Arquivo de noticias do CCG

O despacho de Casto Sampedro Folgar (Redondela, 1848-Pontevedra, 1937) foi un dos afamados faladoiros que caracterizaron a densa vida cultural da Pontevedra de entre séculos. Foi un erudito, sobre todo no ámbito da historia, etnografía e artes. Deixou un amplo e variado legado entre o que destaca o Cancioneiro Musical de Galicia e ter sido o primeiro director do Museo de Pontevedra. O Álbum de Galicia, colección do Consello da Cultura Galega (CCG) introduce a súa entrada que asina Xavier Groba.

A presidenta do Consello da Cultura Galega (CCG), Rosario Álvarez; o presidente do Parlamento, Miguel Santalices; e o alcalde de Melide; José Manuel Pérez Penas, volveron este 4 de decembro a Melide para cumprir unha promesa que fixeron xusto un ano antes: un libro recollería, documentaría e ampliaría a importancia que tivo para a Galicia a xuntanza que outro 4 de decembro, pero de 1520, mantiveron os representantes das principais casas nobiliarias de Galicia para reclamar a El-Rei máis capacidade de autogoberno. O catedrático de Historia Moderna Pegerto Saavedra foi o coordinador do volume titulado A unha voz na metade do Reino. Cincocentos anos da Xunta de Melide que xa se pode descargar desde o web do CCG.

Os datos apuntan que esmorece a socialización en galego na infancia. Sábese tamén que a familia non é suficiente para garantir a continuidade da lingua. Con esa realidade, cómpre que se empregue e transmita tamén noutros contextos coma o social e o escolar. Por iso, nas conclusións dos XXIII Encontros para a Normalización Lingüística organizados polo Centro de Documentación Socioligüística de Galicia (CDSG) do Consello da Cultura Galega (CCG), apuntan á necesidade de incentivar o uso do galego en actividades como comedores, actividades extraescolares, viaxes educativas, programa de madrugadores, entre outros aspectos do eido escolar, ademais de reforzar os contidos de lecer. O documento xa está dispoñible para descarga no web do CCG.

O Arquivo da Emigración Galega, centro do Consello da Cultura Galega (CCG), acaba incorporar ao seu proxecto Repertorio de Prensa da Emigración Galega 14 novos números. Conforman os fondos do Boletín de la Sociedad Cultural y Agraria del Distrito de Mugía que foron doados polo historiador, antropólogo e xestor cultural, Manuel Vilar Álvarez.

Dezasete centros educativos de Galicia e de Portugal apadriñados ou madriñados por outros tantos artistas conforman Meniños cantores 2 o libro disco que o Consello da Cultura Galega (CCG) e a asociación Ponte... nas Ondas! (PNO!) presentaron esta mañá en Santiago. É unha parte dun proxecto moito máis amplo que conta cunha serie documental, un espazo web e no que tamén se recolle o léxico transfronteirizo desta zona. O proxecto foi presentado esta mañá en rolda de prensa por Rosario Álvarez, presidenta do Consello da Cultura Galega; Rosa Vilas, adxunta á dirección xeral da CRTVG; Cecilia Pereira, comisaria do Xacobeo; Santiago Veloso, presidente de PNO!; Segundo Grandío, produtor do documental e do aspecto musical; e Fernando Abreu, profesor, músico e padriño dun dos centros participantes nesta iniciativa.

A industria da moda é responsable do 10 % da contaminación global mundial. Produce entre catro e cinco billóns de toneladas de CO2, representa entre o 8% e o 10% da emisións globais e o seu consumo de auga é un dos máis importantes. A Comisión Europa abordou en 2020 un plan de acción para economía circular que ten unha estratexia específica para a industria téxtil. Neste contexto o Consello da Cultura Galega, a través da Sección de Ciencia, Tecnoloxía, Natureza e Sociedade, organiza mañá a xornada “Consumo e sostibilidade. Os desafíos do transporte e a industria da moda”, a primeira dunha serie de sesións encamiñadas a reflexionar sobre o gran reto do noso tempo, que é facer compatibles o consumo e a preservación ambiental. A presidenta do Consello da Cultura Galega, Rosario Álvarez, e as coordinadoras da cita, Iolanda Casal e María Loureiro, inauguran esta cita que se pode seguir en directo polo web e as redes sociais da institución.

