Arquivo de noticias do CCG

O Consello da Cultura Galega acolleu esta tarde un encontro cos representantes dos diferentes grupos parlamentarios, administracións e outras entidades na que se presentaron as 96 medidas que se propoñen no informe Un país coa súa lingua. Foro participativo, do Consello da Cultura Galega (CCG). A presidenta do CCG, Rosario Álvarez, abriu a sesión na que a vicepresidenta e coordinadora do foro, Dolores Vilavedra, explicou o documento que contén medidas de aplicación inmediata —moitas delas sen custo económico— e estruturais que contribúen a reverter a situación do galego.

Desde como se expresan as ideoloxías lingüísticas nas interaccións das redes do “Dígocho eu” e a plataforma @emgalego, ata as motivacións dos neofalantes da provincia de Ourense, pasando polos procesos de tradución que os fillos dos migrantes fan ao seus pais... son moitas e moi variadas as casuísticas que se analizan no libro “Identidades e ideoloxías perante a diversidade lingüística” que o Consello da Cultura Galega (CCG) e o Instituto de Lingua Galega (ILG) da Universidade de Santiago de Compostela (USC) acaban de sacar do prelo. A directora do ILG, Elisa Fernández Rei, Estela Fidalgo Garra e Miguel Guisantes Alonso, máis Dolores Vilavedra, vicepresidenta do CCG, xunto con diferentes autores do libro presentaron a publicación na mañá deste luns no salón de graos de Filoloxía. O volume xa se pode descargar desde o web do CCG.

Cales son os retos do libro galego? Cales as súas apostas? Como de diversos os seus perfís? A que públicos lles falta por chegar? E, moi especialmente, que espazo teñen o lectorado e o libro galego nelas? Estas son algunhas das preguntas ás que pretende responder a xornada “As librarías, un ecosistema posible para o libro galego” que organiza este mércores (a partir das 16:30 horas) a Sección de Lingua, Literatura e Comunicación do Consello da Cultura Galega (CCG). A cita, coordinada por Montse Pena e Rosalía Fernández Rial, pódese seguir en directo desde o web da institución e a súa canle de Youtube.

“Foi unha muller que se entregou á cultura galega, á que se dedicou en profundidade e que nos deixou un legado impagable” apuntou a presidenta do Consello da Cultura Galega (CCG), Rosario Álvarez, na inauguración. A xornada está coorganizada polo CCG, o Instituto da Lingua Galega (ILG) e o Museo do Pobo, “tres entidades que representan moi ben o vínculo de Dorothé con Galicia e coa cultura galega” engadiu a directora do ILG da Universidade de Santiago de Compostela, Elisa Fernández Rei. Concha Losada, presidenta do Padroado do Museo do Pobo Galego, institución que acolle presencialmente a sesión apuntou que “fan falta moitas mans para debuxar o perfil poliédrico de Dorothé Schubarth”.

Con música, baile e palabra o Consello da Cultura Galega (CCG), o Museo do Pobo Galego e o Instituto da Lingua Galega da USC (ILG-USC) celebrarán o vindeiro 12 de xuño un acto de homenaxe para lembrar a figura de Dorothé Schubarth (Basilea, Suíza, 1944-2023). A presidenta do CCG, Rosario Álvarez; a presidenta do Padroado do Museo do Pobo Galego, Concha Losada, e a directora do ILG-USC, Elisa Fernández Rei, destacaron na súa presentación do programa o papel central que esta musicóloga e compositora suíza representou para o folclore galego. “É unha homenaxe que o pobo galego lle brinda a Dorothé polo seu traballo titánico e xeneroso”, apuntou Rosario Álvarez. Concha Losada destacou a importancia deste legado, que inspirou e contribuíu á música actual e que “todas as que colaboran neste inmenso agradecemento de todo o país o fan voluntariamente”. Pola súa parte, Elisa Fernández Rei engadiu que “o programa é unha festa na que lembraremos a muller, pero tamén escoitaremos a súa música”. Ademais, hoxe incorporouse a súa entrada biográfica ao Álbum de Galicia, a colección de biografías do CCG, escrita polo musicólogo Sergio de la Ossa.

O Consello da Cultura Galega (CCG) levou a cabo unha sesión plenaria no serán deste mércores na que aprobou a programación da institución para 2024. A relación entre cultura, patrimonio e turismo; a intelixencia artificial aplicada á creación; a memoria da transición; a proxección exterior, e internacionalización da cultura galega son as áreas prioritarias para o vindeiro ano. Ademais, a institución, que preside Rosario Álvarez, manterá as súas liñas de acción habitual, así como a asesoría e a avaliación do sector cultural, con informes e documentos de traballo. Na sesión tomou posesión Dolores Vilavedra, que substitúe a Elisa Fernández Rei como representante do ILG no Pleno.

