Arquivo de noticias do CCG

A cultura galega cobra protagonismo en Barcelona no marco do festival internacional de literatura amplificada Kosmópolis 25, organizado polo Centre de Cultura Contemporània de Barcelona (CCCB). A proposta titulada “Galicia no centro” está organizada en colaboración co Consello da Cultura Galega e inclúe conversas, recitais e concertos que poñen en valor a vitalidade e a proxección internacional da creación galega contemporánea. A presidenta do CCG, Rosario Álvarez, xunto coa coordinadora da Sección de Creación de Artes Visuais Contemporáneas, Paula Cabaleiro, asisten a esta cita que se estende ata o domingo.

O Consello da Cultura Galega (CCG) participa na nova edición de Kosmópolis 25, o festival internacional de literatura amplificada organizado polo Centre de Cultura Contemporània de Barcelona (CCCB), cun programa que abre unha xanela á cultura galega contemporánea. Baixo o título Galicia no centro, esta proposta reúne conversas, recitais e concertos que amosan a vitalidade e a proxección internacional da creación galega actual. A programación das actividades, desenvolvidas entre o venres 24 e o domingo 26 de outubro, contou co asesoramento de Paula Cabaleiro.

“As fallas de Valencia son o máis antieconómico que un pode imaxinar. Todo un ano traballando para queimalo nunha noite. Pero é o froito dunha historia, ten un vector identitario e ideosincrásico que poucos poñerían en cuestión” afirmou Luis Cesar Herrero, Universidad de Valladolid, presidente da Association for Cultural Economics International no marco do foro “Modelos para unha economía da cultura”. A cita coordinada por Xosé Carlos Arias puxo sobre a mesa que a cultura é medible e reivindicaron o seu papel máis alá do puramente económico. “O mundo que coñecemos será radicalmente diferente dentro de dez anos e con xornadas como esta axudamos a situar a cultura nese novo escenario” apuntou Arias na inauguración. Canda a el estaba Xosé M. Núñez Seixas, vicepresidente do Consello da Cultura Galega (CCG) e coordinador do foro Pensar o mundo dende Galicia no que se insire esta cita e co que a institución celebra o seu corenta aniversario. Núñez Seixas anunciou que haberá unha última xornada (o 30 de novembro) ”que situará a cultura e a propia institución dentro do contexto autonómico, que está coordinada por Ramón Villares e onde intervirán algúns dos seus protagonistas”.

A última sesión do foro Pensar o mundo dende Galicia, co que o Consello da Cultura Galega (CCG) celebra o seu corenta aniversario, reflexionará sobre a relación entre a economía e a cultura. “Modelos para unha economía da cultura” é o título desta xornada, que está coordinada por Xosé Carlos Arias e na que participan, entre outros, Josep Ramoneda e Luis César Herrero. O coordinador do foro, Xosé Manoel Núñez Seixas, mais o coordinador da xornada inauguran a actividade, que se pode seguir en directo dende o web e as redes sociais do CCG.

“Cómpre abrir o debate da ordenación do territorio, e facelo desde unha perspectiva social, cultural e tamén ambiental” apuntou a arquitecta Teresa Táboas no marco da xornada “Territorio, patrimonio e identidade”, a sétima sesión do foro Pensar o mundo dende Galicia organizado polo Consello da Cultura Galega (CCG). Unha idea na que afondou o arqueólogo Agustín Azkárate, que engadiu que “non se pode recuperar un espazo sen documentalo e comprendelo”. A cita foi gravada e os vídeos pódense consultar no sitio web da institución. Ademais, abriuse a inscrición para a ultima sesión deste foro co que o CCG celebra o seu 40º aniversario. Titúlase “Modelos para unha economía da cultura” está coordinada por Xosé Carlos Arias e terá lugar o vindeiro 9 de novembro.

O valor económico do galego é un documento pioneiro que achega, por primeira vez, o coñecemento da contribución da lingua galega ao conxunto da economía de Galicia. A presidenta do Consello da Cultura Galega (CCG), Rosario Álvarez; o secretario xeral de Política Lingüística, Valentín García; o responsable do Observatorio da Cultura Galega, Håkan Casares; Melchor Fernández e Diana Fernández, profesores da USC e investigadores do Instituto de Estudos e Desenvolvemento de Galicia (IDEGA) presentaron esta mañá os resultados deste informe que cuantifica en 1.440 millóns de euros de valor engadido bruto (VEB) e 27.702 postos de traballo o impacto directo que o galego supón ao conxunto da economía de Galicia. O documento xa está dispoñible para descarga.

