Arquivo de noticias do CCG

O festival O Son do Camiño (12,7%), Manuel Rivas (5,7%), o Culturgal (4,7%), Fillas de Cassandra (4,2%) e a celebración do Día das Letras Galegas (4,1%) son os principais eventos, accións culturais, persoas ou entidades máis destacadas no ámbito da cultura galega en 2024, segundo a percepción das persoas responsables das entidades culturais en Galicia. Así figura no adianto da nova entrega do Barómetro da Cultura Galega, iniciativa realizada polo Observatorio da Cultura Galega, entidade dependente do Consello da Cultura Galega (CCG).

“Antes de zoqueira fun feiranta e as feiras foron a miña universidade” apuntou Elena Ferro na entrevista que a xornalista Marga Pazos lle fixo no marco da xornada “Elena Ferro: Creatividade e arte na pel”. Unha cita organizada polo Centro de Documentación en Igualade e Feminismos (CDIF) do Consello da Cultura Galega (CCG) que puxo o foco no traballo das artesás. A presidenta do CCG, Rosario Álvarez, destacou na inauguración que “hoxe falamos de Elena Ferro e singularizamos nela que detrás de mulleres singulares hai outras redes de homes e de mulleres que permitiron a capacidade de transformación da artesanía aos novos tempos, do deseño tradicional aos novos mercados”. A xornada, que rematou cunha intervención musical de Guadi Galego, tamén deu voz a novas artesás.

O Centro de Documentación en Igualdade e Feminismos (CDIF) do Consello da Cultura Galega (CCG) porá o foco na zoqueira Elena Ferro (Merza, Vila de Cruces, 1975) coa xornada “Elena Ferro: creatividade e arte na pel”, dentro do ciclo “De pioneiras e andainas”. Será este xoves 24 de outubro (a partir das 09:45 horas) e nela revisarase a importancia dos oficios galegos desde a óptica feminista. A presidenta do CCG, Rosario Álvarez, e a coordinadora da xornada e do CDIF, Carme Adán, inauguran esta cita na que participa a propia Elena Ferro, a xornalista Marga Pazos, a escritora Brigitte Vasallo e tres das novas artesás galegas. A sesión rematará cunha interpretación musical de Guadi Galego. A xornada é presencial pero pode seguirse en directo a través do sitio web e as redes da institución.

O Consello da Cultura Galega (CCG) colaborou coa consellería de Sanidade no marco da actividade organzada co gallo do Día Mundial para a prevención do suicidio. No marco desta actividade tivo lugar unha lectura contemorativa a cargo da escritora Rosa Aneiros.

“Vivo onde vivo, falo e penso en galego e para min non había outra opción” afirmou Xosé Antonio Touriñán no marco dos XXIV Encontros para a Normalización Lingüística que se desenvolveron ao longo deste xoves no Consello da Cultura Galega (CCG). Unha cita que este ano buscaba ver a relación entre a arte e a lingua da man de numerosos creadores como a escritora Alba Cid, a artista de circo Natalia Outeiro “Pajarito”, a zoqueira Elena Ferro e moitas outras figuras que non so coincidiron coa posición de Touriñán senón que amosaron un compromiso firme co idioma e o co país. A presidenta da institución, Rosario Álvarez, destacou na inauguración desta cita que “estamos convencidos do potencial da creación como unha ferramenta de normalización”. Pola súa banda, o secretario xeral de Política Lingüística, Valentín García, entidade que colabora na organización dos encontros puxo o acento no feito de que as artes estiveron desde sempre no proceso normalizador.

Xosé Antonio Touriñán, Guadi Galego, Alba Cid ou Quico Cadaval, entre moitos outros creadores coñecidos, debaten este xoves no Consello da Cultura Galega (CCG) sobre o poder das artes como unha ferramenta importante para a normalización do idioma. Esta xornada forma parte do programa dos XXIV Encontros para a Normalización Lingüística, titulados “Arte e lingua como ferramentas de construción masiva” e organizados polo Centro de Documentación Sociolingüística de Galicia (CDSG) do CCG coa colaboración da Secretaría Xeral de Política Lingüística, unha cita de referencia no debate, reflexión e análise da situación presente e futura da lingua galega. A presidenta da institución, Rosario Álvarez e o secretario xeral de Política Lingüística, Valentín García, inaugurarán esta cita, que se pode seguir en directo polo web e as redes sociais do CCG.

Do teatro á videocreación, pasando polo cinema e o humor. As artes poden ser un elemento normalizador poderoso. Esta é a tese que defende o programa dos XXIV Encontros para a Normalización Lingüística, unha cita de referencia no debate, reflexión e análise da situación presente e futura da lingua galega. Un encontro que organiza o Centro de Documentación Sociolingüística (CDSG) do Consello da Cultura Galega (CCG). Creadores recoñecidos como Xosé Antonio Touriñán, Guadi Galego, Alba Cid ou Quico Cadaval, entre moitos outros, debaten sobre a arte como unha ferramenta de construción masiva. Está aberta a inscrición da xornada presencial destes encontros, que se desenvolverá o 20 de outubro. A xornada ten tamén unha parte virtual, que son os vídeos elaborados por Fran da Lobeira, da Lobeira Today, e Nee Barros, de Neeumatiko, nos que os creadores participantes debaten sobre a relación entre arte e lingua. Os vídeos pódense consultar desde hoxe no noso web.

A cantante galega Guadi Galego recibe mañá en Madrid Premio á Promoción da Realidade Plurilingüe do Estado Español polo seu disco “Immersion”. Trátase dun galardón que conceden os gobernos das seis comunidades autónomas con linguas propias, que levaba dez anos sen entregarse e que por primeira vez recae nunha artista. A presidenta do Consello da Cultura Galega, Rosario Álvarez, asistirá ao acto de entrega, que terá lugar mañá, na véspera do Día Internacional da Lingua Materna, no Círculo de Belas Artes.

“As mulleres co mundo na cabeza” é unha homenaxe a todas esas mulleres anónimas que sustentaron cos materiais que transportaban na súa cabeza a numerosas familias e que non deixaron ninguna pegada nos rexistros oficiais”. Encarna Otero explica deste xeito en que consiste o documental que dirixiu no marco dunha das áreas de traballo da Comisión de Igualdade do Consello da Cultura Galega (CCG). A presidenta da institución, Rosario Álvarez, canda a propia Encarna Otero e algunas das mulleres que participaron neste traballo asistirán mañá en Carnota (Salón da casa do concello, ás 19:00 horas) á estrea deste documental que pretende servir de testemuño do traballo anónimo e invisible das mulleres do Pindo. O acto contará coa participación da cantora Guadi Galego.