Arquivo de noticias do CCG

En 2013 tiveron lugar 1172 concertos de música clásica, o que nos sitúa no sexto posto no conxunto de España. Pero se trasladamos este feito ao plano económico, temos un panorama ben diferente. A recadación en Galicia nese ano supuxo un 1,8% do conxunto total do Estado. Todo isto nun conxunto continuado de descenso que arrincou en 2007 ao coincidir coa crise. Son cifras do estudo “A música clásica e popular en Galicia”, o último documento de traballo do Observatorio da Cultura Galega (OCG-DT), que tamén analiza outros xéneros musicais.

O presidente do Consello da Cultura Galega, Ramón Villares, recibiu esta mañá de mans do conselleiro de Cultura, Educación e Ordenación Universitaria, Román Rodríguez, o Documento estrutural básico do Plan de dinamización da lingua galega no tecido económico 2015-2020. O Consello da Cultura Galega (CCG) e a Real Academia Galega (RAG) son as dúas primeiras entidades en recibir este documento que contén a proposta inicial de traballo. O encontro tivo lugar na Sala Eisenman da Cidade da Cultura no que tamén participaron Xesús Alonso Montero e Henrique Monteagudo, presidente e secretario da RAG, respectivamente, e Valentín García, secretario xeral de Política Lingüística.

Arquivos, bibliotecas e museos son as “institucións da memoria” dun país. As súas diferenzas estiveron sempre claras ata a chegada do contexto dixital, que fixo que se esvaecesen os límites e se abrisen novos retos para os usuarios pero tamén para os profesionais. Sobre eles falarán especialistas e responsables da súa xestión nas xornadas “Converxencia dixital das institucións da memoria”, que o Consello da Cultura Galega organiza os días 6 e 7 de maio. Está aberto o prazo de inscrición e hai cen prazas.

Mañá comeza na Universidade Federal da Bahia (UFBA) o I Encontro Brasileiro de Estudos Galegos (I EBEG), unha cita que ten tres obxectivos: conmemorar o aniversario do Centro de Estudos da Lingua e Cultura Galegas (CELGA), homenaxear a fundadora do Centro de Estudos Galegos na Bahia, a profesora Rosario Suárez Albán, así como intensificar o diálogo intelectual entre investigadores brasileiros e estranxeiros que se dediquen aos estudos galegos. Nesta cita, que se estende ata o mércores 15, estará presente Rosario Álvarez, vicepresidenta do Consello da Cultura Galega.

“Aínda non cumprira os vinte anos cando Filgueira Valverde escribiu Os nenos, un libro de creación literaria que dá as claves do que pensaba a xeración do Seminario de Estudos Galegos”, explicou Ramón Villares, presidente do Consello da Cultura Galega (CCG), na presentación desenvolvida esta mañá. Canda el estaba Fernando Filgueira, presidente da fundación que leva o nome do polígrafo pontevedrés; Ana Isabel Vázquez, deputada provincial de Cultura; Maximino Zumalave, vocal do CCG; Carlos Valle, director do Museo de Pontevedra, e David Pintor, autor das ilustracións que acompañan a edición facsimilar deste texto, enriquecido con dous estudos críticos. A publicación insírese nas actividades previstas polo CCG para conmemorar a celebración do Día das Letras Galegas dedicado a “unha figura esencial na construción das institucións do século XX”, en palabras de Ramón Villares.

O concepto Migración inaugura o primeiro Mateus DOC Galicia. Un encontro de reflexión e debate interdisciplinar entre doutorandos e postdocs que segue o espírito do programa Mateus DOC que se desenvolverá entre os días 18 e 20 de setembro de 20015. A cita está organizada polo Instituto Internacional Casa de Mateus e o Consello da Cultura Galega.

Mañá arrinca en Bos Aires a undécima edición do congreso anual da Asociación Internacional de Estudos Galegos (AIEG). Nesta ocasión céntrase en analizar como a globalización muda as identidades nas fronteiras, na emigración e no exilio. O Consello da Cultura Galega (CCG) contribúe coa organización de dous ciclos de diálogos: un sobre o papel de Bos Aires como capital cultural galega e outro sobre o asociacionismo étnico e a identidade.

