Arquivo de noticias do CCG

A presidenta do Consello da Cultura Galega, Rosario Álvarez, está a desenvolver esta semana unha viaxe institucional a Belo Horizonte, Brasil. Arrincou o pasado martes coa visita a Academia Mineira de letras e remata este venres coa inauguración dunha nova itinerancia da exposición Afonso X e Galicia que conta cun programa de actividades complementarias.

A presidenta do Consello da Cultura Galega, Rosario Álvarez, inaugurou este xoves en Kiel (Alemaña) unha nova itinerancia da exposición Afonso X e Galicia. A mostra, que afonda na conexión galega do Rei Sabio, pode verse na Biblioteca Central da Universidade de Kiel (Christian-Albrechts-Universität zu Kiel, CAU) ata o 2 de xuño. Tralo acto inaugural houbo unha serie de relatorios breves a cargo dos profesores Javier Gómez-Montero, Facundo Reyna-Muniain, Gerald Schwedler e Elmar Eggert

A mostra do Consello da Cultura Galega (CCG), Afonso X e Galicia, ábrese ao público no Prédio Histórico da Universidade Federal do Paraná, en Curitiba, este mércores 16 de outubro (GMT-3, hora de Curitiba). Valéria Gil Condé, en representación do CCG; xunto co reitor da Universidade Federal, Ricardo Marcelo Fonseca; e o director do Instituto Cervantes de Brasil, Juan Manuel Casado Ramos, son os encargados de inaugurar este proxecto expositivo que explora a conexión do Rei Sabio con Galicia. A exposición está comisariada por Antoni Rossell, da Universitat Autònoma de Barcelona (UAB) e está producida CCG en colaboración coa Consellería de Cultura, Lingua e Xuventude da Xunta de Galicia e a Deputación de Ourense.

A presidenta do Consello da Cultura Galega (CCG), Rosario Álvarez, participou esta mércores en Braga na apertura oficial do XIV Congreso Internacional da Asociación Internacional de Estudos Galegos (AIEG) que se celebra baixo o lema “Horizontes dos Estudos Galegos e /na Lusofonía”. No marco desta edición, o CCG desenvolveu ese mesmo día a mesa redonda "A interpretación do repertorio lírico-medieval hoxe: enxeñería e investigación coordinada por Rebeca Blanco-Rotea, vogal da Comisión Executiva e coordinadora da Sección de Patrimonio e Bens Culturais. Ademais, a presidenta inaugurou a nova itinerancia da exposición Afonso X e Galicia, que afonda na conexión do Rei Sabio con Galicia.

O proxecto expositivo Afonso X e Galicia, producido polo Consello da Cultura Galega (CCG) coa colaboración da Xunta de Galicia e a Deputación de Ourense, recala no Edifici Històric da Universitat de Barcelona (UB). A presidenta do CCG, Rosario Álvarez; o reitor da UB, Joan Guàrdia; o vicedecano de Investigación e Relacións Internacionais da Facultade de Filoloxía e Comunicación da UB, Josep Solervicens, e o comisario da exposición, Antoni Rossell, inauguraron a mostra nun acto que contou tamén coa actuación do grupo de gaitas da Asociación Cultural Galega Rosalía de Castro de Cornellà. Ao remate, Antoni Rossell e Luciano Pérez, do Centro de Artesanía e Deseño (CENTRAD), realizaron unha visita guiada á exposición, que permanecerá aberta ata o próximo 22 de febreiro.

A presidenta do Consello da Cultura Galega (CCG), Rosario Álvarez, acompañada de Carlo Pulsoni e Marco Paone, codirectores do centro de estudos galegos da Universidade de Perugia;. Roberto Rettori, delegado de orientación, titoría e divulgación científica da mesma universidade; Ignacio Peyró, director do Instituto Cervantes de Roma e Leonardo Varasano, asesor de cultura da Comuna de Perugia, inauguraron esta mañá no reitorado da universidade a mostra Afonso X e Galicia. O proxecto expositivo poderá verse na cidade italiana ata o 13 decembro.

A presidenta do Consello da Cultura Galega (CCG), Rosario Álvarez, inaugurou na tarde deste mércores en São Paulo unha nova itinerancia da exposición Afonso X e Galicia. Canda ela estaban presentes o comisario, Antoni Rossell, e diferentes responsables da Universidade de São Paulo: Paulo Martins, diretor da Facultade de Letras, Filosofía e Ciencias Humanas; Manuel Mourivaldo Santiago Almeida, xefe do Departamento de Letras Clásicas e Vernáculas; e Maria Inês Batista Campos, do Programa de Pós-Graduação em Filologia e Língua Portuguesa. A mostra é unha das accións que a institución mantén neste final de ano no marco do seu programa de Acción Exterior. Conferencias, ciclos de cinema, renovación do espazo web son algunhas das actuacións da institución, que vén de incorporar a Xavier Queipo como coordinador da Comisión de Relacións institucionais e Acción exterior.

