Arquivo de noticias do CCG

O Tío Marcos d’a Portela é o gran pioneiro dos medios de comunicación en galego. Promovido por Valentín Lamas Carvajal (Ourense, 1849-1906), de periodicidade quincenal, chegou a ter unha tiraxe de 4.000 exemplares. A comisión de coordinación do 150 aniversario da publicación presentou hoxe os actos que conmemoran a efeméride. César Manuel Fernández Gil, vicepresidente segundo da Deputación de Ourense; Rosario Álvarez, presidenta do Consello da Cultura Galega, Valentín García, secretario xeral da Lingua da Xunta de Galicia; María López-Sández, membro da comisión executiva da Real Academia Galega; Armando Ojea, concelleiro de Ourense; Afonso Vázquez Mondarxín, coordinador da comisión, xunto con representantes da Asociación de Medios en Galego, La Región, Liceo de Ourense, a coral Ruada e a Fundación ONCE mais familiares de Valentín Lamas Carvajal detallaron no centro Cultural Marcos Valcárcel de Ourense os eixes das actividades previstas. Un roteiro, un xantar popular, un concerto, xornadas de divulgación e a dixitalización da colección completa, destacan entre as propostas que acollerá a cidade de Ourense ao longo deste ano.

Pier Paolo Pasolini deixou constancia do seu pensamento político a través dunha ampla produción literaria, cinematográfica, poética e xornalística. Co fin de profundar nas súas reflexións e de introducir novos enfoques no estudo da súa obra, o Consello da Cultura Galega (CCG) organiza a xornada “O pobo canta: o pensamento político de Pier Paolo Pasolini”. A cita, coordinada por Simone G. Saibene e Celia Pereira Porto, terá lugar mañá, 7 de novembro (10:00 horas), no Centro Cultural Marcos Valcárcel de Ourense. A sesión é presencial e non se poderá seguir en directo, pero será gravada e subida posteriormente á hemeroteca do CCG.

A obra literaria, cinematográfica, poética e xornalística de Pier Paolo Pasolini atende a conceptos como a liberdade, a violencia, a memoria, a xustiza, a felicidade ou o poder. Estas cuestións, que están de vixente actualidade, analizaraas o Consello da Cultura Galega (CCG) na xornada “O pobo canta: o pensamento político de Pier Paolo Pasolini”, cita coordinada por Simone G. Saibene e Celia Pereira Porto que terá lugar o vindeiro 7 de novembro no Centro Cultural Marcos Valcárcel de Ourense. A inscrición está aberta e pode facerse no web do CCG.

O Álbum de Galicia incorpora hoxe a entrada do arqueólogo e sacerdote Xesús Carro (Santiago de Compostela, 1884-1973), quen destacou por ser o pioneiro dos estudos xacobeos. Ademais, colaborou con Xosé Filgueira Valverde na posta en marcha do Museo Catedralicio e axudou a Walter Muir Whitehill na transcrición do Códice Calixtino. Asina a súa biografía Adrián Estévez.

Xesús “Chichi” Campos (La Laguna, Santa Cruz de Tenerife, 1952 - Santiago de Compostela, 1991) proporcionou, por medio dos seus debuxos e escritos, unha visión aguda e vertixinosa do noso país. “A súa foi unha vida que resume o espírito dos anos oitenta en Galicia, unha época que retratou como ninguén”, afirma o seu fillo, Nico Campos. El é o autor da súa biografía no Álbum de Galicia.

O Álbum de Galicia publica no día de hoxe a entrada de Luís Rei (O Grove, 1960 - Pontevedra, 2015), biógrafo do poeta Ramón Cabanillas e do líder agrarista e republicano Basilio Álvarez. Na súa traxectoria sobresae tamén o seu labor no estudo da cultura, da literatura e da historia, especialmente das vinculadas á ría de Arousa, así como o papel que desempeñou na recuperación e divulgación da cultura marítima e fluvial de Galicia e do norte de Portugal. A súa entrada é autoría de Emilio Xosé Insua López.

Agustín Acevedo (Ribadeo, Lugo, 1806 - Las Caldas del Besaya, Cantabria, 1874) destacou polo seu labor de médico na loita contra as epidemias de tifo e cólera, así como por ser o escritor de Una temporada en el más bello de los planetas, considerada a primeira novela galega de ficción científica. A súa entrada no Álbum de Galicia é autoría de Francisco Díaz-Fierros Viqueira.