De Rosalía de Castro ata Emma Pedreira, pasando por Luis Pimentel, Claudio Rodríguez Fer ou Luisa Villalta. Todos eles están en Seara. Discover Galician literature through its texts/Descubre a cultura galega a través dos seus textos, un espazo web que nace para ofrecer unha selección decantada que percorre a historia da literatura galega. Nesta seara, presentada na véspera do Día Internacional da Tradución que se celebra cada 30 de setembro, os textos dos creadores galegos estarán na versión orixinal, pero tamén na súa tradución ao inglés. A presidenta do Consello da Cultura Galega (CCG), Rosario Álvarez, e a coordinadora técnica do proxecto, a profesora e tradutora estadounidense Kathleen Nora March, presentaron en rolda de prensa este espazo que amosa textos inéditos canda outros máis coñecidos, algúns deles tamén recitados para, en palabras da presidenta, “amadores e amadoras das linguas e da literatura, desde calquera lugar e cultura”.

Este domingo remata a quinta edición das Xornadas Etnográficas do Morrazo. Alí se presentará o proxecto do Consello da Cultura Galega (CCG) Axudádeme a cantar. Unha das codirectoras da iniciativa, Renée DePalma, asistirá ao certame en que se proxectará un dos capítulos e manterá un coloquio co público.

“Este pandeiro que toco. O patrimonio de percusión nas mans das mulleres galegas” é o título da xornada que a Sección de Lingua, Literatura e Comunicación do Consello da Cultura Galega (CCG) e a Universidade da Coruña organizan para pór en valor o canto acompañado con percusión de man. A través de materiais audiovisuais, charlas, obradoiros e un concerto didáctico, a xornada explorará aspectos históricos e actuais desta arte coa participación de Xulia Feixoo, Carolina Vázquez e a agrupación Caldo, entre outros. A xornada terá lugar na Sala Cubo de Normal - Espazo de Intervención Cultural da Universidade da Coruña o vindeiro 1 de xullo a partir das 10:15 horas.

Este sábado celébrase unha nova edición do Serán dos Namorados, unha festa que ten lugar no concello de Mondariz arredor do 14 de febreiro e da que se fala no primeiro dos capítulos do proxecto do Consello da Cultura Galega (CCG) Axudádeme a cantar. Ata alí desprazaranse as tres responsables do audiovisual, Renée DePalma, Xulia Feixoo e Carme López, que manterán un coloquio co público tras a proxección (19:00 horas).

Axudádeme a cantar é o nome do último proxecto do Consello da Cultura Galega (CCG), unha serie documental que pretende visibilizar o canto acompañado con percusión de man. Seis capítulos percorren a historia e o presente deste tipo de literatura oral, sostida por mulleres que non aprenderon en ningunha escola e que son as grandes esquecidas da cultura tradicional oral. A presidenta do CCG, Rosario Álvarez; a coordinadora da Sección de Lingua, Literatura e Comunicación, Carmen García Mateo, e mais as tres responsables do proxecto, Carme López, Renée DePalma e Xulia Feixoo, presentaron a serie audiovisual, que xa se pode ver no web do CCG e nas súas redes. “Hai tempo que traballamos na proxección de contidos que permanezan no tempo ademais de homenaxear a toda a cultura de base” apuntou Rosario Álvarez sobre esta iniciativa que terá a primeira exhibición pública no Serán dos Namorados, en Toutón (Mondariz), o vindeiro 11 de febreiro.

Alejandro Manuel Raimúndez Fernández (Ourense, 1906 – Devon, Inglaterra, 1968) destacou, na súa traxectoria, por ser o impulsor e responsable das emisións en galego da BBC de Londres. El foi “o noso home na BBC”, como o define Afonso Vázquez-Monxardín na entrada que asina no Álbum de Galicia.

Realidade e perspectivas de futuro dos medios de comunicación en galego en soporte papel é o título da xornada que se desenvolverá este luns, 10 de outubro ás 09:45 horas, no Consello da Cultura Galega (CCG). Nela, analizarase a realidade actual da prensa escrita en galego, así como a súa capacidade de resistencia e adaptación nun contexto marcado pola dixitalización e a crise económica. A iniciativa está coordinada por María Ángeles Rodríguez Yáñez e forma parte das actividades desenvolvidas pola Sección de Lingua, Literatura e Comunicación do CCG. A sesión é presencial, pero tamén se poderá seguir en directo a través das redes da institución.

