Arquivo de noticias do CCG

“A propósito de Anna” é o título da xornada coa que o Consello da Cultura Galega (CCG) homenaxea á fotoxornalista catalá Anna Turbau este luns (27 de outubro, 16:15 horas). Margarita Ledo coordina esa sesión que achega a mirada crítica e comprometida de Turbau e a súa influencia nas xeracións posteriores. A sesión é presencial pero pode seguirse en directo a través do web e das redes sociais da institución.

O Consello da Cultura Galega (CCG) expresa o seu fondo pesar polo pasamento da fotógrafa catalá Anna Turbau (Barcelona, 1949-2025). Fotógrafa social, Turbau morreu esta madrugada en Barcelona, onde residía. Mantivo unha estreita relación con Galicia que se iniciou en 1975, cando chegou xunto con Llorenç Soler para retratar as vivendas para familias xitanas construídas por César Portela e Pascuala Campos en Campañó (Poio). Arrincou así unha estadía de tres anos na que fotografou, entre outros movementos sociais, as loitas para conservar los montes veciñais, as protestas contra a construción da AP-9 ou a realidade dos Ancares. Un arquivo fotográfico formado por preto de dez mil fotografías que a propia Turbau cedeu ao CCG para a súa custodia e difusión.

O Vello Cárcere de Lugo acolle desde este mércores A intimidade da imaxe, mostra que percorre a Transición en Galicia da man das fotografías de Anna Turbau (Barcelona, 1949). A presidenta do Consello da Cultura Galega, Rosario Álvarez; a fotógrafa, Anna Turbau; a concelleira de Cultura, Turismo e promoción da Lingua, Tareixa Antía Ferreiro; e a comisaria, Margarita Ledo, serán as encargadas de inaugurar (mércores 5, 19:00 horas) esta nova itinerancia da mostra, que estará aberta ata o vindeiro 30 de setembro.

Nalgures é un ciclo de cinema e conversas que se achega a momentos de conflito a partir de conceptos como territorio, memoria e identidade. A proposta xorde como actividade paralela á exposición homónima de Narelle Jubelin (Sidney, Australia, 1960). É froito dunha colaboración entre o Centro Galego de Arte Contemporánea e o Consello da Cultura Galega (CCG), que implica a presenza da fotógrafa catalá Anna Turbau, que retratou a transición en Galicia e cuxo fondo está en depósito no CCG.

O Consello da Cultura Galega e o Concello de Ferrol inauguran este venres no Centro Torrente Ballester (20:00 horas) A intimidade da imaxe, mostra que percorre a transición en Galicia da man das fotografías de Anna Turbau (Barcelona, 1949). Na inauguración estará presente a comisaria, Margarita Ledo, que realizará unha visita guiada. A exposición estará aberta ao público ata o 29 de maio.

A intimidade da imaxe suma un preto dun centenar de fotografías que percorren a Galicia da transición na ollada da fotógrafa catalá Anna Turbau (Barcelona, 1949). Imaxes que mostran os conflitos sociais, políticos e humanos cos que a fotógrafa se atopou na súa chegada a Galicia a finais dos anos setenta. Rebeca Blanco-Rotea, membro da Comisión Executiva do Consello da Cultura Galega; Abel Losada, concelleiro de Cultura e a propia fotógrafa, Anna Turbau, inauguraron na Casa das Artes esta mostra que se poderá visitar ata o 7 de novembro.

O Consello da Cultura Galega (CCG) e o concello de Pontevedra inauguran hoxe no Pazo da Cultura dúas mostras que revisan a historia recente de Galicia desde diferentes puntos e vista e formatos. A primeira delas é “A intimidade da imaxe”, a exposición que olla cara a Galicia da transición a través das fotografías de Anna Turbau (Barcelona, 1949). A segunda é “Alba de Gloria” a proposta que recrea e contextualiza o último gran discurso que pronunciou Castelao en vida no que enumera as grandes figuras da cultura galega. Rosario Álvarez, presidenta do Consello da Cultura Galega e Miguel Anxo Fernández Lores, alcalde de Pontevedra foron os encargos de inaugurar, xunto cos dous comisarios Margarita Ledo e Manuel Gago máis a concelleira de Cultura Carme Fouces. As propostas expositivas poderanse visitar ata o 25 de agosto.

