Arquivo de noticias do CCG

A exposición itinerante “Un canto e unha luz na noite. Asociacionismo cultural en Galicia (1961-1975), ideada e organizada polo Consello da Cultura Galega en colaboración coa Fundación “10 de Marzo”, foi inaugurada hoxe día 3 ás 20 horas na igrexa da Magdalena en Ribadavia. A mostra, comisariada por Ricardo Gurriarán, rescata e destaca en vintedous paneis explicativos e nove vitrinas o papel dinamizador e transformador dos axentes e das asociacións culturais en Galicia nos últimos quince anos da ditadura franquista. Arranca en 1961, ano de creación en Compostela da primeira asociación cultural galega: “O Galo”. No acto inaugural intervirán Marcos Blanco Jorge, alcalde de Ribadavia; Ramón Villares, presidente do CCG; Ricardo Gurriarán, comisario, e José Carlos Sierra, director do Museo Etnográfico de Ribadavia. A exposición poderá visitarse ata o próximo 7 de xaneiro.

Santiago de Compostela, 26 de novembro de 2012.- O presidente do Consello da Cultura Galega, Ramón Villares, asinou hoxe un convenio de cooperación coa Universidade de Sâo Paulo para a realización de actividades conxuntas e a promoción da cultura galega no Brasil. O convenio foi suscrito por Sergio Adorno, director da facultade de Letras, Filosofìa e Ciencias Sociais.

O presidente do Consello da Cultura Galega, Ramón Villares, inaguurou na Casa Guilherme de Almeida, en Sâo Paulo (Brasil) a exposición “Valentín Paz-Andrade, unha antena galega no Brasil”, en colaboración co Governo do Estado de Sao Paulo e a Secretaría de Cultura paulista. A mostra poderá contemplarse ata o 30 de decembro.

O Consello da Cultura Galega presentou hoxe o congreso internacional que dedicará en 2013 á figura e á obra de Rosalía de Castro (1837-1885) baixo o título “Rosalía no século XXI. Unha nova ollada”. Serán cinco xornadas que se desenvolverán entre os meses de febreiro e xuño coa participación dos máis destacados expertos nacionais e internacionais na obra rosaliana. En 2013 cumpliránse 150 aniversario da publicación en Vigo (1863-2013) de “Cantares Gallegos”, obra auroral e determinante para o Rexurdimento das letras galegas. O congreso, que se celebrará na sede da institución en Santiago de Compostela, terá unha parte presencial, cunha programación pechada de conferencias, mesas redondas e recital poético, e unha parte virtual aberta a comunicacións libres. Os traballos poderán seguirse vía streaming. Ramón Villares lembrou o congreso rosaliano celebrado en 1985, no que tamén tiña participado a institución que preside, e falou dunha liña de continuidade. “Trátase agora de mostrar a vixencia de Rosalía no século XXI”, dixo Rosario Álvarez, vicepresidenta e membro do comité organizador integrado tamén por Anxo Angueira, Dolores Vilavedra e María do Cebreiro.

O Presidente do Consello da Cultura Galega, Ramón Villares, disertará o sabado día 17 en Combarro (Poio) no acto institucional conmemorativo do 40 Aniversario da Declaración de Combarro como Conxunto Histórico (1972-2012). A conferencia abordará o tema “A protección do Patrimonio. Unha reflexión histórica” e celebraráse ás 19 horas no Local da Comunidade de Montes de Combarro.

A “Casa do Saber”, en Lugo acollerá os días 16 e 17 de novembro un debate sobre o tema “A propiedade da terra: desde a historia para o futuro”, organizado polo Grupo de Historia Agraria (Historga) da Universidade de Santiago de Compostela e a Rede de Agroecoloxía “Revolta”. A iniciativa foi ideada asemade como homenaxe ao profesor Ramón Villares Paz, catedrático de Historia Contemporánea da USC, e actual presidente do Consello da Cultura Galega, ao cumprírense trinta anos da publicación do seu libro “La propiedad de la tierra en Galicia. 1500-1936”.

O chamamento a novos consensos en defensa do ecosistema do libro e a lectura foi un dos vectores do IX Simposio convocado pola Asociación de Editores de Galicia (AGE) celebrado hoxe no Consello da Cultura Galega (CCG) baixo o lema “O futuro da librería”. O foro, ao que asistiron setenta representantes do sector, reuniu a expertos e profesionais que reflexionaron sobre a comercialización, as redes sociais, as feiras, os modelos de negocio e as súas expectativas. Na sesión inaugural interviron: Henriqe Monteagudo, do Consello da Cultura Galega; Anxo Lorenzo, Secretario Xeral de Cultura, en funcións; Pilar Rodríguez, Presidenta da Federación Libreiros de Galicia, e Manuel Bragado, presidente de AGE. O simposio está patrocinado por CEDRO e conta coa colaboración do CCG.

