Arquivo de noticias do CCG

A reconstrucción desde o exilio dunha literatura nacional, o título do relatorio do profesor González Millán e que foi lido por Dolores Vilavedra, estableceu as características do discurso do exilio: "por unha clara conciencia nacional, a necesidade de volver á terra natal e a difícil experiencia de ter que abandonar á forza un lugar". Segundo González Millán, son estas as claves que os investigadores deben ter en conta á hora de realizar estudios sobre exilio.

No marco da visión globalizada que os organizadores do I Congreso Internacional "O Exilio Galego" quixeron imprimir desde o comezo a este evento, encádrase esta terceira xornada, dedicada ó impacto que a Guerra Civil e o exilio causou noutras manifestacións artísticas como a arquitectura, as artes plásticas, o cine ou o teatro. Aínda que moitos menos coñecidos que escritores, políticos ou intelectuais fuxidos, arquitectos como Caridad Mateo, pintoras como Maruja Mallo ou fotógrafos coma Xosé Suárez tamén terían que marchar de Galicia.

"Hai que superar o debate do bilingüismo no teatro galego", asegurou Lois Pérez Rodríguez, responsable da presentación da sesión que o I Congreso Internacional "O Exilio Galego" dedicou esta tarde ás artes escénicas. Segundo Pérez Rodríguez, "no exilio o teatro facíase en galego e en castelán porque o público ó que ía dirixido tamén era diglósico", incluso, asegurou o relator, "esta producción teatral no exterior fixo posible que moitos emigrantes chegaran a tomar conciencia do feito de seren galegos".

Máis de 130 participantes e 77 relatores participan no I Congreso Internacional do "O exilio galego", que hoxe pola mañá celebrou a súa primeira xornada, baixo a organización do Consello da Cultura Galega. Un congreso que, segundo asegurou o presidente do Consello da Cultura Galega, Carlos Casares, no transcurso do acto de inauguración do congreso, "foi concibido en principio coma unha homenaxe a Castelao, o primeiro gran exiliado" pero que, pouco a pouco foi abríndose "a moitas outras exiliados menos coñecidos". Neste sentido, Casares quixo destacar que este evento, que se desenvolve en Santiago desde hoxe e ata o vindeiro sábado, ten coma obxectivos afondar no fenómeno do exilio pero tamén "facer unha sentida homenaxe a tódolos galegos que tiveron que sufrir esta desgracia histórica".

Co galo do setenta e cinco aniversario do comezo do exilio galego do 36, o Consello da Cultura Galega reúne en Santiago de Compostela a estudiosos e especialistas de dous continentes para lembrar a aqueles que fuxiron tralo comezo da Guerra Civil en 1936. Segundo os organizadores: "ó se cumprir o sesenta e cinco aniversario do comezo do exilio galego de 1936, o Consello da Cultura Galega coida chegada a ocasión de lembrar axeitadamente os que se foron, de estudiar a súa historia e de recuperar a súa memoria". A inauguración realizarase o luns 24 ás 10:00 h. no Salón de Actos do Consello da Cultura Galega. O congreso está coordinado por Pilar Cagiao Vila (Coordinadora Xeral) e Henrique Monteagudo (Secretario) entre outros.

A análise de Curros Enríquez como poeta total, moito máis aló do Curros social e civil do que habitualmente se fala, así como as relacións que o escritor celanovés mantivo cos seus contemporáneos, Emilia Pardo Bazán, Cástor Elices, Murguía ou Lugrís, son os aspectos que centran a xornada de hoxe no I Congreso Internacional "Curros Enríquez e o seu tempo", que se celebra ata o vindeiro sábado en Celanova.

A recuperación da figura de Curros Enríquez, outorgándolle no 150 aniversario do seu nacemento un recoñecemento que ata o de agora se lle negou, centra a xornada inaugural do I Congreso Internacional "Curros Enríquez e o seu tempo", que se celebra na vila natal do escritor, Celanova, baixo a organización do Consello da Cultura Galega. O director do congreso, Xesús Alonso Montero, foi o encargado de ofrece-la primeira das conferencias, centrada nas ausencias que o nome e a figura de Curros sufriu durante a Guerra Civil e a posguerra.

A piques de se cumprir os 101 anos da morte de Frei Rosendo Salvado (1814-1900), o Consello da Cultura Galega organiza unha mostra que recolle aqueles aspectos culturais menos coñecidos da obra que o pai Salvado levou adiante no proceso de construcción de Australia ó longo do século XIX. Durante un mes, entre o 15 de setembro e o 15 de novembro, Tui, cidade natal de Frei Rosendo, acollerá esta exposición, presentada baixo o título de Frei Rosendo Salvado (1814-1900) O bispo dos sen alma e organizada pola sección de Ciencia, Tecnoloxía e Sociedade en colaboración coa de Cultura Galega no Exterior.

O Consello da Cultura Galega inaugurará o xoves, 13 de setembro, no Salón de Actos do mosteiro de Celanova, ás 10:00 h o I Congreso Internacional "Curros Enríquez e o seu tempo". No acto de inauguración estarán presentes Carlos Casares, Presidente do Consello da Cultura Galega, o vicepresidente da Deputación de Ourense, Rogelio Martínez González, Xesús Alonso Montero, catedrático de Literatura Galega, e Antonio Mouriño, alcalde de Celanova, Felipe Ferreiro, delegado provincial da Consellería de Cultura.

O Consello da Cultura Galega foi elixido como gañador dos Premios Ourense de Banda Deseñada no apartado dedicado ás personalidades e institucións que máis destacaron polo seu traballo en beneficio do cómic galego. Estes premios, outorgados pola Concellería de Cultura do Concello de Ourense e a Casa da Xuventude de Ourense, encádranse dentro da celebración da XIII Xornadas de Banda Deseñada que a cidade das Burgas organiza entre o 5 e o 13 de outubro.