Os fogares galegos gastan cada vez menos en cultura. Dos 830 euros que destinaron en 2007, pasaron a ser 563,3 euros en 2013, que nos sitúan no sexto lugar en gasto por comunidade autónoma. Así o indica o último Documento de Traballo do Observatorio da Cultura Galega (DT-OCG), servizo dependente do Consello da Cultura Galega (CCG), que analiza a “Evolución do gasto cultural dos fogares galegos” entre 2006 e 2013.

O Consello da Cultura Galega realizou no serán deste xoves unha sesión plenaria na que aprobou a organización dunha grande homenaxe ás Irmandades da Fala con motivo do centenario da súa constitución, que terá lugar en 2016. Isto concrétase na celebración de tres seminarios e unha exposición, que supoñen unha revisión dos presupostos ideolóxicos e a contextualización deste movemento. Na sesión deuse a coñecer o redeseño da plataforma web culturagalega, que estreará dominio .gal, e a incorporación ao máximo órgano de decisión do CCG do conselleiro de Cultura, Educación e Ordenación Universitaria, Román Rodríguez, como membro nato.

“Os escolares que cursan bacharelato e, ao mesmo tempo, estudan música, teatro ou danza poden chegar a ter 50 horas de clase semanal. Se iso se traduce ao mundo laboral falariamos case de escravitude”. Así describiu Maximino Zumalave, coordinador da Sección de Música e Artes Escénicas do Consello da Cultura, unha situación que afecta a milleiros de escolares galegos. Para buscar fórmulas que permitan flexibilizar esa carga lectiva realizouse a xornada “Os currícula escolares nos novos plans de estudo: música e artes escénicas”. Unha cita de actualidade xa que o presidente do CCG, Ramón Villares, lembrou na inauguración que “o conselleiro de educación acaba de presentar o proxecto de decreto polo que se regulan os currículos das etapas de ESO e bacharelato adaptados á Lei orgánica para a mellora da calidade educativa (LOMCE)” e que deberán entrar en vigor no vindeiro curso.

O Consello da Cultura Galega organiza mañá a xornada “Os currícula escolares nos novos plans de estudo: música e artes escénicas”, unha cita de actualidade porque pon sobre a mesa unha realidade que afecta a preto de 8600 alumnos de toda Galicia. No vindeiro curso académico 2015-2016, entran en vigor os novos plans da ESO e do bacharelato fixados pola LOMCE, que buscan favorecer eses alumnos que tamén cursan ensinanzas reguladas de música e danza. Neste encontro, que se pode seguir en directo desde o web da institución, preténdese dar a coñecer a situación así como a especificidade das ensinanzas artísticas. O presidente do Consello da Cultura Galega, Ramón Villares; o coordinador da Sección de Música e Artes Escénicas, Maximino Zumalave, e o membro da sección Rodrigo Porral son os encargados da inauguración desta sesión.

“O valor económico e social da cultura non está só no prezo dos contidos, senón tamén na participación da cidadanía”. Así o manifestou economista cultural Pier Luigi Sacco no marco dunha intervención que abriu a primeira sesión do ciclo Desafíos do ecosistema cultural galego ante a Axenda Europa 2020 que organiza o Consello da Cultura Galega. O presidente da institución, Ramón Villares, insistiu na inauguración na necesidade dunha “reflexión sobre a cultura en xeral, e a cultura galega en particular, e o seu valor no deseño das políticas”. O ciclo, coordinado por Xosé López contou tamén coa presenza de Xerardo Estévez e Ignacio Aguaded que reforzaron o valor da cultura nunha política activa marcada pola participación da sociedade.

Coñecer as claves políticas nun novo contexto europeo onde a creatividade e a innovación ocupan un lugar central. Este é o obxectivo da sesión que abre o ciclo Desafíos do ecosistema cultural galego ante a Axenda Europa 2020 e que terá lugar mañá martes no Consello da Cultura Galega (CCG). O presidente da institución, Ramón Villares, o coordinador do ciclo, Xosé López, e Rosario Álvarez Blanco, como coordinadora desta primeira sesión, son os encargados de inaugurar esta cita en que destaca a presenza de Pier Luigi Sacco, profesor de Economía da Cultura na Università IULM de Milán.

