Arquivo de noticias do CCG

O salón de actos da Casa Galega da Cultura de Vigo, sede da Fundación Penzol, acolle este mércores (19:00 horas) a presentación da publicación de homenaxe a Alfonso Zulueta de Haz (Vigo 1924-2017) con motivo do centenario do seu nacemento. Na homenaxe intervirán a presidenta do Consello da Cultura Galega (CCG), Rosario Álvarez; o presidente do Padroado da Fundación Penzol, Manuel Puga; o presidente da Sociedade de Estudos Publicacións e Traballos (SEPT), Silvestre Gómez Xurxo; e o presidente do Consello de Administración de Editorial Galaxia, Antón Vidal Andión.

A presidenta do Consello da Cultura Galega (CCG), Rosario Álvarez, recibiu esta mañá a visita institucional de monseñor Francisco José Prieto Fernández, arcebispo da diocese de Santiago de Compostela. É a primeira visita do arcebispo á institución desde o seu nomeamento e asinou no libro de honra da institución.

A tradución da Biblia dos idiomas orixinais ao galego, galardoada no seu momento co Premio Nacional de Tradución, foi un acontecemento destacado no que tivo moito que ver o empeño de Alfonso Zulueta de Haz, expresidente do Consello da Cultura Galega (CCG) e naquel momento presidente da Sociedade de Estudos, Publicacións e Traballos (SEPT). No ano en que se cumpre o centenario do nacemento de Zulueta, diferentes especialistas e teólogos lembraron a historia dos movementos sociais que impulsaron a galeguización da Igrexa e a figura de Zulueta. A presidenta do CCG, Rosario Álvarez, destacou na inauguración da xornada Igrexa e lingua na Transición “aqueles movementos illados e esperanzadores por unha liturxia en galego que foron paralelos á esperanza da recuperación dos dereitos lingüísticos tralo franquismo” ao tempo de lembrar a importancia que desenvolveu Zulueta neste contexto. Pola súa parte, Silvestre Gómez Xurxo, coordinador da cita, destacou que se quixo poñer o foco “en movementos destacados que van desde a tradución da Biblia ata as romaxes pasando pola revista Encrucillada”.

Igrexa e lingua na Transición é o título da xornada coa que o Consello da Cultura Galega (CCG) analizará, o vindeiro 23 de abril, os movementos e iniciativas a prol da galeguización da Igrexa neste período. A xornada é tamén unha homenaxe a figuras como Alfonso Zulueta de Haz, cando se fan cen anos do seu nacemento, quen tivo un papel destacado na tradución da Biblia ao galego. A cita, coordinada por Silvestre Gómez Xurxo, ten aberta a súa inscrición.

O Consello da Cultura Galega (CCG) acolleu na mañá deste venres, 7 de xullo, o acto institucional co que celebrou o 40º aniversario da súa creación. “Renovamos o compromiso do CCG coa defensa e promoción dos valores culturais do pobo galego, dos seus dereitos á cultura, do seu dereito e obriga de arrequentar e transmitir a herdanza cultural”, expresou a presidenta, Rosario Álvarez, nun discurso en que fixo partícipes a todos os presentes. “Velaí un camiño que, por forza, temos que percorrer xuntos”, afirmou nun acto que tamén contou coa presenza de Alfonso Rueda, presidente da Xunta de Galicia e presidente de honra da institución. Rueda puxo en valor o traballo desenvolvido polo CCG durante todos estes anos e comprometeu "o apoio do Executivo autonómico a seguir impulsando a creación e o talento galegos". Pola súa parte, o presidente do Parlamento de Galicia, Miguel Ángel Santalices, apuntou que o CCG é unha “institución indispensable para o presente e para o futuro de Galicia”. Autoridades e representantes da cultura galega e da sociedade civil ateigaron a sede da institución nesta celebración.

Xesús “Chichi” Campos (La Laguna, Santa Cruz de Tenerife, 1952 - Santiago de Compostela, 1991) proporcionou, por medio dos seus debuxos e escritos, unha visión aguda e vertixinosa do noso país. “A súa foi unha vida que resume o espírito dos anos oitenta en Galicia, unha época que retratou como ninguén”, afirma o seu fillo, Nico Campos. El é o autor da súa biografía no Álbum de Galicia.

O Álbum de Galicia publica no día de hoxe a entrada de Luís Rei (O Grove, 1960 - Pontevedra, 2015), biógrafo do poeta Ramón Cabanillas e do líder agrarista e republicano Basilio Álvarez. Na súa traxectoria sobresae tamén o seu labor no estudo da cultura, da literatura e da historia, especialmente das vinculadas á ría de Arousa, así como o papel que desempeñou na recuperación e divulgación da cultura marítima e fluvial de Galicia e do norte de Portugal. A súa entrada é autoría de Emilio Xosé Insua López.

Agustín Acevedo (Ribadeo, Lugo, 1806 - Las Caldas del Besaya, Cantabria, 1874) destacou polo seu labor de médico na loita contra as epidemias de tifo e cólera, así como por ser o escritor de Una temporada en el más bello de los planetas, considerada a primeira novela galega de ficción científica. A súa entrada no Álbum de Galicia é autoría de Francisco Díaz-Fierros Viqueira.

