O Centro de Documentación en Igualdade e Feminismos (CDIF) do Consello da Cultura Galega (CCG) acaba de publicar un novo monográfico titulado “As letras das mulleres”. Helena González coordina este traballo que recompila artigos de opinión e documentos de diferentes fontes e que percorre a evolución do papel da muller nas letras galegas durante as últimas décadas. No especial atópase desde dúas galerías que revisan a presenza da muller na Real Academia Galega (tanto as académicas como as homenaxeadas co Día das Letras Galegas) ata diferentes iniciativas de visibilización de escritoras e intelectuais. A monografía, que xa está dispoñible para consulta, tamén revisa as iniciativas do CCG para a posta en valor das mulleres galegas destacadas.
09/05/2025
07/05/2025
O Álbum de Galicia, colección de biografías do Consello da Cultura Galega (CCG), incorpora hoxe a entrada de Felipe Cordero Carrete (Redondela, 1894 - Santiago de Compostela, 1988) Foi un profesor de Historia, Filosofía e Inglés, así como investigador. Membro da Real Academia Galega, do Seminario de Estudos Galegos e Director da Residencia de Estudantes da Universidade de Santiago de Compostela, desenvolveu proxectos culturais como a Fundación Rosalía de Castro e a Editorial Bibliófilos Galegos. Participou na creación do Instituto de Estudos Galegos Padre Sarmiento e durante a Guerra Civil, axudou a salvagardar a biblioteca da institución. Diana Duo Ramila é a autora da entrada que está dispoñible para consulta no web do CCG.
07/05/2025
Agora vou cantar eu é o libro co que o Consello da Cultura Galega (CCG) contribúe á celebración do Día das Letras Galegas. Pretende ser unha homenaxe ás mulleres creadoras e transmisoras da poesía popular cantada. A vicepresidenta da institución, Dolores Vilavedra, explicou na rolda de prensa que o libro “recolle a grandeza desta celebración, que non busca un nome, senón unha lexión de mulleres poetas e cantareiras, anónimas e sen obra nun volume que traslada ese espírito colectivo”. O libro, coordinado e editado pola antropóloga e musicóloga Beatriz Busto Miramontes, divídese en dúas partes: dunha banda, unha escolma de textos e un estudo crítico a cargo desta investigadora xunto cunha antoloxía que se mergulla no Cancioneiro popular galego, para seleccionar textos recollidos nos anos oitenta por Dorothe Shubarth e Antón Santamarina; e da outra, unha ducia de ilustracións realizadas por Cestola na Cachola (Xoana Almar e Miguel Peralta) que contan con códigos QR desde os que se poden ver e escoitar as catorce cantareiras así como seguir os textos a través das transcricións. “O libro foi entendido como un proxecto transmedia, por iso todo o contido está recollido nun espazo web que xa está accesible” explicou Manuel Gago, coordinador da Unidade Divulgación e Contidos Dixitais do CCG.
02/05/2025
A cidade portuguesa de Braga acolle o encontro Jardíns históricos de Galicia e norte de Portugal que organiza o Consello da Cultura Galega (CCG) xunto coa Associação Portuguesa dos Jardíns Históricos (AJH). A cita combina relatorios sobre os xardíns como elementos patrimoniais e ferramentas turísticas, ademais de diferentes visitas a varios espazos catalogados. A presidenta do CCG, Rosario Álvarez; a presidenta da AJH, Teresa Andresen; máis o vicepresidente da Mesa da Confraria do Bom Jesus do Monte, Varico Pereira, inauguraron esta mañá o encontro que conclúe este sábado 3 de maio coas visitas ao Santuário do Bom Jesus do Monte e á Quinta do Souto.
02/05/2025
O Álbum de Galicia, colección de biografías do Consello da Cultura Galega (CCG), incorpora hoxe a entrada de Celso García de la Riega (Pontevedra, 1844-1914). Foi un historiador e escritor considerado como o primeiro impulsor da teoría galega de Cristóbal Colón. Ao longo da súa vida profesional tivo múltiples intereses e salientou en diversas facetas, como a política, a investigación no eido literario e histórico, o xornalismo e as artes plásticas. Foi un dos fundadores da Sociedad Galicia Literaria e membro da Sociedade Arqueolóxica de Pontevedra, ademais de ser un dos primeiros socios da Real Academia Galega trala súa fundación. Guillermo García de la Riega Bellver é o autor da entrada que está dispoñible para consulta no web do CCG.
