Arquivo de noticias do CCG

A sexta edición do Concerto das Letras Galegas, iniciativa do Consello da Cultura Galega (CCG) para celebrar dun xeito festivo o 17 de maio, terá lugar o vindeiro 17 de maio na Coruña, no Teatro Rosalía ás 21:00 horas. Nesta ocasión será o grupo Milladoiro quen poñerá a música nun concerto en que cobrarán protagonismo os textos de Manuel María. As entradas, que son gratuítas, póñense a disposición do público mañá xoves 5 de maio na Taquilla Central da Praza de Ourense en Coruña. Pódese retirar un máximo de dúas entradas por persoa.

Conferencias, varias presentacións así como a inauguración das últimas mostras do Consello da Cultura Galega sobre Valle-Inclán ou a imaxe de Galicia a través das revistas da emigración conformaron a axenda do presidente da institución, Ramón Villares, na viaxe institucional a Bos Aires. A visita encádrase no marco de actividades previstas na Feira do Libro da capital arxentina na que Santiago era cidade convidada e onde contribuíu a difundir a cultura galega. A cita conclúe hoxe coa presentación do libro homenaxe a Manuel María, Advento.

Escavacións en directo, dixitalizar vídeos familiares e subilos á rede, organizar roteiros polos cemiterios, crear folletos turísticos interactivos e actualizados…, son moitos os formatos de difusión do patrimonio que durante dous días se explicaron no marco da xornada “Patrimonio e comunicación. Novos paradigmas”. Unha cita do Consello da Cultura Galega que puxo sobre a mesa como dar a coñecer o noso patrimonio dun xeito efectivo e á vez rigoroso. A necesidade de traballar de xeito colaborativo entre todos os sectores implicados e de empregar as potencialidades da rede son algunhas das solución que achegaron profesionais e afeccionados para situar o patrimonio no espazo público.

Nos últimos anos apréciase unha preocupación crecente pola divulgación científica do patrimonio tanto por parte de profesionais como de afeccionados. Unha inquedanza que se traduce en numerosas iniciativas que aproveitan as novas tecnoloxías para difundir e por en valor os procesos de patrimonialización. Algunhas destas iniciativas, a nivel galego e español, están recollidas nas xornadas “Patrimonio e comunicación. Novos paradigmas” que arrincan mañá no Consello da Cultura Galega e que se poden seguir en directo a través do web da institución.

A necesidade de contidos de acceso libre, dunha xestión política que entenda a cultura en relación coa comunicación, coa educación e coa sociedade en xeral, así como a fin da comunicación de masas centraron a xornada “Cultura e comunicación na sociedade en rede”. Expertos nestas materias desde ámbitos como a semiótica ou a comunicación abordaron ao longo do día de hoxe cales son os retos e as oportunidades para unha sociedade conectada e cal o papel para as culturas minoritarias. A cita estivo coordinada polos profesores Xosé López, Francisco Campos e Manuel Gago.

“Cultura e comunicación na sociedade en rede” é o título da xornada que se desenvolve mañá no Consello da Cultura e que pretende analizar novos modelos e novas experiencias no ámbito dixital da man de expertos como Miquel de Moragas ou Emili Prado. A cita organizada polos profesores Xosé López, Francisco Campos e Manuel Gago poderá seguirse en directo a través do web da institución.

Galicia 100. Obxectos para contar unha cultura é unha exposición organizada polo Consello da Cultura galega, coa colaboración de Afundación e Abanca, que constrúe un relato histórico do país a través da selección e da relación de cen pezas procedentes de institucións, empresas e coleccionistas de Galicia e do exterior. A mostra inaugurarase o vindeiro 10 de maio na sede de Afundación (rúa do Vilar, 19) en Santiago de Compostela. A exposición contará tamén cunha publicación en papel, aplicación para dispositivos móbiles, así como unha web que aposta polo uso de aspectos interactivos na dixitalización do patrimonio. Como avance, a Televisión de Galicia amosará diariamente desde o luns 25 unha escolma das pezas seleccionadas.

Este documento achega unha descrición xeral e unha visión crítica dos distintos proxectos que se están a desenvolver no noso país. Unha ferramenta útil para divulgadores, colectivos, xestores e institucións.

Convocatoria de bolsas na Casa Velázquez. 2016

O Diario Oficial de Galicia (DOG) publica hoxe a convocatoria da segunda edición das bolsas de colaboración entre o Consello da Cultura Galega e a Casa de Velázquez que promove o intercambio de creadores e investigadores. O proxecto consiste na estadía durante tres meses na Casa de Velázquez en Madrid para realizar investigacións e creacións que promovan a cultura galega no ámbito francófono.

Ramón Villares, presidente do Consello da Cultura Galega (CCG), inicia unha viaxe institucional a Bos Aires co obxectivo de contribuír a difundir a cultura galega no exterior. Nesta ocasión encádrase no marco de actividades previstas na Feira do Libro que comeza mañá na capital arxentina. Na súa axenda está prevista a realización de conferencias, varias presentacións así como a inauguración das últimas mostras realizadas pola institución que preside.

