Arquivo de noticias do CCG

“A violencia económica” é o título da xornada coa que o Centro de Documentación en Igualdade e Feminismos (CDIF) do Consello da Cultura Galega (CCG), coa colaboración do Consello Galego de Relacións Laborais, se achega a unha reivindicación histórica do feminismo e da loita das mulleres como é a independencia económica. Profesionais do ámbito da maxistratura, da avogacía, da inspección de traballo e dos sindicatos laborais achegarán o seu punto de vista sobre ese asunto na sesión deste mércores 5 de novembro (9:45 horas). Rosario Álvarez, presidenta do CCG, e Antía Sández Callejo, presidenta do Consello Galego de Relación Laborais, inauguran esta xornada presencial que se pode seguir en directo desde o web e a Canle de YouTube da institución.

O Centro de Documentación en Igualdade e Feminismos (CDIF) do Consello da Cultura Galega (CCG) pon o foco na traxectoria da política, activista, escritora e feminista María Xosé Porteiro (Madrid, 1952) coa xornada “María Xosé Porteiro: activista das palabras”, dentro do ciclo “De pioneiras e andainas”. Será este xoves 30 de outubro (9:45 horas) e nela revisarase a súa traxectoria vital e profesional, desde os seus inicios nos medios de comunicación ata a súa contribución á política de igualdade e á promoción das mulleres en Galicia. A presidenta do CCG, Rosario Álvarez, e a coordinadora da xornada e do CDIF, Carme Adán, inaugurarán esta cita na que participa a propia María Xosé Porteiro, así como a xornalista Sonia Vizoso, Víctor Freixanes, Susana López Abella, e Ana Miranda, entre outros relatores. A xornada é presencial, pero tamén pode seguirse en directo a través do sitio web e das redes da institución.

Na década dos oitenta, saíron ao prelo Recuperemos as mans é Evidencias, dúas contribucións imprescindíbeis de María Xosé Queizán como pensadora galega ao debate feminista. O Consello da Cultura Galega (CCG) presenta este venres no MARCO de Vigo (19:00 horas) a reedición conmemorativa deses textos, nunha xornada que servetamén de homenaxe á autora. A presidenta do CCG, Rosario Álvarez, asiste a este encontro no que participan Carme Adán, Helena González, María Xosé Porteiro, Iolanda Veloso, Marga do Val e Inma López Silva.

"Recuperemos as mans" é o primeiro ensaio de María Xosé Queizán que viu a luz en 1980. É tamén o título da xornada coa que o Centro de Documentación en Igualdades e Feminismos (CDIF) do Consello da Cultura Galega (CCG) homenaxea á autora este mércores 5 de febreiro (16:45 horas). Carme Adán, Marga do Val e Helena Fernández participan nesta cita que pretende recuperar a vixencia das argumentacións ao tempo que serve de recoñecemento do relevancia da súa escrita hai 45 anos. A presidenta, Rosario Álvarez, inaugura este encontro ao que asiste a homenaxeada e se pode seguir en directo polo web da institución.

“Novos relatos da violencia machista” é o título da xornada anual que o Centro de Documentación en Igualdade e Feminismos (CDIF) do Consello da Cultura Galega (CCG) organiza ao fío do 25N, Día internacional da Eliminación da Violencia contra a Muller. A cita, que terá lugar este xoves (9:45 horas) tratará a realidade da violencia de xénero no contexto global actual onde circulan “exabruptos e discursos de odio que superan abondo o linde do distópico, que disparan ás cheas unha narrativa misóxina” segundo o texto de presentación desta actividade. A presidenta do CCG, Rosario Álvarez, e a coordinadora do CDIF, Carme Adán, inauguran esta cita na que participan, entre outros, a politóloga Priscila Retamozo ou a psicóloga Martina González. O evento é presencial e poderá ser seguido en directo a través do web da institución.

