Arquivo de noticias do CCG

“Centro Dramático Galego, vixencia e contribución da institución ao futuro da creación escénica galega” é o título da xornada coa que a Sección de Artes Escénicas, Musicais e Audiovisuais do Consello da Cultura Galega (CCG) revisa este martes (10:00 horas) a situación desta unidade de produción teatral pública. É tamén a primeira cita dun ciclo que afondará no papel das institucións culturais galegas actuais. Dolores Vilavedra, vicepresidenta do CCG, xunto con Cristina Domínguez, coordinadora da sección e tamén da xornada xunto con Eduardo Alonso e Carlos-Caetano Biscainho-Fernandes, inauguran esta sesión que se pode seguir en directo no web e na canle de YouTube da institución.

“Sobrevivir no jazz en Galicia: entre a paixón e a profesión” é o titulo da xornada coa que a Sección de Artes Escénicas, Musicais e Audiovisuais do Consello da Cultura Galega (CCG) profunda este xoves (a partir das 16:30 horas) na situación do jazz en Galicia. Ramón Pinheiro Almuinha e Felipe Vilar coordinan esta cita que pon o foco nas condicións de creación, na memoria do xénero e nas oportunidades de desenvolvemento dun sector cada vez máis internacional e plural. A xornada é presencial pero pode seguirse en directo desde o web e a Canle de YouTube da institución.

“Cinema galego e Transición” é o título da xornada que a Sección de Artes Escénicas, Musicais e Audiovisuais do Consello da Cultura Galega (CCG) e a Mostra Internacional de Cinema Etnográfico (MICE), coa colaboración do Cineclube de Compostela, organizan este 21 de marzo no Museo do Pobo Galego. A actividade, coordinada por Beli Martínez e José Manuel Sande, ten como obxectivo contextualizar a Transición, afondar en diversos aspectos vinculados coas producións cinematográficas da época e analizar como este período histórico se está a representar no cine galego contemporáneo. A sesión é presencial, pero poderá seguirse en directo a través das redes sociais do Museo do Pobo Galego. Os vídeos coas intervencións estarán tamén dispoñibles proximamente na hemeroteca do CCG.

Con motivo da estrea en Galicia de Manuela Rey is in da house, obra teatral producida polo Centro Dramático Galego, o Teatro Nacional São João, o Teatro Nacional Dona Maria II e o Teatro do Noroeste – Centro Dramático de Viana, a Sección de Artes Escénicas, Musicais e Audiovisuais do Consello da Cultura Galega (CCG) organiza a xornada Intérpretes galegas na emigración e no exilio. Coordinada por Carlos-Caetano Biscainho-Fernandes, Cristina Domínguez Dapena e Fran Núñez, a cita terá lugar este venres, 15 de marzo (16:15 horas), no Teatro Principal de Santiago de Compostela. Non haberá emisión en directo, pero gravarase a sesión e subirase posteriormente á hemeroteca do CCG.

Balboa, Macías e Viaño. Creación musical galega a finais do século XX é o título da xornada que a Sección de Artes Escénicas, Musicais e Audiovisuais do Consello da Cultura Galega (CCG) organiza este mércores, 13 de marzo (16:30 horas), na sede da institución. Nela, diversos especialistas analizarán a figura destes tres compositores. Inaugurarán a cita a presidenta do CCG, Rosario Álvarez, e a coordinadora da Sección de Artes Escénicas, Musicais e Audiovisuais, Cristina Domínguez Dapena. A actividade é presencial, pero poderá seguirse en directo a través do sitio web e das redes sociais corporativas.

O que pode a danza é o novo produto audiovisual co que o Consello da Cultura Galega (CCG) se achega ao sector das artes do movemento. Trátase de oito pezas audiovisuais que nos achegan outras tantas experiencias singulares que amosan as conexións do mundo da danza coa sustentabilidade, co territorio ou coa empresa. Natalia Balseiro é a comisaria deste proxecto, que se acaba de presentar na Casa Vella de Amiadoso, en Ourense, e na Culturgal. A serie está dispoñible desde hoxe no web e nas redes sociais da institución.

O acoso sexual é unha realidade que está presente en moitos ámbitos da vida das mulleres desde a súa infancia. Co fin de afondar na súa concepción e nas diversas formas en que este se manifesta, o Centro de Documentación en Igualdade e Feminismos (CDIF) do Consello da Cultura Galega (CCG), en colaboración coa Sección de Artes Escénicas, Musicais e Audiovisuais da institución, organiza mañá martes (28 de novembro, 10:00 horas) a xornada Que é “si”? Sobre o acoso sexual. Na inauguración intervirán a presidenta do Consello da Cultura Galega, Rosario Álvarez; a coordinadora do CDIF, Carme Adán, e a da Sección de Artes Escénicas, Musicais e Audiovisuais, Cristina Domínguez. A xornada é presencial, pero poderá seguirse en directo a través do sitio web e as redes sociais da institución.

A Sección de Artes Escénicas, Musicais e Audiovisuais do Consello da Cultura Galega (CCG) organiza mañá, 21 de marzo (17:00 horas), a xornada Os inicios da música escénica en Galicia. Nela representarase a tonadilla escénica de Melchor López Los gustos estragados, a única que se conserva das que foron compostas en Galicia. Antes da representación haberá unha mesa redonda, na que intervirán Montserrat Capelán, Javier Gándara e Joám Trilho. A actividade está coordinada pola propia Montserrat Capelán e por Cristina Domínguez Dapena. Ademais, conta coa colaboración da Axencia Galega das Industrias Culturais, do Centro Dramático Galego e do grupo de investigación Organistrum da Universidade de Santiago de Compostela (USC). As prazas están esgotadas, pero as intervencións poderán seguirse en directo a través do sitio web e as redes sociais da institución.

As corais: dinamizadoras imprescindibles do tecido cultural galego é o título da xornada que se celebra na tarde deste martes, 22 de novembro. Nela, analizarase a incidencia social das máis de trescentas corais existentes na nosa comunidade e se presentará o primeiro informe que analiza esta realidade. A actividade está organizada pola Sección de Artes Escénicas, Musicais e Audiovisuais do Consello da Cultura Galega CCG) baixo a coordinadción de Alejo Amoedo e Cristina Domínguez Dapena. Recoñecidos profesionais achegaranse á importante función divulgativa e pedagóxica que desempeñan as corais e, profundarán no seu papel como forzas vertebradoras e dinamizadoras do tecido cultural. A sesión é presencial, pero tamén se poderá seguir en directo a través das redes sociais da institución.

“Antonio Fraguas e a memoria musical de Cotobade” é o libro-CD que mañá xoves (19:00 horas) se presenta no Consello da Cultura Galega. A secretaria da institución, Dolores Vilavedra, participa neste acto que pretende dar a coñece o traballo realizado por Xavier Groba e editado pola Central Folque no que se recolle a primeira achega á música de transmisión oral do concello de Cotobade. Tamén estarán presentes Ramón Castromil e Ramon Pinheiro Almuinha.

O Consello da Cultura Galega (CCG) acolleu este venres a presentación do CD "Crónicas porteñas" do gaiteiro Manuel Dopazo, considerado o máis grande gaiteiro da emigración. A obra está editada pola discográfica "Ouvirmos" e conta co patrocinio do Arquivo Sonoro de Galicia do CCG.

O Consello da Cultura Galega (CCG) acollerá este venres, 3 de xuño, ás 12´30 horas, a presentación do CD "Crónicas porteñas", que reúne unha parte do legado musical de Manuel Dopazo (1882-1952), considerado por moitos como o máis grande gaiteiro da emigración.