A presidenta do Consello da Cultura Galega (CCG), Rosario Álvarez; Paolo Canettieri, director do Dipartimento di Studi Europei Americani e Interculturali da Università di Roma, e Arianna Punzi, decana da Facultad de Lettere e Filosofia, inauguraron hoxe na capital italiana unha nova itinerancia da exposición Afonso X e Galicia, que amosa a conexión galega do Rei Sabio. Tras a inauguración, o comisario, Antoni Rossell, fixo unha visita guiada comentada polo proxecto expositivo, organizado polo CCG coa colaboración da Xunta de Galicia e a Deputación de Ourense.

O Consello da Cultura Galega (CCG) e o Instituto Cervantes realizan esta semana dúas actividades que pretenden dar a coñecer a nosa cultura na capital de Polonia e estreitar as relacións entre a cultura galega e a polaca: dunha banda, a exposición Afonso X e Galicia, que se inaugura este xoves coa presenza da presidenta do CCG, Rosario Álvarez, e do comisario da mostra, Antoni Rossell; da outra, unha mesa redonda que se celebra mañá e que afonda na conexión entre a Galicia española e a Galicia polaca.

O proxecto expositivo organizado polo Consello da Cultura Galega (CCG) coa colaboración da Xunta de Galicia e a Deputación de Ourense, Afonso X e Galicia acaba de inaugurarse no Palazzo Dell’Eiciclo (Consiglio Regionale dell Abruzzo) en L’Aquila (Italia) e marca o inicio da súa itinerancia europea. A presidenta do CCG, Rosario Álvarez; o embaixador de España en Italia, Alfonso Dastis; o presidente del Consiglio Regionale d’Abruzzo, Lorenzo Sospiri; o reitor da Università dell’Aquila, Edoardo Alese, e o comisario, Antoni Rossell foron os encargados de inaugurar esta mostra que permanecerá na cidade italiana ata o 8 de abril. A proposta expositiva serve tamén como antesala do congreso internacional I re poeti no que presidenta do Consello da Cultura Galega, Rosario Álvarez, ofrecerá unha conferencia sobre o monarca.

A montaxe deseñada polo arquitecto Roger Badía Rafart (Barcelona, 1992) para a exposición Afonso X e Galicia foi finalista dos premios Emporia de Arquitectura Efémera na categoria de exposición efémera transportable e itinerante. Estes premios están organizados por Veredictas Internacional co apoio do Col-legi de Dissenyadors d'Interiors i Decoradors de Catalunya, co apoio do Consejo General de Colegios Oficiales de Decoradores y Diseñadores de Interiores de España, a Universidad Politécnica de Madrid, a ETSAB de Barcelona, a Asociación de Carpas e Instalaciones Temporales, a AFE, a FEFIC, as Agencias de Eventos Españolas Asociadas e o Club de Marketing de Barcelona, coa participación no xurado de Grupo eventoplus.

Esta semana cumpríronse 800 anos do nacemento de Afonso X, unha figura destacada da cultura europea. Sobre o legado do monarca e a súa conexión con Galicia trata “Afonso X e Galicia”, proxecto expositivo organizado polo Consello da Cultura Galega (CCG) coa colaboración da Xunta de Galicia e as deputacións de Ourense e Lugo. Esta proposta chegou hoxe á Capela de Santa María de Lugo para amosar unha faceta pouco coñecida da súa figura e convidar a coñecer a súa influencia a través de documentos, testemuños arqueolóxicos, literarios e musicais que amosan o legado afonsino en paralelo ao esplendor da cultura galega na etapa medieval. A presidenta do CCG, Rosario Álvarez; o delegado territorial de Lugo, Javier Arias; o vicepresidente segundo da Deputación de Ourense, César Fernández; e da Deputación de Lugo, Mónica Freire, inauguraron esta mostra que estará aberta ata o 17 de abril. O comisario, Antoni Rossell, fixo un percorrido pola mostra que contará nas vindeiras semanas cun programa visitas guiadas e un concerto.

No día en que se cumpren 800 anos do nacemento de Afonso X (Toledo, 1221-Sevilla, 1284), o Consello da Cultura Galega presentou a monografía encamiñada a desmontar tópicos sobre a relación do monarca con Galicia e, sobre todo, para repensar o paradigma tradicional da historia de Galicia na Baixa Idade Media. A presidenta do CCG, Rosario Álvarez, destacou que o volume Galicia no tempo de Afonso X era un empeño da institución en achegar á sociedade unha contribución científica que permite “visibilizar o esplendor cultural da Galicia medieval”. Simon Doubleday, cunha intervención gravada, e José Miguel Andrade, incidiron en que o libro que editaron achega novas lecturas sobre un rei que “nunca pisou Galicia pero que si mantivo unha forte relación coa historia e a cultura galega”. A presentación contou tamén coa participación de dous autores como Henrique Monteagudo, que puxo de relevo o papel do galego no proxecto cultural do rei; e Diana Pelaz, que destacou o papel das mulleres reais neste período.