30/04/2025
A 15ª edición do Concerto das Letras Galegas do Consello da Cultura Galega (CCG) celebrarase este ano en Carballo en recoñecemento á riqueza que o canto tradicional ten tanto neste concello coma na comarca bergantiñá. A presidenta do CCG, Rosario Álvarez, xunto co alcalde da localidade, Evencio Ferrero, presentaron en rolda de prensa o programa desta cita, que fai un percorrido pola xeografía galega a través das melodías tradicionais cunha posta en escena contemporánea. Na rolda tamén participaron o director do Arquivo Sonoro de Galicia, Alejo Amoedo; a xefa de Comunicación Corporativa da CRTVG, Marta Fernández, e a concelleira de Cultura de Carballo, Maruxa Suárez. Entre as novidades desta edición destaca que o concerto estará a cargo de Do Bertau, unha formación coordinada por Richi Casás, creada expresamente para esta ocasión e integrada por 11 artistas de distintos eidos musicais. O concerto, de entrada libre e gratuíta, terá lugar no Pazo da Cultura de Carballo o 16 de maio (20:30 horas) e poderá seguirse en directo desde o web do CCG e o Día das Letras Galegas na G2.
28/04/2025
Isaac Díaz Pardo é unha figura central para a cultura galega. Neste ano, recoñecido co Día das Artes Galegas, o Consello da Cultura Galega (CCG) achégase á súa figura este luns 28 de abril (a partir das 16:45 horas) na xornada titulada “Isaac Díaz Pardo. Azul Compostela” na que catro persoas moi vencelladas ao intelectual abordan catro facetas complementarias. A sesión, coordinada por Silvia García e Eduardo Valiña, é presencial pero pode seguirse en directo desde o web da institución e a canle de Youtube.
24/04/2025
O Arquivo da Emigración Galega pon na rede fondos de “Xuventude de Galicia. Centro Galego de Lisboa”
Libros de presenzas, actas, estatutos, libros coa contabilidade e folletos de numerosas actividades conforman a documentación da sociedade “Xuventude de Galicia. Centro Gallego de Lisboa” que o Arquivo da Emigración Galega, centro do Consello da Cultura Galega (CCG), vén de subir á rede no marco do proxecto Memoria documental das sociedades da emigración galega. Unha iniciativa que permite visibilizar material procedente das entidades microterritoriais creadas na diáspora galega para axudar a coñecer mellor o fenómeno migratorio.
24/04/2025
Estratexias de benvida con programas de acollida transcultural, promover contidos específicos desde a CRTVG que faciliten a inmersión lingüística de maneira amena e lúdica, realizar estudos sociolingüísticos desde a perspectiva da emigración ou a creación dunha rede de puntos de encontro en galego no rural son algunhas das medidas concretas que se achegaron na terceira sesión de Un país coa súa lingua. Foro Participativo. A cita titulada “Sanidade, ciencia e servizos sociais” foi inaugurada pola coordinadora xeral do foro, Dolores Vilavedra, que destacou a súa importancia “dado que son tres ámbitos que están moi presentes na nosa vida”. Iolanda Casal, coordinadora desta mesa, apuntou na apertura “que a perspectiva sobre migración se debe visibilizar como unha riqueza e unha oportunidade e non como un obstáculo”. O proceso continúa o martes 27 de maio coa mesa “Comunicación, cultura e acción exterior” moderada por Marta Veiga.
23/04/2025
O Álbum de Galicia, colección de biografías do Consello da Cultura Galega (CCG), incorpora hoxe a entrada de Pedro González Pérez (Santa Marta de Ortigueira, 1188- Cartaxena, 1267). Foi un bispo franciscano que salientou pola súa obra intelectual e científica. Durante o seu prelado escribiu varias obras das que se conservan un tratado astronómico, un libro sobre o estudo dos animais e unha obra arredor da economía e goberno domésticos. Ao longo da súa vida mantivo unha fonda relación co rei Afonso X, de quen se di que o menciona nas súas Cantigas. Lúa Blanca Garea é a autora da entrada que está dispoñible para consultar no web do CCG.
