Arquivo de noticias do CCG

A Sección de Creación de Artes Visuais Contemporáneas do Consello da Cultura Galega (CCG) comeza un novo ciclo de xornadas encamiñado a coñecer o estado actual da arte no noso país. Chámase Arte en tempo real e comeza este mércores 25 (17:00 horas) cunha revisión á situación dos artistas. Suso Fandiño, Tono Carbajo, Mónica Alonso e Diego Santomé participan nesta cita coordinada por Carmen Díaz Cacheda. A xornada é presencial e pode seguirse en directo a través do web e das redes sociais da institución.

A presidenta do Consello da Cultura Galega (CCG), Rosario Álvarez, recibiu no serán deste martes a visita do ministro de Cultura, Ernest Urtasun. No encontro abordaron a importancia de establecer vías de colaboración para fomentar a promoción e defensa dos valores culturais. Urtasun asinou no libro de honra onde destacou a ”misión do ministerio na protección da diversidade lingüística e cultural”.

O ciclo de cinema Mulleres, Patrimonios, Sociedade promovido pola Sección de Patrimonio e Bens Culturais do Consello da Cultura Galega (CCG), recala en Tui na sexta edición. Desta volta para prestar especial atención á memoria histórica, as revolucións e os procesos de transición conmemorando o 50 aniversario da Revolução dos Cravos en Portugal. O ciclo desenvolverase dos días 26 ao 28 de setembro no teatro municipal da localidade pontevedresa e achegará recoñecidas producións galegas e portuguesas. Ademais, contará coa presenza do Coronel Mário Tomé, un dos capitáns do 25 de abril. A entrada é libre ata completar a capacidade.

A presidenta do Consello da Cultura Galega, Rosario Álvarez, mantivo unha xuntanza co presidente da Fundación Castelao, Miguel Anxo Seixas Seoane, por mor da celebración do 75 aniversario do pasamento de Alfonso Daniel Rodríguez Castelao (Rianxo, 1886- Bos Aires, 1950) que terá lugar en 2025. No marco da reunión acordáronse diferentes vías de colaboración e futuras actividades para conmemorar a efeméride.

A creación de políticas específicas para a menopausa, máis información e o incremento de recursos para a investigación biomédica son algunhas das demandas das profesionais que participaron este xoves na xornada “Feminismos: a menopausa a debate” organizada polo Centro de Documentación en Igualdade e Feminismos (CDIF) do Consello da Cultura Galega (CCG). A presidenta do CCG, Rosario Álvarez, e a directora do CDIF, Carme Adán, destacaron na inauguración que esta actividade se sitúa nunha liña de traballo da institución que presta atención a temas relevantes para a sociedade desde unha óptica feminista. Os relatorios foron gravados e están a disposición da cidadanía desde a canle de Youtube da institución.

O Repertorio da prensa da emigración galega, proxecto que mantén o Arquivo da Emigración Galega (AEG) do Consello da Cultura Galega (CCG), incorpora neste mes de setembro un número especial da cabeceira El Agrario. Era o xornal que editou en Bos Aire o Centro Protección Agrícola del Distrito de Salceda.

Oferta de emprego público de estabilización de emprego temporal

A presidenta do Consello da Cultura Galega, Rosario Álvarez, deu a benvida aos membros da Asociación Galega de Editores que hoxe celebran na nosa sede o XXI Simposio o libro e a lectura: o libro galego nas librarías. O presidente da asociación, Henrique Alvarellos, e Cristina Rubal, subdirectora xeral de Bibliotecas e do Libro da Xunta de Galicia, foron os encargados de inaugurar este encontró que contou con representantes da Federación de Librarías de Galicia e de librarías de Euskadi e de Catalunya.

Fernando Daniel Cortezón (Ribadeo, 1927- Lugo, 2009), foi un prolífico escritor galego que cultivou a narrativa, o ensaio e a literatura dramática e que destacou pola súa recuperación e revisión da historia de Galicia e a identidade galega dende unha abordaxe crítica. Así o define Ana Abad de Larriva, autora da súa entrada no Álbum de Galicia, colección de biografías que mantén o Consello da Cultura Galega.

“Feminismos: a menopausa a debate” é o título da nova xornada organizada polo Centro de Documentación en Igualdade e Feminismos (CDIF) do Consello da Cultura Galega (CCG). A presidenta do CCG, Rosario Álvarez, e a directora do CDIF, Carme Adán, inauguran mañá xoves, 19 de setembro (10:00 horas) esta cita que busca reflexionar sobre esta etapa da vista desde o punto de vista da medicina e da antropoloxía ademais de ver como se aborda desde espazos de creación e difusión cultural. A bioquímica Inés Pineda i Torra, que investiga o risco cardiovascular das mulleres durante a menopausa, ou a antropóloga Guadalupe Jiménez, son algunhas das relatoras que participan neste encontro. A actividade pódese seguir en directo desde o web e as redes sociais da institución.

