Arquivo de noticias do CCG

O Consello da Cultura Galega, a Fundación Carlos Casares e o Concello de Ourense presentaron na mañá do venres o tradicional Concerto das Letras Galegas, unha cita anual que pretende dotar de música as celebracións do 17 de maio. O estreito vínculo do autor homenaxeado este ano, Carlos Casares, coa cidade auriense determinou a escolla do lugar de celebración dun evento que dende hai sete anos, percorre a xeografía galega para dar protagonismo á literatura e á música galega. A cita será no Auditorio de Ourense o vindeiro día 16 de maio ás 20:30 horas.

O Protocolo para a garantía dos Dereitos Lingüísticos. Exemplo de empoderamento da sociedade civil é o título da conferencia coa que Paul Bilbao, secretario xeral de Kontseilua, abriu os XIX Encontros para a Normalización Lingüística, organizados anualmente polo Consello da Cultura Galega. O experto vasco relatou o traballo realizado durante ano e medio por un cento de entidades de toda Europa para elaborar un protocolo con 185 medidas que se deben adoptar para garantir os dereitos lingüísticos recollidos na Declaración de Barcelona de 1996. Este documento, asinado en Donostia en decembro de 2016, subliñou, evidencia o empoderamento da sociedade civil que o fixo posible.

A praza da Catedral de Mondoñedo será o escenario da quinta edición de “No bico un cantar”, unha iniciativa que ten un marcado carácter didáctico e cultural organizada polo Consello da Cultura Galega e a Consellería de Cultura, Educación e Ordenación Universitaria da Xunta de Galicia. O concerto foi presentado hoxe na Casa do Concello mindoniense polo presidente do Consello da Cultura Galega Ramón Villares; Anxo Lorenzo, secretario xeral de Cultura da Consellería de Cultura, Educación e Ordenación Universitaria; Maximino Zumalave, director artístico do concerto e Elena Candia, alcaldesa anfitrioa. A cita xuntará en Mondoñedo o vindeiro 2 de xuño ás 17:30 horas un gran coro de medio milleiro de nenas e nenos chegados dos conservatorios profesionais de música de Galicia para cantar a Álvaro Cunqueiro, A. Noriega Varela, Manuel Leiras Pulpeiro, Aquilino Iglesia Alvariño e Xosé Díaz Jácome.

O Protocolo para a garantía dos Dereitos Lingüísticos. Exemplo de empoderamento da sociedade civil é o título da conferencia coa que Paul Bilbao, secretario xeral de Kontseilua, abrirá mañá, a partir das 16:00 horas, os XIX Encontros para a Normalización Lingüística, organizados anualmente polo Consello da Cultura Galega. Durante dous días, expertos de ámbitos tan diversos como o ensino, a sanidade, a creación ou a administración reflexionarán sobre a situación dos dereitos lingüísticos nos seus campos de traballo. Nos Encontros poderase visitar Artesa 2017, unha mostra de iniciativas normalizadoras.

A vía máis eficaz para incrementar o uso da lingua galega entre a mocidade galega é a creación dun espazo de “solidariedade co galego”, movidos pola "afectividade e a emotividade”, por riba das vías máis institucionais coma o ensino e os medios de comunicación. Así o pon de manifesto o informe “Prácticas e actitudes lingüísticas da mocidade en Galicia”, elaborado polo CCG e aprobado polo Plenario do Consello da Cultura Galega o 6 de abril de 2017.

O fuso horario e a pertinencia ou non do seu cambio é o obxectivo da publicación electrónica “É o noso fuso horario un problema?”, presentada hoxe por Francisco Díaz-Fierros Viqueira, coordinador da Sección de Ciencia, Natureza e Sociedade, e o coordinador da publicación, o catedrático de Electromagnetismo da USC Jorge Mira.

As cancións dos poetas mindonienses protagonizan a quinta edición de “No bico un cantar”, un programa que ten un marcado carácter didáctico e cultural e xunta música, poesía e mocidade. O concerto foi presentado este luns 13 de marzo no Consello da Cultura Galega polo seu presidente, Ramón Villares, Román Rodríguez, conselleiro de Cultura, Educación e Ordenación Universitaria, Elena Candia, alcaldesa de Mondoñedo e Maximino Zumalave, director artístico do concerto.

Mañá, xoves 9 de marzo, terá lugar ás 17:00 horas no Consello da Cultura Galega a conferencia Intersectional meanings of culture a cargo de Nira Yuval-Davis, directora do Research Centre on Migration, Refugees and Belonging (CMRB) na University of East London. Trátase da sexta sesión do ciclo Europa Fortaleza, coordinado por Ramón Máiz, centrado nos retos dos fluxos migratorios, e na resposta institucional e política da Unión Europea.

Ramón Villares, presidente do Consello da Cultura Galega, foi investido doutor honoris causa pola Universidade de Rennes 2, na Bretaña Francesa, esta mañá do martes 7 de marzo. Durante o acto solemne, Villares pronunciou a conferencia "A Bretaña na cultura galega: similaridades e conexións", que foi respondida pola profesora Christine Rivalan Guégo, profesora de lingua e literatura española contemporáneas.