A illa de San Simón acolle este sábado, 2 de outubro, unha nova edición do ciclo “Seíam´eu en San Simón” un programa do Consello da Cultura Galega e o Concello de Redondela para realizar actividades relacionadas co pasado histórico da illa. Nesta ocasión, cando se cumpren 800 anos do nacemento do Rei Sabio, o programa está orientado a rastrexar a influencia do monarca na música. Rosario Álvarez, presidenta do Consello da Cultura Galega; Digna Rivas, alcaldesa do Concello de Redondela; e Xosé Ramón Pousa, coordinador do Arquivo Sonoro de Galicia son os encargados de inaugurar este encontro titulado “A pegada de Afonso X o Sabio na música galega”. A sesión vai ser gravada e subirase á hemeroteca para consultas futuras.

O vindeiro domingo pecha as súas portas en Ourense Afonso X e Galicia, a mostra coa que o Consello da Cultura Galega (CCG), a Xunta e a Deputación de Ourense conmemoran o 800 aniversario do Rei Sabio. A exposición convida a coñecer a esta figura a través de documentos, testemuños arqueolóxicos, literarios e musicais que amosan o legado afonsino en paralelo ao esplendor da cultura galega na etapa medieval. O músico, musicólogo e medievalista Antoni Rossell é o comisario desta proposta que se enriqueceu para a súa exhibición en Ourense con materiais escolmados por Afonso Vázquez Monxardín que afondan na conexión do monarca con esta provincia.

“É unha boa noticia porque permite poñer ao alcance de todo o mundo patrimonio moi relevante para a historia e a cultura galega, hispánica e universal” apuntou o Consello da Cultura Galega perante o anuncio de que Patrimonio Nacional poñerá en rede os dous códices que faltaban das “Cantigas de Santa Maria”.

“O catálogo é a guinda que lle faltaba ao pastel, dalle unidade e pecha o círculo” explica o músico, musicólogo e medievalista Antoni Rossell sobre “Afonso X e Galicia” o catálogo da exposición homónima coa que o Consello da Cultura Galega celebra este ano o 800 aniversario do nacemento de Afonso X. O catálogo, que está en galego, inglés e castelán, é interactivo e xa se pode consultar deste hoxe no espazo web do CCG.

O Rei Sabio tivo unha conexión singular con Ourense. Por iso a mostra “Afonso X e Galicia” comezou a súa itinerancia nesta cidade á que chega enriquecida cunha serie de materiais arredor dese fío histórico. A exposición conmemora o 800 aniversario do nacemento de Afonso X, unha das figuras máis relevantes da cultura europea, e convida a coñecer a enorme influencia da súa figura cunha peregrinaxe a través de documentos, testemuños arqueolóxicos, literarios e musicais que amosan o legado afonsino en paralelo ao esplendor da cultura galega na etapa medieval. A mostra foi inaugurada pola presidenta do CCG, Rosario Álvarez; e o presidente da Deputación de Ourense, José Manuel Baltar; e Sandra Quintas, xefa territorial da Consellería de Cultura e Turismo. O comisario da mostra é o músico, musicólogo e medievalista Antoni Rossell, e Afonso Vázquez Monxardín encargouse da selección documental que complementa a proposta orixinal e ofrece a conexión con Ourense.

“Afonso X e Galicia” é o título da exposición coa que o Consello da Cultura Galega (CCG) afonda na conexión galega do rei sabio cando se cumpren oitocentos anos do seu nacemento. A mostra pecha este sábado en Compostela e inicia a súa itinerancia. A primeira das súas paradas será Ourense, no Centro Cultural Marcos Valcárcel onde se inaugurará o vindeiro día 7 de maio. O proxecto expositivo compleméntase cun espazo web onde figuran materiais sonoros, audiovisuais e unha proposta de roteiros que convidan a percorrer o patrimonio galego en conexión co legado afonsino.

“Afonso X e Galicia” é o título da exposición coa que o Consello da Cultura Galega (CCG) afonda na conexión galega do Rei Sabio cando se cumpren oitocentos anos do seu nacemento. A mostra, que estivo pechada por mor das circunstancias sanitarias actuais, reabre ao público hoxe martes 23 de febreiro no seu horario habitual. O proxecto expositivo compleméntase cun espazo web onde figuran materiais sonoros, audiovisuais e unha proposta de roteiros que convidan a percorrer o patrimonio galego en conexión co legado afonsino.