Arquivo de noticias do CCG

A Casa Cornide na Coruña, a illa de San Simón e o Pazo de Meirás son algúns dos lugares en que está presente a sombra da ditadura franquista, da súa represión e das súas vítimas. Non todos permaneceron igual, algúns foron esquecidos e outros resignificados; con todo, cómpre unha reflexión de conxunto sobre estes espazos. Isto é o que se propón na xornada “Que facer cos lugares de memoria do franquismo?” que o Consello da Cultura Galega (CCG) organiza o vindeiro xoves 15 de xullo en Sada. O vicepresidente do CCG e coordinador deste encontro, Xosé M. Núñez Seixas, e o alcalde de Sada, Benito Portela, son os encargados de inaugurar esta cita que conta coa participación de Montse Fajardo, Emilio Grandío ou Dionisio Pereira, entre outros destacados especialistas.

Berta Cáccamo (Vigo, 1963-2018) foi unha das máis relevantes figuras da pintura galega da súa xeración. Destacou pola súa personalidade, aberta e solidaria, e deixou unha fonda pegada no medio artístico. Pintora e docente soubo conectar as súas inquedanzas artísticas coas do contexto internacional. O profesor, ensaísta e comisario Carlos L. Bernárdez asina a entrada que se acaba de incorporar ao Álbum de Galicia.

“Arquitectura da auga. A situación patrimonial dos balnearios en Galicia” é o título da xornada que o Consello da Cultura Galega (CCG) organiza mañá martes en Mondariz-Balneario para analizar a problemática patrimonial e de conservación que teñen moitos dos balnearios en Galicia. A cita, coordinada por Rebeca Blanco-Rotea, pretende analizar as solucións que se veñen adoptando para a recuperación e posta en valor deste importante patrimonio e as súas posibilidades como recurso de futuro. Rosario Álvarez, presidenta do CCG; o alcalde de Mondariz-Balneario, José Antonio Lorenzo, e a coordinadora do encontro serán os encargados de inaugurar esta cita na que se exporán os casos concretos de Mondariz, Verín, Cortegada e Lugo.

Descarga do informe

Documental sobre a realidade trans en Galicia

O Consello da Cultura Galega (CCG) puxo a disposición pública en Internet o libro Vindicación. Vida e milagros de Pepe de Xan Baña en trinta anos de Cuba, do emigrante de Santa Comba Xosé Baña Pose. Este volume foi publicado orixinalmente en 1921 en La Habana, co obxectivo de ser repartido entre os veciños xalleiros na seguinte viaxe do escritor. O libro conta cun estudo introdutorio do profesor da Universidade de Vigo Xosé Henrique Costas González, no que se analizan as particularidades da lingua galega empregada na publicación. Está editado na colección Clásicos da Emigración do CCG e a Secretaría Xeral da Emigración da Xunta de Galicia.

Onte presentáronse as conclusións da xornada 'Mulleres rurais. Unha ollada desde Galicia e América Latina', xa cal se celebraran as conferencias o 1 de xuño. A xornada, organizada polo Centro de Documentación en Igualdade e Feminismos do Consello da Cultura Galega (CDIF) e a Valedoría do Pobo de Galicia, reuniu a destacadas expertas do país e de varios estados latinoamericanos para "intercambiar coñecementos, boas prácticas, ideas e propostas" en relación á realidade das mulleres rurais. Na presentación das conclusións participaron Rosario Álvarez, presidentas do Consello da Cultura Galega, e María Xosé Porteiro, vogal da Comisión Executiva e coordinadora do CDIF.

Nun contexto de despoboamento e transformación do rural, a cultura "contribúe á cohesión territorial e das comunidades locais" e pode ser "panca do cambio" necesario para un territorio máis sustentable. Estas son algunhas recomendacións contidas no informe Cultura e Sustentabilidade que o Consello da Cultura Galega presentou este xoves 8 pola tarde en Monterroso (Lugo). O informe, coordinado polo investigador Fran Quiroga, estuda 10 proxectos que "amosan unha diversidade de prácticas que dun xeito extenso responden á relación entre cultura e sustentabilidade", propón recomendacións para unhas políticas públicas activadoras do cambio e inclúe un mecanismo de "autoavaliación" para medir o grao de sustentabilidade dun proxecto cultural.

