Arquivo de noticias do CCG

O Consello da Cultura Galega (CCG) celebra unha nova edición dos Encontros para a Normalización Lingüística, que este ano chegan á súa vixésimo sétima edición baixo o título “Lingua en acción: pasado, presente e futuro dos equipos e servizos de normalización lingüística”. A xornada pon o foco en dous axentes fundamentais para o avance da lingua galega: os Servizos de Normalización Lingüística (SNL) e os Equipos de Dinamización da Lingua Galega (EDLG), dous colectivos que contan con máis de tres décadas de traxectoria e que resultan esenciais para a revitalización e o uso social do galego. A xornada é presencial e pode seguirse en directo a través do sitio web e da canle de Youtube.

O Álbum de Galicia, colección de biografías dixitais do Consello da Cultura Galega (CCG), vén de introducir unha nova entrada dedicada ao intérprete, creador cultural, director e produtor Antonio, Toñito Blanco (A Coruña, 1964 - A Coruña, 22/11/1994), “un dos artistas máis breves e influentes da Galicia dos oitenta e noventa”, segundo o describe o guionista Nico Campos, autor da entrada. Coñecido polo seu único filme La matanza caníbal de los garrulos lisérgicos, Blanco traballou tamén no eido televisivo na Televisión de Galicia (TVG) e na Televisión Española (TVE) en Galicia, cun “estilo recoñecible” ata hoxe, malia a súa prematura morte hai xa 30 anos.

O xornal El emigrado, editado pola Sociedad Hijos del Ayuntamiento de la Estrada en Cuba, xa forma parte do Repertorio da prensa da emigración galega, unha iniciativa do Arquivo da Emigración Galega (AEG) dependente do Consello da Cultura Galega (CCG). Nesta ocasión súbense 57 exemplares editados entre 1923 e 1924. Nas súas páxinas colaboraron persoeiros como Wenceslao Fernández Flórez, Vicente Risco, Ramón Otero Pedrayo, Antón Villar Ponte, Antón Losada Diéguez, Basilio Álvarez ou Enrique Labarta Pose.

O Consello da Cultura Galega, xunto coas demais institucións estatutarias, Valedor do Pobo e Consello de Contas, recibirá o 6 de abril a Medalla do Parlamento de Galicia 2022. Esta distinción recoñece a contribución das tres entidades “ao afianzamento do autogoberno de Galicia e con plena lealdade ás restantes institucións da Comunidade Autónoma e do Estado”. A concesión é froito dun acordo unánime da Mesa da Cámara, adoptado na reunión celebrada este martes antes do inicio do Pleno.

A figura de Francisco Fernández del Riego (Vilanova de Lourenzá, Lugo, 1913- Vigo, 2010) protagoniza a nova entrega de Voces centenarias, un proxecto do Arquivo Sonoro de Galicia, dependente do Consello da Cultura Galega (CCG). Desta volta ofrécense tres gravacións nas que Fernández del Riego analiza a tres intelectuais senlleiros: Ramón Otero Pedrayo, Ricardo Carballo Calero e Antón Losada Diéguez.

Antón Tovar (Rairiz de Veiga, 1921-Ourense, 2004) foi o poeta da autenticidade atormentada e do inconformismo. A súa figura está entre as primeiras voces líricas de Galicia da segunda metade do século XX pero a escasa difusión da súa obra estivo marcada pola súa militancia comunista e a súa querenza polo individualismo e a soidade. A nova entrega de Voces centenarias, un proxecto do Arquivo Sonoro de Galicia, dependente do Consello da Cultura Galega (CCG) achega tres cortes sonoros que condensan a súa poética.

A presidenta do Consello da Cultura Galega, Rosario Álvarez, e a artista viguesa Menchu Lamas, acaban de ser recoñecidas “ex aequo” co Premio Otero Pedrayo 2021 que este ano concedeu a Deputación de Pontevedra. O xurado salientou a "extraordinaria" traxectoria das dúas galardoadas e a súa fundamental contribución á cultura galega.

Hoxe, 22 de decembro, cúmprense anos do nacemento dunha figura senlleira da Xeración Nós como é Antón Losada Diéguez. Co gallo da efeméride, o Consello da Cultura Galega (CCG) engade a súa entrada no Álbum de Galicia. Ademais, incorporamos ao proxecto de difusión #citanós, unha ducia de frases que escolman o seu pensamento e a idea de Galicia.

