Arquivo de noticias do CCG

A decisión de Lola de marchar traballar a Alemaña ante a negativa do seu home a facelo centra o terceiro dos episodios de A Camisa, adaptación sonora da premiada peza dramática escrita por Lauro Olmo (O Barco de Valdeorras, 1922-Madrid, 1994). A ficción en formato podcast foi feita por A quinta do Cuadrante, con dirección de Tito Asorey, e parte da tradución que Ramón de Valenzuela fixo do texto orixinal. O Consello da Cultura Galega (CCG) e o concello do Barco de Valdeorras foron os encargados deste proxecto que conmemora o centenario do nacemento de Lauro Olmo e o sesenta aniversario da estrea da peza.

Agustín Magán Blanco foi unha figura esencial no teatro afeccionado en Galicia. Foi actor, director, dramaturgo, tradutor, autor teatral, escenógrafo... e destacou polo seu labor a prol da dinamización cultural e a difusión teatral por todo o país, con especial interese en Santiago de Compostela, cidade á que estivo moi vencellado. A súa entrada no Álbum de Galicia foi elaborada por Abad de Larriva.

O Parlamento de Galicia concede a súa Medalla ao Consello da Cultura, ao Valdor do Pobo e ao Consello de Contas. Esta distinción recoñece a contribución das tres entidades estatutarias polo “afianzamento do autogoberno de Galicia e con plena lealdade ás restantes institucións da Comunidade Autónoma e do Estado”. Á concesión é froito dun acordo unánime da Mesa da Cámara galega.

O Centro de Documentación en Igualdade e Feminismos (CDIF) do Consello da Cultura galega (CCG) participou esta fin de semana nas xornadas As Mulleres, a información e os Centros da Memoria organizadas por Bamad Galicia e a Fundación Olga Gallego. No marco da cita, a técnica do CCG, Mariam Mariño, debullou a traxectoria da institución en materia de igualdade prestando especial atención no que ten que ver coa compilación de materiais que axudan a visibilizar o traballo das mulleres e as súas producións e a súa posta a disposición pública no web da institución.

O Consello da Cultura Galega, xunto coas institucións estatutarias, Valedor do Pobo e Consello de Contas, recibirá o 6 de abril, aniversario da promulgación do Estatuto de Autonomía, a Medalla do Parlamento de Galicia 2022. Esta distinción recoñece a contribución das tres entidades “ao afianzamento do autogoberno de Galicia e con plena lealdade ás restantes institucións da Comunidade Autónoma e do Estado”. Á concesión é froito dun acordo unánime da Mesa da Cámara e será retransmitido en directo a partir das 10:55 pola Televisión de Galicia e a Radio Galega.

A presidenta do Consello da Cultura Galega (CCG), Rosario Álvarez, recolleu esta mañá a Medalla que o Parlamento de Galicia concedeu ao CCG, ao Valedor do Pobo e ao Consello de Contas, as tres entidades xurdidas ao abeiro do Estatuto de Autonomía. A presidenta do CCG agradeceu a distinción que “implica un recoñecemento institucional que nos reconforta respecto do labor desenvolto ata o presente e nos obriga aínda máis cara ao futuro” apuntou. Rosario Álvarez recibiu a Medalla e o Diploma a mans do presidente da cámara, Miguel Ángel Santalices. O acto, retransmitido pola Televisión de Galicia e a Radio Galega, contou coa asistencia do presidente da Xunta de Galicia, Alberto Núñez Feijoo.

Activistas da lingua é título do terceiro dos capítulos de Aquí medra a lingua, serieweb do Consello da Cultura Galega (CCG) para dar a coñecer iniciativas de dinamización lingüística na escola. Nesta ocasión, o proxecto fai recalada no IES Félix Muriel de Rianxo para amosar o labor de normalización lingüística deste centro que vai máis ala dun proxecto de dinamización.

A prevención é clave cando falamos de conservación do patrimonio. Por iso, a nova entrega dos Encontros Monográficos co Patrimonio Cultural, que organiza a Sección de Patrimonio e Bens Culturais do Consello da Cultura Galega (CCG), afonda no concepto de “conservación preventiva”. Rosa Benavides coordina esta cita que reflexionará, entre outros ámbitos, sobre a prevención do patrimonio xestionado pola Igrexa e polos concellos. Rosario Álvarez, presidenta do CCG inaugura esta xornada que ten as prazas cubertas pero que se pode seguirse en directo a través da web e das redes da institución.

Repensar o papel do Centro Galego de Arte Contemporánea (CGAC), reactivar os procesos de incorporación de persoal aos museos e crear redes de colaboración entre eles son as principais conclusións da xornada “Situarnos: o poder dos museos”, organizada polo Consello da Cultura Galega (CCG) e a Fundación María José Jove (FMJJ). O documento acábase de facer público e expón as ideas abordadas ao fío do encontro que tivo lugar o pasado 4 de febreiro entre Manuel Borja-Villel, director do Museo Nacional Centro de Arte Reina Sofía (MNCARS), e unha parte representativa das institucións museísticas galegas e representantes políticos do eido da cultura, asociacións, artistas e curadores.

