Arquivo de noticias do CCG

Este sábado, 20 de decembro, cúmprense 118 anos da celebración da primeira vez que se interpretou o himno galego na Habana. No marco desta efeméride, o Consello da Cultura Galega, colabora coa Fundación Pondal no desenvolvemento de varias actividades. Hoxe xoves, no IES Eduardo Pondal de Ponteceso, Manuel Ferreiro, un dos máximos estudoso na obra de Eduardo Pondal, ofrecerá unha conferencia sobre o autor da letra do himno. E sábado, a coincidir co día da celebración, na casa natal de Eduardo Pondal terá lugar a interpretación do himno a cargo da asociación coral de Ponteceso "A oliveira" do Monte Branco nun acto que presenta Cristina Pet Posse.

Portugal celebra o 500 aniversario do nacemento dunha das figuras máis sobranceiras da cultura portuguesa: Luís Vaz de Camões. O Consello da Cultura Galega (CCG), en colaboración coa Real Academia Galega (RAG) máis a Cátedra de Estudos Galegos da Facultade de Letras da Universidade de Lisboa (FLUL), organizan varias actividades en Lisboa encamiñadas a estreitar as relacións entre a cultura galega e portuguesa no marco dos actos conmemorativos. Unha delas é a exposición “Sob o signo de Camões. Exposição do livro galego da FLUL” que a presidenta do CCG, Rosario Álvarez, inaugura esta tarde. Outra é encontro-diálogo “Vidas paralelas” que terá lugar mañá mércores no que participan Hélio Alves e Xosé Manuel Dasilva e que afonda na pegada e no impacto creativo da obra camoniana nos autores máis importantes da literatura galega.

O Consello da Cultura Galega (CCG) celebra o Día Internacional da Tradución, que se conmemora cada 30 de setembro, coa actualización de novos textos literarios en galego e inglés no proxecto “Seara. Discover Galician literature through its texts/Descubre a cultura galega a través dos seus textos”. Esta nova entrega diversifica estilos e preocupacións estéticas cun feixe de textos de Marica Campos, Xela Arias, Ánxel Fole e unha escolma de cantigas

O wolframio, os mártires de Carral, a Federación de Sociedades Galegas, o dolmen de Dombate, o castro de Santa Tegra ou a Porta de Carlos V son lugares significativos da memoria colectiva galega. Son tamén as seis entradas que abren o proxecto Lugares de memoria co que o Consello da Cultura Galega (CCG) pretende profundar no coñecemento da nosa historia. Estará conformado por 75 entradas que poñerán o acento nas interpretacións, permanencias e legado na memoria colectiva do país. “Pretende ser unha viaxe polo noso patrimonio e pola nosa historia” apuntou a presidenta do CCG, Rosario Álvarez, na inauguración da xornada “Lugares de Memoria de Galicia: historia e lembranza” coa que se abriu publicamente este proxecto. Xunto con ela, Xosé M. Núñez Seixas, vicepresidente do CCG e coordinador do proxecto, destacou que este catálogo virtual irá incorporando novas entradas progresivamente.

O Álbum de Galicia, colección de biografías do Consello da Cultura Galega (CCG), incorpora hoxe as entradas de dúas figuras do Rexurdimento galego. Dunha banda a de Teodosio Vesteiro Torres (Vigo, 1847- Madrid, 1876), xornalista, poeta, escritor e profesor de música que impulsou a creación da asociación La Galicia Literaria e publicou a obra de Galería de gallegos ilustres. Da outra, a de Alfredo Vicenti Rey (Santiago de Compostela, 1850- Madrid, 1916), xornalista, escritor e político, director do xornal El Liberal e deputado a Cortes. Xurxo Martínez González é o autor de ambas as dúas entradas que xa están dispoñibles para consulta no web do CCG.

O Consello da Cultura Galega (CCG) celebra o Día Internacional da Tradución, que se conmemora cada 30 de setembro, coa actualización de novos textos literarios en galego e inglés no proxecto Seara. Discover Galician literature through its texts/Descubre a cultura galega a través dos seus textos. Esta nova entrega diversifica estilos e preocupacións estéticas cun feixe de textos de Chus Pato, Rafael Dieste e Otero Pedrayo que se irán distribuíndo no web e nas redes do CCG ao longo desta semana.

