas" en relación á realidade das mulleres rurais. Na presentación das conclusións participaron Rosario Álvarez, presidentas do Consello da Cultura Galega, e María Xosé Porteiro, vogal da Comisión Executiva e coordinadora do CDIF.

Nun contexto de despoboamento e transformación do rural, a cultura "contribúe á cohesión territorial e das comunidades locais" e pode ser "panca do cambio" necesario para un territorio máis sustentable. Estas son algunhas recomendacións contidas no informe Cultura e Sustentabilidade que o Consello da Cultura Galega presentou este xoves 8 pola tarde en Monterroso (Lugo). O informe, coordinado polo investigador Fran Quiroga, estuda 10 proxectos que "amosan unha diversidade de prácticas que dun xeito extenso responden á relación entre cultura e sustentabilidade", propón recomendacións para unhas políticas públicas activadoras do cambio e inclúe un mecanismo de "autoavaliación" para medir o grao de sustentabilidade dun proxecto cultural.

O profesor emérito da USC Carlos Villanueva asina esta nova entrega do Álbum de Galicia do Consello da Cultura Galega que inclúe a posibilidade de escoita do seu Concerto Grosso

O Consello da Cultura Galega (CCG) organiza este luns 5 de xullo unha xornada que xunta as loitas feministas e as ecoloxistas. A presidenta da institución, Rosario Álvarez, inaugurará esta cita titulada “Ecofeminismos”. Está coordinada por Luz Darriba e Alba María Rodríguez e conta coa participación de destacadas especialistas nestas materias como Adela Figueroa, Sabela Facal ou Yayo Herrero. No marco da xornada estrearase a videocreación “Unha faba unha vida” realizada por Ugía Pedreira e Marina Oural a partir dun espectáculo homónimo. As prazas están esgotadas pero pode seguirse en directo polo web da institución.

O Álbum de Galicia incorpora hoxe a entrada de Virxinia Pereira (A Estrada, 1884-Madrid, 1969). Ana Acuña asina o texto dunha destacada figura que foi moito máis que a muller de Castelao. A biografía, así como os materiais complementarios que a enriquecen, permiten ver a súa forte personalidade e o seu traballo en prol da causa antifranquista e a defensa da memoria do seu home.

As bandas de música populares teñen unha importancia social e histórica moi destacada no noso país. Roldan o centenar, están creadas por asociacións culturais, desempeñaron un papel moi importante no ámbito da música, pero tamén na dinamización das comunidades locais e na formación musical dunha parte importante da sociedade galega. O Consello da Cultura Galega (CCG), en colaboración coa Federación Galega de Bandas de Música Populares, presenta o primeiro grande informe realizado polo Observatorio da Cultura Galega sobre un colectivo que integra a 7.100 persoas. O estudo dáse a coñecer na véspera da xornada “As bandas de música na memoria de Galicia”, que se desenvolverá presencialmente este xoves na sede da institución. A cita tamén se pode seguir en directo desde o web e as redes sociais.