O Consello da Cultura Galega (CCG) celebra na tarde deste mércores 18 de setembro (18:30 horas) o recital “Entender para vivir”, no que unha ducia de creadores e creadoras ofrecerán un diálogo polifónico que combina xornalismo, narrativa, ensaio, teatro ou poesía para nos achegar á obra Luisa Villalta, homenaxeada este ano co Día das Letras Galegas. A presidenta do CCG, Rosario Álvarez, abrirá este acto que no que participan Chus Pato, Xosé María Álvarez Cáccamo ou Francisco Fernández Naval, entre outros, e que parte dun libro homónonimo coordinado por Dolores Vilavedra. O acto é presencial pero pode seguirse en directo desde o web do CCG.

Procedemento bolsas proxectos de investigación 2024 (PR970B)

A directora do Centro de Documentación en Igualdade e Feminismos (CDIF), Carme Adán, estivo na tarde deste venres na Casa da Calzada de Cambados (19:00 horas) para presentar o Manual básico para afrontar as violencias machistas: recoñecer. Actuar e Restaurar”. Unha guía útil que informa de xeito visual e doado de todos os recursos cos que pode contar unha muller que se atope nunha situación de violencia machista.

O Consello da Cultura Galega (CCG) preestrea este sábado, 14 de setembro, o seu novo proxecto audiovisual Na procura do son perdido. A zanfona, memoria da Transición. O documental achégase ao rexurdir que tivo este instrumento nas décadas dos 70 e 80. Foi realizado pola aCentral Folque e a produtora audiovisual Aqueladas con dirección de Ramon Pinheiro. A presidenta do CCG, Rosario Álvarez, asiste ás 18:30 horas, á presentación que ten lugar en Lugo, no marco do Festival Celme da Zanfona xunto con produtor Mauro Sanín, e os protagonistas Xosé L. Rivas Cruz "Mini" e Luciano Pérez. Un pouco antes, ás 18:00 horas, o documental tamén se preestrea en Tui, no marco do Encontro profesional de música Galiza_Portugal MUMI I Musicas no Minho, coa participación do director, Ramón Pinheiro, o luthier Antón Corral, e a coordinadora da Sección de Artes Escénicas, Audiovisuais e Musicais do CCG, Cristina Domínguez.

Judit Carrera Escudé (Barcelona, 1974) dirixe desde 2018 o Centre de Cultura Contemporània de Barcelona (CCCB). É politóloga de formación e ten unha ampla carreira como xestora e promotora cultural no ámbito da cultura e das relacións internacionais. Estivo na tarde deste mércores no Consello da Cultura Galega (CCG), nun encontro dirixido a profesionais da xestión cultural, do sector audiovisual, das artes escénicas, responsables de museos e de centros de arte, entre outros axentes culturais. A presidenta do CCG, Rosario Álvarez, estivo presente nesta cita coordinada por Paula Cabaleiro, membro do Pleno da institución.

Oferta de emprego público de estabilización de emprego temporal

O Consello da Cultura Galega (CCG) colaborou coa consellería de Sanidade no marco da actividade organzada co gallo do Día Mundial para a prevención do suicidio. No marco desta actividade tivo lugar unha lectura contemorativa a cargo da escritora Rosa Aneiros.

A José Torres Creo (Pontecesures, 1874 – Vigo, 1939) debémoslle a composición de O sol da primaveira (tamén coñecida como Alborada), Mozos e mozas, San Campio e O Neno Xesús, presentes nos repertorios de múltiples orfeóns e corais, ademáis de formar parte do catálogo clásico da música coral galega. A súa entrada no Álbum de Galicia, a colección dixital de biografías que mantén o Consello da Cultura Galega (CCG), é da autoría de Pablo Abreu Fernández.

O vicepresidente, Xosé M. Núñez Seixas recibiu esta mañá a un grupo de alumnos de quinto de secundaria do instituto arxentino galego “Santiago Apóstol”, que realiza anualmente unha viaxe de estudos por Galicia. Acompañados polas docentes Macarena Fuentes e Gabriela Rilla, coñeceron a institución, viron a variedade de recursos que poden atopar nas nosas webs e recibiron un pequeno agasallo (o catálogo da exposición “Materiais Seoane” , o volume “Fardel de Eisilado” da Colección Clásicos da Emigarción que contén a reprodución facsimilar do texto e un estudo introdutorio de Gregorio Ferreiro Fente, entre outros materiais). Nese intercambio cultural, o alumnado deixou para o CCG un gravado da artista arxentina Mariana Hoffman (Tandil, 1965).

A Casa Habaneira acolleu esta mañá a inauguración da mostra O soño cubano da emigración galega, unha proposta do Consello da Cultura Galega (CCG), coa colaboración da Secretaría Xeral da Emigración, que ilustra a fortaleza, a continuidade e a visibilidade da presenza galega na Habana. A presidenta do CCG, Rosario Álvarez, e a alcaldesa de Guitiriz, Marisol Morandeira, destacaron na inauguración a pegada da emigración nesta localidade lucense que se plasma no espazo no que pode ver a exposición ata o vindeiro 30 de setembro.