Arquivo de noticias do CCG

Unha nutrida representación do corpo consultar acreditado en Galicia reuniuse na mañá deste luns convocado polo Consello da Cultura Galega (CCG) para “crear un espazo de comunicación e de coñecemento mutuo entre a lingua e a cultura galega e as linguas e culturas dos países que están aquí representados” tal e como apuntou Rosario Álvarez, presidenta do CCG, na apertura da sesión. Baixo o título “Diplomacia e cultura” coñeceron as características da acción exterior do CCG e sentaron as bases de colaboración nun encontro que terá periodicidade anual.

O Consello da Cultura Galega (CCG) organiza o vindeiro luns, 22 de setembro (sede do CCG, 10:30 horas), a xornada “Diplomacia e cultura” que reúne por primeira ao corpo consular acreditado en Galicia. O encontro supón unha oportunidade para afondar nos vencellos entre a diplomacia consular e a historia contemporánea do noso país ademais de abrir novas vías de colaboración de cara ao futuro. As persoas interesadas en asistir teñen que enviar un correo electrónico a exterior@consellodacultura.gal.

O Consello da Cultura Galega (CCG) acolleu esta mañá a presentación dunha obra que explora a figura e o legado de José María Alonso de Trelles e Jarén, "El viejo Pancho", cando se cumpre o centenario do seu pasamento. A obra El viejo Pancho Pancho, de Ribadeo a El Tala pasando por Navia, coordinada por Pablo Rodríguez "Vivín", rende homenaxe a este poeta nado en Ribadeo que foi unha destacada figura en Uruguai. Dolores Vilavedra, vicepresidenta do CCG; Daniel Vega Pérez, alcalde de Ribadeo; Lourenzo Fernández Prieto e Pilar Cagiao Vila, profesores da Universidade de Santiago de Compostela; máis o editor, Antonio Andina, destacaron na presentación a importancia de tender pontes e a relevancia da súa figura.

A presidenta do Consello da Cultura Galega, Rosario Álvarez; o alcalde de Miño, Manuel Vázquez Faraldo; e o cónsul de Uruguai en Galicia, Asturias, Cantabria e País Vasco, Ramiro Rodríguez Bausero; xunto co secretario xeral da Emigración, Antonio Rodríguez Miranda, inauguraron hoxe en Miño a mostra 'Miñenses no Uruguai: Homenaxe a Antón Crestar'. Trátase dunha dobre homenaxe: aos veciños deste concello que emigraron a Uruguai e a Antón Crestar, un dos grandes expoñentes da emigración galega no Uruguai no século XX. Rosario Álvarez destacou a importancia da colaboración cidadá nesta mostra “que nos permite, non só construír a historia de todos eles e renderlles homenaxe, senón tamén coñecer a historia do país”. Mentres tanto, Miranda incidiu en que “é un espello do legado e a resiliencia da comunidade galega en Uruguai, reflectindo nosa rica historia e cultura transatlántica”. A mostra, comisariada por Pilar Cagiao, estará aberta ata o 10 de xaneiro.

O Consello da Cultura Galega (CCG) pecha un ano de actividade arredor da figura de Francisco Fernández del Riego, cunha xornada no seu Lourenzá natal. Diferentes especialistas afondarán nas relacións do homenaxeado no Día das Letras Galegas desta edición coa emigración e o seu papel como colaborador nas publicacións da colectividade galega en América. A alcaldesa do concello de Lourenzá, Rocío López García, e o vicepresidente do CCG, Xosé M. Núñez Seixas, inauguran este venres, 1 de decembro (19:00 horas), a cita titulada “Fernández del Riego: de Lourenzá a América”.

A presidenta do Consello da Cultura Galega (CCG), Rosario Álvarez, inicia este xoves unha viaxe institucional a Cuba na que participará nun programa de actividades sobre o patrimonio cultural común entre Galicia e Cuba. Ademais de reunirse co embaixador de España en Cuba, asistirá á investidura de Pilar Cagiao como membro da Academia Cubana de Historia.

A presidenta do Consello da Cultura Galega (CCG), Rosario Álvarez, participa no IX Congreso Internacional de la Lengua Española, que arrincou este luns en Cádiz. No marco desta cita defenderá a convivencia entre as linguas ibéricas e reivindicará a importancia do multiculturalismo. De maneira complementaria, a presidenta inaugurou esta mañá na Facultade de Filosofía e Letras da Universidad de Cádiz, xunto co seu reitor, Francisco Piniella Corbacho, a mostra Inventio Mundi, coa que o CCG amosa os inicios da navegación galega.