A colección dixitalizada de publicacións periódicas feministas A Saia, xestionada pola Comisión de Igualdade do Consello da Cultura Galega e ADHUC Teoria, Gènere, Sexualitat da Universitat de Barcelona incorpora a publicación A muller e a loita, editada na clandestinidade en Vigo polo Movimiento Democrático de Mujeres de Vigo entre 1971 e 1976.

Rosario Álvarez, vicepresidenta do Consello da Cultura Galega, presentou hoxe, en compañía de Francisco Dubert, secretario do Instituto da Lingua Galega, e Xavier Varela, coeditor do volume, o libro A lingua galega no solpor medieval, que aborda os procesos de transformación da lingua galega e o seu abandono como lingua escrita formal entre os séculos XV e XVI.

O Castro de Baroña é un dos xacementos máis visitados de Galicia, no que se xuntan interesantes aspectos patrimoniais, a súa temperá posta en valor e a súa localización, o que lle confire un importante valor paisaxístico. <>. Así o considera Luis F. López González, do equipo arqueolóxico de Terra Arqueos, responsable das últimas intervencións no castro e participante no encontro que terá lugar mañá xoves no Consello da Cultura Galega.

O CCG está a preparar actividades vinculadas ao bicentenario dos inicios da preparación para a elaboración do Mapa de Galicia de Domingo Fontán, considerado o primeiro mapa científico do país e dunha importancia simbólica capital para a Xeración Nós e miles de galegos. O noso exemplar foi desmontado e documentado estes días como paso previo á súa restauración. Mentres a sección de Ciencia, Natureza e Sociedade están a preparar un programa de difusión de Fontán e o seu mapa, aquí vemos a Miguel Mariño e Toño Mejuto aproveitando a circunstancia para o documental que están a preparar sobre o xeógrafo.

O Observatorio da Cultura Galega presenta hoxe un novo documento de traballo: “As ensinanzas do ámbito cultural en Galicia”. No informe recóllese que en Galicia existen 188 centros que imparten ensinanzas artísticas, que medra o número de alumnos de Arte Dramática e Conservación e Restauración, así como na modalidade de Artes do Bacharelato, e que o alumnado está formado maioritariamente por Mulleres.

Carlos Casares foi o terceiro presidente do Consello da Cultura Galega (1996-2002), e unha figura comprometida coa potencialidade da cultura e da lingua galegas para construír unha Galicia mellor. É por iso que, co gallo do Día das Letras Galegas 2017, o CCG vai prestar unha atención importante á dimensión de Carlos Casares como intelectual público a través dunha programación de actos que se prolongará ao longo do ano 2017.

A musicóloga, investigadora e profesora titular da UCM, Cristina Bordas e o artesán e restaurador de instrumentos antigos de vento, Oli Xiráldez, participarán na xornada Metodoloxía e criterios sobre restauración de instrumentos históricos. Estado da cuestión en Galicia, que terá lugar o día 15 de febreiro ás 16:30 horas no Consello da Cultura Galega. Ambos especialistas analizarán o estado e os criterios actuais de preservación do noso patrimonio musical, un patrimonio de gran valor que cómpre transmitir a futuras xeracións como testemuño material da propia historia.

O xoves 9 de febreiro terá lugar ás 17:00 horas no Consello da Cultura Galega unha nova sesión do ciclo Europa Fortaleza cunha conferencia sobre a política inmigratoria española a cargo do catedrático de socioloxía da UDC, Antonio Izquierdo. No seu relatorio achegará unha visión diacrónica da política inmigratoria das últimas tres décadas e proporá catro claves para o futuro: a selección de fluxos, a recuperación dos desempregados, o equilibrio na naturalización e a equidade na formación dos menores inmigrantes.

O Consello da Cultura Galega apoiou, a través da súa Comisión Executiva, a Declaración Institucional do Concello de Santiago de Compostela instando ao Goberno Central o cambio na denominación do aeroporto da cidade, que pasar a chamarse: Aeroporto Rosalía de Castro – Santiago de Compostela – Lavacolla.

O Consello da Cultura Galega inaugura o martes 24 de xaneiro ás 20 horas en Vigo a exposición “Galicia 100 Obxectos para contar unha cultura”, en colaboración con Afundación. A mostra, que recolle cen obxectos que percorren a cultura galega desde a Prehistoria ata os anos 90 do século XX, poderase ver na sala de exposicións do Teatro Afundación ata o 25 de marzo. A mostra chega a Vigo despois de itinerar por Santiago de Compostela e A Coruña.

O Consello da Cultura Galega celebrou onte o seu primeiro pleno anual, coa asistencia do presidente de honra da institución, Alberto Núñez Feijóo. O Presidente do CCG, Ramón Villares, fixo un balance da actividade do ano 2016 e presentou as principais liñas e actividades para 2017. Entre os fitos destacados do vindeiro ano serán as actividades vinculadas a Carlos Casares, ás Irmandades da Fala ou un encontro cultural Galicia-Bretaña.