O Consello da Cultura Galega (CCG) acolleu esta mañá a constitución da comisión para a conmemoración do 75 aniversario da morte de Alfonso Daniel Rodríguez Castelao, finado en Bos Aires o 7 de xaneiro de 1950. “É unha ocasión propicia para celebrar a vida e a obra dunha personalidade irrepetible e de tan alta transcendencia na historia contemporánea de Galicia”, apuntou a presidenta do CCG, Rosario Álvarez, no inicio deste primeiro encontro que busca unha celebración plural e diversa, aberta a toda a cidadanía. Na xuntanza participaron representantes do Parlamento de Galicia, da Consellería de Cultura, Lingua e Xuventude, das catro deputacións, das tres universidades, da Real Academia Galega, da Real Academia Galega de Belas Artes, do Museo do Pobo Galego, do Museo de Pontevedra, da Fundación Castelao e dos Concellos de Pontevedra, Rianxo e Santiago de Compostela.
07/11/2024
06/11/2024
A nova entrada do Álbum de Galicia recolle a vida do artista Suso Díaz (Uznach, Sankt Gallen, Suíza, 1971 - Ourense, 2010). Integrante do grupo Sarabela Teatro e fundador da compañía, La Imagina Machina, exerceu como intérprete, director teatral e escultor, ademais de escenógrafo de varias producións e deseñador gráfico. Foi “un home de teatro total, e como poeta do espazo, alquimista da luz e construtor de soños”, así aparece na súa biografía, elaborada pola docente e tamén actriz Ana Abad de Larriva. Este texto, xunto con máis material complementario, pódese consultar dende hoxe no Álbum de Galicia, colección de biografías que mantén o Consello da Cultura Galega (CCG).
05/11/2024
A nova entrega de Proxector, iniciativa de divulgación en lingua galega, promovida polo Centro de Documentación Sociolingüística de Galicia (CDSG) do Consello da Cultura Galega (CCG) co apoio da Universidade de Santiago (USC), pon o foco este mes na astronomía. Baixo o título “Unha ollada ao Universo no Día da Ciencia en Galego”, xunta unha ducia de vídeos que seguen o ronsel da celebración do XV Día da Ciencia en Galego, impulsado pola Institución Galega da Ciencia (Igaciencia).
04/11/2024
O Consello da Cultura Galega (CCG) acolle esta semana dúas xornadas (martes 5 e xoves 7), organizadas xunto coa Asociación Ponte nas Ondas...! e co concello de Santiago, no marco do Mes do Patrimonio Inmaterial. Dúas sesións que abordan o patrimonio inmaterial desde dous puntos de vista difernetes. A do martes a chégase ao oficio dos afiadores, mentres a dos xoves abordará a proxección global do Patrimonio Cultural Inmaterial. Ambas as dúas citas serán ás 17:00 horas e forman parte do Mes do Patrimonio que as tres entidades organizan entre o 17 de outubro, Día do Patrimonio Inmateiral e o Día do Patrimonio, o 16 de novembro.
30/10/2024
A presidenta do Consello da Cultura Galega (CCG), Rosario Álvarez, compareceu na tarde deste mércores, 30 de outubro, na Comisión Terceira de Economía, Facenda e Orzamentos, do Parlamento de Galicia, no marco das sesións informativas en relación co Proxecto de lei de orzamentos. O orzamento da institución para o próximo ano é de 3.333.267 euros, 126.711 euros máis que en 2023. Álvarez detallou que neste ano en curso, o CCG realizou 97 actividades, 18 publicacións, 44 informes (entre Informes de impacto ambiental, informes para a declaración de Ben de Interese Cultural e Documentos de traballo) e puxo en rede máis de 200 fondos documentais relativos ás súas áreas de traballo. Ao tempo, avanzou que para 2025 a institución estatutaria afondará na relación entre turismo e cultura; continuará afondando no impacto da intelixencia artificial na creación cultural e realizará unha exposición sobre o papel das mulleres na emigración. Os representantes dos tres grupos parlamentarios expresaron o seu recoñecemento ao labor da institución.