Arte+coleccionismo e Arte+educación son dúas publicacións que achegan novas lecturas sobre o sector da arte e en relación con outras disciplinas. Son dous textos que recollen as intervencións de dous congresos realizados en 2015 e 2016, respectivamente, pero que teñen total vixencia. “Primeiro porque hai temas como o coleccionismo sobre o que non hai case nada publicado, e segundo porque a situación a día de hoxe aínda está bastante peor que daquela” apuntou Marisa Sobrino, editora dun dos textos e responsable da Sección do Consello da Cultura Galega (CCG) que programou aquelas citas. A presidenta da institución, Rosario Álvarez, apuntou a pertinencia de abordar este tipo de reflexións que contribúen a coñecer a situación actual, ao tempo que anunciou que “este ano prestaremos atención ao mecenado artístico, aínda que explorando outro tipo de formatos”. Ambos os dous volumes xa se poden descargar desde o sitio web corporativo.

“Anna Turbau. Galicia, 1975-1979” é unha publicación que recolle unha parte significativa do legado que a fotógrafa Anna Turbau (Barcelona, 1949) cedeu ao Consello da Cultura Galega. A publicación, editada por Natalia Poncela, é finalista da III Gala do Libro Galego na categoría de mellor iniciativa bibliográfica. Os gañadores saberanse na gala que terá lugar o sábado 19 de maio de 2018 no Teatro Principal de Santiago de Compostela.

O Consello da Cultura Galega (CCG) e o concello da Coruña inauguran mañá ás 19:30 horas no Kiosco Alfonso “A intimidade da imaxe”, a exposición que revisa a Galicia da transición a través das fotografías de Anna Turbau (Barcelona, 1949). A mostra, que se poderá ver ata o 1 de abril, contará coa presenta de Rosario Álvarez, vicepresidenta do Consello da Cultura Galega; o alcalde da Coruña, Xulio Ferreiro; o concelleiro de Culturas, Deporte e Coñecemento, Xosé Manuel Sande; a comisaria da mostra, Margarita Ledo, e a fotógrafa catalá, Anna Turbau. Na exposición exhíbense un centenar de imaxes retratan os conflitos sociais, políticos e humanos cos que a fotógrafa se atopou a finais dos anos setenta.

O presidente do Consello da Cultura Galega (CCG), Ramón Villares, e a editora da obra, Natalia Poncela, presentaron esta mañá “Anna Turbau. Galicia, 1975-1979”, a publicación que recolle unha parte significativa do legado que a fotógrafa Anna Turbau (Barcelona, 1949) cedeu ao CCG. A publicación, xunto coa exposición, comisariada por Margarita Ledo (Pazo de Fonseca, ata o 16 de xaneiro), permiten ver os conflitos sociais, políticos e humanos cos que a fotógrafa se atopou a finais dos anos setenta. O volume deuse a coñecer no marco dunha serie de actividades en que tamén houbo unha mesa redonda na que participaron, ademais de Anna Turbau, César Portela, Cristina Zelich e Margarita Ledo.

O Consello da Cultura Galega (CCG) presentou esta mañá “A intimidade da imaxe”, a exposición que revisa a Galicia da transición a través das fotografías de Anna Turbau (Barcelona, 1949). “É retorno dunha autora pero agora como legado documental e fotográfico” explicou o presidente do CCG, Ramón Villares, na rolda de prensa. A mostra, comisariada por Margarita Ledo, peneira no arquivo da fotógrafa para exhibir nun centenar de imaxes os conflitos sociais, políticos e humanos cos que a fotógrafa se atopou a finais dos anos setenta. A exposición inaugúrase esta tarde ás 20:00 horas no Colexio de Fonseca, onde estará ata o vindeiro 10 de decembro.

O destacamento penal das minas de wolfram de Valborrás de Casaio (Ourense), no que redimiron penas 463 ex-combatentes republicanos na Guerra Civil, centra a vindeira xornada dos “Encontros co patrimonio”. Con ela ábrese a programación do último cuadrimestre do ano no Consello da Cultura Galega (CCG). A figura de Carlos Casares, a relevancia das Irmandades da Fala no contexto peninsular, unha xornada que analiza as relacións entre Galicia e Bretaña e unha exposición que amosa a Galicia retratada por Anna Turbau son outras das actividades programadas.