“Antes de zoqueira fun feiranta e as feiras foron a miña universidade” apuntou Elena Ferro na entrevista que a xornalista Marga Pazos lle fixo no marco da xornada “Elena Ferro: Creatividade e arte na pel”. Unha cita organizada polo Centro de Documentación en Igualade e Feminismos (CDIF) do Consello da Cultura Galega (CCG) que puxo o foco no traballo das artesás. A presidenta do CCG, Rosario Álvarez, destacou na inauguración que “hoxe falamos de Elena Ferro e singularizamos nela que detrás de mulleres singulares hai outras redes de homes e de mulleres que permitiron a capacidade de transformación da artesanía aos novos tempos, do deseño tradicional aos novos mercados”. A xornada, que rematou cunha intervención musical de Guadi Galego, tamén deu voz a novas artesás.

O Centro de Documentación en Igualdade e Feminismos (CDIF) do Consello da Cultura Galega (CCG) porá o foco na zoqueira Elena Ferro (Merza, Vila de Cruces, 1975) coa xornada “Elena Ferro: creatividade e arte na pel”, dentro do ciclo “De pioneiras e andainas”. Será este xoves 24 de outubro (a partir das 09:45 horas) e nela revisarase a importancia dos oficios galegos desde a óptica feminista. A presidenta do CCG, Rosario Álvarez, e a coordinadora da xornada e do CDIF, Carme Adán, inauguran esta cita na que participa a propia Elena Ferro, a xornalista Marga Pazos, a escritora Brigitte Vasallo e tres das novas artesás galegas. A sesión rematará cunha interpretación musical de Guadi Galego. A xornada é presencial pero pode seguirse en directo a través do sitio web e as redes da institución.

A creación de políticas específicas para a menopausa, máis información e o incremento de recursos para a investigación biomédica son algunhas das demandas das profesionais que participaron este xoves na xornada “Feminismos: a menopausa a debate” organizada polo Centro de Documentación en Igualdade e Feminismos (CDIF) do Consello da Cultura Galega (CCG). A presidenta do CCG, Rosario Álvarez, e a directora do CDIF, Carme Adán, destacaron na inauguración que esta actividade se sitúa nunha liña de traballo da institución que presta atención a temas relevantes para a sociedade desde unha óptica feminista. Os relatorios foron gravados e están a disposición da cidadanía desde a canle de Youtube da institución.

“Feminismos: a menopausa a debate” é o título da nova xornada organizada polo Centro de Documentación en Igualdade e Feminismos (CDIF) do Consello da Cultura Galega (CCG). A presidenta do CCG, Rosario Álvarez, e a directora do CDIF, Carme Adán, inauguran mañá xoves, 19 de setembro (10:00 horas) esta cita que busca reflexionar sobre esta etapa da vista desde o punto de vista da medicina e da antropoloxía ademais de ver como se aborda desde espazos de creación e difusión cultural. A bioquímica Inés Pineda i Torra, que investiga o risco cardiovascular das mulleres durante a menopausa, ou a antropóloga Guadalupe Jiménez, son algunhas das relatoras que participan neste encontro. A actividade pódese seguir en directo desde o web e as redes sociais da institución.

No ronsel do 8 de marzo, Día Internacional da Muller, o Centro de Documentación en Igualdade e Feminismos (CDIF) do Consello da Cultura Galega (CCG) organiza a xornada Ficcións da maternidade: entre imaxes e palabras. A cita terá lugar este xoves 7 de marzo (ás 16:15 horas), na sede da institución e contará coas intervencións de Álvaro Gago e Jaione Camborda, cineastas, e de María do Cebreiro e Yolanda Castaño, escritoras. A actividade é presencial, pero poderá seguirse en directo a través do sitio web e as redes sociais corporativas.