Convocatoria de bolsas na Casa Velázquez. 2015

O Diario Oficial de Galicia publica hoxe as bases que rexen a convocatoria do Consello da Cultura Galega de dúas bolsas de estadía durante tres meses na Casa de Velázquez en Madrid. Trátase dun programa de intercambio promovido por ambas entidades coa finalidade de contribuír á proxección da cultura galega no exterior, notablemente no mundo francófono. Estas bolsas créanse en homenaxe á actriz María Casares, que foi o máximo expoñente da presenza da cultura galega en Francia. O prazo de presentación de solicitudes remata o vindeiro 20 de abril.

No vindeiro curso académico 2015-2016 entran en vigor os novos plans da ESO e do bacharelato fixados pola LOMCE, que buscan favorecer eses alumnos que tamén cursan ensinanzas reguladas de música e danza. Non é unha cuestión menor, xa que afecta a preto de 8600 alumnos de toda Galicia. Coñecer a situación así como a especificidade dos ensinos artísticos é parte do obxectivo da xornada “Os currícula escolares nos novos plans de estudo: música e artes escénicas”, que se desenvolverá o vindeiro día 25 de marzo no Consello da Cultura Galega. Está aberto o prazo de inscrición e hai cen prazas.

Durante moito tempo as industrias da cultura ocuparon un lugar secundario no deseño das políticas dos gobernos. Co establecemento da estratexia Europa 2020, a Comisión e o Parlamento Europeo mudaron a óptica con respecto a esta materia. Foi así como a creatividade e a innovación, a cultura, pasaron a ocupar un lugar central. Neste contexto o Consello da Cultura Galega organiza un ciclo para analizar e reflexionar sobre os retos e oportunidades para unha cultura como a galega. Chámase Desafíos do ecosistema cultural galego ante a Axenda Europa 2020, está coordinado polo profesor Xosé López e organizado en tres xornadas. A primeira delas terá lugar o día 24 e destaca a presenza de Xerardo Estévez, arquitecto e ex-alcalde de Santiago de Compostela, e de Pier Luigi Sacco, profesor de Economía da Cultura na Università IULM de Milán.

A delgada liña que separa a ciencia da ficción protagoniza a XVI edición do Salón do Libro Infantil e Xuvenil de Pontevedra. Unha cita á que o Consello da Cultura Galega achega o seu gran de area cunha mesa redonda que terá lugar este venres 13 co obxectivo de falar da divulgación científica. Alimarias, estrelas e clons é o título desta proposta en que participan científicos, xornalistas e divulgadores.

Ramón Villares, presidente do Consello da Cultura Galega, remata mañá unha viaxe a Brasil co obxectivo de contribuír a difundir a cultura galega no exterior. Hoxe participa no acto de nomeamento da escritora de orixe galega Nélida Piñón como directora da Cátedra José Bonifácio do Centro-Iberoamericano (CIBA-USP). A última cita da axenda prevista terá lugar mañá cunha conferencia sobre o patrimonio galego da emigración na sede do Instituto Cervantes de São Paulo.

Conmemórase neste 2015 o Ano Internacional dos Solos. Unha efeméride que a Delegación da Sociedad Española de la Ciencia del Suelo (SECS) en Galicia e o Consejo Superior de Investigaciones Científicas (CSIC) celebra coa reedición (en castelán e con novos contidos adaptados) do cómic divulgativo Vivir no solo, elaborado polo Consello da Cultura Galega. Na presentación estaban presentes Eduardo Pardo de Guevara y Valdés, coordinador institucional do CSIC en Galicia; Montserrat Díaz Raviña, presidenta da Delegación da SECS en Galicia; María Antón Vilasánchez, concelleira de Cultura de Santiago; así como os autores do cómic: Marilar Aleixandre como escritora, Fran Bueno como ilustrador e Francisco Díaz-Fierros como asesor pero tamén como vicepresidente do Consello da Cultura Galega.