O II ciclo de Proxeccións “Creadoras Galegas de Imaxe”, organizado pola Comisón de Igualdade do Consello da Cultura Galega, concluirá esta tarde en Ferrol con tres últimas proxeccións e un debate final. Baixo o lema “A construción do relato ideado” o programa, desenvolvido desde o martes día 6, e con acceso libre no Centro sociocultural Novacaixagalicia de Ferrol (Praza da Constitución, s/n), deu a coñecer once produccións de creadoras galegas que traballan nos xéneros cinematográficos de ficción, documental e animación (curta e longametraxe) baixo olladas feministas.
Hoxe xoves día 8, baixo o lema "A través dos lugares", veranse os documentais "Aadat", de Xisela Franco, e "Apash, os de fóra", de Cora Peña, e a longametraxe "Tralas luces", de Sandra Sánchez.
A sesión e o ciclo rematarán cun debate moderado por Encarna Otero e no que intervirán as realizadoras Xisela Franco e Cora Peña.

O seminario "Novel•la criminal i gènere a Galícia", coordinado por María Xesús Lama (Universitat de Barcelona) e Elena Losada (Centre Dona i Literatura), celebrado na Facultade de Filoloxía da Universitat de Barcelona, foi a primeira iniciativa desenvolvida ó abeiro do convenio de colaboración asinado este ano entre a Comisión de Igualdade do Consello da Cultura Galega (CCG) e o Centre Dona i Literatura. Nas sesións participaron María Xosé Agra, profesora da Universidade de Santiago de Compostela e coordinadora da Comisión de Igualdade do CCG, Shelley Godsland (Universidade de Birmingham), a escritora Laura Caaveiro e María Xesús Lama. A importancia do convenio, e a atención dispensada dende hai anos na Universitat de Barcelona aos estudos galegos foi subliñada por Marta Segarra, Monserrat Gatell, María Xosé Agra e Elena Losada, por esa orde na imaxe.

O “Album da Ciencia”, que o Consello da Cultura Galega iniciou on line (www.culturagalega.org/albumdaciencia/) o pasado 27 de marzo, permite xa consultar cen biografías e máis de trescentas entradas, unha parte substancial do I+D histórico do país. Esta iniciativa e outros proxectos foron presentados o martes día 30 ás 12 horas na sala de prensa da Reitoría da Universidade da Coruña (UDC). Participaron Francisco Díaz-Fierros, vicepresidente do Consello da Cultura Galega e coordinador da Sección de “Ciencia, Natureza e Sociedade”; María José Martínez López, vicerreitora de Estudantes, Deportes e Cultura da UDC, e Xosé A. Fraga, director do “Álbum da Ciencia”.

A Comisión de Igualdade do Consello da Cultura Galega organizou e convocou para o xoves 25 de outubro a xornada “Tereixa Navaza, a voz da liberdade”, unha emotiva homenaxe á contribución da comunicadora e xornalista, nomeadamernte na radio e na televisión. O recoñecemento vai asemade para o labor da primeira xeración de mulleres xornalistas profesionais. Vinte estudosos e xornalistas desenvolverán o programa, coordinado por Ana Romaní Blanco e Carme Vidal Lage, no que participa tamén a Universidade de Santiago de Compostela. O programa abordou a dimensión científico-profesional, (O compromiso da información) e a da memoria (A información con xénero).

O II Seminario Internacional “Emigración e exilio nos Estados Unidos de América: Experiencias de Galicia e Açores” celebrouse na Illa de San Simón os días 18 e 19 de outubro, organizado polo Consello da Cultura Galega e a Fundaçao Luso-Americana para o Desenvolvimento. Tratouse de considerar, de xeito comparado, aspectos como a integración nas sociedades de acollida, as relacións co mundo do exilio, o impulso de novos medios de comunicación na diáspora e o papel das comunidades emigrantes na diplomacia cultural. O seminario continúa os traballos desenvolvidos no congreso GALICIA e AÇORES: A ROTA AMERICANA, celebrado nas Illas Açores a finais de 2009.