María Cardarelly (Zaragoza, 1845 – ?, ca. 1915) foi unha fotógrafa pioneira ao erixirse como a primeira muller en ter un estudio propio en Galicia. Malia que só se dedicou tres anos á práctica fotográfica e que a obra que dela se coñece non supera a media ducia de orixinais, sobresaíu por capturar coa súa cámara “unha das personaxes máis relevantes da literatura e a sociedade do noso país como Rosalía de Castro”. Así o subliña Vítor Vaqueiro, o autor da súa entrada no Álbum de Galicia, a colección dixital de biografías que mantén o Consello da Cultura Galega.

Nas ás do canto é o título do proxecto co que o Consello da Cultura Galega (CCG) contribúe a festexar o centenario de Manuel Murguía (Arteixo, 1833- A Coruña, 1923), figura sobranceira do Rexurdimento. Unha iniciativa que ofrece documentos e recursos musicais para amosar a importancia da unión entre música e literatura neste período destacado para a cultura galega. A presidenta da institución, Rosario Álvarez, xunto con ensaísta Xurxo Martínez e a musicóloga Margarita Viso presentaron na tarde deste xoves un especial web que deita na rede, entre outros contidos, un repertorio de voz e piano en galego. Rosario Álvarez sinalou que este material permite “afondar no contexto decimonónico en que nace a canción lírica galega contemporánea” ao tempo que amosa que “o Rexurdimento foi moito máis que literatura” segundo apuntou Xurxo Martínez. A presentación do proxecto, cuxos contidos se editarán en forma de libro, estivo acompañada dun concerto no que se interpretaron cinco das pezas musicais incluídas no proxecto.

O Álbum de Galicia, a colección dixital de biografías que mantén o Consello da Cultura Galega (CCG), incorpora as entradas de Francisco María de la Iglesia (Santiago de Compostela, 1827 – A Coruña, 1897) e Salvador Golpe Varela (San Pedro de Oza, A Coruña, 1850 – A Coruña, 1909). Malia diferir na súa formación, ambos foron escritores e desenvolveron unha importante actividade xornalística como colaboradores e directores de diferentes cabeceiras. Ademais, foron activos militantes políticos cun marcado compromiso coa lingua galega. Asina as súas entradas Xurxo Martínez González.

De Rosalía de Castro ata Emma Pedreira, pasando por Luis Pimentel, Claudio Rodríguez Fer ou Luisa Villalta. Todos eles están en Seara. Discover Galician literature through its texts/Descubre a cultura galega a través dos seus textos, un espazo web que nace para ofrecer unha selección decantada que percorre a historia da literatura galega. Nesta seara, presentada na véspera do Día Internacional da Tradución que se celebra cada 30 de setembro, os textos dos creadores galegos estarán na versión orixinal, pero tamén na súa tradución ao inglés. A presidenta do Consello da Cultura Galega (CCG), Rosario Álvarez, e a coordinadora técnica do proxecto, a profesora e tradutora estadounidense Kathleen Nora March, presentaron en rolda de prensa este espazo que amosa textos inéditos canda outros máis coñecidos, algúns deles tamén recitados para, en palabras da presidenta, “amadores e amadoras das linguas e da literatura, desde calquera lugar e cultura”.

O protagonismo que tivo no banquete de Conxo, o seu compromiso social ou a relación con Rosalía de Castro marcan a traxectoria cultural, política e vital de Aurelio Aguirre, unha figura sobranceira entre os poetas do século XIX. Mais toda a súa obra estivo escrita en castelán (só deixou un poema en galego) polo que a súa figura quedou relegada a un segundo plano. Xurxo Martínez González asina a súa entrada no Álbum de Galicia, a colección de biografías dixitais do Consello da Cultura Galega (CCG).

O Consello da Cultura Galega (CCG) acolleu na mañá deste venres, 7 de xullo, o acto institucional co que celebrou o 40º aniversario da súa creación. “Renovamos o compromiso do CCG coa defensa e promoción dos valores culturais do pobo galego, dos seus dereitos á cultura, do seu dereito e obriga de arrequentar e transmitir a herdanza cultural”, expresou a presidenta, Rosario Álvarez, nun discurso en que fixo partícipes a todos os presentes. “Velaí un camiño que, por forza, temos que percorrer xuntos”, afirmou nun acto que tamén contou coa presenza de Alfonso Rueda, presidente da Xunta de Galicia e presidente de honra da institución. Rueda puxo en valor o traballo desenvolvido polo CCG durante todos estes anos e comprometeu "o apoio do Executivo autonómico a seguir impulsando a creación e o talento galegos". Pola súa parte, o presidente do Parlamento de Galicia, Miguel Ángel Santalices, apuntou que o CCG é unha “institución indispensable para o presente e para o futuro de Galicia”. Autoridades e representantes da cultura galega e da sociedade civil ateigaron a sede da institución nesta celebración.

