Arquivo de noticias do CCG

O Consello da Cultura Galega estrea un documental sonoro en tres episodios sobre a vida e obra de Castelao na súa nova Plataforma de podcast, Ágora. “Castelao a carón de nós” é o primeiro título dunha serie de producións en formato podcast coas que o CCG quere incrementar a oferta sonora de calidade en lingua galega na rede. Os programas céntranse na figura de Alfonso Daniel Rodríguez Castelao, nunha oportunidade para escoitar as voces expertas sobre a obra literaria e gráfica do autor. O documental está realizado por Arraianos Producións.

Foi o mellor gaiteiro de Galicia, así o acreditaba un concurso que gañou en 1924 e do que Castelao daría conta nun artigo acompañado dun debuxo. Mais Avelino Cachafeiro Bugallo (Soutelo de Montes, Pontevedra, 1899 - 1972) foi tamén un creador versátil e empresario, que chegou a ter unha sala de festas e unha funeraria. A súa biografía xa se pode consultar no Álbum de Galicia, colección de biografías dixitais do Consello da Cultura Galega (CCG), nunha entrada asinada por Rubén Troitiño. Este docente e musicólogo é tamén un dos participantes na xornada “Redescubrindo a figura de Avelino Cachafeiro, o Gaiteiro de Soutelo” que se desenvolve este xoves e na que se aborda a relación da súa figura coa de Castelao.

O Consello da Cultura Galega (CCG) celebrou no serán deste xoves unha sesión plenaria ordinaria na que a súa presidenta, Rosario Álvarez, detallou as liñas de programación para 2025. Destaca a posta en marcha dun gran foro participativo que ofreza propostas perante os recentes datos sobre a situación da lingua, a celebración do Ano Castelao e o Día das Letras Galegas, así como o mantemento das liñas de acción habituais. A institución estatutaria realizou en 2024 un centenar de actividades, 18 publicacións e 55 documentos de asesoría entre estudos e informes de impacto ambiental e Bens de Interese Cultural (BIC). Ademais, aprobouse a incorporación da matemática Elena Vázquez Cendón (Ourense, 1966) á Comisión Executiva como secretaria. Ao plenario asistiu o Presidente de Honra da institución, o presidente da Xunta de Galicia, Alfonso Rueda Valenzuela.

San Domingos de Bonaval acolle o vindeiro 7 de xaneiro un acto cívico que abre a celebración da conmemoración do 75 cabodano de Alfonso Daniel Rodríguez Castelao (Rianxo, 1886- Bos Aires, 1950). Diferentes representantes da comisión constituída o pasado 7 de novembro xuntáronse no Consello da Cultura Galega (CCG) este venres para presentar as primeiras accións de programación encamiñadas a poñer a atención sobre a vixencia e o legado da súa figura. A presidenta do CCG, Rosario Álvarez; o presidente da Fundación Castelao, Miguel Anxo Seixas; o director xeral de Cultura, Anxo Lorenzo; o presidente da Real Academia Galega (RAG), Víctor Freixanes; a presidenta do padroado do Museo do Pobo Galego, Concha Losada; xunto con representantes doutras entidades avanzaron as liñas de programación da celebración. Ademais, fixeron un chamamento á cidadanía da participar na celebración dunha personalidade irrepetible de tan alta transcendencia na historia contemporánea de Galicia.

Borobó, Raimundo Lozano, J. Sierra ou Ánxel Novo. Eran algúns dos seudónimos e heterónimos baixo os que Raimundo García (Pontecesures, 1916- Santiago, 2003) escribiu as súas novas. O escritor e xornalista cumpriría 101 anos esta semana. Unha efeméride que o Consello da Cultura Galega lembrou coa publicación dixital Homenaxe a Raimundo García Domínguez, Borobó na que se recolle as intervencións dun acto organizado pola Asociación de Xornalistas de Santiago en agosto de 2016.

O primeiro día das xornadas Ramón Piñeiro Koldo Mitxelena no seu centenario serviu para construír o relato dunha amizade pero tamén para dar a coñecer a excepcionalidade de dúas figuras fundamentais na cultura e na política galega e vasca. “É a historia de vidas paralelas con camiños diverxentes e un exemplo de posición persoal, política e cultural” afirmou Ramón Villares, presidente do Consello da Cultura Galega (CCG) nunha sesión na que tamén se presentou a primeira fotobiografía como unha mostra da colaboración institucional. As xornadas trasládanse mañá venres ao Centro de Investigación Ramón Piñeiro onde conclúen cunha sesión dedicada a dar a coñecer novos epistolarios.

Ramón Piñeiro e Koldo Mitxelena comparten o feito de ser dúas figuras fundamentais nas súas respectivas culturas, a galega e a vasca, e unha traxectoria vital antifranquista que os levou a encontrarse nunha cadea madrileña nos anos corenta, onde forxaron unha amizade que mantiveron durante décadas. Ambos cumprirían neste 2015 cen anos. Unha efeméride que aproveita o Consello da Cultura Galega (CCG) e o Centro Ramón Piñeiro para lembrar a súa relevancia, a súa relación e a situación das linguas minoritarias no marco da España actual. A cita ten lugar os días 10 e 11 de decembro en Santiago.

“Hoxe recordamos un libro que marcou o pensamento de sucesivas xeracións galegas e un autor que foi un símbolo para os seus coetáneos e para a posteridade”. Deste xeito, Ramón Villares, presidente do Consello da Cultura Galega (CCG), destacou a orixe das diferentes actividades preparadas para conmemorar os setenta anos da publicación de Sempre en Galiza de Alfonso R. Castelao. O Consello da Cultura Galega, en colaboración coa Fundación Castelao, celebrou no Parlamento un acto institucional presidido por Alberto Núñez Feijóo, presidente da Xunta de Galicia, Pilar Rojo, presidenta do Parlamento de Galicia, Ramón Villares, presidente do CCG, e Carlos Mella, presidente da Fundación Castelao. Alén do acto institucional, xa está dispoñible na rede a aplicación para dispositivos móbiles elaborada polo CCG e a Editorial Galaxia que contén o texto completo enriquecido con contidos adicionais.

No mes de xullo cúmprense 70 anos do banquete en que Alfonso R. Castelao presentou en Bos Aires a súa obra cimeira, Sempre en Galiza. Unha efeméride que o Consello da Cultura Galega, en colaboración coa Fundación Castelao, celebrará mañá, 4 de xullo (12:30 horas), cun acto institucional no Parlamento de Galicia e varias accións divulgativas. O acto estará presidido por Alberto Núñez Feijóo, presidente da Xunta de Galicia, Pilar Rojo, presidenta do Parlamento de Galicia, Ramón Villares, presidente do Consello da Cultura Galega, e Carlos Mella, presidente da Fundación Castelao.