“Xornalismo con perspectiva” é o título da nova sesión do ciclo EscriturAs, organizado polo Centro de Documentación en Igualdade e Feminismos (CDIF) do Consello da Cultura Galega (CCG). Nesta ocasión, Fernanda Tabarés e Joana Bonet debaterán arredor de se o xornalismo é un ámbito propicio para a loita feminista. A cita terá lugar mañá, 8 de febreiro, ás 18:00 horas, na Casa das Campás (Pontevedra). A sesión, coordinada por Inmaculada López Silva e Rexina Rodríguez Vega, é presencial e non se poderá seguir en directo, pero será gravada e subida posteriormente á hemeroteca do CCG.

O acoso sexual é unha realidade que está presente en moitos ámbitos da vida das mulleres desde a súa infancia. Co fin de afondar na súa concepción e nas diversas formas en que este se manifesta, o Centro de Documentación en Igualdade e Feminismos (CDIF) do Consello da Cultura Galega (CCG), en colaboración coa Sección de Artes Escénicas, Musicais e Audiovisuais da institución, organiza mañá martes (28 de novembro, 10:00 horas) a xornada Que é “si”? Sobre o acoso sexual. Na inauguración intervirán a presidenta do Consello da Cultura Galega, Rosario Álvarez; a coordinadora do CDIF, Carme Adán, e a da Sección de Artes Escénicas, Musicais e Audiovisuais, Cristina Domínguez. A xornada é presencial, pero poderá seguirse en directo a través do sitio web e as redes sociais da institución.

“Desde Ana Peleteiro ata Sofía Toro pasando por Alicia Fernández Fraga, Julia Vaquero... todas as deportistas galegas lle deben moito a Marta Bobo, porque ela foi a primeira” afirmou Merce Barrientos, presidenta do MUDEGA (Mulleres Deportistas Galegas) no marco da xornada “Marta Bobo. Mulleres e deporte” . Cita coa que o Centro de Documentación en Igualdade e Feminismo (CDIF) do Consello da Cultura Galega (CCG) homenaxeaba a primeira olímpica galega e muller pioneira que abriu moitos teitos de cristal no mundo do deporte. “É unha homenaxe a todas as mulleres que estiveron neste campo, cos seus éxitos e dificultades” afirmou a presidenta do CCG, Rosario Álvarez, na inauguración. Sobre esa idea tamén incidiu Carme Adán, directora do CDIF e organizadora da cita xunto con Cristina López Villar, que afirmou “temos que ter presente a importancia do deporte para mudar todos os estereotipos”. Os vídeos da xornada están dispoñibles na canle de Youtube do CCG.

O Centro de Documentación en Igualdade e Feminismos (CDIF) do Consello da Cultura Galega (CCG) organiza mañá, 26 de outubro, ás 9:30 horas, unha nova sesión do ciclo De pioneiras e andainas. Nesta ocasión, a protagonista será a ximnasta Marta Bobo. A súa traxectoria e os seus logros deportivos servirán como punto de partida para analizar a loita das mulleres por acadar recoñecemento no mundo do deporte. A presidenta do CCG, Rosario Álvarez, e Carme Adán, coordinadora da xornada xunto con Cristina López Villar, inaugurarán esta actividade. A cita é presencial, pero poderá seguirse en directo a través do sitio web e das redes sociais da institución.

“Transgresoras e exitosas. De malas mulleres a señoras que non son Santa Claus” é o título da sesión coa que o Centro de Documentación en Igualdade e Feminismos (CDIF) do Consello da Cultura Galega (CCG) abre o ciclo EscriturAs. Esta iniciativa busca reflexionar, desde unha perspectiva feminina e feminista, sobre os cambios experimentados nos discursos artísticos, xornalísticos e intelectuais durante os últimos anos. A primeira sesión, que terá lugar mañá, 7 de marzo (18:00 horas), xunta a Marilar Aleixandre e a Laura Fernández para conversar arredor da posibilidade de lograr o éxito desde a disidencia. Modera este diálogo Inma López Silva, coordinadora da actividade xunto con Rexina Rodríguez Vega. A cita é presencial, pero poderá seguirse en directo a través do sitio web e as redes sociais da institución.