O Consello da Cultura Galega acolleu hoxe 18 de outubro a xornada “Zambrano-Dieste: O legado de dúas figuras insubornables”. O obxectivo é analizar as obras, pensamentos e relacións de María Zambrano (1904-1991), figura clave da filosofía do século XX, e Rafael Dieste (1899-1981), escritor da Xeración do 27 e renovador da literatura galega. Dúas persoas comprometidas e enraízadas na cultura popular, significadas activamente coa causa da II República e participantes nas "Misións Pedagóxicas" e noutras iniciativas culturais. " de rescatar e facer xustiza a dúas figuras que tanto aprecio se profesaron e de vinculalas cos proxectos doutras xentes que tamén souberon abrir posibilidades en tempos difíciles", precisa María Xosé Agra, coorganizadora da xornada xunto con Ramón Maiz.

O libro "Poesía completa de Valentín Paz-Andrade", en edición de Gregorio Ferreiro Fente, foi presentado hoxe no salòn de actos do Consello da Cultura Galega. No acto interviron: Rosario Álvarez, vicepresidenta do CCG; Xesús Alonso Montero, catedrático e escritor, Gregorio Ferreiro Fente e o editor Manuel Bragado, director de Edicións Xerais de Galicia. O volume de 750 páxinas ven incorporar ao sistema literario galego "un poeta novo e de entidade", afirmou o profesor Alonso Montero. O acto concluiu coa voz de Valentín Paz-Andrade recitando o poema "¡Boas vindas, mariñeiros!".

A exposición itinerante “Un canto e unha luz na noite. Asociacionismo cultural en Galicia (1961-1975), ideada e organizada polo Consello da Cultura Galega en colaboración coa Fundación “10 de Marzo”, foi inaugurada hoxe na Casa Galega da Cultura (Praza da Princesa, 2) en Vigo. A mostra, comisariada por Ricardo Gurriarán, rescata e destaca en vintedous paneis explicativos e nove vitrinas o papel dinamizador e transformador dos axentes e das asociacións culturais en Galicia nos últimos quince anos da ditadura franquista. Arranca en 1961, ano de creación en Compostela da primeira asociación cultural galega “O Galo”. No acto inaugural interviron Ramón Villares, presidente do CCG, Ricardo Gurriarán, Alfonso Zulueta, presidente da Fundación Penzol, e o Alcalde de Vigo, Abel Caballero. A exposición, que conta coa colaboración do Concello de Vigo e o auspicio da Fundación Penzol, poderá visitarse ata o vindeiro 11 de novembro.

A “Asociación Española de Casas Museo y Fundaciones de Escritores” celebrará, entre o 9 e o 13 de outubro o “I Encuentro Ibérico de Casas Museo y Fundaciones de Escritores” que se desenvolverá durante dous días en Santiago de Compostela e outros dous no marco da Capital Europea da Cultura de Guimarães. O martes día 9 ás 19 horas os congresistas sesionaron no salón de actos do Consello da Cultura Galega. Foron recibidos por Francisco Díaz-Fierros, vicepresidente da institución, que deu paso aos relatorios do Secretario Xeral de Política Lingüística, Valentín García, e do Secretario Xeral de Cultura, Anxo Lorenzo, sobre “A rede de dinasmización lingüística” e “O turismo cultural en Galicia”, respectivamente. O Consello da Cultura, a Casa da Troya e a Cidade da Cultura, son os lugares nos que discurrirá a parte gallega do encontro.

O Consello da Cultura Galega expresou o seu pesar polo falecemento de Blanca Jiménez Alonso, viúva de Fermín Penzol, e que fora integrante do Plenario da institución entre 2001 e 2008. Era presidenta de honra da Fundación Penzol e conselleira da Editorial Galaxia.
O Consello da Cultura Galega salientou “o entusiasta labor de Blanca Jiménez Alonso no desenvolvemento do ricaz patrimonio bibliográfico Fundación Penzol, creada por iniciativa do seu marido e aberta ao servizo de Galicia en Vigo desde 1963”. Lembrou asemade a “continuada colaboración da Fundación Penzol co Consello da Cultura desde a constitución desta institución en 1983”.
O funeral celebrarase mañá sábado día 6 de outubro ás 18´15 horas no tanatorio de Boisaca en Santiago de Compostela.

“Nunca existiu nin como denominación nin como realidade un imperio español e o afán expansionista conduciu á fragmentación e ao colapso final, á guerra civil e á independencia das colonias”. Anthony Pagden, profesor de Ciencias Políticas e Historia na University of California-Los Ángeles (UCLA) defendeu este argumento na conferencia que iniciou un novo ciclo do seminario interdisciplinar "O(s) Sentido(s) da(s) Cultura(s)", que o Consello da Cultura Galega puxo en marcha en 2006 coa coordinación do profesor Ramón Maiz. A sesión desenvolveuse nun salón de actos abarrotado de estudiosos da ciencia política.