O profesor emérito da USC Carlos Villanueva asina esta nova entrega do Álbum de Galicia do Consello da Cultura Galega que inclúe a posibilidade de escoita do seu Concerto Grosso

O Consello da Cultura Galega (CCG) organiza este luns 5 de xullo unha xornada que xunta as loitas feministas e as ecoloxistas. A presidenta da institución, Rosario Álvarez, inaugurará esta cita titulada “Ecofeminismos”. Está coordinada por Luz Darriba e Alba María Rodríguez e conta coa participación de destacadas especialistas nestas materias como Adela Figueroa, Sabela Facal ou Yayo Herrero. No marco da xornada estrearase a videocreación “Unha faba unha vida” realizada por Ugía Pedreira e Marina Oural a partir dun espectáculo homónimo. As prazas están esgotadas pero pode seguirse en directo polo web da institución.

Balance de 5 anos de investigación dende o colectivo de RomanArmy.eu

O Álbum de Galicia incorpora hoxe a entrada de Virxinia Pereira (A Estrada, 1884-Madrid, 1969). Ana Acuña asina o texto dunha destacada figura que foi moito máis que a muller de Castelao. A biografía, así como os materiais complementarios que a enriquecen, permiten ver a súa forte personalidade e o seu traballo en prol da causa antifranquista e a defensa da memoria do seu home.

As bandas de música populares teñen unha importancia social e histórica moi destacada no noso país. Roldan o centenar, están creadas por asociacións culturais, desempeñaron un papel moi importante no ámbito da música, pero tamén na dinamización das comunidades locais e na formación musical dunha parte importante da sociedade galega. O Consello da Cultura Galega (CCG), en colaboración coa Federación Galega de Bandas de Música Populares, presenta o primeiro grande informe realizado polo Observatorio da Cultura Galega sobre un colectivo que integra a 7.100 persoas. O estudo dáse a coñecer na véspera da xornada “As bandas de música na memoria de Galicia”, que se desenvolverá presencialmente este xoves na sede da institución. A cita tamén se pode seguir en directo desde o web e as redes sociais.

Os Encontros Monográficos co Patrimonio Cultural (EMPC), espazos de reflexión e debate arredor do patrimonio, regresan este martes despois de cinco meses. O encontro número 32 servirá para facer balance do traballo do colectivo RomanArmy, grupo que cumpre un lustro coa análise do estado romano no noroeste peninsular (Galicia, Asturias, occidente de León e Zamora e norte de Portugal). As prazas están esgotadas, pero pode seguirse en directo desde o web do CCG e as súas redes sociais.

A presidenta do Consello da Cultura Galega (CCG), Rosario Álvarez, recibiu hoxe ao embaixador de Arxentina en España, Ricardo Luis Alfonsín. É a primeira visita institucional do embaixador a Galicia tras tomar posesión do seu posto en setembro de 2020. No marco da xuntanza abordáronse posibles proxectos de colaboración entre as dúas entidades, como a consulta dos fondos consulares para afondar no coñecemento da emigración galega a Arxentina. Ademais, falaron da situación dos fondos documentais en Arxentina e concretaron os traballos de preparación da exposición sobre Luis Seoane. O embaixador asinou tamén no libro de honra da institución.

Estreitar as ligazóns que conectan Galicia coas redes e culturas de lingua portuguesa no mundo

Repensar os estudos migratorios

A escritora, profesora e activista Brigitte Vasallo (Barcelona, 1973) participa mañá no ciclo “Pensamos”, iniciativa da Sección de Pensamento do Consello da Cultura Galega (CCG). Vasallo, coñecida especialmente pola súa crítica da islamofobia de xénero, a denuncia do purplewashing e o homonacionalismo, así como pola súa defensa do poliamor nas relacións afectivas, ofrecerá un relatorio titulado “As mentiras na linguaxe”. A profesora de Ciencias Políticas da USC Marta Lois dialogará con Vasallo no marco deste formato de reflexión coordinado por Carme Adán. As prazas están esgotadas, pero pode seguirse en directo desde o web do CCG e as súas redes sociais.

Eladio Rodríguez González foi, para todos, Don Eladio. A súa biografía confúndese coa do movemento político e cultural do galeguismo comprendido entre o último cuarto do século XIX e a metade do século XX. Este polígrafo ourensán, que residiu a maior parteda súa vida na Coruña, tivo un papel discreto pero extremadamente comprometido co proceso de construción dunha memoria cultural compartida. A súa grande obra, o Diccionario enciclopédico gallego-castellano, é un compendio etnográfico e, ao mesmo tempo, un instrumento lingüístico que servirá de base para o establecemento dunha posterior lexicografía galega, xa nos séculos XX e XXI. A súa entrada é a última incorporación ao Álbum de Galicia.