Coa pretensión de ofrecer un documento cun indubidable valor estético e filolóxico, o Consello da Cultura Galega acaba de publicar unha edición facsímile do manuscrito orixinal da obra de Alfonso R. Castelao, Os dous de sempre. A presentación da edición, coordinada polo secretario do Consello da Cultura Galega, Henrique Monteagudo, terá lugar mañá, martes 24 de xullo, ás 12h. na sede do Museo de Pontevedra.

Ordenar e racionalizar os procesos de inmigración, integrar a estas poboacións na sociedade española, disuadir a inmigración ilegal, loitando contra o tráfico e a explotación, e loitar contra a xenofobia e a intolerancia, son as metas cara ás que traballa o Goberno español no proceso de regularización da inmigración en España, segundo fixo público esta mañá o Secretario de Estado para a Estranxeiría e a Inmigración, Enrique Fernández-Miranda. Fernández-Miranda fixo estas declaracións durante a súa intervención no marco da xornada “Inmigración: un novo reto”, que o Arquivo da Emigración Galega organizou na sede do Consello da Cultura Galega.

A mesa redonda coa que quedou pechada a xornada "A inmigración: un novo reto", organizada polo Arquivo da Emigración Galega ó longo de toda a xornada de hoxe, estivo centrada nas experiencias persoais dos inmigrantes, que coincidiron en sinalar que o choque cunha nova cultura e unha nova lingua fixera a súa integración difícil. Procedentes de Arxentina, Venezuela, Ghana ou Camerún, os participantes na mesa redonda, que estivo moderada polo historiador e membro do Arquivo da Emigración Galega, Xosé Manuel Núñez Seixas, expuxeron os diferentes motivos que os impulsaron a vir a España e os problemas polos que tiveron que pasar.

O Secretario de Estado para a Estranxeiría e a Inmigración, Enrique Fernández-Miranda exporá a nova Lei de Estranxeiría, abordando os conflictos que ocasiona a súa implantación, nun relatorio que ofrecerá o vindeiro luns, 25 de xuño, no marco da xornada "A inmigración: un novo reto", que organiza o Arquivo da Emigración Galega na sede do Consello da Cultura Galega.

A crise da enfermidade das "vacas tolas" e as súas posibles repercusións na saúde humana será obxecto dunha reunión de máis dunha vintena de expertos no marco da Xornada de Síntese sobre a crise da Encefalopatía Esponxiforme Bovina (EEB) e da Variante da Enfermidade de Creutzfeldt-Jakob (vECJ) organizada pola Sección de Ciencia, Tecnoloxía e Sociedade para o vindeiro luns, 25 de xuño na sede do Consello da Cultura Galega.

Galicia, un país tradicionalmente de emigrantes, é agora o destino de numerosos estranxeiros que veñen buscando un futuro mellor do que lles espera nos seus países de orixe. O fenómeno da inmigración en Galicia, algo totalmente novo na historia do noso país, así como as súas consecuencias na poboación galega e a adaptación dos inmigrantes á súa nova situación serán algúns dos aspectos que se abordarán na xornada que baixo o título A inmigración: un novo reto, será presentada ós medios de comunicación mañá, xoves 21 de xullo, en rolda de prensa, ás 12.00h. na sede do Consello da Cultura Galega.

A presentación do libro Cousas da vida no Faro de Vigo (1926-1933) por Castelao, publicación do Consello da Cultura Galega na que se recollen as colaboracións humorísticas do escritor no Faro de Vigo entre 1926 e 1933, terá lugar na xornada de mañá, mércores 20 de xuño, ás 12.00h. na sede da Fundación Penzol, en Vigo, nun acto ó que asistirán o presidente do Consello da Cultura Galega, Carlos Casares Mouriño, o secretario desta institución, Henrique Monteagudo, o director xeral do Faro de Vigo, Pedro Pablo Alonso, así como Alfonso Zulueta de Haz, en representación da Fundación Penzol e o responsable da edición do libro, Clodio González Pérez.

A Sección de Ciencia, Tecnoloxía e Sociedade organizou para mañá, xoves 14 de xuño, ás 12h. no Paraninfo da Universidade de Vigo, un acto para presentar oficialmente unha nova publicación do Consello da Cultura Galega, Economía Ambiental e Sociedade, producto da publicación das actas que sobre o Seminario Economía Ambiental e Sociedade, acolleu Santiago o pasado mes de maio.

O Consello da Cultura Galega acolleu esta mañá o relatorio do profesor da Universidade de Luján (Arxentina), Alejandro Fernández, que ofreceu as principais conclusións da súa Tese de Doutoramento na Universidade Central de Barcelona, que leu recentemente, nun relatorio baixo o título A inmigración española na Arxentina e o comercio bilateral, 1880-1935. Na súa intervención, abordou as relacións entre a inmigración e o desenvolvemento das relacións comerciais cos países de orixe dos emigrados, un traballo que levou ó profesor Fernández a un "detallado e rico coñecemento do colectivo español no período da inmigración clásica, entre 1880 e 1930", segundo asegurou o historiador, Xosé Manuel Núñez Seixas, quen fixo a presentación de Alejandro Fernández no acto que tivo lugar esta mañá no Consello da Cultura Galega.

O doutor pola Universidade de Barcelona e profesor da Universidade de Luján (Arxentina), Alejandro Fernández, ofrecerá unha conferencia mañá, martes 12 de xullo de 2001, ás 12 h., no Salón de Actos do Consello da Cultura Galega, nun acto organizado polo Arquivo da Emigración Galega.