O Consello da Cultura Galega (CCG) realizou no serán deste xoves unha sesión plenaria ordinaria na que deu conta das actividades previstas para o segundo semestre do ano. Unha programación en que destacan Carlos Casares e as Irmandades da Fala e na que haberá, entre outras actividades, unha xornada que analiza as relacións entre Galicia e Bretaña, unha exposición que amosa a Galicia retratada por Anna Turbau, novas sesións do ciclo “Encontros co patrimonio” así como outras propostas que contribúen á proxección exterior da cultura galega. Ademais, aprobouse a incorporación de Dolores Vilavedra á Comisión Executiva da institución en calidade de vogal.

A Sección de Creación de Artes Visuais Contemporáneas do Consello da Cultura Galega realiza mañá unha xornada en que pretende reflexionar sobre as relacións entre a arte e a educación. Na liña de traballo habitual, de poñer a arte en diálogo con outras estruturas ou disciplinas, busca agora afondar nas estratexias e nos modos nos que a arte está presente na sociedade e na educación. A sesión complétase cunha intervención que recolle un mapa conceptual e gráfico sobre estas materias a partir da colaboración das e dos participantes.

A figura do coleccionista en España é moi descoñecida, responde a numerosos clixés pero encerra un enorme valor tanto no artístico como no cultural. “É un labor fundamental, é o gran motor da arte” afirmaba Pilar Citoler, unha das coleccionistas españolas máis coñecidas no marco das xornadas Arte+Coleccionismo que hoxe remataron no Consello da Cultura Galega. Unha cita dirixida por Marisa Sobrino coa coordinación de Natalia Poncela e Rosario Sarmiento que durante dous días xuntou en Santiago a profesionais do mundo da arte contemporánea.

Profesionais de recoñecido prestixio a nivel internacional no mundo da arte reuniranse desde mañá no Consello da Cultura Galega Galega no marco da xornada “Arte+Coleccionismo”. Unha cita dirixida por Marisa Sobrino e coordinada por Rosario Sarmiento e Natalia Poncela que conta coa participación de responsables de entidades como o Museo Thyssen, a Fundación Arte y Mecenazgo ou a colección Patricia Phelps de Cisneros, de feiras como ARCOmadrid, xunto con galeristas e coleccionistas da sona de Pilar Citoler e José Blanco. A sesión de mañá, que se poderá seguir desde o web da institución,achegarase a situación actual do coleccionismo.

O coleccionismo de arte en España, a pesar de ser unha parte fundamental do sistema artístico, caracterízase pola súa fraxilidade e a súa falta de tradición. Nas xornadas “Arte+Coleccionismo”, o Consello da Cultura Galega, a través da Sección de Creación e Artes Visuais Contemporáneas”, pretende reflexionar sobre esta realidade atendendo ao seu presente pero tamén aos seus retos de futuro. Responsables de entidades como o Museo Thyssen ou a colección Patricia Phelps de Cisneros, de feiras como ARCOmadrid, xunto con galeristas e coleccionistas (Pilar Citoler e José Blanco, entre outros) atenderán ao momento complexo que vive o coleccionismo. A cita desenvolverase en Santiago os días 4 e 5 de novembro e acaba de abrir o prazo de inscrición, que se pode formalizar a través da web da institución.

“A miña é unha obra moi persoal, que non recorda a ninguén nin a nada. É orixinal na medida que ten un significado propio porque sen él esa orixinalidade non serve para nada”. Deste xeito se autodefine Elena Colmeiro (Silleda, Pontevedra, 1932), unha creadora pioneira no ámbito da escultura que acaba de recibir unha homenaxe no Consello da Cultura Galega. Baixo o título “Espazos da materia”, esta xornada serviu para lembrar a súa figura pero para reivindicar importancia da muller na arte e na escultura galega.

O Consello da Cultura Galega (CCG) acolle mañá a xornada Espazos da materia Unha cita que xira arredor de Elena Colmeiro (Silleda, Pontevedra, 1932) unha creadora pioneira no ámbito da escultura cunha obra chea de liberdade, fóra de modas e modismos, que arrecende un estilo propio. Profesionais da historia, das artes plásticas, do comisariado, dos medios de comunicación e da crítica participan neste encontro que ten unha parte de homenaxe pero tamén de reivindicación da importancia do seu traballo na historia da arte galega. Na cita presentarase unha cartografía (documentación exhaustiva) sobre a súa obra, a xornalista Ana Romaní conversará con Elena Colmeiro e pecha a xornada unha performance da artista Ana Gesto. Con Colmeiro dase continuidade este tipo de xornadas de homenaxe que organiza anualmente a Comisión de Igualdade do CCG.