Antón Crestar foi un dos grandes expoñentes da emigración galega no Uruguai no século XX. Recuperar a súa figura e visibilizala publicamente é o obxectivo do protocolo de colaboración que asinaron hoxe a presidenta do Consello da Cultura Galega, Rosario Álvarez e o alcalde de Miño, Manuel Vázquez Faraldo. No acto de sinatura estaban presentes Catalina Morado, concelleira de Educación, Cultura, Comunicación, Participación Cidadá, Transparencia e Igualdade, máis Pilar Cagiao, profesora de Historia de América e coordinadora do Grupo HistAmérica da Universidade de Santiago de Compostela.

A presidenta do Consello da Cultura Galega (CCG), Rosario Álvarez, e a alcaldesa de Redondela, Digna Rivas, inauguraron esta mañá na localidade a mostra Os adeuses. Trátase dunha exposición que documenta os últimos momentos da emigración galega a América a través de 51 fotografías realizadas por Alberto Martí nos portos de Vigo e A Coruña entre 1957 e 1963. Estará aberta ao público no Multiusos da Xunqueira ata o 28 de febreiro e chega a Redondela logo dunha itinerancia por numerosos destinos de España, Portugal, Brasil e Estados Unidos.

O Repertorio da prensa da emigración galega, proxecto que mantén o Arquivo da Emigración Galega (AEG) do Consello da Cultura Galega (CCG), suma 17 novos números da cabeceira Eco de Galicia. A publicación, editada pola Empresa de Publicidad Galiciana da Habana, incluía artigos informativos sobre as institucións galegas creadas en Cuba e tamén noticias sociais, artigos políticos e traballos históricos, xeográficos, económicos ou culturais, así como unha "páxina nazonalista". Os números que se incorporan neste mes de xaneiro pertencen a diversos exemplares publicados entre os anos 1918 e 1923, que foron depositados no AEG por Pilar Cagiao.

No desterro é o primeiro poemario de Ramón Cabanillas. Veu a luz na Habana cun limiar de Basilio Álvarez, e consagrou o autor como poeta social por excelencia. O Consello da Cultura Galega (CCG) e a Secretaría Xeral da Emigración, no marco da súa colección Clásicos da Emigración, presentaron este venres no Museo Ramón Cabanillas de Cambados a reedición da obra cun estudo crítico. No acto participaron Xosé Manoel Núñez Seixas, vicepresidente do CCG e director do Arquivo da Emigración Galega; María Baleato, subdirectora de Coordinación Administrativa da Secretaría Xeral da Emigración; Miguel Cabo, autor do estudo da obra e profesor da USC; Francisco Fernández Rei, membro da Real Academia Galega; Tino Cordal, concelleiro de Cultura de Cambados; e Pitusa Vidal Cabanillas, neta do autor.

Galicia viviu entre 1931 e 1939 un amplo desenvolvemento de asociacións mariñeiras derivadas da implantación de modelos e relacións de produción capitalista. A análise desa situación e a súa relación co contexto político daquela altura centran este martes a xornada “Memoria e historia do traballo do mar en Galicia”. É unha nova entrega dos Encontros Monográficos co Patrimonio Cultural que organiza a Sección de Patrimonio e Bens Culturais do Consello da Cultura Galega (CCG). A cita, coordinada por Francisco Xavier Redondo Abal, é presencial pero pode seguirse en directo desde o web e as redes sociais co CCG.

O Consello da Cultura Galega (CCG) rematou no serán deste martes unha viaxe institucional de dous días na que contribuíu a unha maior visibilización da súa acción e da cultura galega na capital europea. Mantivéronse xuntanzas con responsables de diferentes institucións europeas que se traducirán nos vindeiros meses en accións encamiñadas a promover a cultura galega no exterior. Ademais, o programa cultural, desenvolvido na sede do Instituto Cervantes, contou cunha gran acollida de público.

A presidenta do Consello da Cultura Galega (CCG), Rosario Álvarez, inicia este luns unha visita institucional a Bruxelas na que realizará diferentes reunións con responsables de institucións comunitarias e europeas para impulsar o programa de acción exterior do CCG. As xuntanzas están acompañadas dun programa cultural que contribuirá á visibilización da cultura galega na capital europea. As actividades enmárcanse dentro do Plan de Acción Exterior que ten o Consello da Cultura Galega promovido pola Comisión de Relacións Institucionais e Acción Exterior (CRIAE).