A colección biográfica do Consello da Cultura Galega (CCG) incorpora hoxe a entrada de Marcos Valcárcel (Ourense, 1958 – 2010), quen contribuíu de xeito activo á posta en valor da cidade de Ourense como universo literario. “O seu compromiso social e cultural, a súa firmeza elegante, a súa bonhomía e o seu esforzo na concordia fan del un referente exemplar para as xeracións presentes e futuras”, subliña Afonso Vázquez-Monxardín na biografía que asina no Álbum de Galicia.

O Álbum de Galicia incorpora este venres a entrada de Alfonso Zulueta de Haz (Vigo, 1924-2017) figura destacada para a cultura galega e presidente do Consello da Cultura Galega (CCG) entre 2002 e 2006. “Un home con fondas conviccións cristiás, de trato amable e acolledor, que puxo a súa vida ao servizo dos demais, especialmente dos discapacitados intelectuais, e tamén de Galicia, comprometéndose con ela na política, na cultura e na súa profesión” asegura Francisco Domínguez, na coda que acompaña a súa biografía.

Xaime Isla Couto é o ímpeto imprescindible para algunhas das iniciativas culturais, políticas e sociais que se desenvolven na Galicia interior da segunda metade do século XX. A nova entrega de Voces Centenarias, proxecto do Arquivo Sonoro de Galicia (ASG), entidade do Consello da Cultura Galega (CCG) permite difundir tres audios preservados no ASG que nos axudan a debullar o labor deste traballador incansable .

O Consello da Cultura Galega (CCG) lamenta a perda do notario e intelectual galego Alfonzo Zulueta de Haz, que finou onte en Vigo aos 93 anos. Zulueta asumiu a presidencia do CCG tras a morte de Carlos Casares, en 2002, e desempeñou o cargo ata o ano 2006, en que foi elixido Ramón Villares. A institución destaca a súa entrega en prol da cultura galega, así como a súa sensibilidade no ámbito social. O enterro será mañá despois da misa que terá lugar ás 12:00 horas no tanatorio de Emorvisa mentres que o funeral será pola tarde (20:00 horas) na igrexa dos Apóstolos.

A exposición itinerante “Un canto e unha luz na noite. Asociacionismo cultural en Galicia (1961-1975), ideada e organizada polo Consello da Cultura Galega en colaboración coa Fundación “10 de Marzo”, foi inaugurada hoxe na Casa Galega da Cultura (Praza da Princesa, 2) en Vigo. A mostra, comisariada por Ricardo Gurriarán, rescata e destaca en vintedous paneis explicativos e nove vitrinas o papel dinamizador e transformador dos axentes e das asociacións culturais en Galicia nos últimos quince anos da ditadura franquista. Arranca en 1961, ano de creación en Compostela da primeira asociación cultural galega “O Galo”. No acto inaugural interviron Ramón Villares, presidente do CCG, Ricardo Gurriarán, Alfonso Zulueta, presidente da Fundación Penzol, e o Alcalde de Vigo, Abel Caballero. A exposición, que conta coa colaboración do Concello de Vigo e o auspicio da Fundación Penzol, poderá visitarse ata o vindeiro 11 de novembro.

O Consello da Cultura Galega lamenta a morte de Manuel Fraga Iribarne, ex Presidente da Xunta de Galicia. De acordo coa Lei do Consello da Cultura Galega, Manuel Fraga foi tamén Presidente de Honra desta institución durante todos os anos que exerceu o seu cargo como xefe do Executivo galego, entre 1990 e 2005. O actual Presidente do CCG, Ramón Villares, valorou positivamente a relación de Fraga coa institución e salientou o seu apoio manifestado ao participar de forma regular nas súas sesións plenarias e nalgunhas das súas actividades. Considerou tamén decisiva a intervención de Manuel Fraga, canda o Presidente do CCG Xosé Filgueira Valverde, para que o Consello se instalase na sede actual, no Pazo de Raxoi en Santiago de Compostela, en 1994, xa que ata ese momento non tivera unha sede fixa.



XX Aniversario do Consello da Cultura Galega. Franciso Díaz-Fierros, José María García Leira, Manuel Fraga, Alfonso Zulueta, Ramón Castromil e Henrique Monteagudo. Foto: CCG

A relación entre xornalismo e literatura, vencellada ao oficio xornalístico e á vocación literaria de Álvaro Cunqueiro (Mondoñedo, 1911-Vigo, 1981) foi o vector principal do undécimo e último dos Faladoiros dedicados polo Consello da Cultura Galega ao creador de "Merlín e familia". Cincuenta persoas escoitaron na Casa Galega da Cultura, sede da Fundación Penzol, as reflexións de Ceferino de Blas, Ramón Nicolás e Victor F. Freixanes, moderados pola profesora e crítica literaria Dolores Vilavedra. Á sesión asistiu Ramón villares, Presidente do Consello da Cultura Galega.