Arquivo de noticias do CCG

O membro do Plenario do Consello da Cultura Galega, Ángel Carracedo, é distinguido co título honorífico de Doutor Honoris Causa pola Universidade do Minho. A institución portuguesa acordou esta distinción por ser “por ser unha personalidade impar da sociedade académica e científica internacional”. A presidenta do CCG, Rosario Álvarez, asiste á sesión solemne que terá lugar o luns 17 (10:00 hora local) no Salón Medieval da reitoría en Braga.

A campá da Berenguela é un dos sons máis significativos de Santiago de Compostela. E por ese motivo é o elemento vertebrador da identidade sonora desta cidade e xa se pode consultar no Mapa Sonoro de Galicia. A experiencia gravouse como parte da xornada “Os arquivos sonoros: memoria e patrimonio”, que organizou o Consello da Cultura Galega a principios de febreiro. A iniciativa foi coordinada por Xosé Ramón Pousa e pretendía poñer o foco na relevancia do patrimonio sonoro.

O catedrático de Filosofía Política Daniel Innerarity abre mañá (mércores 12 ás 18:00 horas) no Consello da Cultura Galega (CCG) o foro “A identidade galega no mundo da globalización”. Unha cita que pretende situarnos nun contexto global e recuperar un debate que iniciou a xeración Nós un século antes. A conferencia inaugural ten como título “Quen somos nós?” e afondará nas transformacións sociais e políticas actuais, na necesidade de crear un novo tipo de cidadanía e nas diferentes formas de goberno. O vicepresidente do CCG, Xosé Manoel Núñez Seixas, será o encargado de presentar esta cita, que se poderá seguir en directo desde o web da institución.

Amosar o Valle Inclán máis internacional e facelo a través do éxito que tivo a súa obra en vida do autor. E, ao mesmo tempo, ofrecer como recolleu a cultura galega na súa obra sen formar parte do sistema literario galego. Con este obxectivo o Consello da Cultura Galega botou a andar a exposición “Outros verbos, novas leituras: Valle-Inclán traducido”(1930-136)” que se pode ver no Claustre de Lletres da Universitat de Barcelona ata o 20 de febreiro. A presidenta do Consello da Cultura Galega, Rosario Álvarez, presentará mañá en Barcelona a conferencia de Rosario Mascato “Galeguidade a tradución no Valle Inclán across-borders”, que contribuirá a difundir unha faceta menos coñecida do escritor.

Un espazo de reflexión para situar a identidade galega nun contexto global e, ao mesmo tempo, lembrar que un século antes a xeración Nós se situou na mesma perspectiva. Con estes dous propósitos o Consello da Cultura Galega (CCG) súmase ao Museo do Pobo Galego na organización da sexta edición do foro “A identidade galega no mundo da globalización. Sociedade, lingua e cultura”. Unha iniciativa que deron a coñecer esta mañá a presidenta do CCG, Rosario Álvarez; o director xeral de Políticas Culturais, Anxo M. Lorenzo; o presidente do Padroado do Museo do Pobo Galego, Justo Beramendi; e os dous coordinadores: Dolores Vilavedra e Uxio Breogán. Rosario Álvarez destacou que “sumamos esforzos para colocar o foco nas identidades e darlles continuidade ás preocupacións xa formuladas pola xeración Nós”.

“Hoxe xa non é doado explicar por que o meu carro canta, nin por que o son é fino como un asubío. Para facelo necesitariamos moito tempo e unhas gravacións sonoras” explicou a presidenta do Consello da Cultura Galega (CCG), Rosario Álvarez ao presentar unhas xornadas nas que se falou da importancia de comprender o son como ben patrimonial; das dificultades para a súa conservación, da disparidade de mapas sonoros existentes e na que se cuestionaron que criterios se miden para discriminar os ruídos permitidos legalmente do que non. Os expertos participantes nesta cita chamada “Os arquivos sonoros: memoria e patrimonio”, alertaron da necesidade do rexistro, difusión e maior sensibilización do patrimonio sonoro. Xosé Ramón Pousa foi o coordinador desta cita que rexistrou a “identidade sonora de Compostela”.