“Ensayo histórico de la cultura gallega” é unha obra cimeira de Ramón Otero Pedrayo concibida para explicar a cultura galega para fóra. O Consello da Cultura Galega (CCG) acaba de reeditar a versión orixinal deste texto en edición de Xosé Antonio López Silva e cun limiar do historiador e expresidente do CCG Ramón Villares. “Está escrito para demostrar que existe esa cultura, por razóns étnicas, xeográficas, relixiosas e, parcialmente, tamén políticas” apunta Villares na introdución. Acompaña a esta presentación un audiovisual en que o autor do limiar e Xosé Manoel Núñez Seixas, vicepresidente da institución e recoñecido historiador, contextualizan e explican este texto baixo a moderación de María Xosé Agra. Ademais, esta publicación supón tamén o arranque de #citaNós, un proxecto de divulgación de citas emblemáticas da xeración Nós para as redes sociais.

“Pra ledicia de todos e pra enseño de moitos, sai oxe Nós”. Así comezaba unha das iniciativas máis frutíferas da cultura galega: a revista “Nós”. Un proxecto editorial que botaron a andar Vicente Risco, Castelao, Ramón Cabanillas e Antón Losada Diéguez hai cen anos. Nacía así unha cabeceira que dignificou o idioma, que buscaba unha estética xenuinamente galega e nos puxo en pé de igualdade coa cultura europea do momento. Co gallo do centenario desta publicación, o Consello da Cultura Galega presenta a biografía das persoas vencelladas a esta histórica cabeceira. Comezamos con Ánxel Casal, Xavier Prado “Lameiro”, Ricardo Carballo Calero, Arturo Noguerol e o director de “Nós”, Vicente Risco.

No extenso e prolífico labor cultural de Filgueira Valverde, a música ten un protagonismo destacado. Foi un dos promotores da Sociedade Coral Polifónica de Pontevedra e impulsor do Festival da Canción que se desenvolveu na cidade onde foi alcalde, entre moitos outros logros. Unha traxectoria que o Consello da Cultura Galega recupera no programa do seu tradicional Concerto das Letras Galegas, que terá lugar o vindeiro sábado 16 no Auditorio Sede Afundación de Pontevedra.

“Aínda non cumprira os vinte anos cando Filgueira Valverde escribiu Os nenos, un libro de creación literaria que dá as claves do que pensaba a xeración do Seminario de Estudos Galegos”, explicou Ramón Villares, presidente do Consello da Cultura Galega (CCG), na presentación desenvolvida esta mañá. Canda el estaba Fernando Filgueira, presidente da fundación que leva o nome do polígrafo pontevedrés; Ana Isabel Vázquez, deputada provincial de Cultura; Maximino Zumalave, vocal do CCG; Carlos Valle, director do Museo de Pontevedra, e David Pintor, autor das ilustracións que acompañan a edición facsimilar deste texto, enriquecido con dous estudos críticos. A publicación insírese nas actividades previstas polo CCG para conmemorar a celebración do Día das Letras Galegas dedicado a “unha figura esencial na construción das institucións do século XX”, en palabras de Ramón Villares.

Xosé Filgueira Valverde (Pontevedra, 1906-1996) mantivo unha extensa correspondencia con Castelao, Otero Pedrayo, Vicente Risco e a maior parte da intelectualidade galega do século XX. As máis de 500 carpetas con cartas que repousan no Museo de Pontevedra son unha mostra desa fecunda relación. Todas elas, xunto con outros documentos, serán dixitalizadas polo Consello da Cultura Galega en virtude dun acordo de colaboración asinado esta mañá polo presidente desta institución, Ramón Villares, e Fernando Filgueira Iglesias, fillo e presidente da Fundación Filgueira Valverde, ante a presenza de Ana Isabel Vázquez, deputada da Área de Cultura da Deputación de Pontevedra e Carlos Valle, director do museo.

O Concello lucense de Ribadeo e o Arquivo da Emigración Galega do Consello da Cultura Galega celebrarán desde este martes, día 19 de xullo, e ata o vindeiro venres, día 22, a XIII edición das xornadas "Mar por medio" baixo o título "A parroquia de acolá". O encontro contará coa participación de destacados investigadores e profesionais que abordarán a historia da emigración galega e o papel que xoga hoxe e pode xogar no futuro de Galicia.