Arquivo de noticias do CCG

O luns, día 2 de febreiro, ás 13´30 horas, celebrarase no salón de actos do Consello da Cultura Galega unha rolda de prensa para presentar o "V FESTIVAL ALTERNATIVO DE TEATRO MÚSICA E DANZA DE COMPOSTELA".

O presidente do Consello da Cultura Galega (CCG), Alfonso Zulueta de Haz, e os membros da Comisión Executiva reuniranse hoxe mércores, ás 14´00 horas, cos representantes dos medios de comunicación. O encontro, que irá seguido dun xantar, servirá para presentar a edición facsímile do Códice de Toledo das "Cantigas de Santa María", do rei Afonso X o Sabio. O Consello da Cultura levou a cabo esta edición facsímile coincidindo co vinte aniversario da creación da institución.

O presidente do Consello da Cultura Galega (CCG), Alfonso Zulueta de Haz, presidirá esta tarde, ás 19´00 horas no Instituto "Rosalía de Castro" de Santiago de Compostela, o acto de entrega do IX Premio Literario "Arcebispo Juan de San Clemente". Nesta edición os premiados son Rosa Aneiros (Resistencia); Almudena Grandes (Los aires difíciles) e Jonathan Coe (El club de los canallas).

O Consello da Cultura Galega (CCG) editará o "Catálogo de manuscritos da Biblioteca e Arquivo Catedralicio de Santiago de Compostela". Así o comunicou o presidente da institución, Alfonso Zulueta de Haz, durante a presentación do traballo de catalogación realizado no marco do convenio de colaboración entre o CCG e o Arquivo Catedralicio de Santiago.

O empresario compostelán Ramón Castromil Ventureira, vicepresidente do Consello da Cultura Galega (CCG) e un dos artífices da recuperación do Casino de Santiago, recibiu onte o Premio Especial "Manuel Beiras" pola súa traxectoria de apoio decidido á promoción e á normalización do idioma galego, nomeadamente a través das campañas realizadas á fronte da empresa "Castromil", de transporte de viaxeiros.

O Consello da Cultura Galega (CCG) conmemorou este martes os seus primeiros vinte anos cun acto institucional presidido polo Presidente da Xunta, Manuel Fraga, e ó que asistiu o titular do Parlamento, José María García Leira, xunto con autoridades e representacións da vida cultural, política, relixiosa, económica e universitaria de Galicia. No acto fixeron uso da palabra o Presidente do CCG, Alfonso Zulueta de Haz, e o titular da Xunta, Manuel Fraga, Presidente de Honra da institución cultural. Ademais procedeuse á presentación da edición facsímile do "Códice de Toledo" das CANTIGAS DE SANTA MARIA, do Rei Alfonso X "O Sabio", e inaugurouse unha exposición bibliográfica cos fondos do Consello. O cantautor Amancio Prada ofreceu un recital cunha escolma de Cantigas dos trobadores galaico-portugueses e de Alvaro Cunqueiro. Unhas cento cincuenta persoas estiveron presentes nestes actos conmemorativos. Previamente celebraron sesións ordinarias a Comisión Executiva e o Plenario do CCG. O Códice de Toledo foi presentado polo profesor Henrique Monteagudo, secretario do CCG. Ramón Castromil, vicepresidente da institución, presentou ó catautor Amancio Prada.

O Consello da Cultura Galega (CCG) conmemorará o seu vixésimo aniversario cun acto que se celebrará o día 9 decembro, ás 19´00 horas, na súa sede do Pazo de Raxoi, en Santiago, e ó que foron convidadas máis de mil persoas relacionadas coa cultura e as institucións culturais de Galicia. A sesión conmemorativa iniciarase coas intervencións do Presidente de Honra do CCG e da Xunta de Galicia, Manuel Fraga, e do Presidente da institución cultural, Alfonso Zulueta de Haz.

O Consello da Cultura Galega (CCG) acolleu esta mañá a presentación e proxección do vídeo "As claves do enigma. Tafall entre tres mundos", realizado polo historiador José Antonio Durán e patrocinado polo CCG e o Servicio de publicacións da Deputación de Pontevedra. Con esta obra, o Consello da Cultura Galega pretende rescatar a memoria deste excepcional personaxe da historia de Galicia, Bibiano Fernández Osorio Tafall (Pontevedra 1902- México 1990), rescatar a súa traxectoria como líder político, como funcionario internacional e como científico.