Alejandro Viana (Ponteareas, Pontevedra, 1877 – México D. F., 1952) desenvolveu a súa traxectoria como empresario e político. De ideoloxía republicana, acadou en 1936 a acta de deputado nas Cortes pola Fronte Popular, cargo en que permaneceu ata 1939, cando se exiliou a Francia. Dende alí organizou varias expedicións marítimas que permitiron o traslado duns 17 000 refuxiados republicanos a América. A súa entrada no Álbum de Galicia, a colección dixital de biografías que mantén o Consello da Cultura Galega (CCG), é autoría de Roberto Mera.

Gustavo Pernas Cora (Viveiro, Lugo, 1959 – A Coruña, 2018) destacou na súa traxectoria como actor, director de escena e dramaturgo. Foi unha das “figuras fundamentais das artes escénicas galegas e, especialmente, da dramaturxia galega contemporánea”, subliña Ana Abad de Larriva. Ela é a autora da entrada que se incorpora hoxe ao Álbum de Galicia, a colección dixital de biografías que mantén o Consello da Cultura Galega (CCG).

Hijas de Galicia foi unha institución pioneira na historia da emigración galega da primeira metade do século XX. Creada na Habana en 1917 cun fin asistencial, mantivo a súa actividade ata o ano 1960. Durante ese período, ofreceu atención sociosanitaria ás galegas emigradas e prestou especial atención ás situacións de vulnerabilidade que estas sufrían, sobre todo ás vinculadas coa trata e tráfico de mulleres. Ademais, desenvolveu un papel crucial nos inicios do feminismo galego e cubano. María Xosé Porteiro García é a autora da entrada que se incorpora hoxe ao Álbum de Galicia, a colección dixital de biografías que mantén o Consello da Cultura Galega (CCG).

Inocencio Schmidt de las Heras (A Coruña, 1897–1975) foi un dos grandes representantes da corrente fotográfica do pictorialismo, na que destacou polo seu dominio da técnica do bromóleo. A paisaxe constituíu o núcleo central da súa obra, aínda que coa súa cámara rexistrou tamén imaxes de estatuas e recantos típicos dalgunhas cidades. Ademais, realizou outro tipo de fotografías máis vinculadas coa sociedade industrial do seu tempo, nas que sobresae a presenza de fábricas, ferrocarrís ou guindastres. A súa entrada no Álbum de Galicia, a colección dixital de biografías que mantén o Consello da Cultura Galega (CCG), é autoría de Vítor Vaqueiro.

Eduardo Pondal (Ponteceso, A Coruña, 1835 – A Coruña, 1917) foi o último gran poeta do Rexurdimento. Autor dunha produción que o consagrou como o bardo do pobo galego, puxo a súa obra e a súa vida ao servizo da nación, do rexurdir e da redención de Galicia. Ademais, por encarga do compositor Pascual Veiga, escribiu o texto para o himno galego. A súa entrada no Álbum de Galicia, a colección dixital de biografías que mantén o Consello da Cultura Galega (CCG), é autoría de Manuel Ferreiro Fernández.

Antolín Faraldo foi a alma e a mente da Revolución de 1846. Murguía dixo del que foi “o primeiro e o mellor”, líder indiscutible que iniciou o camiño cara ao autogoberno. O proxecto Roteiros, iniciativa do Consello da Cultura Galega (CCG), pon na rede un novo itinerario polas rúas de Compostela a partir da figura de Antolín Faraldo, cando se cumpren 200 anos do seu nacemento. A selección de espazos e textos é do historiador Xurxo Martínez González e as imaxes, de Manuel Gago.

A coordinadora da Sección de Ciencia, Tecnoloxía Natureza e Sociedade do Consello da Cultura Galega (CCG), Elena Vázquez Cendón, inaugurou hoxe en Ponteceso a xornada Emocións e vocacións científicas, encamiñada a fomentar as vocacións científicas. Ánxela Bugallo e Xosé María Varela coordinaron esta actividade que estaba formada por varios obradoiros pensados para alumnado de primaria de centros da contorna. A cita contaba coa colaboración da Fundación Pondal.

O Consello da Cultura Galega (CCG) colabora un ano máis co Festiletras, festival organizado pola Fundación Eduardo Pondal na Aldea do Couto (Ponteceso). Nesta ocasión faino co espectáculo dos Quinquilláns Por que é salgada a auga do mar?. A función terá lugar este venres (2 de setembro) na eira da Praza do Quinteiro.