30/10/2024
O Consello da Cultura Galega (CCG) felicita a Manuel Rivas que vén de acadar o Premio Nacional das Letras Españolas. O xurado destaca que é autor dunha obra de “extraordinaria calidade narrativa que xunta forza emocional e beleza formal”. Na súa resolución pon tamén o acento na “solidez dunha traxectoria versátil e coherente construída coa sensibilidade e a defensa da memoria histórica, a responsabilidade social e a lingua galega”
30/10/2024
A carreira investigadora de María Teresa Fernández Rodríguez (Chantada, 1913-1973) viuse truncada pola Guerra Civil. Sen rematar o doutoramento, regresa á súa vila natal onde tivo unha Oficina de Farmacia e desenvolveu a súa vida profesional. Foi a primeira profesora na facultade de Farmacia, xunto con Celsa Pérez Moreiras, nunha praza na que non percibían remuneración económica pola docencia. A súa biografía entra hoxe no Álbum de Galicia, colección de biografías do Consello da Cultura Galega (CCG), asinada por María Isabel Fernández García.
29/10/2024
A Sección de Creación e Artes Visuais Contemporáneas do Consello da Cultura Galega (CCG) organiza este mércores 30 de outubro (17:00) unha nova xornada do ciclo A arte en tempo real centrada, desta vez, no traballo do comisariado de arte, as súas funcións, relación co resto de actores do proceso artístico e perspectivas de futuro. Esta sesión, que se pode seguir en directo desde o web e as redes do CCG, estará coordinada polo crítico e xornalista Ramón Rozas xunto coa xestora cultural Paula Cabaleiro e contará con voces expertas do oficio, entre as cales estará Santiago Olmo, director do CGAC.
25/10/2024
Entre o 17 de outubro, primeiro Día internacional do Patrimonio inmaterial e o 16 de novembro, Día do Patrimonio desenvolvéranse en diferentes espazos de Compostela conferencias e proxeccións que conforman o Mes do Patrimonio. A presidenta do Consello da Cultura Galega (CCG), Rosario Álvarez, o presidente da asociación Ponte....nas ondas! (PNO!), Santiago Veloso; e o concelleiro de centros socioculturais, Xan Duro, presentaron esta mañá na sede do CCG o programa que remarca a importancia de conservar e compartir as prácticas culturais que forman parte da nosa identidade.
24/10/2024
O Plenario aprobou no serán deste mércores a programación para 2025. O vindeiro ano, a institución estatutaria atenderá ao impacto da intelixencia artificial na creación cultural. Ademais, analizarase a relación entre turismo e cultura desde diferentes perspectivas a través de informes, xornadas e outras actividades. A celebración do 75 cabodano de Castelao, a análise da situación da lingua, o patrimonio inmaterial e acción exterior destacan entre a programación da institución que preside Rosario Álvarez.
24/10/2024
O Arquivo da Emigración Gallega do Consello da Cultura Galega (CCG) vén de incorporar ao proxecto Memoria documental das sociedades da emigración galega os fondos dispoñibles desta asociación da diáspora creada no ano 1945 e que perdurou ata 1960. O Lar Gallego foi unha institución pioneira dentro da colectividade galega no país, con eventos políticos e culturais. O CCG pon a disposición do público os libros de actas dende a súa fundación ata 1959, así como as actas das xuntas xerais de socias e un informe da Xunta Directiva. Toda a información está accesible no web corporativo da institución.
23/10/2024
O Centro de Documentación en Igualdade e Feminismos (CDIF) do Consello da Cultura Galega (CCG) porá o foco na zoqueira Elena Ferro (Merza, Vila de Cruces, 1975) coa xornada “Elena Ferro: creatividade e arte na pel”, dentro do ciclo “De pioneiras e andainas”. Será este xoves 24 de outubro (a partir das 09:45 horas) e nela revisarase a importancia dos oficios galegos desde a óptica feminista. A presidenta do CCG, Rosario Álvarez, e a coordinadora da xornada e do CDIF, Carme Adán, inauguran esta cita na que participa a propia Elena Ferro, a xornalista Marga Pazos, a escritora Brigitte Vasallo e tres das novas artesás galegas. A sesión rematará cunha interpretación musical de Guadi Galego. A xornada é presencial pero pode seguirse en directo a través do sitio web e as redes da institución.
21/10/2024
“Xohán Vicente Viqueira (1886-1924) No centenario do seu pasamento” é o título da xornada que terá lugar o martes 22 de outubro (19:00 horas) no salón de actos da Casa Galega da Cultura, en Vigo. O evento, organizado polo Consello da Cultura Galega (CCG), a Fundación Penzol e o Concello da cidade, afondará na produción e a vida deste intelectual galego. A presidenta do CCG, Rosario Álvarez e o presidente da Fundación Penzol, Manuel Puga, inauguran esta cita coordinada por Malós Cabrera, vicepresidenta da fundación. A asistencia será libre e gratuíta ata completar a capacidade.