O Teatro Helena Sá e Costa de Porto abre mañá unha nova xeira de “Dramaturxias itinerantes/Dramaturgias itinerantes”, o programa do Consello da Cultura Galega (CCG), o Instituto Camões-Centro Cultural Português de Vigo e a Escola Superior de Arte Dramática de Galicia (ESAD) para visiblizar a escrita teatral máis contemporánea de Galicia e de Portugal. As dramaturgas Rita Pinheiro (Porto, 1985) e Laura Porto (Covelo, 1992) son as protagonistas desta edición que se desenvolve mañá martes en Porto (19:00 hora local) e o xoves en Vigo (ESAD, 17:00 horas). A novidade desta edición está na incorporación ao proxecto da Escola Superior de Música e Artes do Espetáculo (ESMAE). Os textos que se van representar xa se poden consultar en forma de publicación no web do CCG.

O Consello da Cultura Galega (CCG) acolleu esta mañá a Escolas Católicas, federación que reúne a 117 colexios públicos, privados e concertados de Galicia. A presidenta do CCG, Rosario Álvarez; o secretario xeral de Política Lingüística, Valentín García; e a secretaria autonómica da entidade, Juana Otero, destacaron na inauguraron da Xornada de Normalización Lingüística a importancia desta cita que suma 17 edicións. O encontro recoñeceu entregou os premios Reboiras a dous centros de Ourense e Santiago e homenaxeou á asociación "Os raparigos" de Ferrol.

Son máis de 6.500 cartas escritas por diferentes interlocutores e dirixidos a Ramón Otero Pedrayo (Ourense, 1888-1976). Documentos imprescindibles para entender a traxectoria persoal e intelectual do escritor de Trasalba que repousaban na Fundación Penzol en Vigo. A presidenta do Consello da Cultura Galega, Rosario Álvarez, e o presidente da Fundación Penzol, Manuel Puga, veñen de asinar un protocolo de colaboración para a dixitalización e difusión pública dese material.

Esta semana cumpríronse 800 anos do nacemento de Afonso X, unha figura destacada da cultura europea. Sobre o legado do monarca e a súa conexión con Galicia trata “Afonso X e Galicia”, proxecto expositivo organizado polo Consello da Cultura Galega (CCG) coa colaboración da Xunta de Galicia e as deputacións de Ourense e Lugo. Esta proposta chegou hoxe á Capela de Santa María de Lugo para amosar unha faceta pouco coñecida da súa figura e convidar a coñecer a súa influencia a través de documentos, testemuños arqueolóxicos, literarios e musicais que amosan o legado afonsino en paralelo ao esplendor da cultura galega na etapa medieval. A presidenta do CCG, Rosario Álvarez; o delegado territorial de Lugo, Javier Arias; o vicepresidente segundo da Deputación de Ourense, César Fernández; e da Deputación de Lugo, Mónica Freire, inauguraron esta mostra que estará aberta ata o 17 de abril. O comisario, Antoni Rossell, fixo un percorrido pola mostra que contará nas vindeiras semanas cun programa visitas guiadas e un concerto.

Na véspera do 25 de Novembro, Día Internacional da Eliminación da Violencia contra a Muller, o Álbum de Galicia incorpora a biografía de Sesé Mate (Chapela, 1965-2017) poeta e activista asasinada polo seu home. Ademais, a súa historia dá nome a un premio de xornalismo ético no tratamento da violencia machista, cuxa primeira edición se fallará este 2021. Asina a entrada Sonia Díaz Pereiro.

No día en que se cumpren 800 anos do nacemento de Afonso X (Toledo, 1221-Sevilla, 1284), o Consello da Cultura Galega presentou a monografía encamiñada a desmontar tópicos sobre a relación do monarca con Galicia e, sobre todo, para repensar o paradigma tradicional da historia de Galicia na Baixa Idade Media. A presidenta do CCG, Rosario Álvarez, destacou que o volume Galicia no tempo de Afonso X era un empeño da institución en achegar á sociedade unha contribución científica que permite “visibilizar o esplendor cultural da Galicia medieval”. Simon Doubleday, cunha intervención gravada, e José Miguel Andrade, incidiron en que o libro que editaron achega novas lecturas sobre un rei que “nunca pisou Galicia pero que si mantivo unha forte relación coa historia e a cultura galega”. A presentación contou tamén coa participación de dous autores como Henrique Monteagudo, que puxo de relevo o papel do galego no proxecto cultural do rei; e Diana Pelaz, que destacou o papel das mulleres reais neste período.

