Arquivo de noticias do CCG

A arquitecta Verónica Sánchez, cofundadora do colectivo n’UNDO, promove unha arquitectura ética, social e humanitaria centrada nas necesidades reais das persoas. Estará este martes (17:00 horas) na sede do Consello da Cultura Galega (CCG) para abrir a cuarta sesión dos “Encontros Temáticos Transversais dende o Patrimonio Cultural” que organiza a Sección de Patrimonio e Bens Culturais e que analiza a situación do litoral. Os encontros continúan mércores 18 (17:00 horas) co debate a cargo de profesionais que traballan no ámbito galego sobre este asunto. A cita, coordinada por Teresa Nieto, Rebeca Blanco-Rotea e Carlos Amoedo, é presencial e pode seguirse en directo a través do web do CCG e a súa canle de YouTube.

Jaume Franquesa (Igualdada, 1976), antropólogo recoñecido polo seu traballo no ámbito da enerxía, o medio ambiente e a política rural en Europa, participa este martes (17:00 horas) na terceira sesión do ciclo “Encontros Temáticos Transversais dende o Patrimonio Cultural” que organiza a Sección de Patrimonio e Bens Culturais do Consello da Cultura Galega (CCG). Nesta ocasión abórdase o impacto da transformación enerxética no sistema local. A xornada continúa o mércores 4 (17:00 horas) co debate a cargo de profesionais que traballan no ámbito galego sobre este asunto. A cita, coordinada por Teresa Nieto, Rebeca Blanco-Rotea e Carlos Amoedo, emítese en directo a través do web do CCG e a súa canle de YouTube.