O Consello da Cultura Galega inaugura mañá no Museo do Mar (19:00 horas) a mostra «Inventio Mundi. Galicia nas viaxes transoceánicas. Séculos XV-XVII». Unha proposta expositiva que pretende explicar a implicación galega e as consecuencias que tivo para o noso país a primeira circunnavegación do planeta: a expedición Magalhães/Elcano, que acaba de cumprir 500 anos da súa partida. Á inauguración asisten a presidenta da institución Rosario Álvarez; o Secretario Xeral de Emigración, Antonio Rodríguez Miranda; o director xeral del Políticas Culturais, Anxo Lorenzo; a directora do Museo do Mar, Marta Lucio; e a comisaria da exposición, Ofelia Rey. Esta exposición estará aberta ao público ata o día 12 de abril.

Corenta puntos do casco histórico, corenta rexistros simultáneos e o son da Berenguela. Estas son algunhas das características da experiencia “Identidade sonora de Compostela” que mañá guiará Xosé Ramón Pousa, director do Arquivo Sonoro de Galicia, pola zona monumental de Santiago. Esta iniciativa forma parte do programa da xornada “Os arquivos sonoros: memoria e patrimonio”, que o Consello da Cultura Galega (CCG) organiza ata xoves coa intención de poñer o foco na importancia que o son ten para a memoria e no desatendido que está este tipo de patrimonio. A presidenta do CCG, Rosario Álvarez, será a encargada de inaugurar esta cita, que concentra durante dous días a especialistas no rexistro e tratamento de recursos sonoros.

As voces das sopranos galegas Mary Isaura e Matilde Vázquez xunto con novas interpretacións dos coros “Cántigas da Terra” e de “Toxos e Froles” son algunhas das gravacións que se poden atopar na oitava entrega do proxecto “Lousas”. Esta iniciativa do Consello da Cultura Galega (CCG) pon na rede o patrimonio sonoro rexistrado en pedra que custodia o Arquivo Sonoro de Galicia (ASG).

“O mecenado non é unha cousa de ricos, senón que todo o mundo pode achegar o seu gran de area na medida das súas posibilidades” asegurou Fran Quiroga, coordinador da xornada “A Cultura do mecenado” que se desenvolveu hoxe no Consello da Cultura Galega (CCG). A cita permitiu coñecer diferentes modelos e elaborar nun documento que propón un itinerario cara a unha cultura do mecenado. A presidenta da institución, Rosario Álvarez, indicou na inauguración “a necesidade deste tipo de citas que aúnan a preocupación da institución pola situación das fundacións e polo reto do mecenado”; e a vogal da Comisión Executiva, María Xosé Porteiro, lembrou o “interese por afondar na idea da corresponsabilidade e nas formas de financiamento da cultura a todos os niveis, sobre todo agora que temos un novo Xacobeo ás portas”.

Coñecer experiencias e casos de boas prácticas de mecenado, abrir un espazo de diálogo, atender á cuestión da arte sobre esta materia son algúns dos asuntos que se analizarán mañá na xornada “A cultura do mecendo”. A cita, organizada polo Consello da Cultura Galega (CCG), conta coa presenza de figuras destacadas desde a esfera privada e pública como son David Chipperfield, José Luis Pérez Pont ou José María Arias Mosquera. A presidenta da institución, Rosario Álvarez, e o coordinador desta xornada, Fran Quiroga, inaugurarán esta cita, que se poderá seguir en directo desde o web do CCG.

Este venres cumpríronse 200 anos do nacemento de Concepción Arenal. Unha efeméride que o Consello da Cultura Galega (CCG) celebrou no cárcere da Lama coa proxección do filme de ficción “Concepción Arenal, a visitadora de cárceres” e un coloquio no que participaron 230 internos e internas. “Iniciamos os actos de homenaxe visitando o cárcere e traendo connosco a Concepción Arenal, como cremos que a ela lle agradaría” asegurou a presidenta do CCG, Rosario Álvarez, na presentación da actividade. Canda ela estaba a directora do Centro Penitenciario, Teresa Delgado, que agradeceu a iniciativa e aproveitou para destacar que “foi unha figura importante e moitos dos avances do sistema penitenciario se deben ao seu legado”. María Xosé Porteiro, vogal do CCG e coordinadora do Centro de Documentación en Igualdade e Feminismos do CCG, destacou o valor desta iniciativa.