22/04/2025
O Consello da Cultura Galega (CCG) celebra este mércores 24 de abril (16:30 horas) a terceira mesa do proxecto Un país coa súa lingua. Foro Participativo, co que pretende ofrecer medidas propositivas para recuperar o vigor do galego. A xornada titúlase “Sanidade, ciencia e servizos sociais”, está coordinada por Iolanda Casal e reflexionará sobre a situación do idioma en a atención a colectivos vulnerables, servizos sociais, así como a inclusión lingüística en contextos de apoio comunitario e contextos académicos e científicos. A presidenta do CCG, Rosario Álvarez, máis a coordinadora xeral do foro, Dolores Vilavedra, xunto con Iolanda Casal, inauguran esta mesa que ten abertas as vías de participación e que tamén se pode seguir en liña. As sesións continúan o martes 27 de maio coa mesa “Comunicación, cultura e acción exterior”, moderada por Marta Veiga.
22/04/2025
O 22 de abril é o Día Mundial da Terra, unha efeméride que celebra a Organización das Nacións Unidas desde 1970 para concienciar da responsabilidade de coidar e protexer o planeta tras observarse indicios de degradación por mor da acción do home. Sobre a importancia de preservar este recurso non renovable afonda a banda deseñada Vivir no solo, que o Consello da Cultura Galega (CCG) elaborou no ano 2000 e que “25 anos despois segue estando plenamente vixente”, tal como apuntou a presidenta, Rosario Álvarez, no acto de presentación das últimas traducións do cómic coas que se pecha unha serie. Canda a ela estaba a delegada institucional do Consello Superior de Investigacións Científicas (CSIC) en Galicia, Carmen González, destacou a importancia de “contribuír á divulgación da ciencia entre a poboación, con especial fincapé no ámbito escolar”. Asistiron tamén os científicos que participaron no proxecto, Francisco Díaz-Fierros e Marilar Aleixandre; o deseñador, Fran Bueno; a responsable das traducións, Montserrat Díaz Raviña, máis a coordinadora da Sección de Ciencia, Tecnoloxía, Natureza e Sociedade do CCG, Elena Vázquez Cendón. Coas traducións ao francés e portugués ponse o ramo a 25 anos de traballo nos que o cómic se traduciu a 11 linguas, contou con 16 edicións e se imprimiron máis de 70 000 exemplares.
21/04/2025
Existen políticas ou proxectos que garantan os dereitos culturais e se adapten ás dinámicas e realidades territoriais? Estes proxectos parten da cidadanía ou das administracións? Son iniciativas exportadas ou as iniciativas culturais nacen do propio territorio e da comunidade rural? Estas son algunhas cuestións que pretende responder a xornada “Acceso á cultura e territorio” que se desenvolve este martes 22 de abril en A Casa Vella (Amiadoso, Allariz). É a segunda cita do ciclo “Acceso á cultura en Galicia 2025”, que puxo en marcha a Comisión Técnica Temporal de Xestión e Políticas Culturais, do Consello da Cultura Galega (CCG). Roberto Pascual coordina esta sesión que obterá datos a partir de experiencias realizadas nas comarcas do interior de Galicia. A xornada ten as prazas cubertas, non se emite en directo pero será gravada e subirase ao sitio web á maior brevidade posible.
16/04/2025
A presidenta do Consello da Cultura Galega (CCG), Rosario Álvarez, e o director xeral da Corporación Radio Televisión de Galicia (CRTVG), Alfonso Sánchez Izquierdo, asinaron esta mañá un convenio de colaboración para a realización de actividades conxuntas que contribúan a fomentar e a difundir a lingua e cultura galega. O convenio, que ten unha vixencia de dous anos que poden ser prorrogables, posibilitará a emisión, entre outras actividades do CCG, do Concerto das Letras Galegas.
16/04/2025
O Repertorio da prensa da emigración galega, proxecto que mantén o Arquivo da Emigración Galega (AEG) do Consello da Cultura Galega (CCG), incorpora este mes de abril varios números de tres publicacións editadas polo Centro Galego de Lisboa en distintas etapas: Juventud de Galicia, O Galego e Galicia ó lonxe.
16/04/2025
O Álbum de Galicia, colección de biografías do Consello da Cultura Galega (CCG), incorpora hoxe a entrada de Antonio López Ferreiro (Santiago, 1837- Vedra, 1910). Foi un cóengo compostelán que destacou en moitos ámbitos. Impulsou as escavacións que remataron en 1879 co achado dos restos do Apóstolo e dos seus discípulos Atanasio e Teodoro baixo o altar maior. Na casa na que naceu hai unha inscrición que o define como “bô galego, bô sacerdote, bô historiador, bô literato, dino por todo de perdurante lembranza”. Xosé Ramón Fandiño é o autor da entrada que está dispoñible para consulta no web do CCG.