“Luisa Cuesta foi unha pioneira nos estudos americanistas e todos os que estudamos os vínculos con América bebemos deste texto” asegurou a historiadora Pilar Cagiao, autora do estudo introdutorio do libro La emigración gallega a América. É o último volume en incorporarse á colección Clásicos da Emigración que promoven o Consello da Cultura Galega (CCG) e a Secretaría Xeral da Emigración. Os titulares de ambas entidades, Rosario Álvarez e Antonio Rodríguez Miranda respectivamente, xunto co director do Arquivo da Emigración Galega, Xosé Manoel Núñez Seixas, presentaron este novo volume que axuda a mellorar o coñecemento do fenómeno migratorio. A publicación xa se pode descargar desde o web do CCG.

O Consello da Cultura Galega (CCG) puxo a disposición pública en Internet o libro Vindicación. Vida e milagros de Pepe de Xan Baña en trinta anos de Cuba, do emigrante de Santa Comba Xosé Baña Pose. Este volume foi publicado orixinalmente en 1921 en La Habana, co obxectivo de ser repartido entre os veciños xalleiros na seguinte viaxe do escritor. O libro conta cun estudo introdutorio do profesor da Universidade de Vigo Xosé Henrique Costas González, no que se analizan as particularidades da lingua galega empregada na publicación. Está editado na colección Clásicos da Emigración do CCG e a Secretaría Xeral da Emigración da Xunta de Galicia.

“As Irmandades da Fala no seu tempo: perspectivas cruzadas” é o título da última publicación dixital do Consello da Cultura Galega (CCG). Máis de cincocentas páxinas serven para explicar e contextualizar este movemento fundamental da nosa cultura desde unha perspectiva que nunca se abordara: a comparada. Isto permite situar o movemento histórico no seu contexto actual, é dicir, desde a perspectiva peninsular, europea e a dimensión americana da diáspora. O texto nútrese das palestras dos congresos que entre 2016 e 2018 o CCG realizou para celebrar o centenario da fundación e expansión das Irmandades da Fala. Ramón Villares, Xosé Manoel Núñez Seixas e Ramón Máiz foron coordinadores destas citas e tamén da actual publicación que xunta as principais contribucións. Complementa a publicación un vídeo no que participan Villares e Núñez Seixas,cunha presentación da presidenta do CCG, Rosario Álvarez. Todo ese material está dispoñible desde hoxe no web da institución.

Este 1 de outubro cúmprense 89 anos da aprobación do dereito das mulleres ao voto. Unha efeméride na que o Consello da Cultura Galega (CCG) pon en rede a web do Centro de Documentación en Igualdade e Feminismos, o CDIF, o cuarto arquivo que o CCG creou en 2019. É un “Arquivo que, ademais de inventariar, documentar, preservar e dispoñeros fondos, debe actuar como incitador á reflexión, divulgador de contidos e dinamizador da sociedade galega” destaca a presidenta, Rosario Álvarez. O centro, que ten a súa orixe nunha comisión temporal creada en 2005, ten como directora a María Xosé Porteiro.

“Da emigración. Notas d’un galego” é unha novela na que Antón Paz Míguez proxectou as duras condicións vitais e laborais dos galegos e galegas que sobrevivían lonxe da terra. É tamén o cuarto volume da colección Clásicos da emigración coa que o Consello da Cultura Galega (CCG) e a Secretaría Xeral da Emigración recuperan, en edición facsimilar e con estudos introdutorios, obras fundamentais para entender o fenómeno migratorio. O profesor e investigador Xavier Castro Rodríguez é o encargado de facer o estudo preliminar. Xunto coa publicación, o CCG presenta a entrada de Paz Míguez no Álbum de Galicia.

Detrás de “Cousas gallegas” hai poemas, discursos e outros materiais que o xornalista e avogado Fortunato Cruces publicou en 1923. É tamén o terceiro volume da colección Clásicos da emigración coa que o Consello da Cultura Galega (CCG) e a Secretaría Xeral da Emigración recuperan, en edición facsimilar e con estudos introdutorios, obras fundamentais para entender o fenómeno migratorio. Nesta ocasión o historiador e vicepresidente do CCG, Xosé Manoel Núñez Seixas, é o encargado da análise da obra. Ademais da publicación, o CCG presenta a entrada de Fortunato Cruces no Álbum de Galicia, así como a difusión de diferentes exemplares de “Nova Galicia”, o xornal que dirixiu e que tivo bastante repercusión en Arxentina.