“Violencias machistas: análise e retos” é o título da xornada que o Centro de Documentación en Igualdade e Feminismos (CDIF) do Consello da Cultura Galega (CCG) organiza mañá, 28 de febreiro (10:30 horas), na sede da institución. Nela, revisaranse os avances que se produciron nos últimos cinco anos desde a ratificación do Pacto de Estado contra a Violencia de Xénero e analizaranse os camiños que se abren coa aplicación de novas leis como a do “Só si é si”. A presidenta do CCG, Rosario Álvarez, e as coordinadoras da actividade, Carme Adán Villamarín e Paz Filgueira Paz serán as encargadas de inaugurar esta cita presencial, que amén se poderá seguir en directo a través do sitio web e as redes sociais do CCG.

O Centro de Documentación en Igualdade e Feminismos (CDIF) do Consello da Cultura Galega (CCG) retoma mañá, 27 de outubro, ás 9:30 horas, o ciclo De pioneiras e andainas cunha xornada dedicada a María Xosé Agra. A través das súas numerosas publicacións e achegas, revisaranse décadas de andaina feminista en Galicia e apuntaranse os principais retos de futuro. A presidenta do CCG, Rosario Álvarez, inaugura esta cita xunto coas súas coordinadoras, Carme Adán e María Xosé Porteiro. A sesión é presencial, pero poderá seguirse en directo a través do sitio web e das redes sociais da institución.

Nieves Fernández Vidueira é escritora, fotógrafa, tallista da madeira, deseñadora e creadora de traxes, disfraces e máscaras de entroido, aínda que ela se define a si mesma como criadora de ovellas. A súa figura é obxecto da xornada homenaxe que o Centro de Documentación en Igualdade e Feminismos (CDIF) do Consello da Cultura Galega (CCG) lle fai este xoves, 21 de outubro. A cita pretende ser un espazo de reflexión arredor da diversidade das contribucións das mulleres do rural no mantemento dun espazo social, económico e natural. A presidenta do Consello da Cultura, Rosario Álvarez; a directora do CDIF, María Xosé Porteiro; máis as coordinadoras da xornada, Lucía Oca e Rosa Arcos, inauguran esta cita presencial que tamén se pode seguir en directo por internet.

“A presenza da muller no ámbito da fotografía en Galicia é historicamente moi escasa”, destacou María Xosé Agra na inauguración da xornada “Mary Quintero. A luz que alumea a vida”, que tivo lugar hoxe no Consello da Cultura Galega (CCG). A cita analizou e comentou a traxectoria desta creadora que fixo a súa primeira exposición con 16 anos e foi unha innovadora na técnica fotográfica. O seu traballo está presente tamén a través dunha exposición montada nas instalacións do Consello ata a vindeira semana. O presidente do CCG, Ramón Villares, salientou na inauguración o traballo da Comisión de Igualdade e a intención de seguir incidindo na análise da fotografía como un modo de entender a acción colectiva. Anunciouse tamén que na vindeira edición a homenaxeada será Kathleen Nora March (Nova York, EEUU) .

A luz que alumea a vida é o título da xornada coa que a Comisión de Igualdade do Consello da Cultura Galega (CCG) quere centrar o foco nunha fotógrafa viguesa tan descoñecida para o público como destacada foi na súa profesión. Mary Quintero (Melide, 1931) é unha das pioneiras da fotografía profesional en Galicia e unha retratista preocupada pola iluminación e uso de novas técnicas. A cita terá lugar mañá xoves en Santiago co obxectivo de visibilizar o traballo de mulleres que, como ela, están a pasar desapercibidas no mundo da imaxe. A xornada complétase cunha exposición nas instalacións do CCG que exhibe algunhas das fotografías e materiais que marcaron a súa traxectoria e que comentará a propia Quintero.