Xulio Ríos

----

Xulio Ríos

1958 Moaña

Biografía de Xulio Ríos

1958- Moaña
Xulio Ríos (Moaña, 1958) é un ensaísta galego especializado en política internacional e, nomeadamente, no mundo chinés.
Graduado Social e licenciado en Dereito pola Universidade de Santiago de Compostela. En 1991 fundou o Instituto Galego de Análise e Documentación Internacional, que, tras 25 anos baixo a súa dirección, preside a título de honra; en 1997, o Fondo Galego de Cooperación e Solidariedade, a axencia municipal para a cooperación internacional; e, en 2001, a Fundación Plácido Castro, que tamén dirixe na actualidade.
É membro do consello asesor de Casa Asia e da Red Navarra de Estudios Chinos. Correspondente académico do Observatorio de Asia-Pacífico (Universidad Tadeo Lozano, Colombia), membro do Consello Consultivo Honorario da carreira de “Especialización en Estudios en China Contemporánea”, da Universidad Nacional de Lanús (Arxentina). É tamén membro do comité científico de Asiadémica, revista universitaria de estudos sobre Asia Oriental, do Foro Académico do Observatorio América Latina-Asia Pacífico e membro do consello de redacción de Shijie Minzu, revista de estudos dos pobos do mundo editada pola Academia de Ciencias Sociais de China. Forma parte igualmente do comité editorial de Cuadernos de China, publicación do Centro de Estudios de África y Asia (CEAA) da Universidade de Los Andes (ULA), Mérida (Venezuela). Tamén é árbitro permanente da revista Nóesis, editada pola Universidad Autónoma de Ciudad Juárez (México).
Director do Observatorio de la Política China (Casa Asia-IGADI); promotor e coordinador da Red Iberoamericana de Sinología; codirector do Compendio Anual sobre las Relaciones entre China e Iberoamérica, que edita a Universidade de Zhejiang (China); dirixe o Informe Anual sobre Política China, que se publica dende 2007; o Informe sobre Taiwán, que se publica dende 2015; o Simposio Electrónico Internacional sobre Política China (dende 2011); Jiexi Zhongguo, trimestral de análise e pensamento iberoamericano sobre China (dende 2011), e Taiwan Hebdo, semanario de información política sobre Taiwán e as relacións a través do Estreito (dende 2013).
Dende 2007 escribe habitualmente no diario El País sobre temas chineses. Tamén colaborou con outros medios como os diarios Faro de Vigo, El Correo Gallego, La Voz de Galicia, La Vanguardia, El Periódico ou Diario El Correo; tamén con Radio Internacional de China, Radio Nederland, BBC, Cadena SER, Radio Nacional de España ou Radio France Internacional, así como con cadeas de televisión (CCTV, TVG, TVE), revistas especializadas (Grial, Política Exterior, Economía Exterior, Pueblos, El Viejo Topo, East Asia. An International Quarterly, Vanguardia Dossier, Humania del Sur, Revista de Occidente, Estudios de Asia y África, Pensamiento Propio, Sinología Hispánica, Cuadernos de Estrategia etc.), dixitais (Praza, Sermos Galiza, Rebelión ou Público), semanarios (Brecha, de Uruguai), axencias de noticias (Xinhua, AGN, EFE, AFP, Alainet) ou anuarios de estudos internacionais (CEIPAZ, CIDOB), entre outros. Entre 1997 e 2019 dirixiu Tempo Exterior, revista galega de análise e estudos internacionais.
Profesor do Instituto de Altos Estudos Universitarios, é autor de varios manuais de formación (La política exterior de China; Taiwán: sistema jurídico, político y económico; Las relaciones internacionales de los países de Asia Oriental; El medio ambiente en China) da Universitat Oberta de Catalunya e da Universidad de Alcalá de Henares, na licenciatura de Estudos de Asia Oriental. Tamén é profesor colaborador do Instituto de Educación Superior Intercontinental de la Empresa (IESIDE).
Residiu de forma permanente en China (2006-2010 e 2013-2014) desenvolvendo diversos programas coa Academia de Ciencias Sociais de China e varias universidades. Foi Visiting Scholar na Academia Sínica, Taipéi, Taiwán (2012). Realizou tamén estadías de investigación na República Popular Chinesa e en Taiwán.
É membro do consello asesor da Fundación Carlos Casares, do consello de administración da revista mensual Tempos Novos e membro correspondente da Real Academia Galega. Foi membro do Consello de Acción Exterior de Galicia dende a súa creación en 2010 ata que presentou a súa dimisión en 2013.
Ten publicados máis dunha vintena de títulos en galego, castelán, portugués, inglés e chinés.
En 2018 recibiu o premio China Chair.

Publicacións nas que participou Xulio Ríos

Portada de  Lois Tobío
LIBRO. ACTAS

Lois Tobío

Galeguista, tradutor e xornalista