“O informe pon de manifesto que hai unha potencialidade extraordinaria para a divulgación da ciencia” apuntou Francisco Díaz-Fierros, vicepresidente do Consello da Cultura Galega e membro da comisión técnica que no último ano estivo a traballar para compilar e documentar as iniciativas existentes sobre esta materia. O coordinador do documento, o científico Xurxo Mariño, presentou o resultado esta mañá no marco dunha xornada encamiñada a explicar os pormenores da divulgación científica en boca dos seus protagonistas. Os problemas de financiamento, a variedade extraordinaria de propostas así como a escasa presenza nos medios son algunhas das conclusións dun informe pensado para difundir entre divulgadores, público xeral e a Administración.

A sede do Consello da Cultura Galega acolle mañá mércores 20 de abril unha xornada encamiñada a dar a coñecer de xeito teórico e práctico cal é a situación da comunicación científica en Galicia. Unha cita que se desenvolve ao longo de todo o día con relatorios e conferencias e que ten unha actividade central na presentación dun informe sobre a divulgación da ciencia no noso país. A xornada está coordinada polo científico Xurxo Mariño, que tamén é un dos membros integrantes da comisión técnica que se encargou da elaboración dese documento.

Tiña apenas 19 anos cando Manuel María(1929-2004) escribiu o seu primeiro poemario, Muiñeiro de brétemas. Foi o inicio dunha escrita que o converteu nun dos máis prolíficos poetas da historia literaria galega. O presidente do Consello da Cultura Galega (CCG), Ramón Villares, presentou esta mañá a reedición dunha das súas obras máis destacadas, Advento, que se encadra no marco das actividades da institución para conmemorar o homenaxeado o Día das Letras Galegas. A presentación da edición facsimilar contou coa presenza de Saleta Goi, viúva de Manuel María e presidenta da Fundación que leva o seu nome, e de Miguel Anxo Fernán-Vello, escritor e editor, responsable do estudo crítico que acompaña o texto.

Unha actitude positiva, poucas resistencias pero unha disociación entre o aprecio do galego e o seu uso. Son algunhas das primeiras valoracións dun estudo novidoso realizado entre mozos de 15 e 25 anos de Galicia e que foi presentado no marco dos XVIII Encontros para a Normalización. A cita organizada polo Centro de Documentación Sociolingüística de Galicia (CDSG) do Consello da Cultura Galega (CCG) foi clausurada esta tarde polo presidente da institución, Ramón Villares. Os Encontros chegaron á súa maioría de idade sendo un espazo de debate e reflexións sobre a lingua e un escaparate das iniciativas en prol da normalización se están a facer no país.

Convocatoria de bolsas de colaboración en proxectos de investigación. 2016

Nova actualización de Gallaeciae Monumenta Historica. Desta volta son 512 documentos do Arquivo da Catedral de Ourense datados entre 1289-1339. Unha obra que podes ler en liña e que permite coñecer o goberno da diocese e do cabido, así como os conflitos e acontecementos da cidade e da contorna no complicado século XIV.

Os “Encontros para a Normalización” chegan á súa maioría de idade sendo un espazo de debate e reflexións sobre a lingua. Nesta XVIII edición, que comeza mañá xoves, volven poñer o foco nos máis novos cun programa encamiñado a coñecer as motivacións da mocidade galega a falar nun ou outro idioma, a debater sobre cal é a potencialidade das redes dixitais e cal o papel da escola. A cita está organizada polo Centro de Documentación Sociolingüística de Galicia (CDSG) do Consello da Cultura Galega (CCG), e poderase seguir en directo a través do web. Valentín García, secretario xeral de Política Lingüística, e Rosario Álvarez, vicepresidenta do CCG, serán os encargados da inauguración dun encontro que se desenvolverá na sede da institución ata o venres.

“Outros verbos, novas lecturas: Valle-Inclán traducido”(1930-1936) é o título da exposición que pretende dar conta da dimensión internacional deste escritor a través das traducións das súas obras a outras linguas. A versión en portugués desta mostra inaugurouse na tarde deste martes no Museo Nogueira da Silva en Braga. Alí estivo presente o presidente do Consello da Cultura Galega, Ramón Villares, e a comisaria, Rosario Mascato, nun acto que contou coa actuación musical do grupo Zoar.

O Consello da Cultura Galega (CCG) celebrou no serán do xoves 7 de abril unha sesión plenaria na que aprobou cambios na súa composición. Nesta ocasión procedeuse a nomear os membros por designación das institucións que conforman o CCG e que se produce por cumprimento da Lei de creación da institución e do seu regulamento, cada dous anos. Ademais, tamén se aprobaron as próximas actividades, así como os informes das seccións e comisións que deron conta do seu funcionamento.