Pilar Cagiao Vila

Profesora Titular de Historia de América na Universidade de Santiago de Compostela á que se incorporou como docente en 1986. As súas principais liñas de investigación están vinculadas aos movementos migratorios e ás relacións culturais entre España e América ao redor das cales coordinou, como investigadora principal, proxectos de investigación americanista en convocatorias competitivas nacionais e autonómicas. Respecto dos movementos migratorios doutorouse na Universidade Complutense de Madrid (1990) coa tese de doutoramento titulada “Participación económico social de la inmigración gallega en Montevideo, 1900-1970”. Nesta universidade madrileña formouse como americanista, merecendo o premio extraordinario de licenciatura. É autora de numerosas publicacións sobre esta temática, de relatorios en congresos nacionais e internacionais e foi comisaria de diversas exposicións sobre a mesma. No que ten que ver coas relacións culturais entre España e América é autora de diversos artigos e coordinadora de varias monografías en editoriais españolas e latinoamericanas. Como profesora convidada impartiu cursos de posgrao, doutoramento e mestrado na UDC, UHU, Universidade Portucalense de Porto, París VII e en varias universidades latinoamericanas: PUCRS de Porto Alegre, Universidade da República (Montevideo), UCR (Costa Rica), Universidade de El Salvador, Universidade de Cuenca e PUCE (Ecuador), Universidade Salgado de Oliveira e Universidade do Estado do Río de Janeiro (Brasil). Foi directora do Centro Interdisciplinario de Estudos Americanistas “Gumersindo Busto” da Universidade de Santiago de Compostela e do Arquivo da Emigración Galega do Consello da Cultura Galega, a cuxa comisión técnica pertenceu desde o ano 2000 ao 2020, así como secretaria de redacción da revista Estudios Migratorios. Revista Galega de Análise das Migracións. Na actualidade é vogal da xunta directiva da Asociación Española de Americanistas.