Unha contorna completamente castelanizada na que a transmisión do galego de pais a fillos hai tempo que non se produce. Neste contexto, a actividade dos equipos de dinamización lingüística do CEIP Quintela de Moaña buscan a faceta emocional para o ensino e uso do idioma. A historia deste centro protagoniza o último capítulo de Aquí medra a lingua, serie web do Consello da Cultura Galega (CCG) que dá a coñecer iniciativas de dinamización lingüística na escola. O proxecto non conclúe aquí, xa que no vindeiro mes de xuño se presentará un documental de trinta minutos que ofrecerá, a partir deste material, unha panorámica xeral sobre o uso do idioma no ámbito escolar.

As visitas ao lavadoiro na que recuperaron oficios e cantigas, un álbum de lembranzas ou o ciclo agrícola para coñecer o léxico de cada estación son algunhas das iniciativas que se desenvolven no Centro Rural Agrupado Nosa Señora do Faro, é dicir, oito escolas dos concellos de Ponteceso, Cabana de Bergantiños e Malpica. O seu proxecto centra a penúltima entrega de Aquí medra a lingua, serie web do Consello da Cultura Galega (CCG) que dá a coñecer iniciativas de dinamización lingüística na escola.

O proxecto Aquí medra a lingua, serieweb do Consello da Cultura Galega (CCG) para dar a coñecer iniciativas de dinamización lingüística na escola, achégase esta semana a Ames. No caso do CEIP Barouta, aínda que o galego segue a ser a lingua materna de parte do alumnado, a desgaleguización é tamén unha realidade. Este capítulo chámase “Alianzas necesarias” e aborda os retos de preparar un Plan de Dinamización Lingüística cando se parte dunha radiografía fiel da realidade.

Activistas da lingua é título do terceiro dos capítulos de Aquí medra a lingua, serieweb do Consello da Cultura Galega (CCG) para dar a coñecer iniciativas de dinamización lingüística na escola. Nesta ocasión, o proxecto fai recalada no IES Félix Muriel de Rianxo para amosar o labor de normalización lingüística deste centro que vai máis ala dun proxecto de dinamización.

O proxecto Aquí medra a lingua, serieweb do Consello da Cultura Galega para dar a coñecer iniciativas de dinamización lingüística na escola, engade este luns o segundo dos capítulos. Titúlase Reforzar o propio e céntrase na experiencia do CPI Virxe da Saleta de Cea, centro integrado que xunta alumnos de infantil e da ESO. Escape rooms, bandas deseñadas, títeres, curtametraxes... son moitas e moi variadas as iniciativas que se fan neste centro que xuntou escola e comunidade e tivo iniciativas tan sonadas coma “A lingua sabe a pan”.

Aquí medra a lingua é o título da última aposta do Consello da Cultura Galega (CCG) na que propón un percorrido audiovisual por seis centros de diferentes contextos da xeografía galega para dar a coñecer os proxectos dos seus Equipos de Dinamización Lingüística. O resultado son seis pezas breves máis un documental no que participaron preto de cincuenta persoas entre alumnado, docentes, familia e comunidade. O primeiro deses traballos presentouse hoxe no IES Perdouro nunha xornada de convivencia na que participou a presidenta do CCG, Rosario Álvarez; a directora do centro, María José Pardiñas; a xefa de normalización lingüística do IES, Natalia Irimia; a realizadora dos audiovisuais, Cristina de la Torre, xunto co alumnado do centro. Na sesión proxectouse o primeiro dos capítulos, O modelo Burela, que xa está dispoñible no web do Consello da Cultura Galega (CCG).

Arqueixal, Gandeiria Quintián, Amarelante ou Adegas Celme son proxectos empresariais galegos que se caracterizan por un fondo compromiso polo medio, pola produción agrícola e gandeira sustentable e polo respecto á lingua e á cultura galegas. Os responsables destas iniciativas participan na xornada “Faladoiro de marcas que constrúen novas ruralidades” que a Sección de Lingua, Literatura e Comunicación do Consello da Cultura Galega (CCG) organiza mañá martes, 20 de xullo, en Castrelo de Miño. A presidenta da institución, Rosario Álvarez, inaugurará esta cita coordinada por Elisa Fernández Rei e Eva Sánchez Amboage.