A colección biográfica do Consello da Cultura Galega (CCG) incorpora hoxe a entrada de Marcos Valcárcel (Ourense, 1958 – 2010), quen contribuíu de xeito activo á posta en valor da cidade de Ourense como universo literario. “O seu compromiso social e cultural, a súa firmeza elegante, a súa bonhomía e o seu esforzo na concordia fan del un referente exemplar para as xeracións presentes e futuras”, subliña Afonso Vázquez-Monxardín na biografía que asina no Álbum de Galicia.

O vindeiro domingo pecha as súas portas en Ourense Afonso X e Galicia, a mostra coa que o Consello da Cultura Galega (CCG), a Xunta e a Deputación de Ourense conmemoran o 800 aniversario do Rei Sabio. A exposición convida a coñecer a esta figura a través de documentos, testemuños arqueolóxicos, literarios e musicais que amosan o legado afonsino en paralelo ao esplendor da cultura galega na etapa medieval. O músico, musicólogo e medievalista Antoni Rossell é o comisario desta proposta que se enriqueceu para a súa exhibición en Ourense con materiais escolmados por Afonso Vázquez Monxardín que afondan na conexión do monarca con esta provincia.

“O catálogo é a guinda que lle faltaba ao pastel, dalle unidade e pecha o círculo” explica o músico, musicólogo e medievalista Antoni Rossell sobre “Afonso X e Galicia” o catálogo da exposición homónima coa que o Consello da Cultura Galega celebra este ano o 800 aniversario do nacemento de Afonso X. O catálogo, que está en galego, inglés e castelán, é interactivo e xa se pode consultar deste hoxe no espazo web do CCG.

“Afonso X e Galicia” é o título da exposición coa que o Consello da Cultura Galega (CCG) afonda na conexión galega do rei sabio cando se cumpren oitocentos anos do seu nacemento. A mostra pecha este sábado en Compostela e inicia a súa itinerancia. A primeira das súas paradas será Ourense, no Centro Cultural Marcos Valcárcel onde se inaugurará o vindeiro día 7 de maio. O proxecto expositivo compleméntase cun espazo web onde figuran materiais sonoros, audiovisuais e unha proposta de roteiros que convidan a percorrer o patrimonio galego en conexión co legado afonsino.

O xurado da game jam "Afonso X e Galicia" declarou por unanimidade gañador o xogo “O mester”, presentado por Carlos Balado e Pablo García de los Salmones. O videoxogo parte da tradición musical das Cantigas de Santa María, e propón duelos musicais cos personaxes das ilustracions do Códice. A entrega do premio, dotado con 250 euros en metálico, terá lugar o venres 16 de abril.

A poliédrica figura de Afonso X, o potencial cultural das Cantigas de Santa María ou a Idade Media son os temas que o Consello da Cultura Galega (CCG), xunto coa asociación Videoxogo.gal, proponen para a realización ou ambientación dun videoxogo. Para iso convocan unha Game Jam, un encontro virtual de desenvolvedores, que comeza hoxe a través da plataforma itch.io. O equipo gañador recibirá un premio de 250 euros en metálico. A proposta é unha das actividades complementarias da exposición “Afonso X e Galicia” que se pode visitar na Igrexa da Universidade de Santiago de Compostela ata o día 24 de abril.

“Afonso X e Galicia” é o título da exposición coa que o Consello da Cultura Galega (CCG) afonda na conexión galega do Rei Sabio cando se cumpren oitocentos anos do seu nacemento. A mostra, que estivo pechada por mor das circunstancias sanitarias actuais, reabre ao público hoxe martes 23 de febreiro no seu horario habitual. O proxecto expositivo compleméntase cun espazo web onde figuran materiais sonoros, audiovisuais e unha proposta de roteiros que convidan a percorrer o patrimonio galego en conexión co legado afonsino.

Neste 2021 cúmprense oitocentos anos do nacemento de Afonso X, rei de Castela entre 1252 e 1284, que tivo unha intensa relación coa cultura galega. Precisamente sobre esa relación afonda “Afonso X e Galicia”, a mostra que o Consello da Cultura Galega inaugurou o pasado 12 de xaneiro e que está pechada por mor das circunstancias sanitarias actuais. Con todo, desde hoxe está disponible para a cidadanía un vídeo que permite coñecer a exposición da man do seu comisario, Antoni Rossell. O audiovisual dura preto de 15 minutos e ofrece un percorrido guiado polo espazo expositivo que emprega documentos, testemuños arqueolóxicos literarios e musicais para achegarse ao pasado medieval galego e á figura do monarca.