O especialista en psicanálise Félix Recio, o crítico de arte Fernando Castro e a galerista Asunta Rodríguez debaterán mañá no Consello da Cultura Galega (CCG) sobre as relacións entre a psicanálise a arte. É unha nova proposta do ciclo “Entre... e a arte” que busca afondar nas conexións entre a arte e outras disciplinas. A presidenta do CCG, Rosario Álvarez, e o coordinador da Sección de Creación e Artes Visuais, Manuel Quintana Martelo, inaugurarán mañá (16:30 horas) esta cita que coordinan Jesús Pastor, Miguel Fernández Cid e a propia Asunta Rodríguez. A xornada é presencial pero poder seguirse en directo a través do web e as redes sociais do CCG.

A nova entrega do especial “Historias de ida e volta”, proxecto web realizado polo Consello da Cultura Galega (CCG) en colaboración coa Secretaría Xeral da Emigración, amosa aqueles destinos atípicos dos nosos emigrantes. Lugares como Panamá, Perú ou Australia, malia non ser numerosos, forman parte da historia da emigración galega. Vinte fotografías e documentos cedidos polos seus protagonistas achégannos outros destinos menos coñecidos.

O vindeiro martes, 23 de novembro, cúmprense 800 anos do nacemento de Afonso X o Sabio. O Consello da Cultura Galega (CCG) presentará no propio día un volume monográfico titulado Galicia no tempo de Afonso X e colabora no simposio Alfons X el Savi i la música que terá lugar en Barcelona. Ademais, o xoves 25 inaugurará na Capela de Santa María en Lugo a exposición Afonso X e Galicia, a mostra que afonda na conexión galega do monarca que estivo en Santiago e Ourense. Todas estas actividades están encamiñadas a reivindicar a importancia do seu legado para a cultura e a historia de Galicia.

A presidenta do Consello da Cultura Galega (CCG), Rosario Álvarez, recibiu esta mañá ao Embaixador de Irlanda en España, Frank Smyth. Na visita abordaron posibles vías de colaboración entre ambas entidades arredor da conexión que existente entre a cultura galega e a irlandesa. Ademais, o embaixador asinou no Libro de Honra da institución.

Chamábase Ernesto Román Laureano Pérez Guerra (Ferrol, A Coruña, 1911 - Lisboa, 1994), asinou cos pseudónimos de D. C. Warnest, Raguer Caldas, Nestore D’Alguecarra, René C. du Regraastal, Ernst Krieg von Kalk ou Ernst Limewar pero foi recoñecido internacionalmente como Ernesto Guerra da Cal. Este ferrolá foi unha autoridade galeguista, hispanista e lusitanista nos campos científico e literario e, por mor do seu exilio nos Estados Unidos, contribuíu a proxectar internacionalmente a cultura galega. Joel R. Gômez asina a súa entrada no Álbum de Galicia.

Cargas policiais abusivas, prexuízos nos procesos xudiciais, incumprimento de prazos obrigados… son moitas as formas de violencia que as institución exerceron sobre as mulleres desde a Transición. Sobre estes aspectos falarase mañá na xornada titulada “Violencia institucional” que organiza o Consello da Cultura(CCG), a través do Centro de Documentación en Igualdade e Feminismos (CDIF), a Valedora do Pobo e a Universidade de Santiago de Compostela (USC). A xornada coordinada por María Xosé Porteiro e Maríam Mariño é presencial, pero pode seguirse en directo a través do web da institución.

Web e App

O 16 de novembro celébrase o Día do Patrimonio, día instaurado pola UNESCO para chamar a atención sobre o seu coidado, protección e preservación. Co gallo da efeméride, o Consello da Cultura Galega (CCG) presentará mañá de maneira simultánea (as 19:30 horas) en Lugo, Ourense, A Coruña e Pontevedra a Guía práctica do Foro Patrimonio e Sociedade. Trátase dun documento fundamental para a xestión do patrimonio en Galicia e que é resultado de tres anos de traballo por parte dunha trintena de especialistas coordinados pola investigadora Rebeca Blanco-Rotea. Ademais, este martes remata en Santiago de Compostela a xornada “Novas perspectivas para o futuro do patrimonio” coordinada por María Isabel Novo cunha sesión que analiza aspectos novidosos na lei, como a consideración da lingua e a toponimia como patrimonio inmaterial e o impacto da contaminación ambiental e lumínica sobre os bens. A cita ten as prazas cubertas pero pode seguirse en directo a través do web do CCG.