A presidenta do Consello da Cultura Galega, Rosario Álvarez; o presidente de Nova Escola Galega, Xosé Lastra; e un dos coordinadores deste número, Antón Costa, deron a coñecer esta mañá o número 75 da Revista Galega de Educación. Trátase dun número especial que dedica unha trintena de artigos analizar da situación actual da nova escola galega e os retos de futuro. Rosario Álvarez destacou na presentación o empeño da institución por ser “a casa de todos e todas e manter unha estreita relación con axentes da cultura galega no que a educación ten un papel esencial”.

Materiais da pegada da emigración galega

A presidenta do Consello da Cultura Galega (CCG), Rosario Álvarez, recibiu esta mañá a visita de diversos representantes da organización frisoa DINGtiid, un órgano consultivo para a defensa do idioma frisón, declarado en 2014 lingua oficial. No marco da visita, a presidenta deu a coñecer as competencias do CCG, o seu funcionamento interno así como as accións presentes e futuras en materia de lingua.

“Hannah Arendt non dá receitas pero si propón exercicios de pensamento e outro xeito de entender o político” afirmou Cristina Sánchez no marco da xornada que a Sección de Pensamento do Consello da Cultura Galega propuxo para revisar a vixencia do pensamento desta pensadora alemá. A cita foi inaugurada pola presidenta, Rosario Álvarez; a responsable da sección, Carme Adán; e o coordinador desta cita, Jorge Álvarez, que anunciaron a celebración do Festival de Filosofía en abril.

Sobreviviu ao horror nazi porque puido emigrar aos Estados Unidos e desde alí reflexionou sobre a natureza do mal. Algunhas das súas frases máis célebres son Europa é “unha monstruosa fábrica de cadáveres” ou “a banalidade do mal” que converteron á filósofa alemá Hannah Aredt (1906-1975) nunha referencia da filosofía política. Sobre a súa figura, a vixencia do seu pensamento e para ofrecer novas lecturas do seu legado xira a xornada homónima que o Consello da Cultura Galega (CCG) desenvolverá mañá xoves na súa sede. Expertos e expertas construirán un relato da pensadora desde distintos puntos de vista nunha serie de intervencións que se poderán seguir en directo desde o web institucional. A cita está organizada pola Sección de Pensamento do CCG e será inaugurada pola presidenta da institución, Rosario Álvarez.

O Consello da Cultura Galega acolleu esta mañá a presentación do programa do I Congreso Internacional do Teatro Galego ao que asistiron a presidenta da institución, Rosario Álvarez; o Director Xeral de Políticas Culturais, Anxo Lorenzo; a presidenta da AGT, Imma António; e o presidente do Consello territorial da SGAE, Juan Rivas. A cita, que terá lugar do 25 ao 28 de marzo na Cidade da Cultura buscará sentar as bases da política teatral do sector na vindeira década despois de tres días de análise e reflexión sobre os públicos, os procesos creativos e o coñecemento doutras realidades teatrais, entre outros aspectos.

”Non se trata de ver as diferentes correntes estéticas da danza actual senón de realizar unha análise en profundidade do sector e facer propostas para mellorar o futuro” explicou Dolores Vilavedra, secretaria do Consello da Cultura Galega e coordinadora da xornada “O estado da danza en Galicia” xunto con Natalia Balseiro. Esta cita, inaugurada esta mañá pola presidenta da institución, Rosario Álvarez, puxo sobre a mesa unha serie de medidas para mellorar o futuro deste sector. A presidenta destacou na súa intervención que “puxemos o foco na danza porque entendemos que, ao igual que outros sectores, non está o suficientemente atendido”. A cita, que xuntou a xestores, creadores, políticos e investigadores na materia, servirá de base para elaborar nun informe-diagnóstico e unha serie entrevistas audiovisuais.

Vidas para contar un país //497 entradas