O Consello da Cultura Galega (CCG) celebrou este martes en Redondela unha nova cita do seu proxecto “Diálogos interxeracionais en ciencia e tecnoloxía” encamiñado a fomentar vocacións científicas a través de conversas distendidas entre alumnado e profesionais. Nesta ocasión falaron da enxeñaría de camiños e fixérono nun lugar emblemático: o Centro de Interpretación da Batalla e o Patrimonio Cultural de Rande en Meirande, que está ao pé da Ponte de Rande, obra icónica da enxeñaría de camiños en Galicia. A presidenta da institución, Rosario Álvarez, foi a encargada de inaugurar esta cita que contou coa participación do alumnado do IES de Chapela.

O Consello da Cultura Galega (CCG), o Camões, Centro Cultural Português em Vigo e a Escola Superior de Arte Dramática de Galicia presentan unha nova entrega do programa “Dramaturxias itinerantes/Dramaturgias itinerantes” que xunta a escrita teatral máis contemporánea de Galicia e Portugal. Nesta ocasión póñense na rede os vídeos das lecturas dos textos dramáticos de Cláudia Lucas Portugal (1978) e Clara Gayo (Vigo, 1978).

O centro José Ángel Valente (rúa do Paseo, 20. Ourense) acolle mañá a terceira das citas do programa IN SITU, que analiza a situación dos cascos históricos. Nesta ocasión búscase coñecer a evolución dos núcleos de Ourense e Ribadavia que contan con dúas décadas de experiencia na xestión patrimonial. A presidenta do Consello da Cultura Galega (CCG) Rosario Álvarez, será a encargada de inaugurar esta xornada coordinada por Rebeca Blanco e Teresa Nieto.

Esta venres, 16 de novembro, é o Día do Patrimonio. Unha iniciativa que o Consello da Cultura Galega (CCG) conmemora xunto con outros centros da memoria do noso país. A colaboración entre todos eles concrétase nun espazo web que concentra a información sobre os diferentes tipos de actividades que cada institución programou para festexar este día. Visitas guiadas, xornadas de portas abertas, pezas do ano, exposicións, difusión de documentos dixitalizados... son algunhas das propostas que se poden realizar e que forman parte desta páxina web.

A exposición itinerante “Un canto e unha luz na noite. Asociacionismo cultural en Galicia (1961-1975), ideada e organizada polo Consello da Cultura Galega en colaboración coa Fundación “10 de Marzo”, será inaugurada o xoves día 28 de febreiro ás 20 horas na Fundación “Luís Seoane” (rúa San Francisco, s/n, A Coruña). A mostra, comisariada por Ricardo Gurriarán, rescata e destaca en vintedous paneis explicativos e nove vitrinas o papel dinamizador e transformador dos axentes e das asociacións culturais en Galicia nos últimos quince anos da ditadura franquista. Arranca en 1961, ano de creación en Compostela da primeira asociación cultural galega: “O Galo”. No acto inaugural interviron Ramón Villares, presidente do Consello da Cultura Galega, Ricardo Gurriarán e Ana Fernández, concelleira de Cultura do concello de A Coruña. A exposición poderá visitarse ata o próximo 17 de marzo.

A Fundación Luís Seoane acolleu hoxe o acto de presentación das Actas do Congreso Internacional "Luís Seoane. Galicia-Arxentina: unha dobre cidadanía", celebrado en abril de 2010 e coorganizado co Consello da Cultura Galega. O libro agrupa en 500 páxinas as 16 contribucións dos relatores galegos e arxentinos. Na presentaciòn interviron o Alcalde da Coruña, Carlos Negreira, e o Presidente do Consello da Cultura Galega e editor da obra, Ramón Villares.

O COLOQUIO UNIVERSITARIO INTERNACIONAL AS CANTIGAS DE SANTA MARÍA: TEXTOS E CONTEXTOS (Historia, Arte, Música e Literatura), organizado polo Consello da Cultura Galega, chega hoxe ao seu fin despois de dous días de debate e estudo. No balance, o director do evento, Antoni Rosell, destacou que deste Coloquio naceron "novas vías e apostas de futuro para a investigación multidisciplinar do repertorio mariano". Na súa opinión, o relevante é que "aparezan novas perspectivas epistemolóxicas para abordar un repertorio que posúe a virtude de ofrecer múltiples ámbitos de interese: literarios, musicais, artísticos (as miniaturas), pero que tamén permite afondar no estudo da lingua galega, na figura da muller na Idade Media e mesmo na estratexia política no rei Afonso X".