Neste 2021 xúntanse dúas celebracións importantes para Galicia e a cultura galega: a celebración dun novo Ano Santo e o 800 aniversario do nacemento de Afonso X, unha das figuras máis relevantes da cultura europea. Dúas efemérides sobre as que se asenta o último proxecto expositivo do Consello da Cultura Galega (CCG) “Afonso X e Galicia”. A mostra, que abre hoxe as súas portas na Igrexa da Universidade en Santiago, convida a coñecer a enorme influencia da figura de Afonso X cunha peregrinaxe a través de documentos, testemuños arqueolóxicos, literarios e musicais que amosan o legado afonsino en paralelo ao esplendor da cultura galega na etapa medieval. A mostra foi inaugurada pola presidenta do CCG, Rosario Álvarez; o presidente da Xunta de Galicia e presidente de honra desta institución, Alberto Núñez Feijoo; o conselleiro de Cultura e Turismo, Román Rodríguez; o presidente da Deputación de Ourense, José Manuel Baltar e o reitor da USC, Antonio López. O músico, musicólogo e medievalista Antoni Rossell é o comisario desta mostra que estará aberta ata o 24 de abril.

O 23 de novembro de 1221 nacía en Toledo unha das figuras máis relevantes da cultura europea e, particularmente, das letras hispánicas do seu tempo: Afonso X. Sobre esta figura afonda “Afonso X e Galicia”, o último proxecto expositivo do Consello da Cultura Galega, que conta coa colaboración da Consellería de Cultura, Educación e Universidade da Xunta de Galicia, a Deputación de Ourense e a Universidade de Santiago de Compostela. A mostra busca visibilizar a conexión con Galicia de Afonso X, no 800 aniversario do seu nacemento, a través das “Cantigas de Santa María” pero tamén noutros nexos máis profundos, ao tempo que amosa un intelectual que condensa outra forma de entender o saber do seu tempo. O músico, musicólogo e medievalista Antoni Rosell é o comisario desta mostra, que se inaugurará o vindeiro 12 de xaneiro.

A exposición itinerante “Un canto e unha luz na noite. Asociacionismo cultural en Galicia (1961-1975), ideada e organizada polo Consello da Cultura Galega (CCG) en colaboración coa Fundación “10 de Marzo”, foi inaugurada esta tarde no Centro Cultural “Marcos Valcárcel” da Deputación de Ourense. A mostra, comisariada por Ricardo Gurriarán, rescata e destaca en vintedous paneis explicativos e nove vitrinas o papel dinamizador e transformador dos axentes e das asociacións culturais en Galicia nos últimos quince anos da ditadura franquista. Arranca en 1961, ano de creación en Compostela da primeira asociación cultural galega: “O Galo”. No acto inaugural interviron Francisco González, director do Centro Cultural da Deputación; Ricardo Gurriarán; Marcelino Fernández Santiago, xerente do CCG, e Roberto Castro, subdelegado do Goberno en Ourense. A exposición poderá visitarse ata o próximo 9 de xuño.

Os investigadores e xornalistas que participan este xoves e venres nas xornadas "A Comunicación no seu tempo", no Consello da Cultura Galega, abordaron esta mañá as perspectivas de futuro e as iniciativas necesarias para avanzar na recuperación da historia da comunicación en Galicia. Estas xornadas, organizadas pola Sección de Comunicación do CCG, reúnen a destacados investigadores, como Armand Balsebre, Timoteo Álvarez e Javier Díaz Noci, para afondar nos piares da historia do xornalismo.

O encontro "A Comunicación no seu tempo" comezou esta mañá no Consello da Cultura Galega analizando o desprestixio que rodea á comunicación de masas e aos seus produtos a pesares de ser os máis consumidos. Estas xornadas, que se celebran este xoves e venres en Santiago de Compostela, reúnen a destacados investigadores, como Armand Balsebre, Timoteo Álvarez e Javier Díaz Noci, para afondar nos piares da historia do Xornalismo.