Un vídeo coa biografía de Bibiano Fernández-Osorio Tafall (Pontevedra, 1902-Cidade de México, 1990) será presentado o día 2 de decembro, ás 12´00 horas, no salón de actos do Consello da Cultura Galega (CCG). Realizado polo historiador José Antonio Durán e patrocinado polo Servicio de Publicacións da Deputación de Pontevedra e o CCG, o vídeo permite un achegamento ó perfil histórico dunha das personalidades galegas máis relevantes da II República e tamén ó funcionario español que acadou o máis alto rango nas organizacións internacionais. Tafall xubilouse coa categoría de subsecretario xeral da Organización das Nacións Unidas (ONU), logo de 26 anos de servicio.

A Sección de Arquitectura do Consello da Cultura Galega (CCG) celebra hoxe a segunda e última sesión das xornadas "A arquitectura desde Cataluña". O deseño dos edificios para que consigan superar os cambios vertixinosos da sociedade, a necesidade dunha normativa que unifique criterios para os chamados "tipos edificatorios", como escolas e hospitais, e a "debilidade" da reflexión crítica coa arquitectura e a elite da profesión foron algúns dos temas abordados.

A Sección de Arquitectura do Consello da Cultura Galega (CCG) celebra hoxe e mañá as xornadas "A Arquitectura desde Cataluña", na que participan relevantes profesionais e profesores desa Comunidade. Na sesión inaugural, os coordinadores do encontro, Iago Seara e Antonio Armesto, destacaron a necesidade de entender a arquitectura como unha conformación máis da cultura e de crear canles de diálogo entre os profesionais da Península para unha mellor formación dos arquitectos. Con este obxectivo, as Xornadas, sinalan, contan coa participación dalgúns dos máis representativos profesionais das xeracións de arquitectos cataláns das últimas décadas, dende Federico Correa ós máis recentes valores.

A Sección de Arquitectura do Consello da Cultura Galega (CCG) organiza este xoves e venres as "Xornadas A Arquitectura desde Cataluña". Con esta iniciativa, a entidade pretende abordar da man dalgúns dos mellores profesionais cataláns unha análise da arquitectura recente nesa Comunidade, así como abrir canles de reflexión e intercambio de coñecementos entre arquitectos galegos e cataláns.

O Consello da Cultura Galega (CCG) presentará mañá, martes, día 25, ás 12´30 horas, en rolda de prensa, as xornadas A ARQUITECTURA DESDE CATALUÑA.

Os dereitos de autor e os dereitos dos cidadáns a acceder á cultura centraron esta mañá o III Encontro O Son da Memoria, que organiza o Arquivo Sonoro de Galicia, do Consello da Cultura Galega (CCG). Membros da Sociedade General de Autores e Editores (SGAE) e representantes de posturas críticas coa actual xestión dos dereitos de autor expuxeron os seus argumentos e debateron sobre a polémica descarga de música por Internet e a copia de CD´s para uso persoal.

O Arquivo Sonoro de Galicia, do Consello da Cultura Galega (CCG), celebra este venres, día 21, o III Encontro O Son da Memoria baixo o título "De quen é a palabra. Arquivos sonoros e propiedade intelectual". A xornada abordará a polémica en torno á xestión dos dereitos de autor e a propiedade intelectual ante as posibilides de difusión que ofrecen as novas tecnoloxías.

O presidente do Consello da Cultura Galega (CCG), Alfonso Zulueta de Haz, o coodinador da Sección de Comunicación do CCG, Xosé López, e o director da Editorial Galaxia, Víctor Freixanes, presentaron esta mañá en rolda de prensa a reedición da obra de Eduardo Blanco Amor "Chile a la vista". Trátase dunha serie de pezas xornalísticas, reportaxes e crónicas, que o escritor galego fixo durante dúas viaxes a través Chile, en 1949 e 1950, e que publicou no diario chileno "La Hora", xa desaparecido.

O Arquivo Sonoro de Galicia, do Consello da Cultura Galega (CCG) celebra este venres, día 21, o III Encontro O Son da Memoria baixo o título "De quen é a palabra. Arquivos sonoros e propiedade intelectual". O coordinador do Arquivo, Rodrigo Romaní, destacou esta mañá en rolda de prensa a importancia destas xornadas para abordar un tema de polémica actualidade, os dereitos de autor e a propiedade intelectual, debido ás posibilidades de difusión de datos ofrecidas polas novas tecnoloxías.

O Consello da Cultura Galega (CCG) presentará mañá, martes, día 18 de novembro, ás 12´00 horas, en rolda de prensa, a reedición do libro CHILE A LA VISTA, de Eduardo Blanco Amor.O libro, de algo máis de 400 páxinas, recolle unha parte importante da obra xornalística de Blanco Amor. Neste caso, os artigos escritos polo autor de "Xente ao lonxe", entre 1949 e 1950 e publicados no xornal chileno "La Hora". Trátase dun relato lúcido, vivo e apaixonado logo de "andar e ver" o país andino.