17/10/2024
Este 17 de outubro celébrase por primeira vez o Día Internacional do Patrimonio Cultural Inmaterial, unha efeméride que a Conferencia xeral da UNESCO proclamou en novembro de 2023. Esta conmemoración pretende poñer en valor a diversidade e a riqueza do patrimonio vivo. O Consello da Cultura Galega (CCG) celebra esta efeméride con diversas accións. Dunha banda, acaba de presentar na rede un espazo web específico que reúne materiais da institución arredor desta materia. Da outra, organiza xunto coa asociación Ponte...nas ondas varias actividades que se desenvolverán no vindeiro mes. Entre estas, destaca a exposición que se pode ver no claustro de Fonseca da Universidade de Santiago. A presidenta do CCG, Rosario Álvarez; o impulsor da asociación Ponte... nas ondas, Santiago Veloso; o concelleiro santiagues, Xan Duro, xunto co vicerreitor de Transformación Dixital e Innovación, Gumersindo Feijoo, inauguraron esta mostra que amosa os diferentes bens de patrimonio cultural inmaterial que hai en España.
17/10/2024
O xornal El emigrado, editado pola Sociedad Hijos del Ayuntamiento de la Estrada en Cuba, xa forma parte do Repertorio da prensa da emigración galega, unha iniciativa do Arquivo da Emigración Galega (AEG) dependente do Consello da Cultura Galega (CCG). Nesta ocasión súbense 57 exemplares editados entre 1923 e 1924. Nas súas páxinas colaboraron persoeiros como Wenceslao Fernández Flórez, Vicente Risco, Ramón Otero Pedrayo, Antón Villar Ponte, Antón Losada Diéguez, Basilio Álvarez ou Enrique Labarta Pose.
16/10/2024
A mostra do Consello da Cultura Galega (CCG), Afonso X e Galicia, ábrese ao público no Prédio Histórico da Universidade Federal do Paraná, en Curitiba, este mércores 16 de outubro (GMT-3, hora de Curitiba). Valéria Gil Condé, en representación do CCG; xunto co reitor da Universidade Federal, Ricardo Marcelo Fonseca; e o director do Instituto Cervantes de Brasil, Juan Manuel Casado Ramos, son os encargados de inaugurar este proxecto expositivo que explora a conexión do Rei Sabio con Galicia. A exposición está comisariada por Antoni Rossell, da Universitat Autònoma de Barcelona (UAB) e está producida CCG en colaboración coa Consellería de Cultura, Lingua e Xuventude da Xunta de Galicia e a Deputación de Ourense.
15/10/2024
Un exemplar do Cancionerio de Ajuda, o máis antigo e verificado dos cancioneiros da lírica galego portuguesa, presidiu a mesa dos XXVI Encontros para a Normalización lingüística, cita organizada polo Centro de Documentación Sociolingüística de Galicia (CDSG) do Consello da Cultura Galega (CCG) co apoio da Secretaría Xeral da Lingua. Este libro, símbolo do período de esplendor da cultura galega, presentouse como fío de unión das diferentes confesións relixiosas que participaron nesta cita que puxo en evidencia o uso minoritario do galego nos ritos funerarios. Representantes das confesións relixiosas maioritarias que existen en Galicia (católica, evanxélica e islámica), xunto cos empresarios implicados en diferentes partes dun acto funerario...) destacaron que o galego esmorece nas exequias, aínda que vén na lingua un fío de unión e de concordia. A presidenta do CCG, Rosario Álvarez destacou na inauguración o carácter de nexo desta cita e avanzou que nos vindeiros días se presentará un documento coas conclusións. Pola súa parte, Valentín García, secretario xeral da Lingua, destacou a importancia do uso do galego nun momento tan familiar e íntimo como é un pasamento. Os relatorios foron gravados e as intervencións pódense consultar no sitio web e as redes sociais.
15/10/2024
A Sección de Ciencia, Tecnoloxía, Natureza e Sociedade do Consello da Cultura Galega (CCG), co apoio da Real Academia Galega de Ciencias (RAGC) e a Universidade de Santiago de Compostela (USC) organizan este mércores na Igrexa da USC a xornada “José Rodríguez, o inicio da liña do tempo en Galicia”. Nela abordará o contexto histórico, científico e político deste persoeiro, nomeado Científico Galego do Ano pola Real Academia Galega de Ciencias (RAGC) e pioneiro da ciencia en Galicia. No evento intervirán, entre outras persoas, Francisco Díaz-Fierros Viqueira, catedrático emérito da USC e Elena Vázquez Cendón, membro do Pleno do CCG e coordinadora da Sección. Despois haberá unha visita guiada á exposición sobre o matemático dentro do mesmo espazo.