10/04/2025
A presidenta do Consello da Cultura Galega (CCG), Rosario Álvarez, participou este xoves no Club de Prensa de Ferrol onde ofreceu unha conferencia sobre a xénese, composición, funcionamento da institución e a súa acción actual. A presidenta da entidade ferrolá, Julia Díaz, lembrou na súa presentación que Ramón Piñeiro, primeiro presidente do CCG, foi tamén un dos primeiros convidados desta asociación creada en 1987.
09/04/2025
O Álbum de Galicia, colección de biografías do Consello da Cultura Galega (CCG), incorpora hoxe a entrada de José Fernández Vide (Ourense, 1893-1981). Foi compositor, director e instrumentista e, segundo explica Javier Jurado na entrada do Álbum, “a través das súas composicións e do seu labor educativo, Vide contribuíu de maneira substancial ao enriquecemento do patrimonio musical de Galicia e das comunidades galegas no estranxeiro”.
08/04/2025
O Consello da Cultura Galega (CCG) presentou este martes o Barómetro da cultura galega 2025, documento que mide o estado e a evolución da actividade cultural do país no último ano e que foi elaborado polo Observatorio da Cultura Galega (OCG), servizo dependente do CCG. A presidenta da institución, Rosario Álvarez, e o responsable do OCG, Håkan Casares Berg, presentaron este informe, que establece que “2024 foi un ano de crecemento moderado para a cultura galega”. O 39 % das entidades enquisadas afirma que tivo un 2024 mellor que o ano anterior, mentres o 21% asegura que lle foi peor. Neste ano os custos fóronse moderando, a tendencia no emprego foi á estabilidade e medrou o número de entidades que non solicitaron subvencións para desenvolver a súa actividade. O sector volve suspender o apoio das diferentes administracións en materia cultural, aínda que mellora levemente a puntuación das administracións locais. “Neste informe, que forma parte da función asesora da institución, temos unha ferramenta de análise e de seguimento da situación cultural no que están as tres áreas implicadas: a empresarial, as administracións e o tecido asociativo” apuntou Rosario Álvarez. O documento xa se pode descargar desde o web corporativo.
08/04/2025
O Consello da Cultura Galega (CCG), a través da Sección de Patrimonio e Bens Culturais, organiza esta semana a segunda sesión do ciclo “Encontros Temáticos Transversais dende o Patrimonio Cultural”. A sostibilidade territorial e o retorno ao lugar, con especial atención ao papel do territorio rural, son os temas que centrarán o segundo dos encontros que abre este mércores 9 de abril (17:00 horas) Joan Nogué i Font, coñecido xeógrafo catalán con gran traxectoria no eido da paisaxe, a ordenación do territorio e o urbanismo. A xornada continúa o xoves 10 (17:00 horas) co debate con profesionais que traballan no ámbito galego sobre este asunto. A cita emítese en directo a través do web do CCG e a súa canle de Youtube.
08/04/2025
Ao fío do Día Internacional do Deporte para o Desenvolvemento e a Paz, que a ONU conmemora cada 6 de abril, a nova entrega de Proxector, iniciativa de divulgación científica en lingua galega promovida polo Centro de Documentación Sociolingüística de Galicia (CDSG) do Consello da Cultura Galega (CCG) co apoio da Universidade de Santiago (USC), afonda no poder transformador do deporte. Unha ducia de vídeos que nos falan da historia e das principais características dalgunhas prácticas deportivas así como dos beneficios do deporte para o benestar físico e mental.
07/04/2025
“O liño e as iniciativas emprendedoras transformadoras; estratexia para un desenvolvemento sostible na Costa da Morte” é un encontro organizado polo Concello de Zas e o Consello da Cultura Galega (CCG), coa colaboración da Universidade da Coruña, que pretende analizar todos os principais aproveitamentos socioeconómicos do liño. O simposio, presentado esta mañá en Zas nunha rolda de prensa, reunirá a especialistas do ámbito científico, económico e cultural pretende poñer de manifesto a relevancia do liño como motor de transformación económica e sostible, destacando o seu valor en sectores como o téxtil ou o agroalimentario. Terá lugar o sábado 31 de maio, no salón de actos do Centro Sociocultural de Baio (Zas).