O 1 de abril é o Días Artes Galegas, unha celebración convocada pola Real Academia Galega de Ciencias á que o Consello da Cultura Galega se suma con dúas achegas sobre a figura homenaxeada: José Otero Abeledo, Laxeiro (Lalín, 1908- Vigo, 1996). A primeira delas é a incorporación da entrada sobre o pintor lalinense no Álbum de Galicia. A segunda é a publicación de tres gravacións sonoras nas que se pode coñecer ao pintor na súa voz e que se integran dentro do proxecto Voces Centenarias.

O segundo episodio de A camisa aborda a emigración forzosa ao estranxeiro dun dos amigos de Xan, o protagonista, que insiste na súa idea de ficar e continuar á busca de traballo. Continúa a narración da premiada peza dramática escrita por Lauro Olmo (O Barco de Valdeorras, 1922-Madrid, 1994) que retrata o dama da emigración. A adaptación sonora en formato podcast feita por A quinta do Cuadrante, dirixida por Tito Asorey, parte da tradución que Ramón de Valenzuela fixo do texto orixinal. O Consello da Cultura Galega (CCG) e o concello do Barco de Valdeorras foron os encargados deste proxecto que conmemora o centenario do nacemento de Lauro Olmo e o sesenta aniversario da estrea da peza.

Hoxe arrinca en Olot a Residencia de Tradución de Poesía entre catalán, éuscaro e galego. Un proxecto promovido polo Institut Ramon Llull, co apoio do Consello da Cultura Galega e do Etxepare Euskal Institutua. Nel participan Jesús Castro Yáñez, María Alonso Seisdedos, Raquel Senra Fernández, Itxaro Borda, Leire Martinez de Marigorta Varela, Lluïsa Soaz González, Eduard Velasco, Pau Hernánez, Ainara Maya Urroz e Isaac Xubín.

A secretaria do Consello da Cultura Galega (CCG), Dolores Vilavedra, participou na presentación da programación do Día das Letras Galegas. O CCG analizará os exilios tomando como base a da figura de Florencio Delgado Gurriarán, homenaxeado nesta ocasión do Día das Letras Galegas. “Os exilios provocados polas guerras seguen a ser unha realidade que non mudou” puntualizou Vilavedra ao tempo que explicou que este estudo permitirá coñecer “un exilio que non é moi visible por non ser un destino moi numeroso, como é o exilio mexicano, pero que á luz das súas achegas foi moi rico intelectualmente”. Un espazo web, a reedición facsimilar Cancioneiro da loita galega con estudo crítico de Xesús Alonso Montero e notas de Ricardo Gurriarán, así como o tradicional Concerto das Letras Galegas a cargo do grupo Zoar centran a programación do CCG que se estenderá máis alá do 17 de maio.

Mobilizadoras, reformadoras, revolucionarias de aquí e de alá. Unha perspectiva atlántica é o título da xornada coa que o Centro de Documentación en Igualdade e Feminismos (CDIF), pertencente ao Consello da Cultura Galega (CCG), atende este xoves 31 ao papel que as mulleres realizaron na década dos setenta do século pasado contra as ditaduras. María Xosé Porteiro e Luz Darriba coordinan esta cita na que participan destacadas especialistas de Galicia, Portugal e América Latina. A presidenta, Rosario Álvarez, é a encargada de inaugurar esta cita presencial que tamén se pode seguir en directo desde a web e as redes sociais da institución.

O Consello da Cultura Galega (CCG) rematou no serán deste martes unha viaxe institucional de dous días na que contribuíu a unha maior visibilización da súa acción e da cultura galega na capital europea. Mantivéronse xuntanzas con responsables de diferentes institucións europeas que se traducirán nos vindeiros meses en accións encamiñadas a promover a cultura galega no exterior. Ademais, o programa cultural, desenvolvido na sede do Instituto Cervantes, contou cunha gran acollida de público.

O primeiro instrumento de Mili Porta (A Coruña, 1918-Madrid, 1971) era un piano debuxado nunha parede, que tocaba sen parar e que revelou a verdadeira vocación da coruñesa. Foi unha persoa moi activa que participou da fundación de numerosas entidades e chegou, con previo permiso do réxime, a dirixir a orquestra da cidade, converténdose na primeira muller directora de orquestra española. A súa historia entra no Álbum de Galicai cunha entrada asinada por María del Carmen Lorenzo Vizcaíno.

O proxecto Aquí medra a lingua, serieweb do Consello da Cultura Galega para dar a coñecer iniciativas de dinamización lingüística na escola, engade este luns o segundo dos capítulos. Titúlase Reforzar o propio e céntrase na experiencia do CPI Virxe da Saleta de Cea, centro integrado que xunta alumnos de infantil e da ESO. Escape rooms, bandas deseñadas, títeres, curtametraxes... son moitas e moi variadas as iniciativas que se fan neste centro que xuntou escola e comunidade e tivo iniciativas tan sonadas coma “A lingua sabe a pan”.

A presidenta do Consello da Cultura Galega (CCG), Rosario Álvarez, inicia este luns unha visita institucional a Bruxelas na que realizará diferentes reunións con responsables de institucións comunitarias e europeas para impulsar o programa de acción exterior do CCG. As xuntanzas están acompañadas dun programa cultural que contribuirá á visibilización da cultura galega na capital europea. As actividades enmárcanse dentro do Plan de Acción Exterior que ten o Consello da Cultura Galega promovido pola Comisión de Relacións Institucionais e Acción Exterior (CRIAE).

Audiovisuais en galego para a docencia

Pensarmos//24 de marzo