13/10/2024
Compañías afeccionadas, festivais ou xornadas de teatro... entre as décadas dos setenta e oitenta xurdiron diferentes iniciativas ao redor das artes escénicas que acabaron cristalizando no nacemento do teatro galego profesional. Para preservar a memoria dese período, o Consello da Cultura Galega (CCG) elaborou a serie documental Memoria do teatro galego na Transición. O proxecto complétase agora con dous novos episodios que se presentan este luns (16:30 horas) no marco dunha xornada encamiñada a reflexionar sobre este período crucial na historia cultural de Galicia e para afondar no proceso de recuperación e preservación da memoria escénica galega. Rosario Álvarez, presidenta do CCG, acompañada por Cristina Domínguez Dapena, coordinadora da Sección de Artes Escénicas, Musicais e Audiovisuais do CCG, e Inma António, presidenta da Academia Galega de Teatro, inauguran esta cita presencial que se pode seguir en directo polo sitio web e as redes da institución.
12/10/2024
A importancia da lingua escollida para os ritos funerarios de distintas confesións relixiosas, a súa pegada cultural e antropolóxica e a nosa relación con ese momento a través da nosa lingua será o eixo central dos XXVI Encontros para a Normalización Lingüística organizados polo Centro de Documentación Sociolingüística de Galicia (CDSG) do Consello da Cultura Galega (CCG) co apoio da Secretaría Xeral da Lingua. A cita, titulada Vivir e perdurar na nosa lingua, terá lugar o vindeiro martes 15 de outubro (9:45). A xornada é presencial pero pode seguirse en directo no sitio web do CCG e as súas redes.
10/10/2024
"Os números de migrantes non palían o envellecemento da poboación nin tampouco axudan a reverter o despoboamento do rural", afirmou Antía Pérez Caramés, unha das tres coordinadoras do seminario celebrado hoxe, baixo o título Os retornos da emigración galega: unha ollada multidisciplinar. Organizado polo Arquivo da Emigración Galega (AEG) do Consello da Cultura Galega (CCG), profesionais da historia, demografía e socioloxía analizaron as características, perfís e o impacto social e económico das persoas emigrantes que regresan a Galicia. Na inauguración, o historiador e vicepresidente do CCG, Xosé M. Núñez Seixas, destacou o traballo que a institución leva realizando na análise deste fenómeno desde hai un cuarto de século. Xunto con el, Begoña Solís Domínguez, subdirectora xeral de Retorno da Xunta de Galicia, salientou que "o retorno é unha oportunidade para Galicia, porque incorpora redes de contactos que poden xogar un papel clave". Os relatorios foron gravados e pódense consultar no web corporativo e na canle de YouTube.
09/10/2024
O Arquivo da Emigración Galega (AEG), centro documental do Consello da Cultura Galega (CCG), organiza este xoves 10 de outubro (9:30 horas) o seminario “Os retornos da emigración galega: unha ollada multidisciplinaria”, no que se abordan as características, perfís e impacto social e económico das persoas emigrantes que regresan a Galicia. A xornada, que conta coa colaboración da Secretaría Xeral da Emigración, pretende poñer o foco nas condicións de retorno dos emigrantes á luz dos resultados de investigacións recentes cun panel de expertos que abordará as diferentes caras do fenómeno. O vicepresidente do CCG, Xosé M. Núñez Seixas, e a subdirectora xeral do Retorno, María Begoña Solís Domínguez, inauguran esta actividade coordinada por Belén Fernández Suárez, Antía Pérez Caramés e Raúl Soutelo. O seminario pódese seguir en directo dende o web corporativo e as redes sociais do CCG
09/10/2024
Antonio Paz Valverde (O Porriño, 1937-2022) foi un destacado compositor e director de coros. É autor de máis de 158 pezas, entre música relixiosa e cancións que partían de poemas de autores como Manuel María, X. M.ª Álvarez Blázquez, Cunqueiro ou Pimentel. As súas composicións asentábanse na idea de crear unha música contemporánea cunha identidade galega manifestada basicamente na lingua. Fundou a Coral Polifónica do C.R.C. do Porriño e o Orfeón Porriñés, cuxas gravacións tiveron gran repercusión internacional. A biografía, elaborada polo músico Xosé Ramón Paz Antón, súmase ao Álbum de Galicia, colección de biobibliografías que mantén o Consello da Cultura Galega (CCG).