07/04/2025
“O liño e as iniciativas emprendedoras transformadoras; estratexia para un desenvolvemento sostible na Costa da Morte” é un encontro organizado polo Concello de Zas e o Consello da Cultura Galega (CCG), coa colaboración da Universidade da Coruña, que pretende analizar todos os principais aproveitamentos socioeconómicos do liño. O simposio, presentado esta mañá en Zas nunha rolda de prensa, reunirá a especialistas do ámbito científico, económico e cultural pretende poñer de manifesto a relevancia do liño como motor de transformación económica e sostible, destacando o seu valor en sectores como o téxtil ou o agroalimentario. Terá lugar o sábado 31 de maio, no salón de actos do Centro Sociocultural de Baio (Zas).
07/04/2025
O Consello da Cultura Galega felicita a Henrique Monteagudo, novo presidente da Real Academia Galega
O Consello da Cultura Galega (CCG) felicita a o novo presidente da Real Academia Galega (RAG), institución que forma parte do Plenario do CCG. A entidade cultural celebrou o pasado venres unha sesión extraordinaria na que se procedeu a elexir a Henrique Monteaguo (Muros, 1959) como décimo cuarto presidente da RAG. Estará acompañado na comisión executiva por Ana Boullón Agrelo como secretaria; María López-Sández na tesourería; María Dolores Sánchez Palomino como arquiveira bibliotecaria e Lourenzo Fernández Prieto como vicesecretario.
04/04/2025
O Consello da Cultura Galega celebrou no serán deste xoves unha sesión plenaria de carácter ordinario na que se aprobou a programación para o vindeiro trimestre (entre abril e xuño) e se fixo balance da actividade desenvolvida desde xaneiro.
03/04/2025
Cine e educación: experiencias de Galicia e Portugal é o título da xornada coa que a Sección de Artes Escénicas, Musicais e Audiovisuais do Consello da Cultura Galega, coa colaboración do Museo do Pobo Galego e a Asociación Cultural Olloboi, amosan este venres (10:00 horas) dinámicas consolidadas de pedagoxía do cine nas aulas galegas en diferentes niveis educativos. Ademais, tamén se achega ás prácticas que se están a desenvolver en Portugal. A sesión, coordinada por Cristina Domínguez, Beli Martínez, Ana Moreiras e José Manuel Sande, pódese seguir en directo desde o web institucional e a canle de Youtube.
02/04/2025
A presidenta do Consello da Cultura Galega (CCG), Rosario Álvarez, e o especialista en poesía popular galega, Domingo Blanco, asinaron esta mañá un acordo polo que Blanco lle cede á institución unha colección de rexistros sonoros en torno a música de tradición oral. Son 38 cassetes orixinais que recollen entrevistas a distintos informantes sobre cantiga improvisada. Os materiais custodiaranse no Arquivo Sonoro de Galicia, centro dependente do CCG, que procederá a súa dixitalización e difusión posterior.
02/04/2025
O Álbum de Galicia, colección de biografías do Consello da Cultura Galega (CCG), incorpora a biografía Francisco Conesa (La Unión, Murcia, 1944 - 2016). Na súa terra natal foi moi coñecido pola súa faceta de pintor e escultor, mentres que en Galicia "desenvolveu unha prolífica carreira como escenógrafo e deseñador de vestiario vinculada ao teatro galego". Así o explica Ana Abad de Larriva na entrada que hoxe se publica no web do CCG.
27/03/2025
Varios libros de actas, os estatutos iniciais e o proxecto de reforma dos mesmos, así como varias memorias... son algúns dos documentos da sociedadad Centro Benéfico e Social Hijos de la Estrada que este xoves se soben á rede no marco do proxecto Memoria documental das sociedades da emigración galega. Esta iniciativa do Arquivo da Emigración Galega, centro do Consello da Cultura Galega (CCG), permite visibilizar fondos documentais das entidades microterritoriais creadas na diáspora galega
26/03/2025
A arquitecta Teresa Táboas (Ciudad de México, 1961) reflexionará este xoves 27 de marzo (18:00 horas) no Consello da Cultura Galega (CCG) sobre os límites do territorio. A súa intervención forma parte do ciclo Pensarmos co que a Sección de Pensamento do CCG propón reflexionar sobre cuestións de actualidade. A cita, coordinada por Celia Pereira Porto, emítese en directo desde o web e a canle de Youtube da institución.