María Xosé Porteiro García

Biografía de María Xosé Porteiro García

1952- Madrid
Hai mulleres que conforman a cartografía da súa vida coas chagas provocadas polas silvas de carreiros que nin chegaban a camiños cando os abriron. Nalgunha ocasión María Xosé Porteiro dixo ter a cabeza chea de golpes por bater con muros, xa non de cristal, senón de pedra, que facían imposible mesmo ver máis aló. Pioneira como política e tamén xornalista e comunicadora por elección e convicción, a súa vida está chea de logros para ela e mais para as galegas, pero tamén das cargas que as mulleres debemos pagar, como impostos patriarcais: ver como lle pasaban diante os seus compañeiros de profesión e militancia varóns, non cotizaren por ela en redaccións que priorizaban aos cabezas de familia, a loita que supuxo facerse cos estudos universitarios que na súa xuventude non puido cursar ou a renuncia por obrigas familiares a unha xefatura na radio pública galega que entón botaba a andar.

María Xosé Porteiro é, sobre todo, voz. A voz coa que aquela adolescente chegada das Américas deixou atrás o seu acento cubano e se enchoupou da Galicia dos últimos anos do franquismo. A voz coa que conseguiu entrar nos medios de comunicación e a rapaza que atopou unha oportunidade de traballo inesperada ao acompañar o seu mozo a unhas probas na radio. A voz coa que fixo crónica da Galicia da transición e dos primeiros anos da democracia, da reconversión industrial, da movida dos 80, do movemento feminista, do sindicalismo, do activismo cultural en galego… A voz da política que impulsou unha das primeiras concellarías da muller do Estado… A voz da narradora que procurou na novela a denuncia de problemáticas como a prostitución, que os medios ocultaban…

Porteiro sabe das trabas que baten nas mulleres, as xornalistas e as políticas. E sabe tamén, e tan ben, contalo, para as outras que veñen atrás. Leccións que deita a vida da comunicadora que comezou a traballar nos anos 70 en La Voz de Vigo, pertencente á rede de emisoras do Movemento, e que logo continuou en Radio Popular e nos xornais El Pueblo Gallego, El País e La Voz de Galicia. Da xornalista que, igual que tantas outras, deixou a profesión por camiños máis estables e conciliadores, como o de xefa de prensa e protocolo do Concello de Vigo. Da política que chegou a este terreo como independente nas listas do PSdeG-PSOE de Vigo á alcaldía de Vigo e que forxou a súa traxectoria como responsable da primeira concellaría da muller en Galicia, promotora do Centro de Información á Muller e da Casa de Acollida para Mulleres Maltratadas da cidade, deputada autonómica e estatal, delegada no exterior da Xunta de Galicia para A Arxentina e O Uruguai, valedora adxunta do Parlamento de Galicia, membro electo do Pleno do Consello da Cultura Galega e directora do Centro de Documentación en Igualdade e Feminismos desta institución.

A voz para sermos e para liberarnos das cadeas invisibles que nos atrancan no político e no profesional, como algunha vez deixou escrito. Velaí a trama que tece esta cartografía.

Publicacións nas que participou María Xosé Porteiro García

Materiais de María Xosé Porteiro García

María Xosé Porteiro García nas actividades do CCG

Artigos

PORTEIRO GARCíA, M. (5/1983) A muller e os medios de comunicación. Festa da palabra silenciada. (00), 4.

Ver artigo

PORTEIRO GARCíA, M. (5/1984) A muller na información. Andaina. 1ª época (6), 11.

Ver artigo Fonte da dixitalización: Colectivo Andaina de Mulleres;

PORTEIRO GARCíA, M. (9/1990) O "museo da muller" de Aarhus: unha lección de autoestima. Festa da palabra silenciada. (07), 95 .

Ver artigo Fonte da dixitalización: Feministas Independentes Galegas;

PORTEIRO GARCíA, M. (2012) Clara Zetkin e as súas lembranzas de Lenin. Festa da palabra silenciada. (28), 31-34.

Ver artigo Fonte da dixitalización: Feministas Independentes Galegas;

Biobibliografías para o Álbum de Galicia