04/10/2024
O psicólogo clínico Xosé Ramón García Soto foi o encargado de abrir as “Xornadas Eloy Luis André” coas que o Consello da Cultura Galega (CCG) e o concello de Verín, se achegan á figura deste pioneiro da psicoloxía en España. A coordinadora da Sección de Pensamento do CCG, Celia Pereira, e a concelleira de cultura de Verín, Samanta Barreira, inauguraron este ciclo que programa todos os xoves de outubro unha sesión para profundar na vixencia do legado deste pensador.
03/10/2024
O Consello da Cultura Galega (CCG) e a Real Academia Galega de Ciencias (RAGC) acaban de sacar do prelo José Rodríguez González (1770-1824). Un matemático sublime, persoeiro nomeado Científico Galego do Ano en 2024. O volume foi presentado esta mañá na Aula Magna da Facultade de Matemáticas da Universidade de Santiago de Compostela pola presidenta do CCG, Rosario Álvarez; o reitor da USC, Antonio López; o conselleiro de Educación, Ciencia, Universidades e Formación Profesional, Román Rodríguez; o alcalde de Lalín, Xosé Crespo; a decana da Facultade de Matemáticas, Elena Vázquez Cendón; o editor, Juan José Nieto Roig; e varios dos autores da publicación. Xa está dispoñible para descarga no web do CCG.
03/10/2024
A zanfona é un dos instrumentos icónicos da recuperación da música tradicional, un símbolo identitario que nos conecta co período medieval. A súa historia está chea de conexións e confluencias que agromaron nos anos setenta e que permitiron a época dourada vive hoxe. Este camiño recente é o que conta Na procura do son perdido. A zanfona, memoria da Transición, o novo proxecto audiovisual promovido polo Consello da Cultura Galega (CCG) que se presentou no serán deste xoves no Museo de Belas Artes da Coruña. A presidenta do CCG, Rosario Álvarez, e a directora do museo, Ángeles Pena Truque, presentaron este traballo xunto co seu director, Ramón Pinheiro e dous dos protagonistas, Miro Casabella e Pablo Quintana. O documental realizado pola aCentral Folque e a produtora audiovisual Aqueladas xa se pode ver no web do CCG.
03/10/2024
Que facer cos espazos da represión franquista no día a día? Esta é a pregunta que profesionais de diferentes lugares da península tratarán de responder na xornada A xestión dos lugares de memoria da represión franquista. A cita ten lugar este venres 4 de outubro (a partir das 10:30 horas) na Illa de San Simón e está organizada polo Consello da Cultura Galega (CCG) e o concello de Redondela. A xornada ten cuberta as prazas e non se retransmite en directo, pero os relatorios serán gravados para subirse posteriormente ao sitio web da institución.
01/10/2024
“Trigonometría: medindo o mundo con ángulos” é o título da nova entrega de Proxector, especial do Centro de Documentación Sociolingüística de Galicia (CDSG) do Consello da Cultura Galega (CCG) en colaboración coa Universidade de Santiago de Compostela (USC) que recompila material audiovisual para a docencia. O protagonista desta edición é o matemático José Rodríguez González (Lalín, 1770 – Santiago de Compostela, 1824) ao ser a figura homenaxeada do Día da Ciencia en Galicia deste 2024. Ao fío desta celebración, o CCG, a USC e a Real Academia Galega de Ciencias presentarán este xoves 3 de outubro (12:00 horas) en Santiago o libro José Rodríguez González (1770-1824). Un matemático sublime.
27/09/2024
Literatura, historia e música terán lugar mañá en Allariz, sábado 28 (10:00 horas) na xornada “A música ten ondas coma o mar”, organizada polo Consello da Cultura Galega (CCG) e a Fundación Vicente Risco Vicente Risco. Unha cita que versará sobre o legado musical do autor e a da súa dona, María del Carmen Fernández Gómez. A xornada non se emite en directo, pero será gravada para logo subirse a hemeroteca web do CCG. Samuel Diz e Xosé Rodríguez son coordinadores desta xornada que inaugura a presidenta do CCG, Rosario Álvarez; a presidenta da Fundación Risco, Celia Pereira; a alcaldesa do Concello de Allariz, Cristina Cid Fernández, e a directora do Teatro Principal de Ourense, Olga Mojón Costela.
26/09/2024
A Agrupación Artística Gallega da Habana, creada no ano 1919 e hoxe en activo, é esencial para entender a difusión da música e do teatro galegos en Cuba. Algúns dos fondos desta entidade conforman a nova entrega do especial web Memoria documental das sociedades da emigración galega que mantén o Arquivo da Emigración Galega (AEG) do Consello da Cultura Galega (CCG) e xa dispoñible no web da institución.